سیدنا زہری فرماتے ہیں: سیدنا ابوبکر صدیق رضی اللہ عنہ کا نام ” عبداللہ بن عثمان بن عامر بن عمرو بن کعب بن سعد بن تیم بن مرہ بن کعب بن لؤی بن غالب بن فہر ہے “۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4451]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ارشاد فرمایا: جو شخص دوزخ سے آزاد آدمی کو دیکھنا چاہتا ہے، وہ ابوبکر رضی اللہ عنہ کو دیکھ لے۔ آپ کے گھر والوں نے آپ کا نام ” عبداللہ بن عثمان بن عامر بن عمرو “ رکھا تھا۔ پھر ” عتیق “ نام آپ پر غالب آ گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4452]

سیدنا ابویحیی سے مروی ہے کہ سیدنا علی رضی اللہ عنہ قسم کھا کر کہا کرتے تھے کہ اللہ تعالیٰ نے سیدنا ابوبکر رضی اللہ عنہ کیلئے آسمان سے ” صدیق “ (کا لقب) اتارا۔ ٭٭ اگر محمد بن سلیمان مجہول نہ ہوتے تو میں اس اسناد کو صحیح قرار دیتا۔ اور نزال بن سبرہ کی سیدنا علی رضی اللہ عنہ سے روایت کردہ (درج ذیل) حدیث مذکورہ حدیث کی شاہد ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4453]

سیدنا نزال بن سبرہ رضی اللہ عنہ فرماتے ہیں: ہم نے سیدنا علی رضی اللہ عنہ کے ساتھ خوش دلی سے موافقت کی اور وہ مزاح فرما رہے تھے۔ ہم نے کہا: آپ اپنے اصحاب کے متعلق ہمیں کچھ بتائیں۔ آپ نے فرمایا: رسول اللہ صلی اللہ علیہ وسلم کے تمام صحابہ میرے اصحاب ہیں۔ ہم نے کہا: سیدنا ابوبکر رضی اللہ عنہ کے متعلق کچھ بتائیں۔ تو فرمایا: وہ ایسے انسان تھے کہ اللہ تعالیٰ نے سیدنا جبرائیل علیہ السلام اور سیدنا محمد صلی اللہ علیہ وسلم کی زبان مبارک سے اس کا نام ” صدیق “ رکھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4454]

ام المومنین سیدہ عائشہ رضی اللہ عنہا فرماتی ہیں: جب رسول اللہ صلی اللہ علیہ وسلم کو معراج کرائی گئی تو صبح کے وقت یہ خبر سن کر کچھ لوگ مرتد ہو گئے اور اہل ایمان نے تصدیق کی۔ کچھ لوگ یہ خبر سیدنا ابوبکر رضی اللہ عنہ کے پاس لے کر گئے اور بولے: کیا آپ کو اپنے ساتھی کی اس بات کا یقین ہے ” وہ یہ سمجھتا ہے کہ اس کو راتوں رات بیت المقدس تک کی سیر کرائی گئی ہے “ آپ رضی اللہ عنہ نے دریافت کیا: کیا یہ بات انہوں (یعنی نبی اکرم صلی اللہ علیہ وسلم ) نے کہی ہے؟ لوگوں نے کہا: جی ہاں۔ آپ رضی اللہ عنہ نے کہا: اگر انہوں (نبی اکرم صلی اللہ علیہ وسلم ) نے یہ فرمایا ہے تو یہ بالکل سچ ہے۔ انہوں نے کہا: کیا تم اس بات پر یقین رکھتے ہو کہ وہ رات ہی رات میں بیت المقدس تک گئے بھی ہیں اور صبح ہونے سے پہلے واپس بھی آ گئے ہیں؟ آپ رضی اللہ عنہ نے فرمایا: جی ہاں۔ میں تو اس سے بھی بڑی بات کو تسلیم کرتا ہوں۔ صبح و شام ان کے پاس آسمان سے آنے والی خبروں کی بھی تصدیق کرتا ہوں۔ اسی بناء پر ان کا نام ” ابوبکر صدیق “ رکھا گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4455]

سیدنا سعید بن مسیب رضی اللہ عنہ فرماتے ہیں: سیدنا ابوبکر صدیق رضی اللہ عنہ رسول اللہ صلی اللہ علیہ وسلم کے وزیر کی حیثیت رکھتے تھے حضور علیہ السلام جمیع امور میں انہی سے مشورہ کیا کرتے تھے۔ اور یہ اسلام میں بھی آپ کے ساتھی تھے، غار میں بھی ساتھی تھے اور جنگ بدر کے دن خیمے میں بھی ساتھ تھے اور قبر انور میں بھی ساتھی ہیں۔ اور رسول اللہ صلی اللہ علیہ وسلم ان پر اور کسی کو ترجیح نہیں دیا کرتے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4456]

