ام المومنین سیدہ عائشہ رضی اللہ عنہا فرماتی ہیں: انہوں نے رسول اللہ صلی اللہ علیہ وسلم کے لیے اون کا کالے رنگ کا جبہ بنایا، حضور صلی اللہ علیہ وسلم نے اس کو پہنا، جب آپ صلی اللہ علیہ وسلم کو پسینہ مبارک آیا تو آپ کو اون کی بدبو محسوس ہوئی، آپ صلی اللہ علیہ وسلم نے اس کو اتار دیا، کیونکہ حضور صلی اللہ علیہ وسلم کو عمدہ خوشبو اچھی لگتی تھی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7580]

سیدنا عبداللہ بن عباس رضی اللہ عنہما کے بارے میں مروی ہے کہ: دو عراقی شخص ان کے پاس آئے، اور ان سے جمعہ کے غسل کے بارے میں دریافت کیا کہ یہ غسل واجب ہے یا نہیں؟ سیدنا عبداللہ بن عباس رضی اللہ عنہما نے فرمایا: جس نے غسل کیا اور اس نے صفائی حاصل کی، اس نے بہت اچھا کام کیا، (اور جس نے غسل نہ کیا، اس کے ذمہ کوئی گناہ نہیں ہے، پھر فرمایا) میں تمہیں بتاتا ہوں کہ جمعہ کا غسل کیسے شروع ہوا۔ اصل بات یہ ہے کہ رسول اللہ صلی اللہ علیہ وسلم کے زمانے میں لوگ غریب ہوتے تھے، اون کے کپڑے پہنتے تھے، اپنی پیٹھ پر کھجوریں لادتے تھے، مسجد تنگ تھی، اس کی چھت بہت نیچی تھی، آپ صلی اللہ علیہ وسلم کا منبر شریف چھوٹا سا تھا، اس کی چند سیڑھیاں تھیں، ایک دفعہ کا ذکر ہے کہ سخت گرمی کے دنوں میں رسول اللہ صلی اللہ علیہ وسلم جمعہ کے لیے تشریف لائے، آپ صلی اللہ علیہ وسلم نے جمعہ کا خطبہ دیا، لوگوں کو پسینہ آ رہا تھا، پسینے اور اون کی بدبو سے ان کی طبیعتیں خراب ہو رہی تھیں، حتیٰ کہ لوگوں کو ایک دوسرے سے تکلیف ہونے لگی، بلکہ یہ بدبو رسول اللہ صلی اللہ علیہ وسلم تک بھی پہنچ گئی، اس وقت رسول اللہ صلی اللہ علیہ وسلم منبر پر جلوہ گر تھے، آپ صلی اللہ علیہ وسلم نے فرمایا: اے لوگو! جب یہ دن آئے تو غسل کر لیا کرو، جس کے پاس کوئی خوشبو یا تیل وغیرہ ہو، وہ لگا لیا کرے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب اللباس/حدیث: 7581]

اسماعیل بن عبداللہ بن جعفر اپنے والد کا یہ بیان نقل کرتے ہیں (وہ فرماتے ہیں) میں نے رسول اللہ صلی اللہ علیہ وسلم کو دیکھا ہے، آپ صلی اللہ علیہ وسلم نے عمامہ پہنا اور چادر اوڑھ رکھی تھی۔ دونوں زعفران سے رنگے ہوئے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7582]

عبداللہ بن بریدہ اپنے والد کا بیان نقل کرتے ہیں: (وہ فرماتے ہیں) رسول اللہ صلی اللہ علیہ وسلم جمعہ کا خطبہ دے رہے تھے۔ سیدنا حسن اور حسین رضی اللہ عنہما تشریف لائے، انہوں نے سرخ رنگ کا لباس زیب تن کیا ہوا تھا، یہ دونوں شہزادے، کبھی گرتے کبھی اٹھ جاتے، رسول اللہ صلی اللہ علیہ وسلم منبر شریف سے نیچے اترے اور دونوں شہزادوں کو اپنے سامنے بٹھا لیا، اور فرمایا: اللہ اور اس کے رسول نے بالکل سچ فرمایا ہے کہ ” بے شک تمہارا مال اور تمہاری اولاد آزمائش ہیں “ میں نے ان دونوں کو دیکھا تو مجھ سے رہا نہیں گیا۔ اس کے بعد آپ صلی اللہ علیہ وسلم نے دوبارہ خطبہ شروع فرما دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ اور اس بارے میں شافی بیان درج ذیل حدیث میں موجود ہے۔ [المستدرك على الصحيحين/كتاب اللباس/حدیث: 7583]

