حضرت عبدالملک بن حارث بن ہشام اپنے والد (ابوبکر بن عبدالرحمٰن بن حارث بن ہشام) سے روایت کرتے ہیں کہ نبی صلی اللہ علیہ وسلم نے ”حضرت ام سلمہ رضی اللہ عنہا سے شوال میں نکاح کیا اور شوال میں انہیں (رخصتی کرا کے) گھر لائے۔“ [سنن ابن ماجه/كتاب النكاح/حدیث: 1991]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے انہیں حکم دیا کہ ”خاوند کے پاس اس کی بیوی کو بھیج دیں، حالانکہ اس نے ابھی اسے کوئی چیز نہیں دی تھی۔“ [سنن ابن ماجه/كتاب النكاح/حدیث: 1992]

حضرت مخمر بن معاویہ رضی اللہ عنہ سے روایت ہے، انہوں نے کہا: ”میں نے رسول اللہ صلی اللہ علیہ وسلم سے سنا کہ آپ صلی اللہ علیہ وسلم فرما رہے تھے: ”نحوست کچھ نہیں اور برکت بعض اوقات تین چیزوں میں ہوتی ہے: عورت میں، گھوڑے میں اور مکان میں۔“” [سنن ابن ماجه/كتاب النكاح/حدیث: 1993]

حضرت سہل بن سعد رضی اللہ عنہ سے روایت ہے، رسول اللہ صلی اللہ علیہ وسلم نے نحوست کے بارے میں فرمایا: ”اگر ہو تو گھوڑے، عورت یا گھر میں ہوتی ہے۔“ [سنن ابن ماجه/كتاب النكاح/حدیث: 1994]

حضرت عبداللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”نحوست تین چیزوں میں ہے: گھوڑے میں، عورت میں اور مکان میں۔“ ایک دوسری روایت میں ہے کہ حضرت ام سلمہ رضی اللہ عنہا یہ تین چیزیں شمار کر کے، ان کے ساتھ (چوتھی چیز) تلوار کا بھی ذکر کرتی تھیں۔ [سنن ابن ماجه/كتاب النكاح/حدیث: 1995]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”ایک غیرت اللہ کو پسند ہے اور ایک غیرت اللہ کو ناپسند ہے۔ جو غیرت اللہ کو پسند ہے وہ خرابی کے آثار معلوم ہونے پر غیرت ہے اور جو غیرت اللہ کو ناپسند ہے، وہ خرابی کے آثار کے بغیر (خواہ مخواہ) غیرت کرنا ہے۔“ [سنن ابن ماجه/كتاب النكاح/حدیث: 1996]

حضرت عائشہ رضی اللہ عنہا سے روایت ہے، انہوں نے فرمایا: ”مجھے کسی عورت پر اس طرح رشک محسوس نہیں ہوا جس قدر حضرت خدیجہ رضی اللہ عنہا سے رشک محسوس ہوا کیونکہ میں نے دیکھا کہ رسول اللہ صلی اللہ علیہ وسلم انہیں کثرت سے یاد کرتے تھے۔ نبی صلی اللہ علیہ وسلم کو رب نے حکم دیا تھا کہ حضرت خدیجہ رضی اللہ عنہا کو جنت میں موتی کے محل کی خوش خبری دیں۔“ امام ابن ماجہ رحمہ اللہ نے فرمایا: ”اس سے مراد سونے کا محل ہے۔“ [سنن ابن ماجه/كتاب النكاح/حدیث: 1997]

