سیدنا عبداللہ بن عمرو رضی اللہ عنہ روایت کرتے ہیں کہ نبی کریم صلی اللہ علیہ وسلم نے فرمایا: «قَفْلَةٌ كَغَزْوَةٍ» ”جہاد سے واپس لوٹنا (فضیلت اور ثواب میں) ایسے ہے جیسے جہاد کے لیے جانا۔“ [سنن ابي داود/كتاب الجهاد /حدیث: 2487]

جناب عبد الخبیر بن ثابت بن قیس بن شماس اپنے والد سے، وہ دادا (ثابت بن قیس رضی اللہ عنہ) سے روایت کرتے ہیں، انہوں نے کہا کہ ایک عورت نبی کریم صلی اللہ علیہ وسلم کی خدمت میں آئی جس کا نام ام خلاد رضی اللہ عنہا تھا، اس نے نقاب ڈالا ہوا تھا، وہ اپنے بیٹے کے بارے میں سوال کر رہی تھی جبکہ وہ (جہاد میں) مارا گیا تھا۔ اصحابِ نبی کریم صلی اللہ علیہ وسلم میں سے کسی نے اس سے کہا: ”تم اپنے بیٹے کے بارے میں سوال کرنے آئی ہو اور نقاب ڈال رکھا ہے؟“ (ایسی پریشانی میں پردے کا یہ اہتمام؟) اس نے کہا: ”اگر میرا بیٹا کھو گیا ہے تو میں نے اپنی حیا تو نہیں کھوئی ہے۔“ رسول اللہ صلی اللہ علیہ وسلم نے فرمایا: ”تیرے بیٹے کو دو شہیدوں کا ثواب ہے۔“ اس نے پوچھا: ”یہ کیوں اے اللہ کے رسول صلی اللہ علیہ وسلم ؟“ آپ صلی اللہ علیہ وسلم نے فرمایا: ”کیونکہ اس کو اہل کتاب نے قتل کیا ہے۔“ [سنن ابي داود/كتاب الجهاد /حدیث: 2488]

سیدنا عبداللہ بن عمرو رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”حج، عمرہ یا جہاد فی سبیل اللہ کی غرض کے سوا سمندری سفر نہ کیا جائے، بلاشبہ سمندر کے نیچے آگ ہے اور آگ کے نیچے سمندر ہے۔“ [سنن ابي داود/كتاب الجهاد /حدیث: 2489]

سیدنا انس بن مالک رضی اللہ عنہ سے روایت ہے کہ (میری خالہ) ام حرام بنت ملحان رضی اللہ عنہا نے بیان کیا اور یہ (انس رضی اللہ عنہ کی والدہ) ام سلیم رضی اللہ عنہا کی ہمشیرہ ہیں کہ رسول اللہ صلی اللہ علیہ وسلم نے (ایک بار) ان کے ہاں قیلولہ کیا۔ آپ صلی اللہ علیہ وسلم جب بیدار ہوئے تو ہنس رہے تھے۔ کہتی ہیں، میں نے پوچھا: ”اے اللہ کے رسول! آپ کس بات پر ہنس رہے ہیں؟“ آپ صلی اللہ علیہ وسلم نے فرمایا: ”میں نے دیکھا کہ (میری امت میں سے) ایک قوم کے لوگ (بڑی شان سے) سمندر میں سفر کر رہے ہیں جیسے کہ بادشاہ تختوں پر ہوں۔“ کہتی ہیں، میں نے کہا: ”اے اللہ کے رسول! دعا فرمائیں کہ اللہ مجھے بھی ان میں کر دے۔“ آپ صلی اللہ علیہ وسلم نے فرمایا: ”تم بھی ان میں سے ہو۔“ آپ صلی اللہ علیہ وسلم پھر سو گئے اور جب بیدار ہوئے تو پھر ہنس رہے تھے۔ میں نے کہا: ”اے اللہ کے رسول! آپ کس بات پر ہنس رہے ہیں؟“ تو آپ صلی اللہ علیہ وسلم نے پہلے والی بات بتائی۔ میں نے کہا: ”اے اللہ کے رسول! اللہ سے دعا کیجیے کہ وہ مجھے ان لوگوں میں سے بنا دے۔“ آپ صلی اللہ علیہ وسلم نے فرمایا: ”تم پہلے لوگوں میں ہوگی۔“ انس رضی اللہ عنہ بیان کرتے ہیں کہ بعد میں سیدنا عبادہ بن صامت رضی اللہ عنہ نے ان سے نکاح کر لیا اور جہاد کے لیے سمندر کے سفر پر گئے اور ان (ام حرام رضی اللہ عنہا) کو بھی ساتھ لے گئے اور جب واپس لوٹے تو ایک خچر ان کے لیے لایا گیا کہ اس پر سوار ہوں تو اس نے ان کو گرا دیا، اس سے ان کی گردن ٹوٹ گئی اور وہ وفات پا گئیں۔ [سنن ابي داود/كتاب الجهاد /حدیث: 2490]

سیدنا انس بن مالک رضی اللہ عنہ سے مروی ہے کہ رسول اللہ صلی اللہ علیہ وسلم جب قباء تشریف لے جاتے، تو ام حرام بنت ملحان رضی اللہ عنہا کے ہاں بھی جاتے اور وہ سیدنا عبادہ بن صامت رضی اللہ عنہ کی زوجیت میں تھیں۔ آپ ایک دن ان کے ہاں تشریف لے گئے تو انہوں نے آپ کو کھانا پیش کیا اور پھر بیٹھ کر آپ کے سر سے جوئیں تلاش کرنے لگیں۔ اور یہی مذکورہ حدیث بیان کی۔ امام ابوداؤد رحمہ اللہ کہتے ہیں: ”بنت ملحان کی وفات قبرص میں ہوئی تھی۔“ [سنن ابي داود/كتاب الجهاد /حدیث: 2491]