7584 - عبداللہ بن عمرو بن العاص (رضی اللہ عنہ) سے روایت ہے کہ: وہ نبی کریم صلی اللہ علیہ وسلم کی خدمت میں حاضر ہوئے جبکہ انہوں نے کسم (گہرے سرخ رنگ) میں رنگا ہوا لباس پہن رکھا تھا۔ آپ صلی اللہ علیہ وسلم نے دریافت فرمایا: "تمہارے پاس یہ کہاں سے آیا؟" انہوں نے عرض کیا: "یہ میرے گھر والوں نے میرے لیے تیار کیا ہے"۔ تو نبی کریم صلی اللہ علیہ وسلم نے فرمایا: "اسے جلا دو"۔ یہ حدیث شیخین (امام بخاری و مسلم) کی شرائط پر صحیح ہے، لیکن انہوں نے اسے (ان الفاظ کے ساتھ) اپنی کتب میں نقل نہیں کیا۔ اس کی واضح تفصیل اس حدیث میں ہے جو (آگے آ رہی ہے): [المستدرك على الصحيحين/كتاب اللباس/حدیث: 7584]

سیدنا عبداللہ بن عمرو رضی اللہ عنہما فرماتے ہیں: میں ایک دن رسول اللہ صلی اللہ علیہ وسلم کی بارگاہ میں حاضر ہوا، میں نے زرد رنگ کے کپڑے پہنے ہوئے تھے، رسول اللہ صلی اللہ علیہ وسلم نے مجھ سے فرمایا: یہ کیسے کپڑے ہیں؟ میں نے کہا: یہ ام عبداللہ نے میرے لیے بنائے ہیں۔ رسول اللہ صلی اللہ علیہ وسلم نے فرمایا: میں تجھے قسم دیتا ہوں کہ جب تم ام عبداللہ کے پاس واپس جاؤ تو اس سے کہنا کہ وہ تنور میں آگ جلائے اور یہ کپڑے اس میں ڈال دے۔ میں وہاں سے واپس آیا اور حضور صلی اللہ علیہ وسلم کے حکم کے مطابق وہ کپڑے جلا ڈالے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ امام بخاری رحمۃ اللہ علیہ اور امام مسلم رحمۃ اللہ علیہ نے سیدنا علی رضی اللہ عنہ سے مروی وہ حدیث شریف نقل کی ہے جس سے یہ ثابت ہے کہ مرد کو زرد رنگ کے کپڑے پہننا منع ہے۔ وہ حدیث ہے ” سیدنا علی رضی اللہ عنہ فرماتے ہیں: نبی اکرم صلی اللہ علیہ وسلم نے مجھے منع کیا ہے، میں یہ نہیں کہتا کہ تمہیں منع کیا ہے۔ [المستدرك على الصحيحين/كتاب اللباس/حدیث: 7585]

سیدنا عبداللہ بن عمرو بن العاص رضی اللہ عنہما فرماتے ہیں کہ رسول اللہ صلی اللہ علیہ وسلم نے ان کو زرد رنگ کے کپڑے پہنے ہوئے دیکھا، اور فرمایا: یہ کفار کے کپڑے ہیں، یہ مت پہنا کرو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7586]

سیدنا عبداللہ بن عمرو بن العاص رضی اللہ عنہما فرماتے ہیں: نبی اکرم صلی اللہ علیہ وسلم کا گزر ایک شخص کے پاس سے ہوا، اس نے سرخ رنگ کے کپڑے پہنے ہوئے تھے، اس نے حضور صلی اللہ علیہ وسلم کو سلام کیا، حضور صلی اللہ علیہ وسلم نے اس کے سلام کا جواب نہیں دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7587]

سیدنا عمران بن حصین رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میں سرخ رنگ اور زرد رنگ کے کپڑے نہیں پہنتا اور ایسا قمیص بھی نہیں پہنتا جس میں ریشم کی سلائی کی گئی ہو۔ سیدنا حسن رضی اللہ عنہ نے اپنی قمیص کے گریبان کی جانب اشارہ کیا اور رسول اللہ صلی اللہ علیہ وسلم نے فرمایا: خبردار مرد کی خوشبو، ایسی خوشبو ہونی چاہیے جس میں رنگ نہ ہو، اور عورت کی خوشبو وہ ہے جس میں رنگ ہو، خوشبو نہ ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ ہمارے اساتذہ کا اگرچہ اس بارے میں اختلاف ہے کہ حسن نے عمران بن حصین سے احادیث سنی ہیں یا نہیں، لیکن اکثر محدثین کی رائے یہ ہے کہ حسن نے عمران بن حصین سے سماع کیا ہے۔ [المستدرك على الصحيحين/كتاب اللباس/حدیث: 7588]

سیدنا انس بن مالک رضی اللہ عنہ فرماتے ہیں: آج لوگ مسجد میں طیالسی چادریں کثرت سے استعمال کرنے میں خیبر کے یہودیوں کے ساتھ بہت ملتے جلتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس کا مطلب یہ ہے کہ رنگی ہوئی چادریں، کیونکہ یہ یہودیوں کا لباس ہے۔ [المستدرك على الصحيحين/كتاب اللباس/حدیث: 7589]