عرفجہ بن اسعد رضی اللہ عنہ اپنے دادا کے بارے میں یہ بات نقل کرتے ہیں کہ جنگِ کلاب کے دن ان کی ناک ضائع ہو گئی تو انہوں نے چاندی کی ناک بنوائی، اس میں سے بو آنے لگی تو نبی اکرم صلی اللہ علیہ وسلم نے یہ ہدایت کی کہ ”وہ سونے کی ناک بنوا لیں۔“ [صحیح ابن حبان/كتاب الزينة والتطييب/حدیث: 5462]

نافع بیان کرتے ہیں کہ سیدنا عبداللہ بن عمر رضی اللہ عنہما جب انگیٹھی سلگاتے تھے تو اُلوہ (مخصوص قسم کی لکڑی) کے ذریعے سلگاتے تھے اور کافور کو بھی اس کے ساتھ ملا دیتے تھے، پھر یہ بتاتے تھے کہ نبی اکرم صلی اللہ علیہ وسلم بھی اسی طرح انگیٹھی سلگاتے تھے۔ [صحیح ابن حبان/كتاب الزينة والتطييب/حدیث: 5463]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”زعفران لگانے سے منع کیا ہے (یا زعفرانی رنگ پہننے سے منع کیا ہے)“۔ [صحیح ابن حبان/كتاب الزينة والتطييب/حدیث: 5464]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اس بات سے منع کیا ہے کہ ”آدمی زعفران لگائے (یا زعفرانی رنگ پہنے)۔“ [صحیح ابن حبان/كتاب الزينة والتطييب/حدیث: 5465]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ایسا شخص جہنم میں داخل نہیں ہو گا جس کے دل میں ذرے کے وزن جتنا ایمان ہو گا، اور ایسا شخص جنت میں داخل نہیں ہو گا جس کے دل میں ذرے کے وزن جتنا تکبر ہو گا۔“ ایک صاحب نے عرض کی: یا رسول اللہ صلی اللہ علیہ وسلم ! آدمی اس بات کو پسند کرتا ہے کہ اس کے کپڑے اچھے ہونے چاہئیں اور اس کا جوتا اچھا ہونا چاہیے۔ نبی اکرم صلی اللہ علیہ وسلم نے ارشاد فرمایا: ” «إِنَّ اللَّهَ جَمِيلٌ يُحِبُّ الْجَمَالَ» ”بے شک اللہ تعالیٰ جمیل ہے اور جمال کو پسند کرتا ہے،“ تکبر یہ ہے کہ آدمی حق کو قبول نہ کرے اور لوگوں کو کم تر سمجھے۔“ [صحیح ابن حبان/كتاب الزينة والتطييب/حدیث: 5466]

سیدنا ابوہریرہ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور عرض کی: یا رسول اللہ صلی اللہ علیہ وسلم ! مجھے خوبصورتی متاثر کرتی ہے اور مجھے یہ بات پسند نہیں ہے کہ اس حوالے سے کوئی شخص ایک تسمے جتنا بھی مجھ سے آگے ہو، تو کیا یہ چیز تکبر ہو گی؟ نبی اکرم صلی اللہ علیہ وسلم نے ارشاد فرمایا: ”جی نہیں، تکبر یہ ہے کہ آدمی حق کو قبول نہ کرے اور لوگوں کو حقیر سمجھے۔“ [صحیح ابن حبان/كتاب الزينة والتطييب/حدیث: 5467]

