ہشام بن ابو رقیہ بیان کرتے ہیں: میں نے سیدنا مسلمہ بن مخلد رضی اللہ عنہ کو منبر پر لوگوں کو خطبہ دیتے ہوئے یہ بیان کرتے ہوئے سنا: اے لوگو! کیا تمہارے لیے عصب اور کتان میں وہ چیز نہیں ہے، جو تمہیں ریشم سے بے نیاز کر دے؟ ان صاحب نے نبی اکرم صلی اللہ علیہ وسلم کے حوالے سے حدیث بیان کی ہے: اے عقبہ! آپ کھڑے ہو جائیں، تو سیدنا عقبہ بن عامر رضی اللہ عنہ کھڑے ہوئے (راوی کہتے ہیں:) میں سن رہا تھا انہوں نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص جان بوجھ کر میری طرف کوئی جھوٹی بات منسوب کرے وہ جہنم میں اپنے مخصوص ٹھکانے تک پہنچنے کے لیے تیار رہے۔“ اور میں اس بات کی گواہی دیتا ہوں میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص ریشم پہنے گا اس کے لیے یہ بات حرام قرار دی گئی ہے وہ آخرت میں اسے پہنے۔“ [صحیح ابن حبان/كتاب اللباس وآدابه/حدیث: 5436]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص دنیا میں ریشم پہنے گا وہ آخرت میں اسے نہیں پہنے گا، اگرچہ وہ جنت میں داخل ہو جائے، (دوسرے) اہل جنت اسے پہنیں گے لیکن وہ نہیں پہن سکے گا۔“ [صحیح ابن حبان/كتاب اللباس وآدابه/حدیث: 5437]

سیدنا علی بن ابی طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”سونے کی انگوٹھی، «الْقَسِيِّ» (قسی) اور «الْمَيْثَرَةِ» (میثرہ) (مخصوص قسم کے کپڑے)“ سے منع فرمایا ہے۔ [صحیح ابن حبان/كتاب اللباس وآدابه/حدیث: 5438]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر بن خطاب رضی اللہ عنہ نے مسجد کے دروازے کے پاس ایک سیرانی حلہ فروخت ہوتے ہوئے دیکھا تو عرض کی: یا رسول اللہ صلی اللہ علیہ وسلم ! آپ اسے خرید لیں اور جمعہ کے دن اور وفود سے ملاقات کے دن اسے پہن لیا کریں (تو یہ مناسب ہو گا) جب وہ وفود آپ کی خدمت میں حاضر ہوتے ہیں، تو نبی اکرم صلی اللہ علیہ وسلم نے ارشاد فرمایا: ”اسے وہ شخص پہنے گا، جس کا آخرت میں کوئی حصہ نہیں ہو گا“، پھر نبی اکرم صلی اللہ علیہ وسلم کے پاس اس قسم کے حلے آئے تو آپ صلی اللہ علیہ وسلم نے ان میں سے ایک حلہ سیدنا عمر بن خطاب رضی اللہ عنہ کو بھی عطا کیا۔ سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم ! آپ نے مجھے پہننے کے لیے یہ دے دیا ہے حالانکہ آپ صلی اللہ علیہ وسلم نے عطارد (نامی شخص) کے حلہ کے بارے میں فلاں بات ارشاد فرمائی تھی، تو نبی اکرم صلی اللہ علیہ وسلم نے ارشاد فرمایا: ”میں نے یہ تمہیں اس لیے نہیں دیا تاکہ تم اسے پہن لو“، تو سیدنا عمر رضی اللہ عنہ نے وہ حلہ مکہ میں موجود اپنے مشرک بھائی کو پہننے کے لیے دے دیا۔ [صحیح ابن حبان/كتاب اللباس وآدابه/حدیث: 5439]

سیدنا علی بن ابی طالب رضی اللہ عنہ بیان کرتے ہیں: نبی اکرم صلی اللہ علیہ وسلم نے ”قسی اور معصفر پہننے سے اور سونے کی انگوٹھی پہننے سے اور رکوع کے دوران قرأت کرنے سے منع کیا ہے۔“ [صحیح ابن حبان/كتاب اللباس وآدابه/حدیث: 5440]

سیدنا عمر بن خطاب رضی اللہ عنہ نے خطبہ دیتے ہوئے یہ بات ارشاد فرمائی کہ نبی اکرم صلی اللہ علیہ وسلم نے ”ریشم پہننے سے منع کیا ہے، البتہ دو انگلیوں، یا تین انگلیوں، یا چار انگلیوں (جتنی پٹی استعمال کرنے کی) اجازت دی ہے۔“ [صحیح ابن حبان/كتاب اللباس وآدابه/حدیث: 5441]

سیدنا مغیرہ بن شعبہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا کہ آپ نے سیدنا سفیان بن ابوسہیل رضی اللہ عنہ کے پہلو کو پکڑ کر ارشاد فرمایا: ”اے سفیان! اپنے تہبند کو (ٹخنوں سے نیچے) لٹکانا نہیں کیونکہ اللہ تعالیٰ (ٹخنوں سے نیچے) لٹکانے والوں کی طرف نظر رحمت نہیں کرے گا۔“ [صحیح ابن حبان/كتاب اللباس وآدابه/حدیث: 5442]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص تکبر کی وجہ سے اپنے کپڑے کو لٹکائے گا اللہ تعالیٰ قیامت کے دن اس کی طرف نظر رحمت نہیں کرے گا۔“ [صحیح ابن حبان/كتاب اللباس وآدابه/حدیث: 5443]

سالم بن عبداللہ رحمہ اللہ اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص تکبر کے طور پر اپنے کپڑے کو (ٹخنوں سے نیچے) لٹکائے گا اللہ تعالیٰ قیامت کے دن اس کی طرف نظرِ رحمت نہیں کرے گا۔“ سیدنا ابوبکر رضی اللہ عنہ نے عرض کی: یا رسول اللہ صلی اللہ علیہ وسلم ! میرا تہبند ایک طرف سے لٹک جاتا ہے، مجھے اس کا بہت خیال رکھنا پڑے گا۔ نبی اکرم صلی اللہ علیہ وسلم نے ان سے فرمایا: ”تم ان لوگوں میں سے نہیں ہو جو تکبر کے طور پر ایسا کرتے ہیں۔“ [صحیح ابن حبان/كتاب اللباس وآدابه/حدیث: 5444]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے میری پنڈلی کو درمیان سے پکڑ کر ارشاد فرمایا: ”یہ جگہ تہبند کے لیے ہے، اگر تم نہیں مانتے تو یہاں تک، لیکن ٹخنوں میں تہبند کا کوئی حق نہیں ہے۔“ [صحیح ابن حبان/كتاب اللباس وآدابه/حدیث: 5445]