سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کسی سرزمین پر حد کا قائم ہونا وہاں کے رہنے والوں کے لیے چالیس دن تک مسلسل بارش ہونے سے زیادہ بہتر ہے۔“ [صحیح ابن حبان/كتاب الحدود/حدیث: 4397]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”زمین پر حد کا قائم ہو جانا چالیس دن تک بارش ہونے سے زیادہ بہتر ہے۔“ [صحیح ابن حبان/كتاب الحدود/حدیث: 4398]

سیدنا ابوہریرہ رضی اللہ عنہ بیان کرتے ہیں: اسلمی نبی اکرم صلی اللہ علیہ وسلم کی خدمت میں حاضر ہوا، اس نے اپنی ذات کے بارے میں چار مرتبہ زنا کرنے کی گواہی دی، اس نے یہ کہا: ”میں نے ایک عورت کے ساتھ حرام طور پر (صحبت کی ہے)“ نبی اکرم صلی اللہ علیہ وسلم اس سے اعراض کرتے رہے یہاں تک کہ جب وہ پانچویں مرتبہ آیا تو نبی اکرم صلی اللہ علیہ وسلم نے اس سے دریافت کیا: ”کیا تم نے اس عورت کے ساتھ صحبت کی ہے؟“ اس نے جواب دیا: ”جی ہاں۔“ نبی اکرم صلی اللہ علیہ وسلم نے دریافت کیا: ”کیا تمہاری شرم گاہ اس کی شرم گاہ میں یوں غائب ہو گئی تھی جس طرح سرمہ دانی میں سلائی گم ہو جاتی ہے یا کنویں میں رسی چلی جاتی ہے؟“ اس نے جواب دیا: ”جی ہاں۔“ نبی اکرم صلی اللہ علیہ وسلم نے دریافت کیا: ”کیا تم جانتے ہو زنا کیا ہے۔“ اس نے جواب دیا: ”جی ہاں میں نے اس عورت کے ساتھ حرام طور پر وہ عمل کیا جو کوئی شخص اپنی بیوی کے ساتھ حلال طور پر کرتا ہے۔“ نبی اکرم صلی اللہ علیہ وسلم نے دریافت کیا: ”تم یہ کہہ کر کیا چاہتے ہو؟“ اس نے عرض کی: ”میں یہ چاہتا ہوں کہ آپ صلی اللہ علیہ وسلم مجھے پاک کر دیں“ تو نبی اکرم صلی اللہ علیہ وسلم نے اس کے بارے میں حکم دیا کہ اسے سنگسار کر دیا جائے تو اسے سنگسار کر دیا گیا۔ نبی اکرم صلی اللہ علیہ وسلم نے اپنے اصحاب میں سے دو آدمیوں کو سنا، ان میں سے ایک اپنے ساتھی سے یہ کہہ رہا تھا: ”ذرا اس شخص کی طرف دیکھو کہ اللہ تعالیٰ نے اس کا پردہ رکھا تھا، لیکن اس نے اپنے آپ کو ایسی حالت میں کر دیا کہ اسے کتے کی طرح سنگسار کر دیا گیا۔“ راوی کہتے ہیں: نبی اکرم صلی اللہ علیہ وسلم ان دونوں کی بات پر خاموش رہے پھر آپ کا گزر ایک مردار گدھے کے پاس سے ہوا جس کا پاؤں اوپر کی طرف اٹھا ہوا تھا، نبی اکرم صلی اللہ علیہ وسلم نے دریافت کیا: ”فلاں اور فلاں شخص کہاں ہیں؟“ ان دونوں نے عرض کی: ”یا رسول اللہ صلی اللہ علیہ وسلم ! ہم یہاں ہیں۔“ نبی اکرم صلی اللہ علیہ وسلم نے ان دونوں سے فرمایا: ”تم دونوں اس گدھے کا مردار کھا لو۔“ ان دونوں نے عرض کی: ”یا رسول اللہ صلی اللہ علیہ وسلم ! اللہ تعالیٰ آپ صلی اللہ علیہ وسلم کی مغفرت کرے، اسے کون کھا سکتا ہے۔“ نبی اکرم صلی اللہ علیہ وسلم نے فرمایا: ”تم نے ابھی تھوڑی دیر پہلے اس شخص کی عزت پر جو حملہ کیا ہے وہ اس مردار کو کھانے سے زیادہ برا ہے، اس ذات کی قسم! جس کے دست قدرت میں میری جان ہے، وہ شخص اس وقت جنت کی نہروں میں ہے۔“ [صحیح ابن حبان/كتاب الحدود/حدیث: 4399]