ام المومنین سیدہ عائشہ رضی اللہ عنہا فرماتی ہیں: سیدنا ابوبکر رضی اللہ عنہ کا انتقال 22 جمادی الاولیٰ 13 ہجری منگل کی رات میں ہوا۔ اس وقت آپ کی عمر 63 برس تھی۔ آپ 15 دن بیمار رہے۔ آپ کے بیمار ہونے کی وجہ یہ تھی کہ آپ نے سخت سردی کے موسم میں غسل کر لیا تھا جس کی وجہ سے آپ کو بخار ہو گیا اور یہ بخار 15 دن تک رہا، ان ایام میں آپ نماز کیلئے نہیں نکل سکے۔ تو آپ کی جگہ سیدنا عمر رضی اللہ عنہ نماز پڑھاتے رہے اور آپ اس مکان میں تھے جو رسول اللہ صلی اللہ علیہ وسلم نے آپ کو دیا تھا اور یہ سیدنا عثمان رضی اللہ عنہ کے موجودہ مکان کے بالکل سامنے تھا۔ آپ نے وصیت کی تھی کہ ان کی بیوی سیدہ اسماء بنت عمیس رضی اللہ عنہا آپ کو غسل دیں۔ لیکن وہ ضعیف ہو چکی تھیں اس لئے سیدنا عبدالرحمن رضی اللہ عنہ نے ان کے ساتھ معاونت کی۔ آپ کو دو کپڑوں میں کفن دیا گیا ان میں بھی ایک کپڑا دھلا ہوا تھا اور یہ بھی روایت موجود ہے کہ تین کپڑوں میں کفن دیا گیا تھا۔ پھر آپ کو چارپائی پر رکھا گیا، اور یہ ام المومنین سیدہ عائشہ رضی اللہ عنہا کی وہ چارپائی تھی جس پر آپ سویا کرتی تھیں۔ سیدنا ابوبکر رضی اللہ عنہ کا جنازہ اسی پر اٹھایا گیا تھا اور سیدنا عمر رضی اللہ عنہ نے (رسول اللہ صلی اللہ علیہ وسلم کی) قبر انور اور منبر کے درمیان آپ کا جنازہ پڑھایا، اور آپ کو رات کے وقت اسی حجرے میں رسول اللہ صلی اللہ علیہ وسلم کے ہمراہ دفن کیا گیا اور ان کا سر رسول اللہ صلی اللہ علیہ وسلم کے کندھوں کے مقابل میں رکھا گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4457]

سالم بن عبداللہ اپنے والد کا یہ بیان نقل کرتے ہیں: سیدنا ابوبکر رضی اللہ عنہ کی وفات کا سبب رسول اللہ صلی اللہ علیہ وسلم کی وفات تھی۔ (کیونکہ حضور علیہ السلام کے انتقال کے بعد) آپ کا جسم مسلسل کمزور سے کمزور تر ہوتا گیا حتی کہ آپ رضی اللہ عنہ کا انتقال ہو گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4458]

ابن شہاب فرماتے ہیں: ایک دن کسی آدمی نے سیدنا ابوبکر رضی اللہ عنہ کو خزیرہ (آٹے اور چربی کا بنے ہوئے کھانے) کا ایک پیالہ ہدیہ دیا۔ اس وقت آپ کے پاس حارث بن کلدہ نامی ایک صاحب علم شخص موجود تھا۔ جب ان دونوں نے اس میں سے کھا لیا تو ابن کلدہ بولا: اس میں سم سنہ ہے (سم سنہ اس زہر کو کہتے ہیں جس کا اثر ایک سال کے اندر اندر ہو جاتا ہے) (ابن شہاب کہتے ہیں) اس ذات کی قسم! جس کے قبضہ میں میری جان ہے ابھی ایک سال پورا نہیں ہوا تھا کہ سال کے آخری ایام میں ایک ہی دن میں دونوں کا انتقال ہو گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4459]

سیدنا شعبی رضی اللہ عنہ فرماتے ہیں: اس کمینی دنیا سے کیا توقع کی جا سکتی ہے کہ رسول اللہ صلی اللہ علیہ وسلم کو زہر دیا گیا۔ سیدنا ابوبکر صدیق رضی اللہ عنہ کو زہر دیا گیا۔ سیدنا عمر بن خطاب رضی اللہ عنہ کو شہید کیا گیا۔ سیدنا عثمان رضی اللہ عنہ کو شہید کیا گیا۔ سیدنا علی رضی اللہ عنہ کو شہید کیا گیا۔ سیدنا حسن رضی اللہ عنہ کو زہر دیا گیا۔ سیدنا حسین رضی اللہ عنہ کو بھی شہید کیا گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4460]