سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ہر وہ کام جس کا آغاز اللہ تعالیٰ کی حمد کے ساتھ نہ کیا جائے، وہ نامکمل ہوتا ہے۔“ [صحیح ابن حبان/المقدمة/حدیث: 1]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ہر وہ کام جس کا آغاز اللہ تعالیٰ کی حمد کے ساتھ نہ کیا جائے، وہ نامکمل ہوتا ہے۔“ [صحیح ابن حبان/المقدمة/حدیث: 2]

سیدنا ابوموسیٰ اشعری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک میری مثال اور جس چیز کے ہمراہ اللہ تعالیٰ نے مجھے مبعوث کیا ہے، اس کی مثال ایسے شخص کی مانند ہے، جو اپنی قوم کے پاس آتا ہے، اور یہ کہتا ہے: اے میری قوم! میں نے ایک لشکر دیکھا ہے، اور میں ڈرانے والا ہوں (یعنی تم لوگوں کو خبردار کر رہا ہوں)، تو اس کی قوم کا ایک گروہ اس کی اطاعت کر لیتا ہے، اور وہ لوگ اس دوران چپکے سے چلے جاتے ہیں اور نجات پا لیتے ہیں، جبکہ ایک گروہ اس کی تکذیب کرتا ہے۔ وہ لوگ اپنی جگہ رہتے ہیں اور صبح کے وقت دشمن ان پر حملہ کر کے انہیں ہلاک کر دیتا ہے، اور انہیں تباہ و برباد کر دیتا ہے، تو یہ اس شخص کی مثال ہے، جو میری اطاعت کرتا ہے، اور جو میں لے کر آیا ہوں اس کی پیروی کرتا ہے، اور اس شخص کی مثال ہے، جو میری نافرمانی کرتا ہے، اور میں جس حق کو لے کر آیا ہوں، وہ اسے جھٹلاتا ہے۔“ [صحیح ابن حبان/المقدمة/حدیث: 3]

نبی اکرم صلی اللہ علیہ وسلم نے یہ بات بھی ارشاد فرمائی ہے: ”اللہ تعالیٰ نے مجھے جو ہدایت اور علم عطا کیا ہے، اس کی مثال بارش کی طرح ہے، جو کسی سرزمین پر ہوتی ہے، تو اس زمین کا کچھ حصہ پاکیزہ ہوتا ہے، وہ اسے قبول کر لیتا ہے اور بہت زیادہ گھاس پھوس اور چارہ اگا دیتا ہے، یا وہ پانی کو روک لیتا ہے اور اللہ تعالیٰ اس کے ذریعے لوگوں کو نفع دیتا ہے، وہ لوگ اس میں سے خود بھی پیتے ہیں، (جانوروں وغیرہ) کو بھی پلاتے ہیں اور کھیتی باڑی بھی کرتے ہیں۔ یہ بارش زمین کے ایک اور حصے پر بھی ہوتی ہے، جو چٹیل میدان ہوتا ہے، وہ پانی کو روک نہیں سکتا اور گھاس اگا نہیں سکتا، تو یہ اس شخص کی مثال ہے، جو اللہ کے دین کا فہم حاصل کر لیتا ہے اور اللہ تعالیٰ نے مجھے جس چیز کے ساتھ مبعوث کیا ہے، اللہ تعالیٰ اس شخص کو اس چیز کے ذریعے نفع دے دیتا ہے، وہ شخص علم حاصل کرتا ہے اور اس پر عمل بھی کرتا ہے، اور یہ اس شخص کی مثال ہے، جو اس کے لیے سر نہیں اٹھاتا (یعنی اس کی طرف توجہ نہیں کرتا) اور اللہ تعالیٰ کی اس ہدایت کو قبول نہیں کرتا، جس کے ہمراہ مجھے بھیجا گیا ہے۔“ [صحیح ابن حبان/المقدمة/حدیث: 4]

