سیدنا نافع بن جبیر بن بن مطعم اپنے والد کا یہ بیان نقل کرتے ہیں: (وہ فرماتے ہیں) لوگ کہتے ہیں: میرے اندر غرور ہے، حالانکہ میں گدھے پر سوار ہوتا ہوں، بکری کا دودھ دوہتا ہوں، اور کھلی چوڑی چادر پہنتا ہوں اور رسول اللہ صلی اللہ علیہ وسلم نے ارشاد فرمایا ہے کہ ” جس نے ایسا کیا، اس میں ذرا بھی تکبر نہیں ہے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7560]

ابوسلام الاسود کہتے ہیں: سیدنا عمر بن عبدالعزیز رضی اللہ عنہ کو (میرے بارے میں) یہ اطلاع ملی کہ میں سیدنا ثوبان کے واسطے سے ابوالاحوص کی حدیث بیان کرتا ہوں، سیدنا عمر بن عبدالعزیز نے اپنے آدمی بھیجے، وہ ان کو سیدنا عمر بن عبدالعزیز کے پاس لے آئے، انہوں نے سیدنا عمر بن عبدالعزیز رضی اللہ عنہ کو سلام کرنے کے بعد کہا: اے امیرالمومنین! سفر کی وجہ سے میرے پاؤں میں زخم ہو گیا ہے، سیدنا عمر بن عبدالعزیز رضی اللہ عنہ نے اظہار افسوس کرتے ہوئے کہا: ہمارا ارادہ آپ کو تکلیف دینے کا نہ تھا، اصل بات یہ ہے کہ مجھے پتہ چلا ہے کہ تم سیدنا ثوبان کے حوالے سے، حوض کوثر کے بارے میں نبی اکرم صلی اللہ علیہ وسلم کا کوئی فرمان روایت کرتے ہو، مجھے یہ خواہش ہوئی کہ میں وہ فرمان مصطفوی تم سے بالمشافہہ سنو، (اس لیے تمہیں یہاں لانے کی تکلیف دی گئی ہے) ابوسلام نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ میرا حوض (مقام) عدن (یہ ساحلی پٹی کا علاقہ ہے، جہاں پر یمن کا ساحل ختم ہوتا ہے اور ہند کا ساحل شروع ہوتا ہے) سے لے کر عمان البلقاء (اس سے مراد یمن یا شام کی بستی ہے اور البلقاء، سے مراد بعض مؤرخین کے نزدیک فلسطین کا ایک شہر ہے) تک ہے۔ اس (حوض) کا پانی دودھ سے زیادہ سفید اور شہد سے زیادہ میٹھا ہے، اس کے پیالوں کی تعداد ستاروں کے برابر ہے، جو شخص اس کا ایک گھونٹ پی لے گا، اس کو کبھی پیاس نہیں لگے گی، اس حوض پر سب سے پہلے فقراء مہاجرین آئیں گے، جو پراگندہ بالوں والے، بوسیدہ کپڑوں والے ہوں گے، مالدار خواتین سے وہ نکاح نہیں کرتے اور نہ ان کے لیے مسدود راہیں کھلتی ہیں۔ سیدنا عمر بن عبدالعزیز رضی اللہ عنہ نے فرمایا: لیکن میں نے تو مالدار خاتون فاطمہ بنت عبدالملک سے نکاح کیا ہے اور میرے لیے مسدود راہیں کھول دی جاتی ہیں، اب میں اپنا سر نہیں دھویا کروں گا، تاکہ میرے بال پراگندہ ہو جائیں اور نہ میں اپنے جسم پر پہنے ہوئے کپڑے تبدیل کیا کروں گا تاکہ یہ بوسیدہ ہو جائیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7561]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم پر سفید کپڑے لازم ہیں، زندہ لوگ بھی سفید کپڑے پہنیں اور اپنے فوت شدگان کو کفن بھی سفید کپڑوں میں ہی دیا کرو، کیونکہ کپڑوں میں، سفید کپڑا سب سے بہتر ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو ابن سفیان عیینہ کے واسطے سے نقل نہیں کیا۔ اور اسماعیل بن علیہ نے اس کو ایوب سے روایت کرنے میں ارسال سے کام لیا ہے۔ [المستدرك على الصحيحين/كتاب اللباس/حدیث: 7562]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم پر سفید کپڑے لازم ہیں، زندہ لوگ بھی سفید کپڑے پہنیں اور اپنے فوت شدگان کو کفن بھی سفید کپڑوں میں ہی دیا کرو۔ [المستدرك على الصحيحين/كتاب اللباس/حدیث: 7563]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم پر سفید کپڑے لازم ہیں، زندہ لوگ بھی سفید کپڑے پہنیں اور اپنے فوت شدگان کو کفن بھی سفید کپڑوں میں ہی دیا کرو، کیونکہ کپڑوں میں، سفید کپڑا سب سے بہتر ہے۔ ٭٭ اسی مفہوم کی ایک اور حدیث سیدنا عبداللہ بن عباس رضی اللہ عنہما اور سیدنا سمرہ بن جندب رضی اللہ عنہ سے بھی مروی ہے لیکن اس میں کچھ الفاظ کا اضافہ ہے۔ [المستدرك على الصحيحين/كتاب اللباس/حدیث: 7564]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: بہترین کپڑا سفید ہے، زندہ لوگ بھی سفید کپڑے پہنیں اور اپنے فوت شدگان کو کفن بھی سفید کپڑوں میں ہی دیا کرو۔ بہترین سرمہ ” اثمد “ ہے۔ یہ بینائی کو تیز کرتا ہے اور بال گھنے کرتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور سیدنا سمرہ بن جندب رضی اللہ عنہ سے مروی حدیث کے بارے میں اختلاف کو میں نے ابوقلابہ والی حدیث سے پہلے بیان کیا ہے۔ اس کی اسناد امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7565]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: سفید کپڑے پہنا کرو، کیونکہ یہ صاف ستھرے ہوتے ہیں، اور اسی میں اپنے فوت شدگان کو کفن دیا کرو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7566]

