سیدنا ابوامامہ رضی اللہ عنہ بیان کرتے ہیں کہ میں نے عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم کسی عمل کی طرف میری رہنمائی کیجیے۔ نبی اکرم صلی اللہ علیہ وسلم نے فرمایا: ”تم پر روزہ رکھنا لازم ہے، کیونکہ اس کے برابر اور کوئی چیز نہیں ہے۔“ (امام ابن حبان رحمہ اللہ فرماتے ہیں:) ابونصر نامی یہ راوی حمید بن ہلال ہے۔ میں ایسا ہونے کا انکار نہیں کرتا کہ محمد بن ابویعقوب نے یہ روایت تفصیلی طور پر رجاء سے سنی ہو اور پھر انہوں نے اس کا کچھ حصہ حمید بن ہلال سے سنا ہو تو اس کے دونوں طرق محفوظ ہوں گے۔ [صحیح ابن حبان/كتاب الصوم/حدیث: 3426]

سیدنا ابوہریرہ رضی اللہ عنہ بیان کرتے ہیں: یہ وہ حدیثیں ہیں جو نبی اکرم صلی اللہ علیہ وسلم نے ہمارے سامنے بیان کی تھیں، پھر انہوں نے کچھ احادیث بیان کیں جن میں یہ بات بھی بیان کی کہ نبی اکرم صلی اللہ علیہ وسلم نے ارشاد فرمایا: ”روزہ ڈھال ہے۔“ [صحیح ابن حبان/كتاب الصوم/حدیث: 3427]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تین لوگوں کی دعا مسترد نہیں ہوتی: روزہ دار شخص جب تک وہ افطاری نہیں کر لیتا، عادل حکمران اور مظلوم کی دعا۔“ (امام ابن حبان رحمہ اللہ فرماتے ہیں:) ابوالمدلہ نامی راوی کا نام عبیداللہ بن عبداللہ ہے، وہ مدینہ کا رہنے والا ہے اور ثقہ ہے۔ [صحیح ابن حبان/كتاب الصوم/حدیث: 3428]

سیدنا زید بن خالد جہنی رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص روزہ دار کو افطاری کرواتا ہے اسے اس روزہ دار کی مانند اجر ملتا ہے اور اس روزہ دار کے اجر میں کوئی کمی نہیں ہوتی۔“ [صحیح ابن حبان/كتاب الصوم/حدیث: 3429]

حبیب بن زید انصاری بیان کرتے ہیں: ہم نے اپنی ایک کنیز لیلیٰ کو سیدہ ام عمارہ بنت کعب رضی اللہ عنہا کے حوالے سے یہ بات نقل کرتے ہوئے سنا کہ ایک مرتبہ نبی اکرم صلی اللہ علیہ وسلم ان کے ہاں تشریف لائے، انہوں نے نبی اکرم صلی اللہ علیہ وسلم کی کھانے کی دعوت کی تھی۔ نبی اکرم صلی اللہ علیہ وسلم نے ارشاد فرمایا: ”تم بھی آگے آؤ اور کھاؤ۔“ انہوں نے عرض کی: ”میں روزہ دار ہوں۔“ نبی اکرم صلی اللہ علیہ وسلم نے فرمایا: ”روزہ دار شخص کے پاس جب تک کھانا کھایا جاتا ہے، فرشتے اس روزہ دار کے لیے دعائے رحمت کرتے رہتے ہیں۔“ [صحیح ابن حبان/كتاب الصوم/حدیث: 3430]

عبدالرحمن بن ابوبکرہ اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”عید کے دو مہینے کم نہیں ہوتے ہیں: رمضان اور ذوالحجہ۔“ [صحیح ابن حبان/كتاب الصوم/حدیث: 3431]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص ایمان کی حالت میں ثواب کی امید رکھتے ہوئے رمضان کے روزے رکھتا ہے، اس کے گزشتہ گناہوں کی مغفرت ہو جاتی ہے۔“ (امام ابن حبان رحمہ اللہ فرماتے ہیں:): ”ایمان کی حالت میں“ (کے الفاظ سے مراد) یہ ہے: جو شخص ان کی فرضیت پر ایمان رکھتا ہو اور ”ثواب کی امید رکھتے ہوئے“ (کے الفاظ سے مراد یہ ہے) کہ وہ اپنے اس عمل میں مخلص ہو۔ [صحیح ابن حبان/كتاب الصوم/حدیث: 3432]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص رمضان کے روزے رکھے، اس کی حدود کی حفاظت کرے اور جس چیز کی حفاظت کرنا چاہے اس کی حفاظت کرے، تو اس شخص کے گزشتہ گناہوں کی مغفرت ہو جاتی ہے۔“ [صحیح ابن حبان/كتاب الصوم/حدیث: 3433]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب رمضان کا مہینہ آتا ہے تو جنت کے دروازے کھول دیے جاتے ہیں، جہنم کے دروازے بند کر دیے جاتے ہیں اور شیاطین کو پابندِ سلاسل کر دیا جاتا ہے۔“ (امام ابن حبان رحمہ اللہ فرماتے ہیں:) انس بن ابوانس نامی راوی امام مالک بن انس کے والد ہیں۔ ابوانس نامی راوی کا نام مالک بن ابوعامر ہے۔ یہ اہل مدینہ کے ثقہ راویوں میں سے ایک ہیں اور ان کا نسب یہ ہے: مالک بن ابوعامر بن عمرو بن حارث بن غیمان بن خثیل بن عمرو بن ذو اصبحہ، ان کا تعلق اہل یمن سے ہے۔ [صحیح ابن حبان/كتاب الصوم/حدیث: 3434]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب رمضان کے مہینے کی پہلی رات آتی ہے، تو شیاطین یعنی سرکش جنوں کو قید کر دیا جاتا ہے، جہنم کے دروازوں کو بند کر دیا جاتا ہے، ان میں سے کوئی دروازہ کھلا نہیں رہتا، جنت کے دروازوں کو کھول دیا جاتا ہے، ان میں سے کوئی دروازہ بند نہیں رہتا اور ایک منادی یہ اعلان کرتا ہے: اے بھلائی کے خواہش مند! آگے آؤ، اے برائی کے خواہش مند! بچنے کی کوشش کرو، اللہ تعالیٰ کی طرف سے کچھ لوگ جہنم سے آزاد کیے جاتے ہیں اور ایسا ہر رات میں ہوتا ہے۔“ [صحیح ابن حبان/كتاب الصوم/حدیث: 3435]