حضرت سعید بن مسیب رضی اللہ عنہ سے روایت ہے، انہوں نے فرمایا: ”میں ایک جنازے میں عبداللہ بن عمر رضی اللہ عنہما کے ساتھ حاضر تھا۔ جب انہوں نے میت کو قبر میں رکھا تو فرمایا: «بِسْمِ اللّٰهِ وَفِي سَبِيلِ اللّٰهِ وَعَلَىٰ مِلَّةِ رَسُولِ اللّٰهِ» ”اللہ کے نام سے، اللہ کی راہ میں اور اللہ کے رسول صلی اللہ علیہ وسلم کی ملت پر۔“ جب لحد پر کچی اینٹیں لگانا شروع کی گئیں تو فرمایا: «اللّٰهُمَّ أَجِرْهَا مِنَ الشَّيْطَانِ وَمِنْ عَذَابِ الْقَبْرِ، اللّٰهُمَّ جَافِ الْأَرْضَ عَنْ جَنْبَيْهَا، وَصَعِّدْ رُوحَهَا، وَلَقِّهَا مِنْكَ رِضْوَانًا» ”اے اللہ! اسے شیطان سے اور قبر کے عذاب سے پناہ دے، اے اللہ! اس کے پہلوؤں سے (قبر کی) زمین کو دور رکھ، اس کی روح کو بلند کر اور اسے اپنی خوشنودی نصیب فرما۔“ (سعید بن مسیب نے فرمایا) میں نے کہا: ”ابن عمر! کیا آپ نے یہ چیز رسول اللہ صلی اللہ علیہ وسلم سے سنی ہے یا اپنی رائے سے یہ الفاظ کہے ہیں؟“ انہوں نے کہا: ”تب تو میں باتیں بنانے پر قادر ہوں، (نہیں) بلکہ یہ چیز میں نے رسول اللہ صلی اللہ علیہ وسلم سے سنی ہے۔““ [سنن ابن ماجه/كتاب الجنائز/حدیث: 1553]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ” «اللَّحْدُ» (بغلی قبر) ہمارے لیے ہے اور «الشَّقُّ» (صندوقی قبر) ہمارے سوا دوسروں کے لیے ہے۔“ [سنن ابن ماجه/كتاب الجنائز/حدیث: 1554]

حضرت جریر بن عبداللہ بجلی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”بغلی قبر ہمارے لیے ہے اور صندوقی قبر دوسروں کے لیے۔“ [سنن ابن ماجه/كتاب الجنائز/حدیث: 1555]

حضرت عامر بن سعد اپنے والد سعد بن ابی وقاص رضی اللہ عنہ سے روایت کرتے ہیں، انہوں نے فرمایا: ”میرے لیے لحد تیار کرنا اور مجھ پر کچی اینٹیں لگانا جس طرح رسول اللہ صلی اللہ علیہ وسلم کے لیے کیا گیا تھا۔“ [سنن ابن ماجه/كتاب الجنائز/حدیث: 1556]

حضرت انس بن مالک رضی اللہ عنہ سے روایت ہے، انہوں نے فرمایا: جب نبی کریم صلی اللہ علیہ وسلم فوت ہوئے، اس وقت مدینے میں ایک آدمی لحد والی قبر بنایا کرتا تھا اور ایک آدمی سیدھی (شق والی) قبر بناتا تھا۔ صحابہ رضی اللہ عنہم نے کہا: ”ہم اپنے رب سے استخارہ کرتے ہیں (بہتر چیز کی دعا کرتے ہیں) اور دونوں کو بلا بھیجتے ہیں جو پیچھے رہ گیا، اسے چھوڑ دیں گے۔“ (اور جو پہلے آ گیا، وہ اپنے طریقے پر قبر تیار کر دے گا) چنانچہ ان دونوں کو پیغام بھیجا گیا تو لحد بنانے والا پہلے آ گیا، چنانچہ صحابہ رضی اللہ عنہم نے نبی کریم صلی اللہ علیہ وسلم کے لیے بغلی قبر تیار کروائی۔ [سنن ابن ماجه/كتاب الجنائز/حدیث: 1557]