سیدنا جابر بن عبداللہ فرماتے ہیں: رسول اللہ صلی اللہ علیہ وسلم ہمارے پاس تشریف لائے، آپ صلی اللہ علیہ وسلم نے ایک آدمی کو دیکھا کہ اس کے بال بکھرے ہوئے تھے، آپ صلی اللہ علیہ وسلم نے فرمایا: اس کے پاس کوئی ایسی چیز نہیں ہے جو اس کے بالوں کو درست کر دے۔ پھر آپ صلی اللہ علیہ وسلم نے ایک آدمی کو دیکھا، اس کے کپڑے بہت بوسیدہ میلے کچیلے تھے، آپ صلی اللہ علیہ وسلم نے فرمایا: اس آدمی کو کوئی ایسی چیز نہیں ملتی جس کے ساتھ یہ اپنے کپڑوں کو دھو لے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7567]

سیدنا ام حصین احمسیہ فرماتی ہیں: میں نے نبی اکرم صلی اللہ علیہ وسلم کو دیکھا، آپ کے اوپر ایک بڑی چادر تھی، جس کو آپ نے اپنی بغل کے نیچے سے لپیٹا ہوا تھا، اور میں دیکھ رہا تھا کہ آپ کے بازو کا پٹھا حرکت کر رہا تھا، میں نے آپ صلی اللہ علیہ وسلم کو یہ فرماتے ہوئے سنا ہے کہ ” اے لوگو! اللہ تعالیٰ سے ڈرو، تم پر اگر کوئی حبشی غلام بھی امیر بنا دیا جائے تو تم اس کی بات کو بھی غور سے سنو اور جب تک وہ تمہیں کتاب اللہ کے موافق حکم دے تب تک اس کی فرمانبرداری لازمی کرو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7568]

سیدنا جابر بن سلیم ہجیمی رضی اللہ عنہ فرماتے ہیں: مدینے کے ایک راستے میں، رسول اللہ صلی اللہ علیہ وسلم کے ساتھ میری ملاقات ہو گئی، آپ کے اوپر کاٹن کی ایک چادر تھی، جس کی کناریاں کھلی ہوئی تھیں، میں نے آپ صلی اللہ علیہ وسلم کو سلام کیا، (اور سلام کرنے کے لیے یہ الفاظ استعمال کیے) ” علیک السلام یا محمد “ (یا) علیک السلام یا رسول اللہ “ آپ صلی اللہ علیہ وسلم نے فرمایا:” علیک السلام “ مردوں کا سلام ہے۔” علیک السلام “ تو مردوں کا سلام ہے۔” علیک السلام “ تو مُردوں کا سلام ہے، تمہیں ” سلام علیکم “ کہنا چاہیے،” سلام علیکم “ کہنا چاہیے۔” سلام علیکم “ کہنا چاہیے، جابر بن سلیم رضی اللہ عنہ فرماتے ہیں: میں نے پھر آپ سے ازار کے بارے میں پوچھا تو آپ نے نیچے کی جانب جھک کر اپنی پنڈلی کی بڑی ہڈی کو پکڑ کر کہا: یہاں تک ازار ہونا چاہیے۔ نہیں تو ٹخنوں کے اوپر تک ہو، اور اس سے بھی نیچے تک کیا، تو یہ تکبر کی بات ہے اور اللہ تعالیٰ متکبرین کو پسند نہیں کرتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7569]