ایک سند کے مطابق سیدنا عمران بن حصین رضی اللہ عنہ اور ایک سند کے مطابق سعید بن مسیب رحمہ اللہ بیان کرتے ہیں کہ ایک شخص نے اپنے مرنے کے قریب چھ غلاموں کو آزاد کر دیا، اس شخص کے پاس ان غلاموں کے علاوہ اور کوئی مال نہ تھا، نبی اکرم صلی اللہ علیہ وسلم نے ان کے درمیان قرعہ اندازی کروائی اور ان میں سے دو کو آزاد قرار دیا اور چار کو غلام رہنے دیا۔ [صحیح ابن حبان/كتاب القضاء/حدیث: 5075]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”فیصلہ کرتے ہوئے رشوت لینے والے اور دینے والے پر اللہ نے لعنت کی ہے۔“ [صحیح ابن حبان/كتاب القضاء/حدیث: 5076]

سیدنا عبداللہ بن عمرو رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ نے رشوت لینے والے اور دینے والے پر لعنت کی ہے۔“ [صحیح ابن حبان/كتاب القضاء/حدیث: 5077]

عدی کندی رضی اللہ عنہ، جن کا تعلق بنو ارقم سے ہے، روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے لوگو! تم میں سے جو شخص ہمارے لیے (زکوۃ وغیرہ وصول کرنے کا) کوئی کام کرتا ہے اور پھر ہم سے اس میں سے کوئی ایک سوئی چھپا لیتا ہے یا اس سے بھی اوپر کی کوئی چیز چھپا لیتا ہے تو جب وہ قیامت کے دن آئے گا تو وہ خیانت کرنے والا ہو گا۔“ تو ایک سیاہ فام شخص کھڑا ہوا، یہ منظر آج بھی گویا کہ میری نگاہ میں ہے، میرا خیال ہے وہ ایک انصاری تھا۔ اس نے گزارش کی: یا رسول اللہ صلی اللہ علیہ وسلم ! جو آپ نے مجھے ذمہ داری عطا کی تھی اسے واپس لے لیں۔ نبی اکرم صلی اللہ علیہ وسلم نے دریافت کیا: ”وہ کیوں؟“ اس نے عرض کی: میں نے ابھی آپ کو یہ ارشاد فرماتے ہوئے سنا ہے۔ نبی اکرم صلی اللہ علیہ وسلم نے فرمایا: ”میں اب بھی یہی کہتا ہوں کہ جس شخص کو ہم کسی کام کا نگران مقرر کریں وہ تھوڑی اور زیادہ سب چیزیں لے کر آئے، جو اسے دیا جائے اسے وصول کر لے اور جس چیز سے اسے منع کیا جائے اس سے باز آ جائے۔“ [صحیح ابن حبان/كتاب القضاء/حدیث: 5078]