عبدالرحمن بن عمرو سلمی اور حجر بن حجر کلاعی بیان کرتے ہیں: ہم لوگ سیدنا عرباض بن ساریہ رضی اللہ عنہ کی خدمت میں حاضر ہوئے، یہ وہ صاحب ہیں، جن کے بارے میں یہ آیت نازل ہوئی تھی: ﴿وَلَا عَلَى الَّذِينَ إِذَا مَا أَتَوْكَ لِتَحْمِلَهُمْ قُلْتَ لَا أَجِدُ مَا أَحْمِلُكُمْ عَلَيْهِ﴾ [سورة التوبة: 92] ”اور نہ ہی ان لوگوں پر کہ جب وہ تمہارے پاس آئے تاکہ تم ان کو سواری کے لیے جانور دو، تو تم نے کہا: مجھے وہ چیز نہیں ملتی جو میں تمہیں سواری کے لیے دوں“۔ ہم نے انہیں سلام کیا اور ہم نے یہ کہا: ہم آپ کی زیارت کرنے کے لیے اور آپ سے فیض یاب ہونے کے لیے آئے ہیں، تو سیدنا عرباض رضی اللہ عنہ نے فرمایا: ایک دن نبی اکرم صلی اللہ علیہ وسلم نے ہمیں صبح کی نماز پڑھائی پھر آپ صلی اللہ علیہ وسلم ہماری طرف متوجہ ہوئے اور آپ صلی اللہ علیہ وسلم نے ہمیں بلیغ وعظ کیا جس کے نتیجے میں آنکھوں سے آنسو جاری ہو گئے اور دل لرز گئے۔ ایک صاحب نے عرض کی: یا رسول اللہ! یہ الوداعی وعظ محسوس ہوتا ہے، تو آپ ہمیں کسی چیز کی تلقین کرتے ہیں؟ نبی اکرم صلی اللہ علیہ وسلم نے فرمایا: ”میں تمہیں اللہ تعالیٰ سے ڈرنے، (حاکمِ وقت کی) اطاعت و فرمانبرداری کرنے کی تلقین کرتا ہوں، اگرچہ وہ (حاکم) کوئی ایسا حبشی غلام ہو، جس کے اطراف (یعنی کان یا ناک) کٹے ہوئے ہوں۔ تم میں سے جو شخص (زیادہ عرصے تک) زندہ رہے گا، وہ عنقریب بہت زیادہ اختلاف دیکھ لے گا۔ (تو ایسی صورتحال میں) تم لوگوں پر میری سنت اور ہدایت یافتہ اور ہدایت کا مرکز خلفاء کی سنت کی پیروی کرنا لازم ہے، تم لوگ اسے مضبوطی سے تھام لینا اور اچھی طرح پکڑ لینا اور تم نئے پیدا ہونے والے امور سے بچنا، کیونکہ ہر نئی پیدا ہونے والی چیز بدعت ہے، اور ہر بدعت گمراہی ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے یہ الفاظ ”تو تم پر میری سنت کو اختیار کرنا لازم ہے“ یہ اس صورتحال کے بارے میں ہیں جب آپ صلی اللہ علیہ وسلم نے اس اختلاف کا ذکر کیا، جو آپ صلی اللہ علیہ وسلم کی امت میں پیدا ہو گا، تو یہ اس بات کا واضح بیان ہے، جو شخص سنت پر مواظبت (یعنی باقاعدگی سے اس پر عمل) اختیار کرے گا، اس (سنت) کے مطابق رائے دے گا، اس (سنت) کی بجائے دوسری آراء کو آگے نہیں کرے گا، تو ایسا شخص قیامت کے دن نجات پانے والے گروہ میں سے ہو گا۔ اللہ تعالیٰ اپنے فضل و کرم کے تحت ہمیں بھی ان میں شامل رکھے۔ [صحیح ابن حبان/المقدمة/حدیث: 5]

سیدنا عبداللہ بن مسعود رضی اللہ عنہ بیان کرتے ہیں: (ایک مرتبہ) نبی اکرم صلی اللہ علیہ وسلم نے ہمارے سامنے ایک لکیر کھینچی، آپ صلی اللہ علیہ وسلم نے ارشاد فرمایا: ”یہ اللہ تعالیٰ کا راستہ ہے“، پھر آپ صلی اللہ علیہ وسلم نے اس لکیر کے دائیں طرف اور بائیں طرف کچھ اور لکیریں کھینچیں، پھر آپ صلی اللہ علیہ وسلم نے یہ بات ارشاد فرمائی: ”یہ مختلف راستے ہیں، جن میں سے ہر ایک راستے پر ایک شیطان بیٹھا ہوا ہے، جو اس راستے کی طرف دعوت دیتا ہے“، پھر نبی اکرم صلی اللہ علیہ وسلم نے یہ آیت تلاوت کی: ﴿وَأَنَّ هَٰذَا صِرَاطِي مُسْتَقِيمًا فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [سورة الأنعام: 153] ”بے شک یہ میرا راستہ ہے، جو مستقیم ہے“، یہ آیت آپ صلی اللہ علیہ وسلم نے آخر تک تلاوت کی۔ [صحیح ابن حبان/المقدمة/حدیث: 6]

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمارے سامنے ایک لکیر کھینچی، جس کے دائیں طرف اور بائیں طرف کچھ اور لکیریں بھی کھینچی تھیں، آپ صلی اللہ علیہ وسلم نے ارشاد فرمایا: ”یہ مختلف راستے ہیں، ان میں سے ہر ایک راستے پر شیطان بیٹھا ہوا ہے، جو اس راستے کی طرف دعوت دیتا ہے“ پھر آپ صلی اللہ علیہ وسلم نے یہ آیت تلاوت کی: ﴿وَأَنَّ هَٰذَا صِرَاطِي مُسْتَقِيمًا فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [سورة الأنعام: 153] ”بے شک یہ میرا راستہ ہے، جو مستقیم ہے، تو تم اس کی پیروی کرو اور تم مختلف راستوں کی پیروی نہ کرو، ورنہ وہ تم لوگوں کو اس کے راستے سے بھٹکا دے گا۔“ یہ مکمل آیت ہے۔ [صحیح ابن حبان/المقدمة/حدیث: 7]