حضرت مسور بن مخرمہ بن نوفل رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے یہ فرمان سنا جبکہ آپ منبر پر تشریف فرما تھے: ”ہشام بن مغیرہ کے بیٹوں نے مجھ سے اجازت طلب کی ہے کہ وہ اپنی بیٹی کا نکاح علی بن ابی طالب رضی اللہ عنہ سے کر دیں۔ میں انہیں اجازت نہیں دیتا، پھر (کہتا ہوں کہ) میں انہیں اجازت نہیں دیتا، پھر (کہتا ہوں کہ) میں انہیں اجازت نہیں دیتا، ہاں اگر علی بن ابی طالب رضی اللہ عنہ یہ پسند کریں کہ میری بیٹی (فاطمہ رضی اللہ عنہا) کو طلاق دے کر ان کی لڑکی سے شادی کر لیں (تو ان کی مرضی ہے)۔ فاطمہ رضی اللہ عنہا تو میرا ٹکڑا (میرے جسم و جان کا ایک حصہ) ہے، جس بات سے اسے پریشانی ہوتی ہے اس سے مجھے بھی پریشانی ہوتی ہے اور جس بات سے اسے دکھ پہنچتا ہے، اس سے مجھے بھی دکھ پہنچتا ہے۔““ [سنن ابن ماجه/كتاب النكاح/حدیث: 1998]

حضرت مسور بن مخرمہ رضی اللہ عنہ سے روایت ہے کہ حضرت علی بن ابی طالب رضی اللہ عنہ نے ابو جہل کی بیٹی کا رشتہ طلب کیا جب کہ نبی صلی اللہ علیہ وسلم کی بیٹی حضرت فاطمہ رضی اللہ عنہا ان کے نکاح میں تھیں۔ جب حضرت فاطمہ رضی اللہ عنہا نے یہ بات سنی تو وہ نبی صلی اللہ علیہ وسلم کی خدمت میں حاضر ہوئیں اور کہا: ”لوگ باتیں کرتے ہیں کہ آپ کو اپنی بیٹیوں کے متعلق کسی بات پر غصہ نہیں آتا۔ یہ (دیکھیے) علی (رضی اللہ عنہ) ابوجہل کی بیٹی سے نکاح کرنے والے ہیں۔“ حضرت مسور رضی اللہ عنہ بیان کرتے ہیں: نبی صلی اللہ علیہ وسلم کھڑے ہوئے، میں نے سنا کہ آپ نے تشہد پڑھا (خطبہ کے افتتاحی کلمات ارشاد فرمائے) پھر فرمایا: ” «أَمَّا بَعْدُ» ! میں نے ابوالعاص بن ربیع رضی اللہ عنہ کو رشتہ دیا۔ انہوں نے مجھ سے (جو بھی) بات کی، سچی بات کی۔ اور بے شک محمد ( صلی اللہ علیہ وسلم ) کی بیٹی فاطمہ (رضی اللہ عنہا) میرا ٹکڑا (اور میری لخت جگر) ہے۔ مجھے یہ بات اچھی نہیں لگتی کہ تم اسے آزمائش میں ڈالو۔ قسم ہے اللہ کی! اللہ کے رسول کی بیٹی اور اللہ کے دشمن کی بیٹی کبھی ایک آدمی کے پاس (اس کے نکاح میں) جمع نہیں ہوں گی۔“ راوی نے بیان کیا: چنانچہ حضرت علی رضی اللہ عنہ اس رشتے سے دست بردار ہو گئے۔ [سنن ابن ماجه/كتاب النكاح/حدیث: 1999]

حضرت عائشہ رضی اللہ عنہا سے روایت ہے، وہ فرمایا کرتی تھیں: ”کیا عورتوں کو شرم نہیں آتی کہ وہ اپنا آپ نبی صلی اللہ علیہ وسلم کو ہبہ کرتی ہیں؟“ تو اللہ تعالیٰ نے یہ آیت نازل فرمائی: ﴿تُرْجِي مَن تَشَاءُ مِنْهُنَّ وَتُؤْوِي إِلَيْكَ مَن تَشَاءُ﴾ [سورة الأحزاب: 51] ”ان میں سے جسے آپ چاہیں (اس سے ملاقات کو) مؤخر کر دیں اور جسے چاہیں اپنے قریب کر لیں۔“ حضرت عائشہ رضی اللہ عنہا نے فرمایا: ”تب میں نے کہا: (اے اللہ کے رسول!) آپ کا رب آپ کی خواہش فوراً پوری فرما دیتا ہے۔“ [سنن ابن ماجه/كتاب النكاح/حدیث: 2000]