سیدنا سمرہ بن جندب رضی اللہ عنہ بیان کرتے ہیں کہ نبی کریم صلی اللہ علیہ وسلم نے ہمیں حکم فرمایا: ”امام کو (اس کے سلام کا) جواب دیں، اور یہ کہ آپس میں محبت رکھیں اور ایک دوسرے کو سلام کیا کریں۔“ [سنن ابي داود/أبواب تفريع استفتاح الصلاة /حدیث: 1001]

سیدنا ابن عباس رضی اللہ عنہما بیان کرتے ہیں کہ ”رسول اللہ صلی اللہ علیہ وسلم کی نماز کا ختم ہونا تکبیر ( «اللّٰهُ أَكْبَرُ» کہنے کی آواز) سے جانا جاتا تھا۔“ [سنن ابي داود/أبواب تفريع استفتاح الصلاة /حدیث: 1002]

سیدنا ابن عباس رضی اللہ عنہما نے خبر دی، فرمایا کہ ”رسول اللہ صلی اللہ علیہ وسلم کے دور میں لوگ جب فرض نماز سے فارغ ہوتے تو ذکر کرتے ہوئے اپنی آوازیں بلند کیا کرتے تھے۔“ ابن عباس رضی اللہ عنہما فرماتے ہیں کہ ”مجھے ان کا نماز سے فارغ ہونا اسی سے معلوم ہوتا تھا اور میں ان کا ذکر سنتا تھا۔“ [سنن ابي داود/أبواب تفريع استفتاح الصلاة /حدیث: 1003]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”سلام کو لمبا کیے بغیر کہنا سنت ہے۔“ عیسیٰ رحمہ اللہ کہتے ہیں: ”جناب ابن مبارک رحمہ اللہ نے مجھے اس حدیث کو مرفوع بیان کرنے سے منع فرمایا تھا۔“ امام ابوداؤد رحمہ اللہ کہتے ہیں: ”میں نے ابو عمیر عیسیٰ بن یونس فاخوری رملی کو سنا، وہ بیان کرتے تھے کہ فریابی جب مکہ سے واپس لوٹے تو انہوں نے اس حدیث کو مرفوع بیان کرنا چھوڑ دیا تھا اور کہا: مجھے امام احمد بن حنبل رحمہ اللہ نے اس حدیث کو مرفوع بیان کرنے سے روکا ہے۔“ [سنن ابي داود/أبواب تفريع استفتاح الصلاة /حدیث: 1004]

سیدنا علی بن طلق رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی نماز میں پھسکی مارے، (ہوا خارج کرے) تو چاہیے کہ نماز توڑ دے اور وضو کرے اور اپنی نماز دہرائے۔“ [سنن ابي داود/أبواب تفريع استفتاح الصلاة /حدیث: 1005]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”کیا تم اس بات سے عاجز ہو کہ (فرضوں کے بعد) آگے، پیچھے یا دائیں، بائیں ہو جاؤ، یعنی نفل پڑھنے کے لیے؟“ [سنن ابي داود/أبواب تفريع استفتاح الصلاة /حدیث: 1006]

