سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ فرماتا ہے: ابنِ آدم جو بھی عمل کرتا ہے میں اس کا بدلہ دس گنا سے لے کر سات سو گنا تک دیتا ہوں، صرف روزے کا معاملہ مختلف ہے، کیونکہ وہ میرے لیے ہے اور میں خود اس کی جزا دوں گا۔ روزہ ڈھال ہے، جو شخص روزہ دار ہو وہ بدزبانی اور جہالت کا مظاہرہ نہ کرے، اگر کوئی شخص اسے برا کہے یا اسے تکلیف پہنچائے، تو وہ یہ کہہ دے: «إِنِّي صَائِمٌ، إِنِّي صَائِمٌ» ”میں نے روزہ رکھا ہوا ہے، میں نے روزہ رکھا ہوا ہے۔““ [صحیح ابن حبان/كتاب الصوم/حدیث: 3416]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو بھی شخص اللہ کی راہ میں ایک دن کا روزہ رکھتا ہے، تو اللہ تعالیٰ اس ایک دن کے عوض میں اسے جہنم سے ستر برس کے فاصلے جتنا دور کر دیتا ہے۔“ [صحیح ابن حبان/كتاب الصوم/حدیث: 3417]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص کسی بھی چیز کا جوڑا اللہ کی راہ میں دیتا ہے تو جنت کے دروازوں سے یہ اعلان کیا جاتا ہے: اے اللہ کے بندے! یہ بھلائی ہے۔ جنت کے کئی دروازے ہیں؛ جو لوگ نمازی ہیں انہیں نماز والے دروازے سے بلایا جائے گا، جو جہاد کرنے والے ہیں انہیں جہاد والے دروازے سے بلایا جائے گا، جو صدقہ کرنے والے ہیں انہیں صدقہ والے دروازے سے بلایا جائے گا اور جو روزہ دار ہوں گے انہیں بابِ «الرَّيَّانِ» ”ریان“ سے بلایا جائے گا۔“ راوی بیان کرتے ہیں: سیدنا ابوبکر رضی اللہ عنہ نے عرض کی: یا رسول اللہ صلی اللہ علیہ وسلم ! ایسے شخص کو کوئی نقصان نہیں ہوگا کہ جس شخص کو ان تمام دروازوں سے بلایا جائے۔ یا رسول اللہ صلی اللہ علیہ وسلم ! کیا کسی شخص کو ان تمام دروازوں سے بھی بلایا جائے گا؟ نبی اکرم صلی اللہ علیہ وسلم نے فرمایا: ”جی ہاں! اور مجھے امید ہے تم ان میں سے ایک ہو گے۔“ [صحیح ابن حبان/كتاب الصوم/حدیث: 3418]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اللہ کی راہ میں کسی چیز کا جوڑا خرچ کرتا ہے، تو اسے جنت کے دروازوں سے بلایا جاتا ہے؛ جنت کے کئی دروازے ہیں، جو لوگ نمازی ہیں انہیں نماز والے دروازے سے بلایا جائے گا، جو صدقہ کرنے والے ہیں انہیں صدقے والے دروازے سے بلایا جائے گا، جو جہاد کرنے والے ہیں انہیں جہاد کے دروازے سے بلایا جائے گا اور جو روزہ دار ہیں انہیں «بَابُ الرَّيَّانِ» ”بابِ ریان“ سے بلایا جائے گا۔“ سیدنا ابوبکر رضی اللہ عنہ نے عرض کی: یا رسول اللہ صلی اللہ علیہ وسلم ! ایسے بھی تو ہو سکتا ہے کہ کسی شخص کو ان تمام دروازوں سے بلایا جائے، یا رسول اللہ صلی اللہ علیہ وسلم ! کیا کسی شخص کو ان تمام دروازوں سے بلایا جائے گا؟ نبی اکرم صلی اللہ علیہ وسلم نے فرمایا: ”جی ہاں! اور مجھے یہ امید ہے کہ تم ان میں سے ایک ہو گے۔“ (امام ابن حبان رحمہ اللہ فرماتے ہیں): لفظ «عَسَىٰ» جب اللہ تعالیٰ کی طرف منسوب ہو تو اس سے مراد کسی چیز کا لازم ہونا ہو گا، اور لفظ «أَرْجُو» ”مجھے اُمید ہے“ جب نبی اکرم صلی اللہ علیہ وسلم کی طرف منسوب ہو تو اس کا مطلب یہ ہے کہ ایسا ضرور ہو گا۔ [صحیح ابن حبان/كتاب الصوم/حدیث: 3419]