سیدنا ابوہریرہ رضی اللہ عنہ بیان کرتے ہیں کہ ماعز رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور عرض کی: ”دور والے نے زنا کا ارتکاب کیا ہے۔“ نبی اکرم صلی اللہ علیہ وسلم نے ان سے فرمایا: ” «وَيْحَكَ» (تمہارا ستیاناس ہو)، کیا تم جانتے ہو کہ زنا کیا ہے؟“ پھر نبی اکرم صلی اللہ علیہ وسلم نے ان کے بارے میں حکم دیا تو انہیں وہاں سے نکال دیا گیا، پھر وہ دوسری مرتبہ نبی اکرم صلی اللہ علیہ وسلم کی خدمت میں حاضر ہوئے اور عرض کی: ”یا رسول اللہ صلی اللہ علیہ وسلم ! دور کے شخص نے زنا کا ارتکاب کیا ہے۔“ نبی اکرم صلی اللہ علیہ وسلم نے فرمایا: ” «وَيْحَكَ» (تمہارا ستیاناس ہو)، تمہیں کیا پتا زنا کیا ہے؟“ انہیں پھر وہاں سے نکال دیا گیا، پھر وہ تیسری مرتبہ نبی اکرم صلی اللہ علیہ وسلم کی خدمت میں حاضر ہوئے اور عرض کی: ”یا رسول اللہ صلی اللہ علیہ وسلم ! دور کے شخص نے زنا کا ارتکاب کیا ہے۔“ نبی اکرم صلی اللہ علیہ وسلم نے فرمایا: ” «وَيْحَكَ» (تمہارا ستیاناس ہو)، تمہیں کیا پتا کہ زنا کیا چیز ہے؟“ انہوں نے عرض کی: ”میں نے ایک عورت کے ساتھ حرام طور پر وہی کام کیا ہے جو کوئی شخص اپنی بیوی کے ساتھ کرتا ہے۔“ نبی اکرم صلی اللہ علیہ وسلم نے ان کے بارے میں حکم دیا تو انہیں وہاں سے نکال دیا گیا، وہ چوتھی مرتبہ نبی اکرم صلی اللہ علیہ وسلم کی خدمت میں حاضر ہوئے اور عرض کی: ”یا رسول اللہ صلی اللہ علیہ وسلم ! دور کے شخص نے زنا کا ارتکاب کیا ہے۔“ نبی اکرم صلی اللہ علیہ وسلم نے فرمایا: ” «وَيْحَكَ» (تمہارا ستیاناس ہو)، تمہیں کیا پتا ہے کہ زنا کیا ہوتا ہے؟ کیا تم نے اندر داخل کیا اور باہر نکالا؟“ انہوں نے جواب دیا: ”جی ہاں۔“ تو نبی اکرم صلی اللہ علیہ وسلم نے ان کے بارے میں حکم دیا کہ انہیں سنگسار کر دیا جائے، جب انہیں پتھر لگنے لگے تو انہوں نے درخت کی آڑ لی، پھر انہیں اس درخت کے پاس سنگسار کر دیا گیا یہاں تک کہ ان کا انتقال ہو گیا۔ اس کے بعد نبی اکرم صلی اللہ علیہ وسلم گزر رہے تھے اور آپ صلی اللہ علیہ وسلم کے ہمراہ آپ صلی اللہ علیہ وسلم کے کچھ اصحاب رضی اللہ عنہم بھی تھے، ان میں سے ایک صاحب نے اپنے ساتھی سے کہا: ”تمہارے باپ کی قسم! یہ شخص خسارے کا شکار ہونے والا ہے، یہ نبی اکرم صلی اللہ علیہ وسلم کی خدمت میں کئی مرتبہ حاضر ہوا، ہر مرتبہ نبی اکرم صلی اللہ علیہ وسلم اسے واپس کرتے رہے یہاں تک کہ اسے یوں قتل کر دیا گیا جس طرح کتے کو مارا جاتا ہے۔“ تو نبی اکرم صلی اللہ علیہ وسلم ان دونوں کے حوالے سے خاموش رہے یہاں تک کہ نبی اکرم صلی اللہ علیہ وسلم کا گزر ایک گدھے کے مردار جسم کے پاس سے ہوا جس کا پاؤں اوپر کی طرف اٹھا ہوا تھا، نبی اکرم صلی اللہ علیہ وسلم نے ان دونوں سے فرمایا: ”تم دونوں اسے کھاؤ۔“ ان دونوں نے عرض کی: ”یا رسول اللہ صلی اللہ علیہ وسلم ! کیا گدھے کے مردار کو کھائیں؟“ نبی اکرم صلی اللہ علیہ وسلم نے فرمایا: ”تم نے اپنے بھائی کی عزت پر جو حملہ کیا ہے وہ اس سے زیادہ (بڑا گناہ ہے)، اس ذات کی قسم جس کے دستِ قدرت میں محمد صلی اللہ علیہ وسلم کی جان ہے! وہ شخص اب جنت کی نہروں میں غوطے لگا رہا ہے۔“ [صحیح ابن حبان/كتاب الحدود/حدیث: 4400]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے جب سیدنا ماعز بن مالک رضی اللہ عنہ کو سنگسار کروایا تو آپ صلی اللہ علیہ وسلم نے ارشاد فرمایا: ”میں نے اسے دیکھا ہے وہ جنت کی نہروں میں تیر رہا ہے۔“ [صحیح ابن حبان/كتاب الحدود/حدیث: 4401]

