سیدنا انس بن مالک رضی اللہ عنہ بیان کرتے ہیں کہ فتح مکہ کے دن سیدنا ابوبکر اور سیدنا ابوقحافہ رضی اللہ عنہما کو ساتھ لے کر آئے تو نبی اکرم صلی اللہ علیہ وسلم نے سیدنا ابوبکر رضی اللہ عنہ سے فرمایا: ”اگر تم ان بزرگ کو گھر میں رہنے دیتے اور میں خود ان کے پاس چلا جاتا (تو یہ ٹھیک تھا)۔“ (راوی کہتے ہیں:) نبی اکرم صلی اللہ علیہ وسلم نے سیدنا ابوبکر رضی اللہ عنہ کی عزت افزائی کے لیے یہ بات ارشاد فرمائی۔ راوی بیان کرتے ہیں: سیدنا ابوقحافہ رضی اللہ عنہ نے اسلام قبول کر لیا، ان کے سر اور داڑھی کے بال ثغامہ پھول کی طرح سفید تھے۔ نبی اکرم صلی اللہ علیہ وسلم نے ارشاد فرمایا: ”ان کی رنگت تبدیل کر دو البتہ سیاہ رنگ استعمال کرنے سے بچنا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”ان کی رنگت تبدیل کر دو“، یہ لفظی طور پر امر کا صیغہ ہے لیکن اس کی صفت کے بارے میں جو حکم ہے اس میں اختیار دیا گیا ہے، آدمی جس چیز کے ذریعے چاہے تبدیل کر دے پھر اس میں سے سیاہ رنگ کا استثناء کر لیا گیا اور نبی اکرم صلی اللہ علیہ وسلم نے اس سے منع کر دیا تو باقی تمام چیزیں اپنی اصل حالت پر برقرار رہیں گی۔ [صحیح ابن حبان/كتاب الزينة والتطييب/حدیث: 5472]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا: ”سفید بالوں کی رنگت تبدیل کر دو اور یہودیوں و عیسائیوں سے مشابہت اختیار نہ کرو۔ (کیونکہ وہ بالوں کو خضاب نہیں لگاتے)“ [صحیح ابن حبان/كتاب الزينة والتطييب/حدیث: 5473]

سیدنا ابو ذر غفاری رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جس چیز کے ذریعے تم سفید بالوں کی رنگت تبدیل کرتے ہو، ان سب سے بہترین چیز مہندی اور کتم ہے۔“ [صحیح ابن حبان/كتاب الزينة والتطييب/حدیث: 5474]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے ”مونچھیں چھوٹی رکھنے اور داڑھی بڑی رکھنے“ کا حکم دیا ہے۔ (امام ابن حبان رحمہ اللہ فرماتے ہیں:) امام مالک نے ابوبکر بن نافع کے حوالے سے اس روایت کے علاوہ کوئی اور حدیث نقل نہیں کی اور ابوبکر بن نافع کا نام عمر ہے۔ [صحیح ابن حبان/كتاب الزينة والتطييب/حدیث: 5475]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم کے سامنے مجوسیوں کا ذکر کیا گیا تو آپ صلی اللہ علیہ وسلم نے ارشاد فرمایا: ”وہ لوگ مونچھیں بڑی رکھتے ہیں اور داڑھیاں منڈوا دیتے ہیں، تو تم لوگ ان کے برخلاف کرو۔“ تو سیدنا عبداللہ بن عمر رضی اللہ عنہما اپنی مونچھیں یوں صاف کروا دیتے تھے جس طرح بکری یا اونٹ کے بال صاف کیے جاتے ہیں۔ [صحیح ابن حبان/كتاب الزينة والتطييب/حدیث: 5476]

سیدنا زید بن ارقم رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص مونچھیں چھوٹی نہیں کرتا وہ ہم میں سے نہیں ہے۔“ [صحیح ابن حبان/كتاب الزينة والتطييب/حدیث: 5477]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”مونچھیں چھوٹی کرنا، ناخن تراشنا اور زیر ناف بال صاف کرنا فطرت کا حصہ ہے۔“ [صحیح ابن حبان/كتاب الزينة والتطييب/حدیث: 5478]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”پانچ چیزیں فطرت میں شامل ہیں: مونچھیں چھوٹی کرنا، بغلوں کے بال صاف کرنا، ناخن تراشنا، زیر ناف بال صاف کرنا اور ختنہ کرنا۔“ [صحیح ابن حبان/كتاب الزينة والتطييب/حدیث: 5479]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”فطرت پانچ چیزیں ہیں: ختنہ کروانا، زیرِ ناف بال صاف کرنا، مونچھیں چھوٹی کرنا، ناخن تراشنا اور بغلوں کے بال صاف کرنا۔“ [صحیح ابن حبان/كتاب الزينة والتطييب/حدیث: 5480]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”فطرت پانچ چیزیں ہیں: ناخن تراشنا، مونچھیں چھوٹی کرنا، زیرِ ناف بال صاف کرنا، ختنہ کرنا اور بغلوں کے بال صاف کرنا۔“ [صحیح ابن حبان/كتاب الزينة والتطييب/حدیث: 5481]