سیدنا عبداللہ بن عباس رضی اللہ عنہما، سیدنا علی رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے مجھے پیغام رساں (یعنی گورنر) بنا کر بھیجا، میں نے عرض کی: یا رسول اللہ صلی اللہ علیہ وسلم ! آپ مجھے بھیج رہے ہیں حالانکہ میں ایک کم عمر آدمی ہوں، مجھ سے قضا کے بارے میں دریافت کیا جائے گا اور مجھے سمجھ نہیں آ رہی کہ میں کیا جواب دوں گا۔ نبی اکرم صلی اللہ علیہ وسلم نے فرمایا: ”اس کے بغیر کوئی چارہ بھی نہیں ہے، یا مجھے جانا ہوگا یا تم چلے جاؤ۔“ سیدنا علی رضی اللہ عنہ کہتے ہیں، میں نے عرض کی: اگر اس کے بغیر کوئی چارہ نہیں ہے تو پھر میں چلا جاتا ہوں۔ نبی اکرم صلی اللہ علیہ وسلم نے فرمایا: ”تم جاؤ اور اسے لوگوں کے سامنے تلاوت کرو، اللہ تعالیٰ تمہاری زبان کو ثابت رکھے گا اور تمہارے دل کو ہدایت پر ثابت رکھے گا۔“ پھر نبی اکرم صلی اللہ علیہ وسلم نے ارشاد فرمایا: ”لوگ اپنے مقدمات لے کر آئیں گے، جب دو فریق تمہارے پاس آئیں تو تم کسی بھی فریق کے حق میں اس وقت تک فیصلہ نہ کرنا جب تک دوسرے فریق کا کلام نہ سن لو، کیونکہ یہ اس بات کے زیادہ لائق ہے کہ تمہیں پتا چل جائے کہ حق پر کون ہے۔“ [صحیح ابن حبان/كتاب القضاء/حدیث: 5065]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”دو خواتین سیدنا داؤد علیہ السلام کی خدمت میں حاضر ہوئیں، وہ ایک بچے کے بارے میں جھگڑا کر رہی تھیں۔ سیدنا داؤد علیہ السلام نے بڑی عمر کی عورت کے حق میں فیصلہ فرما دیا، جب وہ دونوں وہاں سے نکلیں تو سیدنا سلیمان علیہ السلام نے دریافت کیا: سیدنا داؤد علیہ السلام نے تم دونوں کے درمیان کیا فیصلہ دیا ہے؟ ان دونوں خواتین نے سیدنا سلیمان علیہ السلام کو اس بارے میں بتایا، تو سیدنا سلیمان علیہ السلام نے فرمایا: تم میرے پاس چھری لے کر آؤ (راوی کہتے ہیں: پہلی مرتبہ میں نے نبی اکرم صلی اللہ علیہ وسلم کی زبانی لفظ «السِّكِّينُ» ”سکین“ سنا، کیونکہ ہم لوگ چھری کے لیے لفظ «المُدْيَةُ» ”مدیہ“ استعمال کرتے ہیں) تو چھوٹی عمر کی عورت نے دریافت کیا: وہ کیوں؟ سیدنا سلیمان علیہ السلام نے کہا: میں اس بچے کو تم دونوں کے درمیان تقسیم کر دوں گا۔ اس عورت نے کہا: آپ اس بچے کو اس بڑی عمر کی عورت کے سپرد کر دیں، جبکہ بڑی عمر کی عورت نے کہا: آپ اسے ہمارے درمیان تقسیم کر دیں۔ نبی اکرم صلی اللہ علیہ وسلم فرماتے ہیں: تو سیدنا سلیمان علیہ السلام نے چھوٹی عمر کی عورت کے حق میں فیصلہ دے دیا۔ انہوں نے فرمایا: اگر یہ تمہارا بیٹا ہوتا تو تم اس بات سے راضی نہ ہوتیں کہ اس کے ٹکڑے کر دیے جائیں۔“ [صحیح ابن حبان/كتاب القضاء/حدیث: 5066]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب راستے کے بارے میں تمہارے درمیان اختلاف ہو جائے، تو سات ذراع تک جگہ چھوڑ دو۔“ [صحیح ابن حبان/كتاب القضاء/حدیث: 5067]

سیدنا ابوہریرہ رضی اللہ عنہ بیان کرتے ہیں: دو آدمیوں نے ایک جانور کے بارے میں دعویٰ کیا، ان دونوں میں سے ہر ایک نے دو گواہ بھی پیش کر دیے تو نبی اکرم صلی اللہ علیہ وسلم نے اس جانور کو ان دونوں کے درمیان نصف نصف کے طور پر تقسیم کر دیا۔ [صحیح ابن حبان/كتاب القضاء/حدیث: 5068]

