طلحہ بن مصرف بیان کرتے ہیں: میں نے سیدنا عبداللہ بن ابواوفیٰ رضی اللہ عنہ سے دریافت کیا: کیا نبی اکرم صلی اللہ علیہ وسلم نے کوئی وصیت کی تھی؟ انہوں نے فرمایا: نبی اکرم صلی اللہ علیہ وسلم نے ایسی کوئی چیز نہیں چھوڑی جس کے بارے میں آپ صلی اللہ علیہ وسلم کو وصیت کرنی پڑتی۔ میں نے دریافت کیا: پھر آپ صلی اللہ علیہ وسلم لوگوں کو وصیت کرنے کا حکم کیوں دیتے تھے؟ تو انہوں نے فرمایا: آپ صلی اللہ علیہ وسلم اللہ تعالیٰ کی کتاب (کے حکم کے مطابق) یہ ہدایت کرتے تھے۔ [صحیح ابن حبان/كتاب الوصية/حدیث: 6023]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جس مسلمان کے پاس کوئی ایسی چیز موجود ہو، جس کے بارے میں وہ وصیت کر سکتا ہو، تو اسے اس بات کا حق حاصل نہیں ہے دو راتیں گزر جائیں (اور اس نے وصیت نہ کی ہو) اس کی وصیت اس کے پاس لکھی ہونی چاہیے۔“ [صحیح ابن حبان/كتاب الوصية/حدیث: 6024]

سالم اپنے والد رضی اللہ عنہما کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”کسی مسلمان شخص کو اس بات کا حق حاصل نہیں ہے کہ اس پر تین دن گزر جائیں (اور اس نے وصیت نہ لکھی ہو) اس کی وصیت اس کے پاس ہونی چاہیے۔“ [صحیح ابن حبان/كتاب الوصية/حدیث: 6025]

سیدنا سعد بن ابی وقاص رضی اللہ عنہ بیان کرتے ہیں: حجۃ الوداع کے موقع پر نبی اکرم صلی اللہ علیہ وسلم میری عیادت کرنے کے لیے تشریف لائے کیونکہ میری بیماری شدید ہو چکی تھی، میں نے عرض کی: یا رسول اللہ صلی اللہ علیہ وسلم ! میری بیماری کا جو عالم ہے وہ آپ صلی اللہ علیہ وسلم ملاحظہ فرما رہے ہیں، میں ایک مالدار شخص ہوں اور میری وارث صرف میری ایک بیٹی ہے، کیا میں اپنا دو تہائی مال صدقہ کر دوں؟ نبی اکرم صلی اللہ علیہ وسلم نے ارشاد فرمایا: ”جی نہیں۔“ میں نے عرض کی: نصف؟ تو نبی اکرم صلی اللہ علیہ وسلم نے فرمایا: ”جی نہیں۔“ پھر آپ صلی اللہ علیہ وسلم نے ارشاد فرمایا: ”ایک تہائی کر دو، ویسے ایک تہائی بھی زیادہ ہے (راوی کو شک ہے شاید یہ الفاظ ہیں) بڑا ہے، اگر تم اپنے ورثاء کو خوشحال چھوڑ کر جاتے ہو، تو یہ اس سے زیادہ بہتر ہے کہ وہ تنگدست ہوں اور لوگوں سے مانگتے پھریں، تم اللہ کی رضا کے حصول کے لیے جو بھی خرچ کرو گے اس کا تمہیں اجر ملے گا، یہاں تک کہ تم اپنی بیوی کے منہ میں جو کچھ ڈالو گے (اس کا بھی اجر ملے گا)۔“ میں نے عرض کی: یا رسول اللہ صلی اللہ علیہ وسلم ! کیا میں اپنے ساتھیوں سے پیچھے رہ جاؤں گا؟ نبی اکرم صلی اللہ علیہ وسلم نے فرمایا: ”تم پیچھے نہیں رہو گے، تم اللہ کی رضا کے حصول کے لیے جو بھی نیک عمل کرو گے اس کے نتیجے میں تمہارے درجے اور قدر و منزلت میں اضافہ ہوگا، ہو سکتا ہے تمہیں طویل زندگی ملے، یہاں تک کہ بہت سے لوگ تم سے نفع حاصل کریں اور بہت سے لوگوں کو تمہاری وجہ سے نقصان کا سامنا کرنا پڑے۔ «اللَّهُمَّ أَمْضِ لِأَصْحَابِي هِجْرَتَهُمْ، وَلَا تَرُدَّهُمْ عَلَى أَعْقَابِهِمْ» ”اے اللہ! تو میرے ساتھیوں کی ہجرت کو باقی رہنے دے اور انہیں ایڑیوں کے بل واپس نہ لوٹانا“، لیکن سعد بن خولہ پر افسوس ہے۔“ (راوی کہتے ہیں:) نبی اکرم صلی اللہ علیہ وسلم نے ان پر افسوس کا اظہار اس لیے کیا کیونکہ ان کا انتقال مکہ میں ہو گیا تھا۔ [صحیح ابن حبان/كتاب الوصية/حدیث: 6026]

سیدہ عائشہ صدیقہ رضی اللہ عنہا بیان کرتی ہیں کہ عبیداللہ بن جحش نے اپنی بیوی ام حبیبہ بنت ابوسفیان رضی اللہ عنہا کے ہمراہ حبشہ کی طرف ہجرت کی، جب وہ حبشہ پہنچے تو بیمار ہو گئے، جب ان کی وفات کا وقت قریب آیا تو انہوں نے نبی اکرم صلی اللہ علیہ وسلم کے لیے وصیت کی، اس کے بعد نبی اکرم صلی اللہ علیہ وسلم نے سیدہ ام حبیبہ رضی اللہ عنہا کے ساتھ شادی کر لی اور نجاشی نے سیدنا شرحبیل بن حسنہ رضی اللہ عنہ کے ہمراہ سیدہ ام حبیبہ رضی اللہ عنہا کو (حبشہ سے مدینہ منورہ) بھیجا۔ [صحیح ابن حبان/كتاب الوصية/حدیث: 6027]