سیدنا سہل بن سعد رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جنت میں ایک دروازہ ہے، جس کا نام «الرَّيَّانُ» ”الریان“ ہے، قیامت کے دن روزہ دار لوگ اس سے داخل ہوں گے، ان کے علاوہ اور کوئی شخص اس میں سے داخل نہیں ہوگا، یہ کہا جائے گا: روزہ دار لوگ کہاں ہیں؟ وہ لوگ اٹھیں گے اور اس دروازے سے جنت میں داخل ہو جائیں گے اور جب ان کا آخری فرد اندر داخل ہو جائے گا، تو اس دروازے کو بند کر دیا جائے گا، کوئی اور اس دروازے سے داخل نہیں ہو سکے گا۔“ [صحیح ابن حبان/كتاب الصوم/حدیث: 3420]

سیدنا سہل بن سعد رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جنت میں ایک دروازہ ہے، جس کا نام «الرَّيَّانُ» ”ریان“ ہے، اسے روزہ داروں کے لیے تیار کیا گیا ہے، جب ان کا آخری فرد اس میں سے داخل ہو جائے گا، تو اسے بند کر دیا جائے گا۔“ [صحیح ابن حبان/كتاب الصوم/حدیث: 3421]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ابن آدم کا ہر عمل اس کے لیے ہوتا ہے، صرف روزے کا معاملہ مختلف ہے، وہ میرے لیے ہے اور میں اس کی جزاء دوں گا۔ روزہ دار شخص کے منہ کی بو اللہ تعالیٰ کے نزدیک مشک کی خوشبو سے زیادہ پاکیزہ ہے۔“ [صحیح ابن حبان/كتاب الصوم/حدیث: 3422]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ فرماتا ہے: ابن آدم کا ہر عمل اس کے لیے ہوتا ہے، صرف روزے کا معاملہ مختلف ہے، وہ میرے لیے ہے اور میں اس کی جزا دوں گا (نبی اکرم صلی اللہ علیہ وسلم فرماتے ہیں:) اس ذات کی قسم! جس کے دستِ قدرت میں محمد صلی اللہ علیہ وسلم کی جان ہے، روزہ دار شخص کے منہ کی بو قیامت کے دن اللہ تعالیٰ کے نزدیک مشک کی خوشبو سے زیادہ پاکیزہ ہو گی۔ روزہ دار شخص کو دو خوشیاں نصیب ہوں گی: ایک جب وہ افطاری کرے گا، تو افطاری کرنے کی وجہ سے اسے خوشی ہو گی اور ایک جب وہ اللہ کی بارگاہ میں حاضر ہو گا، تو اپنے روزہ رکھنے کی وجہ سے خوش ہو گا۔“ (امام ابن حبان رحمہ اللہ فرماتے ہیں:): قیامت کے دن اہل ایمان کا مخصوص علامتی نشان دنیا میں ان کے کیے گئے وضو کی چمک ہو گی جس کی وجہ سے ان کے اور دیگر تمام امتوں کے درمیان امتیاز کیا جا سکے گا اور قیامت کے دن ان کا مخصوص نشان ان کے روزے کی وجہ سے ان کے منہ سے آنے والی بو ہو گی جو مشک کی خوشبو سے زیادہ پاکیزہ ہو گی تاکہ وہ اپنے عمل کے نتیجے میں میدانِ محشر میں سب لوگوں کے درمیان پہچانے جائیں۔ ہم اللہ تعالیٰ سے اس دن کی برکت کا سوال کرتے ہیں۔ [صحیح ابن حبان/كتاب الصوم/حدیث: 3423]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ابنِ آدم جو بھی نیکی کرتا ہے اس کا بدلہ دس گنا سے لے کر سات سو گنا تک ہوتا ہے، اللہ تعالیٰ یہ فرماتا ہے: صرف روزے کا معاملہ مختلف ہے وہ میرے لیے ہے اور میں اس کی جزا دوں گا، وہ میری وجہ سے کھانا چھوڑتا ہے، میری وجہ سے اپنا پینا چھوڑتا ہے اور میری وجہ سے اپنی خواہش کو چھوڑتا ہے، تو میں اس کی جزا دوں گا۔ روزہ دار کو دو خوشیاں نصیب ہوں گی: ایک خوشی اس وقت جب وہ افطاری کرے گا اور ایک خوشی اس وقت جب وہ اپنے پروردگار کی بارگاہ میں حاضر ہو گا۔ روزہ دار شخص کے منہ کی بو، جو کھانا چھوڑنے کی وجہ سے آتی ہے، وہ اللہ تعالیٰ کے نزدیک مشک کی خوشبو سے زیادہ پاکیزہ ہے۔“ [صحیح ابن حبان/كتاب الصوم/حدیث: 3424]

سیدنا ابوامامہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ایک لشکر تیار کیا، میں آپ صلی اللہ علیہ وسلم کی خدمت میں حاضر ہوا اور عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم میرے لیے شہادت کی دعا کیجیے۔ نبی اکرم صلی اللہ علیہ وسلم نے فرمایا: «اللَّهُمَّ سَلِّمْهُمْ وَغَنِّمْهُمْ» ”اے اللہ! ان لوگوں کو سلامت رکھنا اور انہیں مال غنیمت عطا کرنا۔“ ہم لوگوں نے جنگ میں حصہ لیا، ہم سلامت بھی رہے اور ہمیں مال غنیمت بھی مل گیا، یہاں تک کہ راوی نے تین مرتبہ یہ بات ذکر کی۔ راوی بیان کرتے ہیں: پھر میں نبی اکرم صلی اللہ علیہ وسلم کی خدمت میں حاضر ہوا اور میں نے عرض کی: یا رسول اللہ صلی اللہ علیہ وسلم ! میں تین مرتبہ آپ صلی اللہ علیہ وسلم کی خدمت میں حاضر ہوا، میں نے آپ صلی اللہ علیہ وسلم سے درخواست کی کہ آپ صلی اللہ علیہ وسلم میرے لیے شہادت کی دعا کیجیے، تو آپ صلی اللہ علیہ وسلم نے ارشاد فرمایا: «اللَّهُمَّ سَلِّمْهُمْ وَغَنِّمْهُمْ» ”اے اللہ! ان لوگوں کو سلامت رکھنا اور انہیں مال غنیمت بھی عطا کرنا۔“ یا رسول اللہ صلی اللہ علیہ وسلم ! ہم سلامت بھی رہے ہیں اور ہمیں مال غنیمت بھی مل گیا ہے، اب آپ صلی اللہ علیہ وسلم مجھے کسی ایسے عمل کے بارے میں حکم دیجیے جس کی وجہ سے میں جنت میں داخل ہو جاؤں۔ نبی اکرم صلی اللہ علیہ وسلم نے ارشاد فرمایا: «عَلَيْكَ بِالصَّوْمِ فَإِنَّهُ لَا عِدْلَ لَهُ» ”تم پر روزہ رکھنا لازم ہے، کیونکہ اس کی مانند اور کوئی چیز نہیں ہے۔“ راوی بیان کرتے ہیں: تو سیدنا ابوامامہ رضی اللہ عنہ کے گھر سے دن کے وقت کبھی بھی دھواں نظر نہیں آتا تھا، ماسوائے ایک دن کے جب ان کے ہاں کوئی مہمان آیا ہوا ہوتا تھا، جب ان کے گھر دن کے وقت دھواں نظر آتا، تو لوگوں کو پتا چل جاتا تھا کہ ان کے ہاں کوئی مہمان آیا ہوا ہے۔ (امام ابن حبان رحمہ اللہ فرماتے ہیں:): مہدی بن میمون نے یہ روایت محمد بن ابویعقوب کے حوالے سے رجاء سے نقل کی ہے، جبکہ شعبہ نے یہ روایت محمد بن ابویعقوب کے حوالے سے حمید بن ہلال کے حوالے سے رجاء سے نقل کی ہے۔ [صحیح ابن حبان/كتاب الصوم/حدیث: 3425]