سیدہ عائشہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”قیامت کے دن عادل قاضی کو بلایا جائے گا اور اس سے اتنی سختی سے حساب لیا جائے گا کہ وہ یہ آرزو کرے گا کہ کاش اس نے اپنی پوری زندگی میں کبھی بھی دو آدمیوں کے درمیان کوئی فیصلہ نہ دیا ہوتا۔“ [صحیح ابن حبان/كتاب القضاء/حدیث: 5055]

عبداللہ بن وہب بیان کرتے ہیں: سیدنا عثمان غنی رضی اللہ عنہ نے سیدنا عبداللہ بن عمر رضی اللہ عنہما سے فرمایا: تم جاؤ، تم قاضی ہو۔ سیدنا عبداللہ بن عمر رضی اللہ عنہما نے عرض کی: اے امیر المؤمنین! کیا آپ مجھے اس سے معاف نہیں رکھیں گے؟ سیدنا عثمان رضی اللہ عنہ نے کہا: تم جاؤ اور لوگوں کے درمیان فیصلہ کرو۔ انہوں نے گزارش کی: اے امیر المؤمنین! کیا آپ مجھے اس سے معافی نہیں دیتے؟ سیدنا عثمان رضی اللہ عنہ نے کہا: میں تمہیں تاکید کر رہا ہوں کہ تم جاؤ اور فیصلہ کرو۔ سیدنا عبداللہ بن عمر رضی اللہ عنہما نے عرض کی: آپ جلدی نہ کیجیے۔ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص اللہ کی پناہ لیتا ہے وہ ایک ایسی ذات کی پناہ لیتا ہے جس کی پناہ لی جاتی ہے“۔ سیدنا عثمان رضی اللہ عنہ نے کہا: ٹھیک ہے۔ سیدنا عبداللہ بن عمر رضی اللہ عنہما نے کہا: تو میں اس بات سے اللہ کی پناہ مانگتا ہوں کہ میں قاضی بن جاؤں۔ سیدنا عثمان رضی اللہ عنہ نے دریافت کیا: تم ایسا کیوں نہیں کرتے جبکہ تمہارے والد فیصلے دیا کرتے تھے؟ سیدنا عبداللہ بن عمر رضی اللہ عنہما نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص قاضی ہو اور علم نہ ہونے کے باوجود فیصلہ دے وہ اہل جہنم میں سے ہو گا اور جو شخص قاضی ہو کر ظلم کے مطابق فیصلہ دے وہ اہل جہنم میں سے ہو گا اور جو شخص قاضی ہو اور عالم بھی ہو اور حق کے ساتھ (راوی کو شک ہے شاید یہ الفاظ ہیں) انصاف کے ساتھ فیصلہ دے وہ بھی (قیامت کے دن) یہ آرزو کرے گا کہ اسے برابری کی بنیاد پر چھوڑ دیا جائے“۔ (سیدنا عبداللہ بن عمر رضی اللہ عنہما نے کہا:) تو اب اس کے بعد میں کیا امید رکھ سکتا ہوں۔ (امام ابن حبان رحمہ اللہ فرماتے ہیں:) ابن وہب نامی راوی عبداللہ بن وہب بن اسود قریشی ہے جس کا تعلق مدینہ منورہ سے ہے۔ ابن شہاب زہری نے اس کے حوالے سے روایات نقل کی ہیں۔ [صحیح ابن حبان/كتاب القضاء/حدیث: 5056]

سیدنا عبداللہ بن عباس رضی اللہ عنہما بیان کرتے ہیں کہ ایک قریظہ قبیلہ تھا اور ایک نضیر قبیلہ تھا، نضیر قبیلہ، قریظہ قبیلے سے زیادہ معزز سمجھا جاتا تھا۔ سیدنا عبداللہ بن عباس رضی اللہ عنہما بیان کرتے ہیں کہ بنو قریظہ سے تعلق رکھنے والا جب کوئی شخص بنو نضیر سے تعلق رکھنے والے کسی شخص کو قتل کر دیتا تو اسے اس کے بدلے میں قتل کر دیا جاتا اور جب بنو نضیر سے تعلق رکھنے والا کوئی شخص بنو قریظہ سے تعلق رکھنے والے کسی شخص کو قتل کرتا تو وہ کھجور کے ایک سو وسق دیت ادا کر دیتا۔ جب نبی اکرم صلی اللہ علیہ وسلم کو مبعوث کیا گیا، تو بنو نضیر سے تعلق رکھنے والے ایک شخص نے بنو قریظہ سے تعلق رکھنے والے ایک شخص کو قتل کر دیا۔ لوگوں نے کہا: تم لوگ اسے ہمارے حوالے کرو تاکہ ہم بھی اسے قتل کریں۔ ان لوگوں نے کہا: ہمارے اور تمہارے درمیان نبی اکرم صلی اللہ علیہ وسلم فیصلہ کریں گے۔ پھر وہ نبی اکرم صلی اللہ علیہ وسلم کی خدمت میں حاضر ہوئے تو اس بارے میں یہ آیت نازل ہوئی: ﴿اگر تم فیصلہ دیتے ہو تو ان کے درمیان انصاف کے مطابق فیصلہ دو﴾ [سورة المائدة: 42] ۔ یہاں انصاف سے مراد یہ ہے کہ جان کا بدلہ جان ہو، پھر یہ آیت نازل ہوئی: ﴿کیا وہ زمانہ جاہلیت کے رواج کے مطابق فیصلہ چاہتے ہیں﴾ [سورة المائدة: 50] ۔ [صحیح ابن حبان/كتاب القضاء/حدیث: 5057]