جناب ازرق بن قیس کہتے ہیں کہ ہمیں ہمارے امام نے جن کا نام ابورمثہ تھا، نماز پڑھائی، انہوں نے کہا: ”میں نے یہ نماز یا اسی طرح کی کوئی اور نماز نبی کریم صلی اللہ علیہ وسلم کے ساتھ پڑھی، اور سیدنا ابوبکر رضی اللہ عنہ اور سیدنا عمر رضی اللہ عنہ صف اول میں آپ صلی اللہ علیہ وسلم کی دائیں جانب کھڑے تھے، وہاں ایک اور آدمی بھی تھا جو تکبیرِ اولیٰ میں پہنچا تھا، نبی کریم صلی اللہ علیہ وسلم نے نماز پڑھائی پھر اپنی دائیں اور بائیں جانب سلام پھیرا، حتیٰ کہ ہم نے آپ صلی اللہ علیہ وسلم کے رخساروں کی سفیدی دیکھی، پھر وہاں سے پھرے جیسے کہ میں پھرا ہوں، تو وہ آدمی جو تکبیرِ اولیٰ میں شامل ہوا تھا، نفل پڑھنے کے لیے اٹھ کھڑا ہوا، سیدنا عمر رضی اللہ عنہ جلدی سے اس کی طرف اٹھے اور اسے کندھے سے پکڑ کر جھنجوڑا اور کہا: ”بیٹھ جاؤ، اہل کتاب کی ہلاکت کا باعث یہی تھا کہ ان کی نمازوں میں کوئی فرق اور فاصلہ نہ ہوتا تھا۔“ تو نبی کریم صلی اللہ علیہ وسلم نے ان کی طرف اپنی نظر اٹھائی اور فرمایا: ”اے ابن خطاب! اللہ نے تمہیں صحیح بات کہنے کی توفیق دی ہے۔“ امام ابوداؤد رحمہ اللہ کہتے ہیں کہ امام کا نام ابورمثہ کی بجائے ابو امیہ بھی بیان کیا گیا ہے۔ [سنن ابي داود/أبواب تفريع استفتاح الصلاة /حدیث: 1007]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہم کو پچھلے پہر کی ایک نماز پڑھائی ظہر یا عصر، آپ نے ہمیں دو رکعتیں پڑھا کر سلام پھیر دیا۔ پھر آپ صلی اللہ علیہ وسلم مسجد کے سامنے ایک لکڑی کے پاس کھڑے ہوئے اور اپنے دونوں ہاتھ اس پر رکھ لیے، آپ صلی اللہ علیہ وسلم کا ایک ہاتھ دوسرے کے اوپر تھا اور آپ کے چہرے پر ناراضی کے آثار نمایاں تھے۔ پھر جلد باز لوگ (مسجد سے) نکل آئے اور وہ کہہ رہے تھے: ”نماز کم کر دی گئی! نماز کم کر دی گئی!“ لوگوں میں سیدنا ابوبکر رضی اللہ عنہ اور سیدنا عمر رضی اللہ عنہ بھی تھے، مگر ہیبت کے باعث وہ آپ صلی اللہ علیہ وسلم سے بات نہ کر رہے تھے، تو ایک آدمی کھڑا ہوا، رسول اللہ صلی اللہ علیہ وسلم اسے ذوالیدین (ہاتھوں والا) کہا کرتے تھے۔ وہ کہنے لگا: ”اے اللہ کے رسول! کیا آپ بھول گئے ہیں یا نماز کم کر دی گئی ہے؟“ آپ صلی اللہ علیہ وسلم نے فرمایا: ”میں بھولا ہوں نہ نماز کم کی گئی ہے۔“ کہنے لگا: ”بلکہ آپ بھول گئے ہیں، اے اللہ کے رسول!“ تب رسول اللہ صلی اللہ علیہ وسلم لوگوں کی طرف متوجہ ہوئے اور پوچھا: ”کیا ذوالیدین ٹھیک کہہ رہا ہے؟“ انہوں نے اشارہ کیا کہ ”ہاں“۔ تب رسول اللہ صلی اللہ علیہ وسلم اپنی جگہ پر تشریف لائے اور بقیہ دو رکعتیں پڑھائیں، پھر آپ صلی اللہ علیہ وسلم نے سلام پھیرا، پھر آپ صلی اللہ علیہ وسلم نے تکبیر کہی اور سجدہ کیا اپنے سجدے کی مانند یا اس سے کچھ لمبا، پھر سر اٹھایا اور تکبیر کہی اور (دوسرا) سجدہ کیا اپنے (پہلے) سجدے کی مانند یا اس سے کچھ لمبا، پھر آپ صلی اللہ علیہ وسلم نے سر اٹھایا اور تکبیر کہی۔ محمد بن سیرین رحمہ اللہ سے کہا گیا: ”کیا آپ نے سجدہ سہو کے بعد سلام پھیرا تھا؟“ انہوں نے جواب دیا: ”مجھے یہ بات سیدنا ابوہریرہ رضی اللہ عنہ سے یاد نہیں ہے، مگر مجھے بتایا گیا ہے کہ عمران بن حصین رضی اللہ عنہ نے بیان کیا ہے کہ پھر آپ نے سلام پھیرا۔“ [سنن ابي داود/أبواب تفريع استفتاح الصلاة /حدیث: 1008]

محمد (محمد بن سیرین) سے روایت ہے اور حماد کی روایت زیادہ کامل ہے، انہوں نے (سیدنا ابوہریرہ رضی اللہ عنہ سے) بیان کیا کہ ”پھر رسول اللہ صلی اللہ علیہ وسلم نے نماز پڑھی۔“ یہ نہیں کہا کہ ”ہمیں نماز پڑھائی“ اور نہ یہ کہا کہ ”لوگوں نے اشارہ کیا“ بلکہ کہا کہ لوگوں نے کہا: ”ہاں“ (یعنی آپ بھول گئے ہیں)۔ پھر بیان کیا کہ ”آپ نے سر اٹھایا“ مگر تکبیر کا ذکر نہیں کیا۔ ”پھر تکبیر کہی اور سجدہ کیا اپنے پہلے سجدے کی مانند یا اس سے کچھ لمبا، پھر سر اٹھایا“ (یعنی یہاں بھی تکبیر کا ذکر نہیں) اور یہاں تک اس کی روایت پوری ہو گئی ہے اور اس کے بعد آخر تک کے الفاظ بھی بیان نہیں کیے۔ اور «فَأَوْمَئُوا» ”لوگوں نے اشارہ کیا“ کا لفظ سوائے حماد بن زید کے کسی اور نے ذکر نہیں کیا۔ امام ابوداؤد رحمہ اللہ فرماتے ہیں کہ ”جس نے بھی یہ روایت ذکر کی ہے اس نے آپ صلی اللہ علیہ وسلم کی تکبیر اور آپ کے لوٹ آنے کا ذکر نہیں کیا ہے۔“ [سنن ابي داود/أبواب تفريع استفتاح الصلاة /حدیث: 1009]

سیدنا ابوہریرہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے ہمیں نماز پڑھائی“، آخر تک روایت حماد کی مانند کہ مجھے بتایا گیا ہے کہ عمران بن حصین رضی اللہ عنہ نے کہا کہ ”پھر آپ نے سلام پھیرا“، (سلمہ نے) کہا: ”میں نے پوچھا: اور تشہد؟“ انہوں نے کہا: ”تشہد کے بارے میں میں نے کچھ نہیں سنا، مگر مجھے تشہد پڑھنا زیادہ پسند ہے۔“ (سلمہ نے یہ) ذکر نہیں کیا کہ ”آپ صلی اللہ علیہ وسلم اس شخص کو ذوالیدین کہا کرتے تھے“، اور نہ لوگوں کے اشارے اور رسول اللہ صلی اللہ علیہ وسلم کی ناراضی کا ذکر کیا۔ اور حماد کی حدیث زیادہ کامل ہے جو ایوب سے مروی ہے۔ [سنن ابي داود/أبواب تفريع استفتاح الصلاة /حدیث: 1010]