امام ابن شہاب زہری رحمہ اللہ سے روایت ہے کہ حضرت عمر بن عبدالعزیز رحمہ اللہ (گورنر مدینہ) نے عصر کی نماز وقت سے کچھ مؤخر کی تو حضرت عروہ رحمہ اللہ نے ان سے فرمایا: ”حضرت جبریل علیہ السلام اترے تھے اور انہوں نے رسول اللہ صلی اللہ علیہ وسلم کے آگے کھڑے ہو کر آپ کو نماز پڑھائی تھی۔“ حضرت عمر بن عبدالعزیز رحمہ اللہ کہنے لگے: ”عروہ! دیکھو کیا کہہ رہے ہو؟“ انہوں نے کہا: ”میں نے بشیر بن ابومسعود رحمہ اللہ کو یہ کہتے ہوئے سنا کہ میں نے حضرت ابومسعود رضی اللہ عنہ کو یہ کہتے ہوئے سنا کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”حضرت جبریل علیہ السلام اترے اور مجھے نماز پڑھائی۔ میں نے ان کے ساتھ نماز پڑھی، پھر میں نے ان کے ساتھ نماز پڑھی، پھر میں نے ان کے ساتھ نماز پڑھی، پھر میں نے ان کے ساتھ نماز پڑھی، پھر میں نے ان کے ساتھ نماز پڑھی۔““ آپ صلی اللہ علیہ وسلم نے اپنی انگلیوں پر پانچوں نمازیں شمار کیں۔ [سنن نسائي/كتاب المواقيت/حدیث: 495]

سیار بن سلامہ سے روایت ہے، وہ بیان کرتے ہیں کہ ”میں نے اپنے والد محترم کو حضرت ابوبرزہ رضی اللہ عنہ سے نبی صلی اللہ علیہ وسلم کی نماز کے بارے میں سوال کرتے سنا۔“ (سیار کے شاگرد شعبہ کہتے ہیں کہ) میں نے (سیار سے) کہا: ”کیا آپ نے ان (اپنے باپ) سے سنا ہے؟“ انھوں (سیار) نے کہا: ”(میں نے اسی طرح سنا ہے) جس طرح میں اس وقت تم سے سن رہا ہوں۔“ کہا: ”میں نے اپنے والد سے سنا، وہ رسول اللہ صلی اللہ علیہ وسلم کی نماز کے بارے میں سوال کر رہے تھے تو حضرت ابوبرزہ رضی اللہ عنہ نے فرمایا کہ آپ صلی اللہ علیہ وسلم عشاء کی نماز کو نصف رات تک مؤخر کرنے میں کوئی پروا نہیں کرتے تھے۔ آپ عشاء کی نماز سے پہلے سونے اور نماز کے بعد باتیں کرنا پسند نہیں فرماتے تھے۔“ شعبہ کہتے ہیں: بعد ازاں میں ان (سیار) سے ملا تو میں نے (بطور وثوق حضرت ابوبرزہ رضی اللہ عنہ کی حدیث کے بارے میں) پھر سوال کیا تو انھوں (حضرت ابوبرزہ رضی اللہ عنہ) نے کہا: ”آپ صلی اللہ علیہ وسلم ظہر کی نماز اس وقت پڑھتے جب سورج ڈھل جاتا اور عصر کی نماز اس وقت پڑھتے کہ (آپ کے ساتھ نماز پڑھنے والا) آدمی مدینہ منورہ کی دور دراز بستی تک پہنچ جاتا تھا جب کہ ابھی سورج تیز ہوتا تھا۔“ اور مغرب کے بارے میں مجھے علم نہیں کہ انھوں نے کون سا وقت ذکر کیا۔ پھر میں اس کے بعد انھیں ملا تو ان سے پوچھا، فرمانے لگے: ”اور آپ صلی اللہ علیہ وسلم صبح کی نماز اس وقت پڑھتے کہ نمازی سلام پھیر کر اپنے ہم نشین جسے وہ پہلے سے پہچانتا تھا، کے چہرے کو دیکھتا تو اسے پہچان لیتا تھا اور آپ صبح کی نماز میں ساٹھ (60) سے سو (100) تک آیات تلاوت فرماتے تھے۔“ [سنن نسائي/كتاب المواقيت/حدیث: 496]

