علی بن عبدالرحمٰن اپنے والد کا یہ بیان نقل کرتے ہیں: میں سیدنا ابوسعید خدری رضی اللہ عنہ کی خدمت میں حاضر ہوا۔ میں نے دریافت کیا: کیا آپ نے نبی اکرم صلی اللہ علیہ وسلم کو تہبند کے بارے میں کوئی بات ارشاد فرماتے ہوئے سنا ہے؟ انہوں نے جواب دیا: جی ہاں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مومن کا تہبند اس کی نصف پنڈلی تک ہونا چاہیے، نصف پنڈلی سے لے کر ٹخنوں تک کے درمیان میں جہاں بھی ہو تو کوئی حرج نہیں ہے، لیکن جو اس سے نیچے ہو گا وہ جہنم میں ہو گا اور اللہ تعالیٰ ایسے شخص کی طرف نظرِ رحمت نہیں کرے گا جو تکبر کے طور پر اپنے تہبند کو لٹکائے گا۔“ [صحیح ابن حبان/كتاب اللباس وآدابه/حدیث: 5446]

علی بن عبدالرحمن اپنے والد کا یہ بیان نقل کرتے ہیں کہ میں نے سیدنا ابوسعید خدری رضی اللہ عنہ سے تہبند کے بارے میں دریافت کیا تو انہوں نے فرمایا: میں تمہیں اس بارے میں علم کی بات بتاتا ہوں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مومن کا تہبند نصف پنڈلی تک ہونا چاہیے۔ نصف پنڈلی سے لے کر ٹخنوں تک کے درمیان میں جہاں بھی ہو، اسے کوئی حرج نہیں ہے، لیکن جو اس سے نیچے ہوگا وہ جہنم میں ہوگا۔“ یہ بات نبی اکرم صلی اللہ علیہ وسلم نے تین مرتبہ ارشاد فرمائی (اور پھر فرمایا): ”اللہ تعالیٰ اس شخص کی طرف نظرِ رحمت نہیں کرے گا جو تکبر کے طور پر اپنے تہبند کو لٹکائے گا۔“ [صحیح ابن حبان/كتاب اللباس وآدابه/حدیث: 5447]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنا دستِ مبارک اپنی (یا ان کی) پنڈلی کے نصف حصے پر رکھا اور ارشاد فرمایا: ”یہ تہبند کی جگہ ہے، اگر تم نہیں مانتے تو نیچے کر لو، اگر نہیں مانتے تو ٹخنوں میں تہبند کا کوئی حق نہیں ہے۔“ (یعنی اسے ٹخنوں سے اونچا ہونا چاہئے) [صحیح ابن حبان/كتاب اللباس وآدابه/حدیث: 5448]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے میری پنڈلی کو درمیان سے پکڑا اور ارشاد فرمایا: ”یہ جگہ تہبند کے لیے ہے، اگر تم نہیں مانتے تو یہ ہے، تاہم ٹخنوں میں تہبند کا کوئی حق نہیں ہے۔“ (امام ابن حبان رحمہ اللہ فرماتے ہیں:) ابواسحاق نے یہ روایت مسلم بن نذیر اور اغر ابومسلم سے سنی ہے، تو اس کے دونوں طرق محفوظ ہیں، البتہ اغر کی نقل کردہ روایت زیادہ غریب ہے اور مسلم بن نذیر کی نقل کردہ روایت زیادہ مشہور ہے۔ [صحیح ابن حبان/كتاب اللباس وآدابه/حدیث: 5449]

علی بن عبدالرحمن اپنے والد کا یہ بیان نقل کرتے ہیں کہ تہبند کا معاملہ ذکر کیا گیا تو میں سیدنا ابوسعید خدری رضی اللہ عنہ کی خدمت میں حاضر ہوا، میں نے کہا: آپ مجھے تہبند کے بارے میں بتائیں، انہوں نے فرمایا: جی ہاں، علم کی بات (میں تمہیں بتاتا ہوں)، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”مومن کا تہبند اس کی نصف پنڈلی تک ہوتا ہے، نصف پنڈلی سے لے کر ٹخنوں کے درمیان جہاں بھی ہو اس کا کوئی گناہ نہیں ہوگا، لیکن جو اس سے نیچے ہو وہ جہنم میں ہوگا اور جو شخص اپنے تہبند کو تکبر کے طور پر لٹکائے گا اللہ تعالیٰ اس کی طرف نظرِ رحمت نہیں کرے گا۔“ [صحیح ابن حبان/كتاب اللباس وآدابه/حدیث: 5450]