سیدہ عائشہ رضی اللہ عنہا بیان کرتی ہیں کہ قریش ایک مخزومی خاتون کے معاملے میں بہت پریشان تھے جس نے چوری کی تھی، لوگوں نے کہا: اس خاتون کے بارے میں کون نبی اکرم صلی اللہ علیہ وسلم کے ساتھ بات کرے گا؟ تو کسی نے کہا: یہ جرأت صرف اسامہ بن زید رضی اللہ عنہما کر سکتے ہیں جو نبی اکرم صلی اللہ علیہ وسلم کے محبوب ہیں، جب سیدنا اسامہ رضی اللہ عنہ نے نبی اکرم صلی اللہ علیہ وسلم سے اس بارے میں بات کی تو نبی اکرم صلی اللہ علیہ وسلم نے فرمایا: ”تم اللہ کی ایک حد کے بارے میں سفارش کر رہے ہو؟“ پھر نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم نے خطبہ دیتے ہوئے ارشاد فرمایا: ”تم سے پہلے کے لوگ اس لیے ہلاکت کا شکار ہو گئے کہ جب ان میں سے بڑے خاندان کا کوئی شخص چوری کرتا تو وہ اسے چھوڑ دیتے تھے اور جب کسی کمزور خاندان کا شخص چوری کرتا تھا تو وہ اس پر حد جاری کر دیا کرتے تھے، اللہ کی قسم! اگر محمد ( صلی اللہ علیہ وسلم ) کی صاحبزادی فاطمہ (رضی اللہ عنہا) نے چوری کی ہوتی تو میں اس کا ہاتھ بھی ضرور کٹوا دیتا۔“ [صحیح ابن حبان/كتاب الحدود/حدیث: 4402]