حضرت عائشہ رضی اللہ عنہا سے روایت ہے، انہوں نے فرمایا: ”جب رسول اللہ صلی اللہ علیہ وسلم کا انتقال ہوا تو صحابہ رضی اللہ عنہم میں بغلی (لحد والی) یا سیدھی (شق والی) قبر کے بارے میں اختلاف ہو گیا۔ انہوں نے اس بارے میں بحث کی حتی کہ ان کی آوازیں بلند ہو گئیں۔ حضرت عمر رضی اللہ عنہ نے فرمایا: ”رسول اللہ صلی اللہ علیہ وسلم کے پاس زور سے نہ بولو، خواہ آپ صلی اللہ علیہ وسلم زندہ ہوں یا فوت ہو چکے ہوں“، یا ایسے ہی دیگر الفاظ فرمائے، چنانچہ انہوں نے سیدھی (شق والی) قبر بنانے والے اور بغلی (لحد والی) قبر بنانے والے دونوں کو بلا بھیجا۔ بغلی (لحد والی) قبر بنانے والا (پہلے) آ گیا۔ اس نے رسول اللہ صلی اللہ علیہ وسلم کے لیے بغلی (لحد والی) قبر تیار کی، پھر رسول اللہ صلی اللہ علیہ وسلم کو دفن کر دیا گیا۔“ [سنن ابن ماجه/كتاب الجنائز/حدیث: 1558]

حضرت ادرع سلمی رضی اللہ عنہ سے روایت ہے، انہوں نے فرمایا: ”میں ایک رات رسول اللہ صلی اللہ علیہ وسلم کی پہرا داری کی نیت سے حاضر ہوا، میں نے دیکھا کہ ایک آدمی بہت بلند آواز سے تلاوت کر رہا ہے۔ نبی صلی اللہ علیہ وسلم باہر تشریف لائے تو میں نے عرض کیا: ”اے اللہ کے رسول! یہ شخص ریاکار ہے۔“ (بعد میں) جب مدینہ میں وہ شخص فوت ہوا اور صحابہ اس کو تیار کرنے (غسل اور کفن وغیرہ) سے فارغ ہوئے اور اس کی چارپائی اٹھائی تو نبی صلی اللہ علیہ وسلم نے فرمایا: ”اس سے نرمی کرو، اللہ تعالیٰ اس پر نرمی کرے، یہ اللہ اور اس کے رسول سے محبت رکھتا تھا۔“ راوی کہتے ہیں، آپ صلی اللہ علیہ وسلم نے اس کی قبر تیار کروائی تو فرمایا: ”اس کی قبر کشادہ کرو، اللہ اس پر کشادگی فرمائے۔“ ایک صحابی نے عرض کیا: ”اے اللہ کے رسول! آپ کو اس (کی وفات) کا بہت غم ہوا ہے۔“ آپ صلی اللہ علیہ وسلم نے فرمایا: ”ہاں، وہ اللہ اور اس کے رسول سے محبت رکھتا تھا۔““ [سنن ابن ماجه/كتاب الجنائز/حدیث: 1559]

حضرت ہشام بن عامر انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”(قبریں) کشادہ اور اچھی کھودو۔“ [سنن ابن ماجه/كتاب الجنائز/حدیث: 1560]

حضرت انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے عثمان بن مظعون رضی اللہ عنہ کی قبر پر (اس کے سرہانے) علامت کے طور پر ایک بڑا پتھر رکھا۔“ [سنن ابن ماجه/كتاب الجنائز/حدیث: 1561]

حضرت جابر رضی اللہ عنہ سے روایت ہے، انہوں نے کہا: ”رسول اللہ صلی اللہ علیہ وسلم نے قبروں کو چونا گچ کرنے سے منع فرمایا۔“ [سنن ابن ماجه/كتاب الجنائز/حدیث: 1562]