سیدنا انس بن مالک رضی اللہ عنہ بیان کرتے ہیں کہ ایک دیہاتی نے نبی اکرم صلی اللہ علیہ وسلم سے سوال کیا، حالانکہ صحابہ کرام کے لیے یہ زیادہ مناسب تھا کہ وہ نبی اکرم صلی اللہ علیہ وسلم سے یہ سوال کرتے، اس دیہاتی نے عرض کی: یا رسول اللہ! قیامت کب آئے گی؟ نبی اکرم صلی اللہ علیہ وسلم نے دریافت کیا: ”تم نے اس کے لیے کیا تیاری کی ہے؟“ اس نے عرض کی: میں نے اس کے لیے تیاری تو نہیں کی ہے، البتہ میں اللہ اور اس کے رسول سے محبت رکھتا ہوں، نبی اکرم صلی اللہ علیہ وسلم نے ارشاد فرمایا: ”بے شک تم اس کے ساتھ ہو گے جس سے تم محبت رکھتے ہو۔“ سیدنا انس رضی اللہ عنہ یہ بیان کرتے ہیں: نبی اکرم صلی اللہ علیہ وسلم کے اس فرمان پر لوگ جتنے خوش ہوئے، میں نے انہیں اسلام قبول کرنے کے بعد اور کسی بات پر اتنا خوش ہوتے ہوئے نہیں دیکھا۔ [صحیح ابن حبان/المقدمة/حدیث: 8]

سیدہ عائشہ صدیقہ رضی اللہ عنہا بیان کرتی ہیں کہ سیدنا عثمان بن مظعون رضی اللہ عنہ کی اہلیہ تشریف لائیں، ان کا نام خولہ بنت حکیم تھا، وہ سیدہ عائشہ رضی اللہ عنہا کی خدمت میں آئیں تو ان کی حالت بری تھی، سیدہ عائشہ رضی اللہ عنہا نے ان سے دریافت کیا: تمہیں کیا ہوا ہے؟ انہوں نے بتایا: میرے شوہر رات بھر نفل پڑھتے رہتے ہیں اور دن کے وقت نفلی روزہ رکھ لیتے ہیں۔ (اسی دوران) نبی اکرم صلی اللہ علیہ وسلم سیدہ عائشہ رضی اللہ عنہا کے ہاں تشریف لے آئے، سیدہ عائشہ رضی اللہ عنہا نے اس بات کا تذکرہ آپ کے سامنے کیا، پھر نبی اکرم صلی اللہ علیہ وسلم کی ملاقات سیدنا عثمان بن مظعون رضی اللہ عنہ سے ہوئی تو نبی اکرم صلی اللہ علیہ وسلم نے ارشاد فرمایا: ”اے عثمان! ہم پر رہبانیت لازم قرار نہیں دی گئی ہے، کیا تمہارے لیے میرے طریقے میں بہترین نمونہ نہیں ہے؟ اللہ کی قسم! میں تم سب لوگوں سے زیادہ اللہ سے ڈرتا ہوں اور اس کی حدود کا تم سب سے زیادہ خیال رکھتا ہوں۔“ [صحیح ابن حبان/المقدمة/حدیث: 9]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم جب خطبہ دیتے تھے تو آپ صلی اللہ علیہ وسلم کی آنکھیں سرخ ہو جاتی تھیں، آپ صلی اللہ علیہ وسلم کی آواز بلند ہو جاتی تھی اور آپ صلی اللہ علیہ وسلم کا جوش زیادہ ہو جاتا تھا، یہاں تک کہ یوں لگتا تھا جیسے آپ کسی لشکر (کے حملے) سے ڈرا رہے ہیں۔ آپ صلی اللہ علیہ وسلم یہ فرماتے تھے: ”وہ صبح یا شام کے وقت (تم پر حملہ کر دے گا)۔“ آپ صلی اللہ علیہ وسلم یہ فرماتے تھے: ”مجھے اور قیامت کو ان دو کی طرح مبعوث کیا گیا ہے۔“ آپ اپنی شہادت کی انگلی اور درمیان والی انگلی کے درمیان فرق کرتے تھے اور آپ صلی اللہ علیہ وسلم یہ ارشاد فرماتے تھے: «أَمَّا بَعْدُ» ”امابعد! سب سے بہترین کلام اللہ کی کتاب ہے اور سب سے بہترین ہدایت سیدنا محمد صلی اللہ علیہ وسلم (کی لائی ہوئی) ہدایت ہے، بے شک سب سے برا کام نیا پیدا شدہ کام ہے اور ہر بدعت گمراہی ہے۔“ نبی اکرم صلی اللہ علیہ وسلم یہ ارشاد فرماتے تھے: ”میں ہر مومن کے نزدیک اس کی جان سے زیادہ قریب ہوں، جو شخص مال چھوڑ کر جائے گا وہ اس کے اہل خانہ کو ملے گا اور جو شخص قرض یا بال بچے چھوڑ کر جائے گا تو وہ میری طرف آئیں گے اور ان کی ادائیگی میرے ذمہ ہو گی۔“ [صحیح ابن حبان/المقدمة/حدیث: 10]