حضرت ابوہریرہ رضی اللہ عنہ سے روایت ہے، انہوں نے فرمایا: ”اس ولیمے کا کھانا بدترین کھانا ہے جس میں دولت مندوں کو بلایا جائے اور غریبوں کو نہ بلایا جائے۔ اور جس نے (ولیمہ کی دعوت) قبول نہ کی، اس نے اللہ کی اور اس کے رسول صلی اللہ علیہ وسلم کی نافرمانی کی۔“ [سنن ابن ماجه/كتاب النكاح/حدیث: 1913]

حضرت عبداللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب کسی کو شادی کے ولیمے میں بلایا جائے تو اسے چاہیے کہ (دعوت) قبول کرے۔“ [سنن ابن ماجه/كتاب النكاح/حدیث: 1914]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”پہلے دن ولیمہ حق (ضروری) ہے، دوسرے دن نیکی ہے، تیسرے دن دکھاوا اور شہرت ہے۔“ [سنن ابن ماجه/كتاب النكاح/حدیث: 1915]

حضرت انس رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”ثیبہ کے لیے تین دن رات کی مدت ہے اور باکرہ کے لیے سات دن رات۔“ [سنن ابن ماجه/كتاب النكاح/حدیث: 1916]

حضرت ام سلمہ رضی اللہ عنہا سے روایت ہے کہ رسول اللہ صلی اللہ علیہ وسلم نے جب ام سلمہ رضی اللہ عنہا سے شادی کی تو تین دن ان کے ہاں ٹھہرے، پھر فرمایا: ”تیرے خاوند ( صلی اللہ علیہ وسلم ) کی نظر میں تیرا مقام کم نہیں۔ اگر تو چاہے تو سات دن تیرے پاس ٹھہروں۔ اور اگر میں سات دن تیرے پاس ٹھہرا تو دوسری بیویوں کے پاس بھی سات سات دن ٹھہروں گا۔“ [سنن ابن ماجه/كتاب النكاح/حدیث: 1917]

حضرت عبداللہ بن عمرو رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب کسی کو عورت یا لونڈی یا جانور حاصل ہو تو اس کے سر کے اگلے حصے کو پکڑ کر کہے: «اَللّٰهُمَّ إِنِّيْ أَسْأَلُكَ مِنْ خَيْرِهَا، وَخَيْرِ مَا جُبِلَتْ عَلَيْهِ، وَأَعُوْذُ بِكَ مِنْ شَرِّهَا، وَشَرِّ مَا جُبِلَتْ عَلَيْهِ» ”اے اللہ! میں تجھ سے اس کی بھلائی، اور اس کی پیدائشی عادتوں کی بھلائی مانگتا ہوں، اور اس کے شر سے اور اس کی پیدائشی عادتوں کے شر سے تیری پناہ میں آتا ہوں۔“” [سنن ابن ماجه/كتاب النكاح/حدیث: 1918]

حضرت عبداللہ بن عباس رضی اللہ عنہما سے روایت ہے، نبی صلی اللہ علیہ وسلم نے فرمایا: ”جب کوئی اپنی عورت کے پاس جاتا ہے، اگر اس وقت یہ الفاظ کہہ لے: «اَللّٰهُمَّ جَنِّبْنِي الشَّيْطَانَ، وَجَنِّبِ الشَّيْطَانَ مَا رَزَقْتَنِي» ”اے اللہ! مجھ سے شیطان کو دور رکھ اور تو مجھے جو اولاد دے، اس سے بھی شیطان کو دور رکھ۔“ پھر اگر انہیں اولاد مل گئی تو اللہ اس پر شیطان کو مسلط نہیں کرے گا۔ یا فرمایا: اسے شیطان نقصان نہیں پہنچائے گا۔“ [سنن ابن ماجه/كتاب النكاح/حدیث: 1919]

حضرت بہز بن حکیم اپنے والد حضرت حکیم بن معاویہ رضی اللہ عنہ اور وہ (اپنے والد) بہز کے دادا (حضرت معاویہ بن حیدہ قشیری رضی اللہ عنہ) سے روایت کرتے ہیں، انہوں نے عرض کیا: ”اے اللہ کے رسول! اعضائے مستورہ میں سے ہمیں کس چیز کے ظاہر کرنے کی اجازت ہے اور کس چیز کی ممانعت ہے؟“ آپ صلی اللہ علیہ وسلم نے فرمایا: ”بیوی اور لونڈی کے سوا سب سے اپنی شرمگاہ کو محفوظ رکھ۔“ میں نے عرض کیا: ”یہ ارشاد فرمائیے کہ اگر لوگ اکٹھے ہوں (یا اکٹھے رہتے ہوں؟)“ آپ صلی اللہ علیہ وسلم نے فرمایا: ”اگر یہ ممکن ہو کہ اسے کوئی نہ دیکھے تو ہرگز کسی کی نظر اس پر نہ پڑنے دے۔“ میں نے عرض کیا: ”اے اللہ کے رسول! اگر کوئی اکیلا ہو؟“ آپ صلی اللہ علیہ وسلم نے فرمایا: ”تب بھی لوگوں سے زیادہ اللہ کا حق ہے کہ اس سے شرم کی جائے۔“ [سنن ابن ماجه/كتاب النكاح/حدیث: 1920]

حضرت عتبہ بن عبد سلمی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب کوئی اپنی بیوی کے پاس جائے تو اسے چاہیے کہ پردہ کرے، اور گدھوں کی طرح ننگا نہ ہو جائے۔“ [سنن ابن ماجه/كتاب النكاح/حدیث: 1921]

حضرت عائشہ رضی اللہ عنہا سے روایت ہے، انہوں نے فرمایا: ”میں نے کبھی رسول اللہ صلی اللہ علیہ وسلم کی شرم گاہ نہیں دیکھی۔“ ابوبکر نے کہا: ”ابونعیم (حضرت عائشہ کے غلام کی بجائے) حضرت عائشہ رضی اللہ عنہا کی لونڈی سے بیان کرتے تھے۔“ [سنن ابن ماجه/كتاب النكاح/حدیث: 1922]