سیدنا عمران بن حصین رضی اللہ عنہ بیان کرتے ہیں کہ جہینہ قبیلے سے تعلق رکھنے والی ایک خاتون نبی اکرم صلی اللہ علیہ وسلم کی خدمت میں حاضر ہوئی، اس نے عرض کی: ”یا رسول اللہ صلی اللہ علیہ وسلم ! میں نے قابلِ حد جرم کا ارتکاب کیا ہے، آپ صلی اللہ علیہ وسلم مجھ پر حد قائم کریں“، نبی اکرم صلی اللہ علیہ وسلم نے اس کے سرپرست کو بلوایا اور فرمایا: ”اس کے ساتھ اچھا سلوک کرو، جب یہ بچے کو جنم دے دے تو تم اسے میرے پاس لے آنا“، جب اس عورت نے بچے کو جنم دے دیا تو وہ شخص اس عورت کو نبی اکرم صلی اللہ علیہ وسلم کی خدمت میں لے آیا، نبی اکرم صلی اللہ علیہ وسلم کے حکم کے تحت اس کے کپڑے کو مضبوطی سے باندھا گیا، پھر آپ صلی اللہ علیہ وسلم کے حکم کے تحت اسے سنگسار کر دیا گیا، پھر نبی اکرم صلی اللہ علیہ وسلم نے اس خاتون کی نمازِ جنازہ ادا کی۔ سیدنا عمر رضی اللہ عنہ نے عرض کی: ”یا رسول اللہ صلی اللہ علیہ وسلم ! کیا آپ صلی اللہ علیہ وسلم ایک ایسی عورت کی نمازِ جنازہ ادا کریں گے جس نے زنا کا ارتکاب کیا ہے؟“ نبی اکرم صلی اللہ علیہ وسلم نے فرمایا: ”اس نے ایک ایسی توبہ کی ہے کہ اگر اسے اہل مدینہ سے تعلق رکھنے والے ستر افراد پر تقسیم کیا جائے تو ان سب کے لیے کافی ہو، کیا تمہیں اس سے زیادہ افضل اور کوئی شخص ملتا ہے جس نے اپنی ذات کو اللہ کے لیے قربان کر دیا؟“ (امام ابن حبان رحمہ اللہ فرماتے ہیں:) امام اوزاعی کو ابوقلابہ کے چچا کی کنیت ذکر کرنے میں وہم ہوا ہے کیونکہ گھوڑا ٹھوکر کھا جاتا ہے، انہوں نے یہ کہا ہے کہ یہ روایت ابوقلابہ کے حوالے سے ان کے چچا ابومہاجر کے حوالے سے منقول ہے، حالانکہ ان کے چچا کی کنیت ابومہلب ہے اور ان کا نام عمرو بن معاویہ بن زید جرمی ہے، یہ ثقہ تابعین میں سے ہیں اور اہل بصرہ کے سرداروں میں سے ہیں۔ [صحیح ابن حبان/كتاب الحدود/حدیث: 4403]

سیدنا جابر رضی اللہ عنہ بیان کرتے ہیں: جب نبی اکرم صلی اللہ علیہ وسلم نے سیدنا ماعز بن مالک رضی اللہ عنہ کو سنگسار کروایا تو آپ صلی اللہ علیہ وسلم نے فرمایا: ”میں نے اسے جنت کی نہروں میں تیرتے ہوئے دیکھا ہے۔“ [صحیح ابن حبان/كتاب الحدود/حدیث: 4404]

سیدنا عبادہ بن صامت رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہم سے بھی اسی طرح بیعت لی جس طرح ہماری خواتین سے لی تھی، آپ صلی اللہ علیہ وسلم نے ارشاد فرمایا: ”تم میں سے جو شخص ان میں سے کسی ایک قابلِ حد چیز کا مرتکب ہو جائے اور اسے دنیا میں سزا دے دی جائے تو یہ چیز اس کے لیے کفارہ ہو گی اور جس شخص سے یہ بات مؤخر ہو جائے (یعنی اسے دنیا میں سزا نہ ملے) تو اس کا معاملہ اللہ تعالیٰ کے سپرد ہو گا، اگر وہ چاہے گا تو اس پر رحم کر دے گا اور اگر چاہے گا تو اسے عذاب دے دے گا۔“ [صحیح ابن حبان/كتاب الحدود/حدیث: 4405]

سیدنا عرفجہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”عنقریب فساد ہی فساد ہوں گے، جو شخص اس امت میں تفرقہ پیدا کرنے کی کوشش کرے، جبکہ وہ لوگ اکٹھے ہوں تو اسے تلوار کے ذریعے قتل کر دو، خواہ وہ جو کوئی بھی ہو۔“ [صحیح ابن حبان/كتاب الحدود/حدیث: 4406]