سیدنا اسامہ بن شریک رضی اللہ عنہ کہتے ہیں کہ میں نبی کریم صلی اللہ علیہ وسلم کی خدمت میں پہنچا (تو دیکھا کہ) آپ کے صحابہ (آپ کی مجلس میں) ایسے بیٹھے تھے گویا ان کے سروں پر پرندے ہوں، (یعنی انتہائی باادب اور پرسکون تھے) چنانچہ میں نے سلام کیا اور بیٹھ گیا۔ ادھر ادھر سے بدوی لوگ آئے اور انہوں نے پوچھا: ”اے اللہ کے رسول! کیا ہم دوا دارو کر لیا کریں؟“ آپ صلی اللہ علیہ وسلم نے فرمایا: ”دوا کیا کرو، بلاشبہ اللہ عزوجل نے کوئی بیماری پیدا نہیں کی مگر اس کی دوا بھی پیدا کی ہے، سوائے ایک بیماری کے یعنی بڑھاپا (اس کا کوئی علاج نہیں)۔“ [سنن ابي داود/كتاب الطب /حدیث: 3855]

سیدہ ام منذر (ام منذر سلمیٰ بنت قیس انصاریہ) بنت قیس انصاریہ رضی اللہ عنہا سے روایت ہے کہ رسول اللہ صلی اللہ علیہ وسلم میرے گھر تشریف لائے، آپ صلی اللہ علیہ وسلم کے ساتھ سیدنا علی رضی اللہ عنہ بھی تھے جو بیماری سے اٹھے تھے اور کمزور تھے۔ ہمارے ہاں کھجوروں کے خوشے لٹک رہے تھے۔ رسول اللہ صلی اللہ علیہ وسلم اٹھے اور ان سے کھانے لگے اور سیدنا علی رضی اللہ عنہ بھی کھانے کے لیے اٹھے تو رسول اللہ صلی اللہ علیہ وسلم نے ان سے فرمایا: «مَهْ مَهْ يَا عَلِيُّ، فَإِنَّكَ نَاقِهٌ» ”رک جاؤ! تم ابھی کمزور ہو۔“ چنانچہ سیدنا علی رضی اللہ عنہ (کھانے سے) رکے رہے۔ ام منذر رضی اللہ عنہا کہتی ہیں کہ میں نے جَو اور چقندر پکائے اور آپ صلی اللہ علیہ وسلم کی خدمت میں پیش کیے تو رسول اللہ صلی اللہ علیہ وسلم نے فرمایا: «يَا عَلِيُّ، مِنْ هَذَا فَأَصِبْ، فَإِنَّهُ أَوْفَقُ لَكَ» ”علی! لو یہ تمہارے لیے مفید ہے۔“ امام ابوداؤد رحمہ اللہ کہتے ہیں: (میرے شیخ) ہارون (ہارون بن عبداللہ) نے (اپنے شیخ) ابوداود سے ام منذر کے بارے میں نقل کیا کہ یہ ”عدویہ“ (بنو عدی کی خاتون) ہیں۔ [سنن ابي داود/كتاب الطب /حدیث: 3856]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تمہاری دواؤں میں جن سے تم علاج کرتے ہو، اگر کوئی بہتر دوا ہے تو (ان میں سے ایک) سینگی لگوانا ہے۔“ [سنن ابي داود/كتاب الطب /حدیث: 3857]

سیدہ سلمیٰ رضی اللہ عنہا (زوجہ ابورافع رضی اللہ عنہ) جو رسول اللہ صلی اللہ علیہ وسلم کی خادمہ تھیں، بیان کرتی ہیں کہ جو کوئی رسول اللہ صلی اللہ علیہ وسلم کے پاس سر درد کی شکایت لے کر آتا تو آپ صلی اللہ علیہ وسلم اسے فرماتے: ”سینگی لگواؤ“ اور جو کوئی پاؤں کے درد کی تکلیف بتاتا تو آپ صلی اللہ علیہ وسلم فرماتے: ”مہندی لگاؤ۔“ [سنن ابي داود/كتاب الطب /حدیث: 3858]

سیدنا ابوکبشہ انماری رضی اللہ عنہ سے روایت ہے کہ نبی کریم صلی اللہ علیہ وسلم اپنے سر کے بالائی حصے اور دونوں کندھوں کے درمیان سینگی لگوایا کرتے تھے اور فرماتے تھے: ”جس کسی نے ان مقامات سے خون کے کچھ حصے بہا دیے تو وہ کسی بیماری کے لیے کوئی اور دوا نہ بھی لے تو اسے کوئی ضرر نہیں پہنچے گا۔“ [سنن ابي داود/كتاب الطب /حدیث: 3859]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ”تین مرتبہ سینگی لگوائی گردن کی دونوں جانب کی رگوں پر اور کندھوں کے درمیان (کمر کے اوپر شروع میں)۔“ معمر رحمہ اللہ کہتے ہیں: ”میں نے سینگی لگوا لی تو میرا حافظہ جاتا رہا حتیٰ کہ مجھے نماز میں فاتحہ پڑھنے میں بھی لقمہ دیا جاتا تھا۔“ انہوں نے اپنی کھوپڑی پر (غلط جگہ پر) سینگی لگوائی تھی۔ [سنن ابي داود/كتاب الطب /حدیث: 3860]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جو شخص سترہ، انیس اور اکیس تاریخ (قمری) کو سینگی لگوائے اسے ہر بیماری سے شفا ہو گی۔“ [سنن ابي داود/كتاب الطب /حدیث: 3861]

سیدہ کیسہ بنت ابی بکرہ رضی اللہ عنہا سے روایت ہے کہ ان کے والد سیدنا ابوبکرہ رضی اللہ عنہ منگل کے روز سینگی لگوانے سے منع کیا کرتے تھے۔ ان کا خیال تھا کہ رسول اللہ صلی اللہ علیہ وسلم نے فرمایا ہے: ”منگل کا دن خون کا دن ہے، اس میں ایک گھڑی ایسی آتی ہے کہ اس میں خون نہیں رکتا۔“ [سنن ابي داود/كتاب الطب /حدیث: 3862]

سیدنا جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے درد کی وجہ سے اپنی سرین پر سینگی لگوائی تھی۔“ [سنن ابي داود/كتاب الطب /حدیث: 3863]

سیدنا جابر رضی اللہ عنہ کا بیان ہے کہ ”نبی کریم صلی اللہ علیہ وسلم نے سیدنا ابی بن کعب رضی اللہ عنہ کی طرف ایک معالج بھیجا جس نے ان کی رگ کاٹی۔“ [سنن ابي داود/كتاب الطب /حدیث: 3864]