سیدنا ابوطلحہ انصاری رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”فرشتے ایسے گھر میں داخل نہیں ہوتے جس میں کتا یا تصویر موجود ہو۔“ راوی بیان کرتے ہیں: میں نے سوچا میں سیدہ عائشہ رضی اللہ عنہا کے پاس جا کر ان سے اس بارے میں دریافت کروں گا۔ میں ان کی خدمت میں حاضر ہوا، میں نے کہا: اے امی جان! ایک صاحب نے مجھے یہ حدیث سنائی ہے، نبی اکرم صلی اللہ علیہ وسلم نے ارشاد فرمایا ہے: ”فرشتے اس گھر میں داخل نہیں ہوتے جس میں تصویر یا کتا موجود ہو۔“ کیا آپ نے نبی اکرم صلی اللہ علیہ وسلم کو اس بارے میں ذکر کرتے ہوئے سنا ہے؟ تو سیدہ عائشہ رضی اللہ عنہا نے فرمایا: جی نہیں، لیکن میں تمہیں وہ بات بتاتی ہوں جو میں نے نبی اکرم صلی اللہ علیہ وسلم کو کرتے ہوئے دیکھا ہے۔ ایک مرتبہ نبی اکرم صلی اللہ علیہ وسلم کسی غزوے میں شرکت کے لیے تشریف لے گئے، جب آپ کے واپس آنے کا وقت ہوا تو میں نے ایک کپڑا لیا اور اسے پردے کے طور پر لٹکا دیا۔ جب آپ تشریف لائے تو میں نے دروازے پر آپ کا استقبال کیا۔ میں نے عرض کی: آپ پر سلام ہو اور اللہ تعالیٰ کی رحمت نازل ہو، ہر طرح کی حمد اللہ تعالیٰ کے لیے مخصوص ہے جس نے آپ کو عزت عطا کی، آپ کی مدد کی اور آپ کی عزت افزائی کی۔ نبی اکرم صلی اللہ علیہ وسلم نے گھر کی طرف دیکھا تو آپ کو وہ پردہ نظر آیا، آپ نے مجھے کوئی جواب نہیں دیا۔ مجھے آپ کے چہرے پر ناپسندیدگی کے آثار محسوس ہو گئے۔ میں نے وہ پردہ اتار کر اسے پھاڑ دیا (راوی کو شک ہے شاید یہ الفاظ ہیں) اسے کاٹ دیا۔ پھر نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے ہمیں جو رزق عطا کیا ہے اس کے بارے میں ہمیں یہ حکم نہیں دیا کہ ہم مٹی اور پتھروں کو لباس پہنائیں۔“ سیدہ عائشہ رضی اللہ عنہا بیان کرتی ہیں: میں نے کپڑے کے دو حصے کیے اور ان میں پتے بھر دیے (یعنی ان کے تکیے بنا لیے) تو نبی اکرم صلی اللہ علیہ وسلم نے اس حوالے سے مجھ پر اعتراض نہیں کیا۔ [صحیح ابن حبان/كتاب الزينة والتطييب/حدیث: 5468]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم مدینہ منورہ تشریف لائے، آپ کے ساتھیوں میں سیدنا ابوبکر رضی اللہ عنہ سب سے زیادہ عمر رسیدہ تھے، وہ مہندی اور «الْكَتَم» ”کتم“ (نامی بوٹی) ملا کر خضاب لگاتے تھے یہاں تک کہ (ان کے بالوں کا رنگ) سیاہ ہو چکا تھا۔ راوی کہتے ہیں کہ اگلی مرتبہ جب میں ان کے پاس گیا تو میں نے کہا: (روایت میں یہ الفاظ ہیں:) ان کا رنگ سیاہ ہونے کے قریب تھا، تو (راوی استاد) نے کہا: میں نے یہ نہیں کہا: سیاہ۔ [صحیح ابن حبان/كتاب الزينة والتطييب/حدیث: 5469]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”بے شک یہودی اور عیسائی (بالوں کو) رنگتے نہیں ہیں، تو تم لوگ ان کے برخلاف کرو۔“ [صحیح ابن حبان/كتاب الزينة والتطييب/حدیث: 5470]

سیدنا جابر رضی اللہ عنہ بیان کرتے ہیں کہ فتح مکہ کے دن سیدنا ابوقحافہ رضی اللہ عنہ کو (نبی اکرم صلی اللہ علیہ وسلم کی خدمت میں) لایا گیا، ان کے سر اور داڑھی (کے بال) ثغامہ پھول کی طرح سفید تھے، تو نبی اکرم صلی اللہ علیہ وسلم نے ارشاد فرمایا: ”تم ان کے سر (کے بالوں کی رنگت) تبدیل کرو البتہ سیاہ رنگ استعمال کرنے سے بچنا۔“ [صحیح ابن حبان/كتاب الزينة والتطييب/حدیث: 5471]