حضرت عائشہ رضی اللہ عنہا سے روایت ہے، انہوں نے فرمایا: ”میں اس وقت بھی گڑیوں سے کھیلا کرتی تھی جب میں رسول اللہ صلی اللہ علیہ وسلم کے پاس آ چکی تھی۔ رسول اللہ صلی اللہ علیہ وسلم میری سہیلیوں کو میرے پاس بھیج دیتے تھے اور وہ میرے ساتھ کھیلتیں۔“ [سنن ابن ماجه/كتاب النكاح/حدیث: 1982]

حضرت عبداللہ بن زمعہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم نے خطبہ دیا۔ (مختلف مسائل بیان فرمائے) پھر عورتوں کا ذکر فرمایا تو ان کے بارے میں لوگوں کو نصیحت کی، پھر فرمایا: ”آدمی کب تک اپنی عورت کو لونڈی کی طرح پیٹتا رہے گا؟ شاید دن کے آخر میں وہ اس کے ساتھ لیٹے۔“ [سنن ابن ماجه/كتاب النكاح/حدیث: 1983]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم نے نہ اپنے کسی لونڈی غلام کو مارا، نہ کبھی کسی بیوی کو مارا۔ (بلکہ) آپ صلی اللہ علیہ وسلم نے اپنے ہاتھ سے کسی چیز کو نہیں مارا۔“ [سنن ابن ماجه/كتاب النكاح/حدیث: 1984]

حضرت ایاس بن عبداللہ بن ابوذباب رضی اللہ عنہ سے روایت ہے، نبی صلی اللہ علیہ وسلم نے فرمایا: ”اللہ کی بندیوں کو ہرگز نہ مارو۔“ (چند دن بعد) حضرت عمر رضی اللہ عنہ نے نبی صلی اللہ علیہ وسلم کی خدمت میں حاضر ہو کر عرض کیا: ”اللہ کے رسول! عورتیں اپنے خاوندوں کے سامنے جرأت دکھانے لگی ہیں (اور گستاخ ہو گئی ہیں۔)“ نبی صلی اللہ علیہ وسلم نے انہیں مارنے کی اجازت دے دی۔ چنانچہ انہیں مار پڑی۔ تب بہت سی عورتوں نے آلِ محمد صلی اللہ علیہ وسلم (ازواجِ مطہرات رضی اللہ عنہن) کے ہاں چکر لگائے (اور امہات المؤمنین رضی اللہ عنہن سے اپنے خاوندوں کی شکایتیں کیں۔) صبح کو رسول اللہ صلی اللہ علیہ وسلم نے فرمایا: ”آج رات آلِ محمد ( صلی اللہ علیہ وسلم ) کے ہاں ستر عورتیں آئیں۔ ہر عورت اپنے خاوند کی شکایت کر رہی تھی۔ تم دیکھو! ایسے لوگ اچھے نہیں ہیں۔“ [سنن ابن ماجه/كتاب النكاح/حدیث: 1985]

حضرت اشعث بن قیس رضی اللہ عنہ سے روایت ہے، انہوں نے فرمایا: ”میں ایک رات حضرت عمر رضی اللہ عنہ کے ہاں مہمان رہا۔ آدھی رات ہوئی تو وہ اٹھ کر اپنی عورت کو مارنے لگے، میں نے بیچ بچاؤ کرا دیا۔ جب وہ اپنے بستر پر گئے تو مجھ سے فرمایا: ”اے اشعث! میری ایک بات یاد رکھنا۔ میں نے وہ بات رسول اللہ صلی اللہ علیہ وسلم سے سنی ہے۔“ (آپ صلی اللہ علیہ وسلم نے فرمایا: ”مرد سے نہیں پوچھنا چاہیے کہ اس نے اپنی عورت کو کیوں مارا۔“ اور وتر پڑھے بغیر مت سویا کر۔ اور تیسری بات مجھے یاد نہیں رہی۔)“ [سنن ابن ماجه/كتاب النكاح/حدیث: 1986]

حضرت عبداللہ بن عمر رضی اللہ عنہما نے نبی صلی اللہ علیہ وسلم سے روایت بیان کی کہ آپ صلی اللہ علیہ وسلم نے ”بالوں میں دوسرے بال ملانے والی، اور بال ملوانے والی اور گودنے والی اور گدوانے والی پر لعنت فرمائی ہے۔“ [سنن ابن ماجه/كتاب النكاح/حدیث: 1987]