سیدنا جابر رضی اللہ عنہ بیان کرتے ہیں کہ جب حبشہ کے مہاجرین واپس نبی اکرم صلی اللہ علیہ وسلم کی خدمت میں حاضر ہوئے تو نبی اکرم صلی اللہ علیہ وسلم نے فرمایا: ”تم لوگوں نے حبشہ کی سرزمین پر جو حیران کن بات دیکھی ہے اس بارے میں ہمیں کچھ بتاؤ۔“ تو ان میں سے کچھ نوجوانوں نے عرض کی: یا رسول اللہ ( صلی اللہ علیہ وسلم )! ایک مرتبہ ہم بیٹھے ہوئے تھے، اسی دوران ایک بوڑھی عورت ہمارے پاس سے گزری، اس نے اپنے سر پر پانی کا مٹکا اٹھایا ہوا تھا، وہ حبشیوں سے تعلق رکھنے والے ایک نوجوان کے پاس سے گزری تو اس نوجوان نے اپنا ایک ہاتھ اس کے دونوں کندھوں کے درمیان رکھا اور پھر اسے گھٹنوں کے بل گرا دیا، اس عورت کا مٹکا ٹوٹ گیا، پھر وہ عورت کھڑی ہوئی اور اس نوجوان کی طرف متوجہ ہو کر اس نے کہا: اے نالائق! عنقریب تم جان لو گے اللہ تعالیٰ جب کرسی کو رکھے گا اور تمام پہلے اور بعد والوں کو جمع کرے گا، اس دن ہاتھ اور پاؤں اس بارے میں کلام کریں گے کہ انہوں نے کیا کچھ کیا، اس وقت تم میرے اور اپنے معاملے کے بارے میں جان لو گے۔ تو نبی اکرم صلی اللہ علیہ وسلم نے ارشاد فرمایا: ”اس عورت نے سچ کہا ہے، اس نے سچ کہا ہے، اللہ تعالیٰ ایسی قوم کو کیسے پاک کر سکتا ہے جس میں کمزور کے لیے طاقت ور سے مواخذہ نہیں کیا جاتا۔“ [صحیح ابن حبان/كتاب القضاء/حدیث: 5058]

سیدنا جابر رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”ایسی امت کو کیسے پاک کیا جا سکتا ہے جس میں کمزور کے لیے طاقت ور سے مواخذہ نہ کیا جائے۔“ [صحیح ابن حبان/كتاب القضاء/حدیث: 5059]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی قاضی فیصلہ کرتے ہوئے اجتہاد کرتا ہے اور درست فیصلہ کرتا ہے تو اسے دو اجر ملتے ہیں اور جب وہ فیصلہ کرتے ہوئے اجتہاد کرتا ہے اور اس سے غلطی ہو جائے تو اسے ایک اجر ملتا ہے۔“ (امام ابن حبان رحمہ اللہ فرماتے ہیں:) معمر نے ثوری کے حوالے سے مسند روایت کے طور پر یہی روایت نقل کی ہے۔ [صحیح ابن حبان/كتاب القضاء/حدیث: 5060]

سیدنا عمرو بن العاص رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب قاضی فیصلہ کرتے ہوئے اجتہاد کرے اور درست فیصلہ دے تو اسے دو اجر ملتے ہیں اور جب وہ فیصلہ دیتے ہوئے اجتہاد کرے اور غلطی کرے تو اسے ایک اجر ملتا ہے۔“ [صحیح ابن حبان/كتاب القضاء/حدیث: 5061]

سیدنا عبداللہ بن ابی اوفیٰ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بیشک اللہ تعالیٰ قاضی کے ساتھ ہوتا ہے جب تک وہ ظلم نہ کرے۔“ [صحیح ابن حبان/كتاب القضاء/حدیث: 5062]

سیدنا عبدالرحمن بن ابوبکر رضی اللہ عنہما اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”کوئی بھی قاضی غصے کے عالم میں دو آدمیوں کے درمیان فیصلہ نہ دے۔“ [صحیح ابن حبان/كتاب القضاء/حدیث: 5063]

عبدالرحمن بن ابوبکرہ رضی اللہ عنہما اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”کوئی قاضی غصے کے عالم میں دو آدمیوں کے درمیان فیصلہ نہ دے۔“ [صحیح ابن حبان/كتاب القضاء/حدیث: 5064]