سیدہ ام سلیم رضی اللہ عنہا کی ہمشیرہ رمیصاء رضی اللہ عنہا سے روایت ہے کہ ”نبی کریم صلی اللہ علیہ وسلم سو گئے، پھر جاگے جبکہ یہ اپنا سر دھو رہی تھیں، آپ صلی اللہ علیہ وسلم جاگے تو ہنس رہے تھے، اس نے کہا: ”اے اللہ کے رسول! کیا آپ صلی اللہ علیہ وسلم میرے سر پر ہنس رہے ہیں؟“ آپ صلی اللہ علیہ وسلم نے فرمایا: ”نہیں۔“ اور پوری حدیث بیان کی جس میں کچھ کمی بیشی ہے۔“ امام ابوداؤد رحمہ اللہ فرماتے ہیں: ”رمیصاء ام سلیم رضی اللہ عنہا کی رضاعی بہن ہیں اور یہی ام حرام بنت ملحان رضی اللہ عنہا ہیں۔“ [سنن ابي داود/كتاب الجهاد /حدیث: 2492]

سیدہ ام حرام رضی اللہ عنہا، نبی کریم صلی اللہ علیہ وسلم سے روایت کرتی ہیں کہ آپ صلی اللہ علیہ وسلم نے فرمایا: ”سمندر کے سفر میں جس کا سر چکرائے اور قے آ جائے تو اس کے لیے ایک شہید کا ثواب ہے اور جو ڈوب کر مر جائے اس کو دو شہیدوں کا ثواب ہے۔“ [سنن ابي داود/كتاب الجهاد /حدیث: 2493]

سیدنا ابوامامہ باہلی رضی اللہ عنہ، رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”تین (قسم کے) آدمیوں کا اللہ عزوجل ضامن ہے۔ جو شخص اللہ کی راہ میں جہاد کے لیے نکلا تو اللہ اس کا ضامن ہے حتیٰ کہ (اگر) اس کی وفات ہو جائے تو اس کو جنت میں داخل کرے گا یا اجر و ثواب اور غنیمت کے ساتھ واپس لوٹائے گا، دوسرا وہ آدمی جو مسجد کی طرف گیا تو اللہ اس کا ضامن ہے حتیٰ کہ (اگر) اس کی وفات ہو جائے تو اس کو جنت میں داخل کرے گا یا اجر و ثواب اور غنیمت کے ساتھ لوٹائے گا، اور تیسرا وہ آدمی جو سلام (یا سلامتی) کے ساتھ اپنے گھر میں داخل ہوا تو اللہ عزوجل اس کا ضامن ہے۔“ [سنن ابي داود/كتاب الجهاد /حدیث: 2494]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”کافر اور اس کا قاتل (مجاہد) آگ میں کبھی بھی اکٹھے نہیں ہو سکتے۔“ [سنن ابي داود/كتاب الجهاد /حدیث: 2495]

سلیمان بن بریدہ اپنے والد بریدہ رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”خانہ نشین لوگوں پر مجاہدین کی عورتوں کی عزت و حرمت ایسے (واجب اور لازم) ہے جیسے کہ ان کی اپنی مائیں ہوں، جو کوئی (جہاد سے) پیچھے رہے اور مجاہدین کے اہل میں خیانت (بدنظری یا خباثت) کا معاملہ کرے تو قیامت کے روز ایسے شخص کے لیے جھنڈا لگایا جائے گا اور (اسے اہل محشر میں رسوا کرتے ہوئے) مجاہد سے کہا جائے گا: یہی شخص ہے جو تیرے پیچھے تیرے اہل میں برائی کرتا رہا، اس کی نیکیوں میں سے جو لینا چاہتا ہے، لے لے۔“ پھر رسول اللہ صلی اللہ علیہ وسلم ہماری طرف متوجہ ہوئے اور فرمایا: ”تو تمہارا کیا خیال ہے؟“ (بھلا وہ کچھ چھوڑے گا، یعنی ہرگز نہیں، سبھی نیکیاں سمیٹ لے گا)۔ امام ابوداؤد رحمہ اللہ بیان کرتے ہیں کہ راویِ حدیث قعنب ایک نیک آدمی تھے، ابن ابی لیلیٰ نے ان کو قاضی بنانا چاہا تو انہوں نے انکار کر دیا اور کہا کہ: ”مجھے ایک درہم کی کوئی معمولی چیز بھی لینی ہوتی ہے تو دوسرے آدمی کی مدد لیتا ہوں (تو قضاء و عدالت کی ذمہ داریاں کیسے اٹھا سکتا ہوں؟)۔“ انہوں نے کہا: ”ہم میں سے کون ہے جسے دوسرے کی مدد کی ضرورت نہ پڑتی ہو؟“ انہوں نے کہا: ”اب تو اجازت دیں میں کچھ سوچ لوں۔“ چنانچہ اجازت دی گئی تو وہ چھپ گئے۔ سفیان بیان کرتے ہیں کہ وہ اسی کیفیت میں تھے کہ گھر کی چھت گر پڑی اور اس سے وہ وفات پا گئے۔ [سنن ابي داود/كتاب الجهاد /حدیث: 2496]