سیدنا عبداللہ بن عباس رضی اللہ عنہما بیان کرتے ہیں کہ جب یہ آیت: ﴿وَإِنْ تُبْدُوا مَا فِي أَنْفُسِكُمْ أَوْ تُخْفُوهُ يُحَاسِبْكُمْ بِهِ اللَّهُ﴾ [سورة البقرة: 284] ”تمہارے من میں جو کچھ ہے اسے ظاہر کرو یا چھپا کے رکھو اللہ تعالیٰ اس کے بارے میں تم سے حساب لے گا“ نازل ہوئی تو اس آیت کے نزول کی وجہ سے لوگ انتہائی زیادہ پریشان ہو گئے۔ نبی اکرم صلی اللہ علیہ وسلم نے فرمایا: ”تم یہ کہو: «سَمِعْنَا وَأَطَعْنَا» ”ہم نے سنا اور اطاعت کی“ اور ہم نے تسلیم کیا“ تو اللہ تعالیٰ نے ان کے دلوں میں ایمان کو ڈال دیا اور اللہ تعالیٰ نے یہ آیت نازل فرمائی: ﴿آمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ وَالْمُؤْمِنُونَ﴾ [سورة البقرة: 285] ”رسول اس چیز پر ایمان لایا جو اس کے پروردگار کی طرف سے اس پر نازل کی گئی اور اہل ایمان بھی (ایمان لائے)“۔ اس میں یہ الفاظ بھی ہیں (وہ لوگ یہ کہتے ہیں): ﴿رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا﴾ [سورة البقرة: 286] ”اے ہمارے پروردگار! اگر ہم بھول جائیں یا غلطی کر جائیں تو ہم سے مواخذہ نہ کرنا۔“ تو اللہ تعالیٰ نے فرمایا: «قَدْ فَعَلْتُ» ”میں نے ایسا ہی کیا“۔ (اس میں یہ دعا بھی ہے): ﴿رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِنْ قَبْلِنَا﴾ [سورة البقرة: 286] ”اے ہمارے پروردگار، تو ہم پر اس طرح بوجھ نہ لاد دینا جس طرح تو نے ہم سے پہلے لوگوں پر لاد دیا تھا۔“ تو پروردگار نے فرمایا: «قَدْ فَعَلْتُ» ”میں نے ایسا ہی کیا۔“ [صحیح ابن حبان/كتاب القضاء/حدیث: 5069]

سیدہ زینب رضی اللہ عنہا، سیدہ ام سلمہ رضی اللہ عنہما کے حوالے سے نبی اکرم صلی اللہ علیہ وسلم کا یہ فرمان نقل کرتی ہیں: ”میں ایک انسان ہوں، تم لوگ اپنے مقدمات لے کر میرے پاس آتے ہو، البتہ اگر کوئی شخص اپنے موقف کو ثابت کرنے میں دوسرے کے مقابلے میں زیادہ تیز ہو اور میں نے جو سنا میں اس کے مطابق اس کے حق میں فیصلہ دے دوں، تو میں جس شخص کے حق میں اس کے کسی بھائی کے حق کا فیصلہ دوں تو وہ اسے قبول نہ کرے کیونکہ میں نے اس کے لیے جہنم کا ٹکڑا کاٹ کر دیا ہو گا۔“ [صحیح ابن حبان/كتاب القضاء/حدیث: 5070]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میں ایک انسان ہوں ہو سکتا ہے تم میں سے کوئی ایک شخص اپنے موقف کو پیش کرنے میں دوسرے سے زیادہ تیز ہو تو جس کے حق میں، میں اس کے بھائی کے حق کا فیصلہ دے دوں تو میں نے اس کو جہنم کا ٹکڑا کاٹ کر دیا ہو گا۔“ [صحیح ابن حبان/كتاب القضاء/حدیث: 5071]

سیدہ ام سلمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”میں ایک انسان ہوں۔ تم لوگ میرے پاس مقدمات لے کر آتے ہو۔ ہو سکتا ہے کوئی شخص اپنا موقف پیش کرنے میں دوسرے سے زیادہ تیز ہو، تو جس شخص کے حق میں، میں اس کے بھائی کے حق سے متعلق کسی چیز کا فیصلہ دے دوں، تو میں نے اس کو جہنم کا ٹکڑا کاٹ کر دیا ہو گا۔“ [صحیح ابن حبان/كتاب القضاء/حدیث: 5072]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”ایک گواہ کے ہمراہ قسم کی بنیاد پر فیصلہ دے دیا تھا۔“ [صحیح ابن حبان/كتاب القضاء/حدیث: 5073]

علقمہ بن وائل اپنے والد (سیدنا وائل بن حجر رضی اللہ عنہ) کا یہ بیان نقل کرتے ہیں کہ حضرموت سے تعلق رکھنے والا ایک شخص اور کندہ سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوئے، حضرمی نے عرض کی: یا رسول اللہ! اس شخص نے میری زمین پر قبضہ کر لیا ہے جو میرے باپ کی ملکیت تھی، کندی نے کہا: وہ زمین میری ہے، میرے قبضے میں ہے، میں نے اس پر کھیتی باڑی کی ہے اور اس کا اس زمین میں کوئی حق نہیں ہے، نبی اکرم صلی اللہ علیہ وسلم نے حضرمی سے دریافت کیا: ”کیا تمہارے پاس کوئی ثبوت ہے؟“ اس نے جواب دیا: جی نہیں، تو نبی اکرم صلی اللہ علیہ وسلم نے فرمایا: ”پھر تمہیں قسم اٹھانی ہو گی۔“ دوسرے شخص نے عرض کی: یہ گناہ گار شخص ہے، یہ اس بات کی پرواہ نہیں کرتا کہ کس بات پر قسم اٹھا رہا ہے اور یہ کسی چیز سے ڈرتا نہیں ہے، نبی اکرم صلی اللہ علیہ وسلم نے فرمایا: ”اس کی طرف سے تمہیں یہی چیز مل سکتی ہے۔“ راوی بیان کرتے ہیں کہ وہ شخص قسم اٹھانے کے لیے تیار ہوا تو نبی اکرم صلی اللہ علیہ وسلم نے اس کے جانے کے بعد ارشاد فرمایا: ”اگر اس شخص نے اس مال کے بارے میں اس لیے قسم اٹھائی ہے تاکہ ظلم کے طور پر اسے ہتھیا لے، تو جب یہ اللہ تعالیٰ کی بارگاہ میں حاضر ہو گا تو اللہ تعالیٰ اس سے منہ پھیر لے گا۔“ [صحیح ابن حبان/كتاب القضاء/حدیث: 5074]