سیدنا عمرو بن العاص رضی اللہ عنہ بیان کرتے ہیں کہ ”نبی کریم صلی اللہ علیہ وسلم نے مجھے قرآن میں پندرہ سجدے پڑھائے، ان میں سے تین جزء مفصل (آخری منزل) میں (سورۃ النجم، سورۃ الانشقاق، اور سورۃ العلق میں) اور دو سورۃ الحج میں ہیں۔“ امام ابوداؤد رحمہ اللہ کہتے ہیں کہ ”سیدنا ابوالدرداء رضی اللہ عنہ کے واسطے سے نبی کریم صلی اللہ علیہ وسلم سے گیارہ سجدے منقول ہیں، البتہ اس کی سند کمزور ہے۔“ [سنن ابي داود/كتاب سجود القرآن /حدیث: 1401]

سیدنا عقبہ بن عامر رضی اللہ عنہ کہتے ہیں کہ میں نے رسول اللہ صلی اللہ علیہ وسلم سے کہا: ”اے اللہ کے رسول! کیا سورۃ الحج میں دو سجدے ہیں؟“ آپ صلی اللہ علیہ وسلم نے فرمایا: ”ہاں! اور جو یہ نہ کرنا چاہے وہ ان کی تلاوت ہی نہ کرے۔“ [سنن ابي داود/كتاب سجود القرآن /حدیث: 1402]

سیدنا ابن عباس رضی اللہ عنہما سے مروی ہے کہ ”رسول اللہ صلی اللہ علیہ وسلم نے مدینہ تشریف لانے کے بعد جزء مفصل میں کسی مقام پر سجدہ نہیں کیا۔“ [سنن ابي داود/كتاب سجود القرآن /حدیث: 1403]

سیدنا زید بن ثابت رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم کے سامنے سورۃ النجم کی تلاوت کی مگر آپ صلی اللہ علیہ وسلم نے اس میں سجدہ نہیں کیا۔“ [سنن ابي داود/كتاب سجود القرآن /حدیث: 1404]

خارجہ بن زید بن ثابت اپنے والد (سیدنا زید بن ثابت رضی اللہ عنہ) سے، وہ نبی کریم صلی اللہ علیہ وسلم سے مذکورہ بالا حدیث کے ہم معنی روایت کرتے ہیں۔ امام ابوداؤد رحمہ اللہ بیان کرتے ہیں کہ ”زید رضی اللہ عنہ امام تھے اور انہوں نے سجدہ نہیں کیا۔“ [سنن ابي داود/كتاب سجود القرآن /حدیث: 1405]

سیدنا عبداللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے سورہ النجم کی تلاوت کی اور اس میں سجدہ کیا اور حاضرین میں سے سب نے سجدہ کیا، سوائے ایک آدمی کے، اس نے کنکریوں کی یا مٹی کی ایک مٹھی لی اور اپنے چہرے کی طرف اٹھائی اور کہا: ”مجھے یہ کافی ہے“۔ سیدنا عبداللہ رضی اللہ عنہ بیان کرتے ہیں کہ بعد میں، میں نے اسے دیکھا کہ حالتِ کفر میں قتل کر دیا گیا۔ [سنن ابي داود/كتاب سجود القرآن /حدیث: 1406]

سیدنا ابوہریرہ رضی اللہ عنہ بیان کرتے ہیں کہ ”ہم نے رسول اللہ صلی اللہ علیہ وسلم کے ساتھ سورۃ ﴿إِذَا السَّمَاءُ انشَقَّتْ﴾ [سورة الانشقاق: 1] اور ﴿اقْرَأْ بِاسْمِ رَبِّكَ الَّذِي خَلَقَ﴾ [سورة العلق: 1] میں سجدے کیے۔“ امام ابوداؤد رحمہ اللہ فرماتے ہیں کہ ”سیدنا ابوہریرہ رضی اللہ عنہ فتح خیبر کے موقع پر سن چھ ہجری میں مسلمان ہوئے ہیں اور یہ سجدے کرنا رسول اللہ صلی اللہ علیہ وسلم کا آخری عمل ہے۔“ [سنن ابي داود/كتاب سجود القرآن /حدیث: 1407]

ابورافع رضی اللہ عنہ بیان کرتے ہیں کہ میں نے سیدنا ابوہریرہ رضی اللہ عنہ کے ساتھ عشاء کی نماز پڑھی، انہوں نے نماز میں سورۃ ﴿إِذَا السَّمَاءُ انشَقَّتْ﴾ [سورة الانشقاق: 1] تلاوت کی اور سجدہ بھی کیا، میں نے پوچھا: ”یہ کیسا سجدہ ہے؟“ انہوں نے کہا: ”میں نے سیدنا ابوالقاسم صلی اللہ علیہ وسلم کے پیچھے یہ سجدہ کیا ہے اور میں اسے نہیں چھوڑوں گا یہاں تک کہ آپ سے جا ملوں۔“ [سنن ابي داود/كتاب سجود القرآن /حدیث: 1408]

عکرمہ سے روایت ہے کہ سیدنا ابن عباس رضی اللہ عنہما نے بیان کیا کہ ”سورۃ ص کا سجدہ واجبی سجدوں میں سے نہیں ہے، جب کہ میں نے رسول اللہ صلی اللہ علیہ وسلم کو دیکھا ہے کہ آپ اس میں سجدہ کرتے تھے۔“ [سنن ابي داود/كتاب سجود القرآن /حدیث: 1409]

سیدنا ابو سعید خدری رضی اللہ عنہ سے روایت ہے، انہوں نے بیان کیا کہ رسول اللہ صلی اللہ علیہ وسلم نے منبر پر سورہ ص کی تلاوت کی۔ جب سجدے کی آیت پر پہنچے تو آپ منبر سے نیچے تشریف لائے اور سجدہ کیا اور آپ کے ساتھ لوگوں نے بھی سجدہ کیا۔ پھر ایک دوسرا موقع آیا اور آپ نے اسی کی تلاوت فرمائی۔ جب آپ سجدے کی آیت پر پہنچے تو لوگ سجدے کے لیے تیار ہو گئے۔ تو رسول اللہ صلی اللہ علیہ وسلم نے فرمایا: ”یہ ایک نبی (سیدنا داود علیہ السلام) کی توبہ کا ذکر ہے لیکن میں نے تمہیں دیکھا ہے کہ تم سجدہ کرنا چاہتے ہو۔“ چنانچہ آپ اترے اور سجدہ کیا اور لوگوں نے بھی سجدہ کیا۔ [سنن ابي داود/كتاب سجود القرآن /حدیث: 1410]