حضرت ابو سعید رضی اللہ عنہ سے روایت ہے کہ ایک سیاہ فام خاتون مسجد میں جھاڑو دیا کرتی تھی۔ ایک رات وہ فوت ہوگئی۔ صبح کو رسول اللہ صلی اللہ علیہ وسلم کو اس کی وفات کی اطلاع دی گئی۔ آپ صلی اللہ علیہ وسلم نے فرمایا: ”تم نے مجھے (اس وقت) کیوں نہ اس کی وفات کی اطلاع دی؟“ پھر آپ صلی اللہ علیہ وسلم صحابہ کرام رضی اللہ عنہم کو ساتھ لے کر نکلے اور اس کی قبر پر جا کھڑے ہوئے۔ رسول اللہ صلی اللہ علیہ وسلم نے اور آپ کے پیچھے تمام لوگوں نے اس پر (نماز جنازہ کی) تکبیریں کہیں اور اس کے لیے دعائیں کیں (نماز جنازہ پڑھی) پھر واپس آگئے۔ [سنن ابن ماجه/كتاب الجنائز/حدیث: 1533]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”نجاشی فوت ہو گیا ہے۔“ (اس کے بعد) رسول اللہ صلی اللہ علیہ وسلم اور آپ کے ساتھی بقیع میں تشریف لے گئے۔ آپ صلی اللہ علیہ وسلم نے اپنے پیچھے ہماری صفیں بنائیں۔ رسول اللہ صلی اللہ علیہ وسلم (خود) آگے بڑھے اور چار تکبیریں کہیں۔ [سنن ابن ماجه/كتاب الجنائز/حدیث: 1534]

حضرت عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تمہارا بھائی نجاشی فوت ہو گیا ہے، اس کا جنازہ پڑھ لو۔“ صحابی بیان کرتے ہیں کہ ”آپ صلی اللہ علیہ وسلم کھڑے ہوئے اور ہم نے آپ کی اقتدا میں نماز (جنازہ) ادا کی۔ میں دوسری صف میں تھا، آپ نے دو صفیں بنا کر اس کا جنازہ پڑھایا۔“ [سنن ابن ماجه/كتاب الجنائز/حدیث: 1535]

حضرت مجمع بن جاریہ انصاری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”تمہارا بھائی نجاشی فوت ہو گیا ہے، اٹھو اس کا جنازہ پڑھ لو۔“ تو ہم نے آپ صلی اللہ علیہ وسلم کے پیچھے دو صفیں بنا لیں۔ [سنن ابن ماجه/كتاب الجنائز/حدیث: 1536]

حضرت حذیفہ بن اسید غفاری رضی اللہ عنہ سے روایت ہے کہ نبی صلی اللہ علیہ وسلم صحابہ کرام رضی اللہ عنہم کو لے کر نکلے اور فرمایا: ”اپنے ایک بھائی کا جنازہ پڑھو جو تمہارے علاقے سے باہر فوت ہو گیا ہے۔“ صحابہ کرام رضی اللہ عنہم نے کہا: ”وہ کون ہے؟“ فرمایا: ”نجاشی۔“ [سنن ابن ماجه/كتاب الجنائز/حدیث: 1537]

حضرت عبداللہ بن عمر رضی اللہ عنہ سے روایت ہے کہ نبی صلی اللہ علیہ وسلم نے ”نجاشی رضی اللہ عنہ کا جنازہ پڑھا تو چار تکبیریں کہیں۔“ [سنن ابن ماجه/كتاب الجنائز/حدیث: 1538]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جس نے جنازے کی نماز پڑھی اس کے لیے ایک قیراط ثواب ہے اور جس نے انتظار کیا حتیٰ کہ اس (کے دفن) سے فراغت ہو جائے، اس کے لیے دو قیراط ثواب ہے۔“ صحابہ نے عرض کیا: دو قیراط کیسے ہوتے ہیں؟ آپ صلی اللہ علیہ وسلم نے فرمایا: ”دو پہاڑوں کے برابر۔“ [سنن ابن ماجه/كتاب الجنائز/حدیث: 1539]

حضرت ثوبان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے جنازے کی نماز پڑھی اس کے لیے ایک قیراط (ثواب) ہے اور جو اس کے دفن تک حاضر رہا اس کے لیے دو قیراط (ثواب) ہے۔“ نبی صلی اللہ علیہ وسلم سے قیراط کے متعلق پوچھا گیا تو آپ صلی اللہ علیہ وسلم نے فرمایا: ”احد (پہاڑ) کے برابر۔“ [سنن ابن ماجه/كتاب الجنائز/حدیث: 1540]

حضرت ابی بن کعب رضی اللہ عنہ سے روایت ہے رسول اللہ صلی اللہ علیہ وسلم نے فرمایا: ”جس نے جنازے کی نماز پڑھی اس کے لیے ایک قیراط (ثواب) ہے اور جو حاضر رہا حتی کہ (میت کو) دفن کیا جائے، اس کے لیے (ثواب کے) دو قیراط ہیں۔ قسم ہے اس ذات کی جس کے ہاتھ میں محمد ( صلی اللہ علیہ وسلم ) کی جان ہے، (ثواب کا) قیراط اس احد سے بھی بڑا ہے۔“ [سنن ابن ماجه/كتاب الجنائز/حدیث: 1541]

حضرت عبداللہ بن عمر رضی اللہ عنہ نے حضرت عامر بن ربیعہ رضی اللہ عنہ سے روایت بیان کی کہ نبی صلی اللہ علیہ وسلم نے فرمایا: ”جب تم جنازہ دیکھو تو اس کے لیے کھڑے ہو جاؤ حتی کہ وہ آگے گزر جائے یا (زمین پر) رکھ دیا جائے۔“ [سنن ابن ماجه/كتاب الجنائز/حدیث: 1542]