حضرت اسماء رضی اللہ عنہا سے روایت ہے، انہوں نے فرمایا: ”ایک عورت نبی صلی اللہ علیہ وسلم کی خدمت میں حاضر ہوئی اور کہا: ”میری بیٹی دلہن ہے۔ (اس کی شادی قریب ہے۔) اسے چیچک نکل آئی ہے اور بال جھڑ گئے ہیں، تو کیا میں اس کے بالوں میں دوسرے بال ملا دوں؟“ رسول اللہ صلی اللہ علیہ وسلم نے فرمایا: ”اللہ نے لعنت کی ہے بال ملانے والی اور ملوانے والی پر۔““ [سنن ابن ماجه/كتاب النكاح/حدیث: 1988]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”اللہ کے رسول صلی اللہ علیہ وسلم نے گودنے والیوں پر، گدوانے والیوں پر، بال نوچنے والیوں پر، حسن کے لیے دانتوں کے درمیان فاصلہ پیدا کرنے والیوں پر اور اللہ کی تخلیق میں تبدیلی کرنے والیوں پر لعنت فرمائی ہے۔“ قبیلہ بنو اسد کی ایک خاتون، جن کا نام ام یعقوب تھا، کو یہ بات معلوم ہوئی تو وہ حضرت عبداللہ بن مسعود رضی اللہ عنہ کی خدمت میں حاضر ہوئیں اور کہا: ”مجھے معلوم ہوا ہے کہ آپ نے یہ یہ بات فرمائی ہے۔“ انہوں نے کہا: ”میں اس پر کیوں نہ لعنت کروں جس پر اللہ کے رسول صلی اللہ علیہ وسلم نے لعنت فرمائی ہے، اور یہ بات اللہ کی کتاب میں موجود ہے۔“ اس نے کہا: ”میں نے تو شروع سے آخر تک سارا قرآن پڑھا ہوا ہے، مجھے تو (اس میں) یہ مسئلہ نہیں ملا۔“ انہوں نے فرمایا: ”اگر تو نے (قرآن) پڑھا ہوتا تو تجھے (یہ مسئلہ) مل جاتا۔ کیا تو نے یہ نہیں پڑھا: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا﴾ [سورة الحشر: 7] ”رسول تمہیں جو کچھ دیں وہ لے لو اور جس سے منع کریں، اس سے رک جاؤ۔“ اس نے کہا: ”جی ہاں۔ (یہ تو پڑھا ہے۔)“ فرمایا: ”تو رسول اللہ صلی اللہ علیہ وسلم نے ان کاموں سے منع فرمایا ہے۔“ اس نے کہا: ”میرا خیال ہے کہ آپ کے گھر والے یہ کام کرتے ہیں۔“ انہوں نے فرمایا: ”جاؤ، جا کر دیکھ لو۔“ اس نے جا کر دیکھا تو اسے کوئی ایسی بات نظر نہ آئی جو وہ دیکھنا چاہتی تھی۔ اس نے (واپس آ کر) کہا: ”مجھے تو کوئی بات نظر نہیں آئی۔“ حضرت عبداللہ بن مسعود رضی اللہ عنہ نے فرمایا: ”اگر وہ بات اسی طرح ہوتی جس طرح تو کہتی تھی تو وہ (بیوی) ہمارے ساتھ نہ رہتی۔“ [سنن ابن ماجه/كتاب النكاح/حدیث: 1989]

حضرت عائشہ رضی اللہ عنہا سے روایت ہے، انہوں نے فرمایا: ”نبی کریم صلی اللہ علیہ وسلم نے مجھ سے شوال میں نکاح فرمایا، اور شوال ہی میں مجھے (رخصتی کرا کے) اپنے گھر لائے، پھر نبی کریم صلی اللہ علیہ وسلم کی کون سی زوجہ محترمہ کو مجھ سے زیادہ نبی کریم صلی اللہ علیہ وسلم کی قربت حاصل تھی؟“ (حضرت عروہ رحمہ اللہ نے فرمایا:) ”حضرت عائشہ رضی اللہ عنہا اپنے کنبے کی عورتوں کی رخصتی شوال میں کرنا پسند کرتی تھیں۔“ [سنن ابن ماجه/كتاب النكاح/حدیث: 1990]