صفیہ بنت ابوعبید بیان کرتی ہیں کہ جب تہبند کا ذکر ہوا تو نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا نے آپ کی خدمت میں عرض کی: یا رسول اللہ صلی اللہ علیہ وسلم ! عورت کا کیا حکم ہے؟ نبی اکرم صلی اللہ علیہ وسلم نے فرمایا: ”وہ ایک بالشت لٹکائے۔“ سیدہ ام سلمہ رضی اللہ عنہا نے عرض کی: اس صورت میں تو وہ بے پردہ ہو گی۔ نبی اکرم صلی اللہ علیہ وسلم نے فرمایا: ”پھر ایک ذراع (یعنی دونوں ہاتھوں کے پھیلاؤ جتنی) لٹکا لے، اس سے زیادہ نہ لٹکائے۔“ [صحیح ابن حبان/كتاب اللباس وآدابه/حدیث: 5451]

سیدنا معاویہ بن قرہ رحمہ اللہ اپنے والد (سیدنا قرہ رضی اللہ عنہ) کا یہ بیان نقل کرتے ہیں کہ میں مزینہ قبیلے کے کچھ لوگوں کے ہمراہ نبی اکرم صلی اللہ علیہ وسلم کی خدمت میں حاضر ہوا، ہم نے آپ صلی اللہ علیہ وسلم کے دستِ اقدس پر بیعت کی، میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم کا گریبان کھلا ہوا تھا تو میں نے اس میں اپنا ہاتھ داخل کیا اور مہرِ نبوت کو چھو لیا۔ راوی کہتے ہیں: میں نے معاویہ بن قرہ اور ان کے والد کو دیکھا کہ وہ گرمی اور سردی ہر موسم میں گریبان کھلا رکھتے تھے، وہ بٹن کبھی بند نہیں کرتے تھے۔ [صحیح ابن حبان/كتاب اللباس وآدابه/حدیث: 5452]

زید بن اسلم رحمہ اللہ بیان کرتے ہیں کہ انہوں نے سیدنا عبداللہ بن عمر رضی اللہ عنہما کو دیکھا کہ وہ بٹن کھول کر نماز ادا کر رہے تھے۔ میں نے ان سے اس بارے میں دریافت کیا تو انہوں نے بتایا: ”میں نے نبی اکرم صلی اللہ علیہ وسلم کو اسی طرح نماز ادا کرتے ہوئے دیکھا ہے۔“ [صحیح ابن حبان/كتاب اللباس وآدابه/حدیث: 5453]

ابو عثمان بیان کرتے ہیں: سیدنا عمر رضی اللہ عنہ کا مکتوب ہمارے پاس آیا، ہم اس وقت عتبہ بن فرقد رضی اللہ عنہ کے ہمراہ آذربائیجان میں موجود تھے (اس میں یہ تحریر تھا) «أَمَّا بَعْدُ» ”بعد ازاں!“ بٹن بند رکھو، جوتے پہن کے رکھو، کم وزنی تیر چلاؤ اور شلواروں کو (ٹخنوں سے کچھ اوپر) کاٹ دو، تم پر لازم ہے تم اپنے جدِ امجد سیدنا اسماعیل علیہ السلام کا سا لباس پہنو اور تم لوگ (مہنگی اور فضول) آرائش و زیبائش والی نعمتوں اور عجمیوں کے طور طریقوں سے بچو اور تم پر لازم ہے دھوپ میں بھی رہو کیونکہ یہ عربوں کا حمام ہے، کھردرے اور پرانے کپڑے پہنو اور گھوڑے کی ننگی پیٹھ پر سواری کرو کیونکہ نبی اکرم صلی اللہ علیہ وسلم نے ہمیں ”ریشم پہننے سے منع کیا ہے البتہ اتنے کی اجازت ہے یعنی دو انگلیوں کی، درمیانی انگلی اور شہادت کی انگلی۔“ راوی کہتے ہیں: ہمارے علم کے مطابق اس سے مراد نشانی (یعنی پٹی کے طور پر ریشم استعمال کرنا ہے)۔ [صحیح ابن حبان/كتاب اللباس وآدابه/حدیث: 5454]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص جوتا پہنے، تو پہلے دائیں پاؤں میں پہنے اور جب اتارے تو پہلے بائیں پاؤں سے اتارے، دایاں پاؤں پہننے میں پہلے ہونا چاہیے اور بایاں اتارنے میں پہلے ہونا چاہیے۔“ [صحیح ابن حبان/كتاب اللباس وآدابه/حدیث: 5455]