حضرت ثابت رضی اللہ عنہ سے روایت ہے، انہوں نے کہا: ”ہم حضرت انس بن مالک رضی اللہ عنہ کے پاس بیٹھے تھے اور ان کی ایک بیٹی بھی موجود تھیں، حضرت انس رضی اللہ عنہ نے فرمایا: ”ایک عورت نبی صلی اللہ علیہ وسلم کی خدمت میں حاضر ہوئی اور اس نے اپنے آپ کو رسول اللہ صلی اللہ علیہ وسلم (سے نکاح) کے لیے پیش کیا اور کہا: ”اے اللہ کے رسول! کیا آپ کو میری خواہش ہے؟“”حضرت انس رضی اللہ عنہ کی بیٹی نے کہا: ”وہ کتنی بے شرم تھی!“ حضرت انس رضی اللہ عنہ نے فرمایا: ”وہ تجھ سے افضل تھی، اس نے اللہ کے رسول صلی اللہ علیہ وسلم سے محبت کی وجہ سے اپنی ذات کو نبی صلی اللہ علیہ وسلم کی خدمت میں پیش کیا۔“” [سنن ابن ماجه/كتاب النكاح/حدیث: 2001]

حضرت ابوہریرہ رضی اللہ عنہ سے روایت ہے، انہوں نے فرمایا: ”قبیلہ بنو فزارہ کے ایک آدمی نے رسول اللہ صلی اللہ علیہ وسلم کی خدمت میں حاضر ہو کر عرض کیا: ”اے اللہ کے رسول! میری عورت نے سانولا لڑکا جنا ہے۔“ (اور میں تو گورا ہوں) تو رسول اللہ صلی اللہ علیہ وسلم نے فرمایا: ”کیا تیرے پاس اونٹ ہیں؟“ اس نے کہا: ”جی ہاں۔“ فرمایا: ”وہ کس رنگ کے ہیں؟“ اس نے کہا: ”سرخ ہیں۔“ فرمایا: ”کیا ان میں کوئی خاکی رنگ کا بھی ہے؟“ اس نے کہا: ”(جی ہاں)، ان میں خاکی رنگ کے بھی ہیں۔“ فرمایا: ”ان میں یہ رنگ کہاں سے آ گیا؟“ اس نے کہا: ”شاید کسی رگ نے زور کیا ہے۔“ نبی صلی اللہ علیہ وسلم نے فرمایا: ”شاید اس (لڑکے) میں بھی کسی رگ نے زور کیا ہو۔““ یہ الفاظ (راوی حدیث) ابن صباح کے ہیں۔ [سنن ابن ماجه/كتاب النكاح/حدیث: 2002]

حضرت عبداللہ بن عمر رضی اللہ عنہ سے روایت ہے کہ ایک خانہ بدوش نبی صلی اللہ علیہ وسلم کی خدمت میں حاضر ہوا اور اس نے کہا: ”اے اللہ کے رسول! میری عورت کے ہاں، میرے نکاح میں رہتے ہوئے، سیاہ فام لڑکا پیدا ہوا ہے اور ہمارے خاندان میں کبھی کوئی سیاہ فام نہیں تھا۔ (ہمارے ننھیال و ددھیال سب سفید فام ہیں۔)“ تو نبی صلی اللہ علیہ وسلم نے فرمایا: ”کیا تیرے پاس اونٹ ہیں؟“ اس نے کہا: ”جی ہاں۔“ آپ نے فرمایا: ”وہ کس رنگ کے ہیں؟“ کہا: ”سرخ ہیں۔“ آپ نے فرمایا: ”کیا ان میں کوئی سیاہ بھی ہے؟“ اس نے کہا: ”جی نہیں۔“ فرمایا: ”کیا ان میں کوئی خاکی رنگ کا بھی ہے؟“ اس نے کہا: ”جی ہاں۔“ آپ نے فرمایا: ”وہ کیسے ہو گیا؟“ اس نے کہا: ”شاید کسی (دادا پردادا یا نانا وغیرہ) کا خون غالب آیا ہے؟“ [سنن ابن ماجه/كتاب النكاح/حدیث: 2003]

