جناب ابوعلقمہ نے کہا کہ میرے علم و یقین کے مطابق سیدنا ابوہریرہ رضی اللہ عنہ نے رسول اللہ صلی اللہ علیہ وسلم سے روایت کیا ہے، آپ صلی اللہ علیہ وسلم نے فرمایا: ”بے شک اللہ ذوالجلال ہر سو سال کے شروع میں یا آخر میں اس امت کے اندر ایک آدمی پیدا کرتا رہے گا جو اس کے دین کو ازسر نو قائم اور مضبوط کرتا رہے گا۔“ امام ابوداؤد رحمہ اللہ کہتے ہیں: ”اس روایت کو عبدالرحمٰن بن شریح اسکندرانی نے ( «مُعْضَل») بیان کیا ہے، وہ شراحیل سے آگے نہیں بڑھا۔ (اس نے بعد والے راویوں کا ذکر چھوڑ دیا ہے)۔“ [سنن ابي داود/كتاب الملاحم /حدیث: 4291]

حسان بن عطیہ کہتے ہیں کہ مکحول اور ابن ابوزکریا، خالد بن معدان کی طرف روانہ ہوئے اور میں بھی ان کے ساتھ چل دیا، تو خالد نے جبیر بن نفیر سے ایک حدیث روایت کی جو «هُدْنَة» (مصالحت) کے متعلق تھی۔ پھر جبیر نے کہا: ”چلیں سیدنا ذی مخبر رضی اللہ عنہ کے ہاں چلتے ہیں جو کہ نبی کریم صلی اللہ علیہ وسلم کے صحابہ میں سے تھے۔“ ہم ان کے پاس پہنچے تو جبیر نے ان سے «هُدْنَة» (مصالحت) کے متعلق پوچھا، تو انہوں نے کہا: ”میں نے رسول اللہ صلی اللہ علیہ وسلم کو فرماتے ہوئے سنا ہے: ”تم لوگ رومیوں سے ایک پُرامن مصالحت کرو گے، اور پھر ان کے ساتھ مل کر اپنے پیچھے ایک دشمن سے جنگ کرو گے، ان پر غالب رہو گے، غنیمت پاؤ گے اور صحیح سلامت رہو گے، پھر وہاں سے واپس لوٹو گے اور ایک میدان میں اترو گے جس میں ٹیلے بھی ہوں گے۔ تو عیسائیوں میں سے ایک آدمی صلیب بلند کرے گا اور کہے گا: ”صلیب غالب آ گئی“، تو مسلمانوں میں سے ایک آدمی کو غصہ آئے گا اور وہ اسے قتل کر ڈالے گا، تو اس موقع پر رومی دھوکا کریں گے اور جنگ کے لیے جمع ہو جائیں گے۔“” [سنن ابي داود/كتاب الملاحم /حدیث: 4292]

حسان بن عطیہ رحمہ اللہ نے یہ حدیث بیان کی اور مزید کہا: ”مسلمان جلدی سے اپنے اسلحے کی طرف اٹھیں گے اور ان سے قتال کریں گے اور اللہ انہیں شہادت سے سرفراز فرمائے گا۔“ امام ابوداؤد رحمہ اللہ نے کہا: ”اس سند میں ولید نے بواسطہ جبیر، سیدنا ذی مخبر رضی اللہ عنہ سے اور انہوں نے نبی کریم صلی اللہ علیہ وسلم سے روایت کیا ہے۔“ امام ابوداؤد رحمہ اللہ کہتے ہیں کہ: ”روح، یحییٰ بن حمزہ اور بشر بن بکر نے اوزاعی سے روایت کیا جیسے کہ عیسیٰ نے کہا۔“ [سنن ابي داود/كتاب الملاحم /حدیث: 4293]

سیدنا معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بیت المقدس کی آبادی یثرب (مدینے) کی بے آبادی کا پیش خیمہ ہو گی۔ اور یثرب کی بے آبادی کے نتیجے میں بڑی جنگ ہو گی اور اس جنگ کا ظہور قسطنطینیہ کی فتح ہو گا۔ اور قسطنطینیہ کی فتح کے بعد دجال آئے گا۔“ پھر رسول اللہ صلی اللہ علیہ وسلم نے اپنا ہاتھ اس حدیث کے بیان کرنے والے (سیدنا معاذ رضی اللہ عنہ) کی ران یا کندھے پر مارا، پھر فرمایا: ”بلاشبہ یہ واقعہ اس طرح حق ہے جیسے کہ تم یہاں ہو یا بیٹھے ہوئے ہو۔“ مراد سیدنا معاذ بن جبل رضی اللہ عنہ تھے۔ [سنن ابي داود/كتاب الملاحم /حدیث: 4294]

سیدنا معاذ بن جبل رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جنگ عظیم، فتح قسطنطینیہ اور دجال کی آمد سات مہینوں میں ہو گی۔“ [سنن ابي داود/كتاب الملاحم /حدیث: 4295]

سیدنا عبداللہ بن بسر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جنگ عظیم اور شہر (قسطنطینیہ) کی فتح چھ سال کے عرصے میں ہو گی اور مسیح دجال کا نکلنا ساتویں میں ہو گا۔“ امام ابوداؤد رحمہ اللہ کہتے ہیں کہ یہ روایت عیسیٰ کی (مذکورہ بالا) روایت سے صحیح تر ہے۔ [سنن ابي داود/كتاب الملاحم /حدیث: 4296]

سیدنا ثوبان رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”ایسا وقت آنے والا ہے کہ دوسری امتیں تمہارے خلاف ایک دوسرے کو بلائیں گی، جیسے کہ کھانے والے اپنے پیالے پر ایک دوسرے کو بلاتے ہیں۔“ تو کہنے والے نے کہا: ”کیا یہ ہماری ان دنوں قلت اور کمی کی وجہ سے ہو گا؟“ آپ صلی اللہ علیہ وسلم نے فرمایا: ”نہیں، بلکہ تم ان دنوں بہت زیادہ ہو گے، لیکن جھاگ ہو گے جس طرح کہ سیلاب کا جھاگ ہوتا ہے۔ اللہ تعالیٰ تمہارے دشمن کے سینوں سے تمہاری ہیبت نکال دے گا اور تمہارے دلوں میں «الْوَهْنُ» ”وہن“ ڈال دے گا۔“ پوچھنے والے نے پوچھا: ”اے اللہ کے رسول! «الْوَهْنُ» ”وہن“ سے کیا مراد ہے؟“ آپ صلی اللہ علیہ وسلم نے فرمایا: ”دنیا کی محبت اور موت کی کراہت۔“ [سنن ابي داود/كتاب الملاحم /حدیث: 4297]

سیدنا ابودرداء رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جنگ کے موقع پر مسلمانوں کا خیمہ (مرکز) دمشق نامی شہر کی جانب میں واقع مقام غوطہ ہو گا اور دمشق شام کے بہترین شہروں میں سے ہو گا۔“ [سنن ابي داود/كتاب الملاحم /حدیث: 4298]

سیدنا ابن عمر رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”عنقریب مسلمان مدینے میں گھیر لیے جائیں گے حتیٰ کہ ان کی بعید ترین چھاؤنی اس وقت مقام سلاح ہو گی۔“ [سنن ابي داود/كتاب الملاحم /حدیث: 4299]

جناب زہری رحمہ اللہ سے مروی ہے کہ ”سلاح کا مقام خیبر کے قریب ہے۔“ [سنن ابي داود/كتاب الملاحم /حدیث: 4300]