حضرت عائشہ رضی اللہ عنہا سے روایت ہے کہ زمعہ کی لونڈی سے پیدا ہونے والے ایک لڑکے کے بارے میں حضرت عبد بن زمعہ رضی اللہ عنہ اور حضرت سعد رضی اللہ عنہ اپنا جھگڑا لے کر نبی صلی اللہ علیہ وسلم کے پاس آئے تو حضرت سعد رضی اللہ عنہ نے کہا: ”اللہ کے رسول صلی اللہ علیہ وسلم ! جب میں مکہ گیا تھا تو میرے بھائی نے مجھے نصیحت کی تھی کہ میں زمعہ کی لونڈی کے بچے کو دیکھ کر اپنی کفالت میں لے لوں۔“ حضرت عبد بن زمعہ رضی اللہ عنہ نے کہا: ”وہ میرا بھائی ہے، میرے والد کی کنیز کا بیٹا ہے، میرے والد کے گھر میں پیدا ہوا ہے۔“ نبی صلی اللہ علیہ وسلم نے دیکھا کہ وہ (لڑکا) عتبہ سے مشابہت رکھتا ہے تو فرمایا: ”اے عبد بن زمعہ! وہ تمہارا بھائی ہے، «الْوَلَدُ لِلْفِرَاشِ» ”بچہ بستر والے کا ہوتا ہے“، اور اے سودہ (رضی اللہ عنہا)! تم اس سے پردہ کیا کرو۔“ [سنن ابن ماجه/كتاب النكاح/حدیث: 2004]

حضرت عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فیصلہ دیا کہ ”لڑکا بستر والے کا ہے۔“ [سنن ابن ماجه/كتاب النكاح/حدیث: 2005]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”لڑکا بستر والے کا ہے اور زانی کے لیے پتھر ہیں۔“ [سنن ابن ماجه/كتاب النكاح/حدیث: 2006]

حضرت ابوامامہ باہلی رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: «الْوَلَدُ لِلْفِرَاشِ وَلِلْعَاهِرِ الْحَجَرُ» ”لڑکا بستر والے کا ہے اور زانی کے لیے پتھر ہیں۔““ [سنن ابن ماجه/كتاب النكاح/حدیث: 2007]

حضرت عبداللہ بن عباس رضی اللہ عنہ سے روایت ہے کہ ایک عورت نبی صلی اللہ علیہ وسلم کی خدمت میں حاضر ہو کر مسلمان ہو گئی۔ اس سے ایک مرد نے نکاح کر لیا۔ راوی کہتے ہیں کہ بعد ازاں اس کا پہلا خاوند آ گیا۔ اس نے کہا: ”اے اللہ کے رسول! میں اس کے ساتھ ہی مسلمان ہوا تھا اور اسے میرے مسلمان ہونے کا علم تھا۔“ تو رسول اللہ صلی اللہ علیہ وسلم نے اس عورت کو دوسرے خاوند سے جدا کر کے پہلے خاوند کے پاس بھیج دیا۔ [سنن ابن ماجه/كتاب النكاح/حدیث: 2008]

حضرت عبداللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم نے اپنی بیٹی (حضرت زینب رضی اللہ عنہا) کو دو سال کے بعد، پہلے نکاح کی بنا پر ہی، حضرت ابوالعاص بن ربیع رضی اللہ عنہ کے پاس واپس بھیج دیا۔“ [سنن ابن ماجه/كتاب النكاح/حدیث: 2009]

حضرت عبداللہ بن عمرو رضی اللہ عنہ سے روایت ہے کہ ”رسول اللہ صلی اللہ علیہ وسلم نے (اپنی بیٹی) حضرت زینب رضی اللہ عنہا کو حضرت ابوالعاص بن ربیع رضی اللہ عنہ کے پاس نیا نکاح کر کے واپس بھیجا۔“ [سنن ابن ماجه/كتاب النكاح/حدیث: 2010]