حضرت انس رضی اللہ عنہ سے منقول ہے کہ ”رسول اللہ صلی اللہ علیہ وسلم سورج ڈھلنے کے وقت (اپنے حجرۂ مبارکہ سے) نکلے اور انہیں نمازِ ظہر پڑھائی۔“ [سنن نسائي/كتاب المواقيت/حدیث: 497]

حضرت خباب رضی اللہ عنہ سے روایت ہے، انہوں نے فرمایا: ”ہم نے رسول اللہ صلی اللہ علیہ وسلم سے زمین کے گرم ہونے کا شکوہ کیا لیکن آپ نے ہماری شکایت دور نہ کی۔“ ابواسحاق سے کہا گیا: ”(صحابہ کرام رضی اللہ عنہم کا شکوہ) نماز جلدی پڑھنے کے بارے میں تھا؟“ انہوں نے کہا: ”ہاں۔“ [سنن نسائي/كتاب المواقيت/حدیث: 498]

حضرت انس بن مالک رضی اللہ عنہ بیان کرتے ہیں کہ اللہ کے رسول صلی اللہ علیہ وسلم جب کسی منزل میں اترتے تھے تو ظہر کی نماز پڑھنے سے پہلے وہاں سے کوچ نہ فرماتے تھے۔ ایک آدمی نے کہا: ”اگرچہ سورج سر پر ہوتا؟“ فرمایا: ”اگرچہ سورج سر پر ہوتا۔“ [سنن نسائي/كتاب المواقيت/حدیث: 499]

حضرت انس بن مالک رضی اللہ عنہ بیان کرتے ہیں کہ ”جب گرمی ہوتی تو رسول اللہ صلی اللہ علیہ وسلم نمازِ ظہر کو ٹھنڈی کر کے پڑھتے تھے اور جب سردی ہوتی تو جلدی پڑھتے۔“ [سنن نسائي/كتاب المواقيت/حدیث: 500]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب گرمی زیادہ ہو تو نماز کو ٹھنڈی کرو کیونکہ گرمی کی شدت جہنم کا جوش ہے۔“ [سنن نسائي/كتاب المواقيت/حدیث: 501]

حضرت ابوموسیٰ رضی اللہ عنہ سے مرفوع روایت ہے، وہ بیان کرتے ہیں کہ نبی صلی اللہ علیہ وسلم نے فرمایا: ”ظہر کی نماز (کچھ) ٹھنڈک میں پڑھو، کیونکہ جو گرمی تم محسوس کرتے ہو، وہ جہنم کا جوش ہے۔“ [سنن نسائي/كتاب المواقيت/حدیث: 502]

حضرت ابوہریرہ رضی اللہ عنہ سے روایت ہے، اللہ کے رسول صلی اللہ علیہ وسلم نے فرمایا: ”یہ جبریل علیہ السلام ہیں جو تمہیں تمہارا دین سکھانے آئے ہیں، پھر جونہی فجر طلوع ہوئی انہوں نے صبح کی نماز اور جب سورج ڈھل گیا تو ظہر کی نماز پڑھائی، پھر عصر کی نماز پڑھائی جب انہوں نے ہر چیز کا سایہ اس کے برابر (زوال کے سائے کے علاوہ) دیکھ لیا، پھر مغرب کی نماز پڑھائی جونہی سورج غروب ہوا اور روزے دار کے لیے روزہ کھولنا حلال ہوا، پھر عشاء کی نماز پڑھائی جب رات کی سرخی غائب ہوگئی۔ پھر اگلے دن وہ (جبرئیل علیہ السلام) دوبارہ آپ صلی اللہ علیہ وسلم کے پاس آئے اور آپ کو صبح کی نماز پڑھائی جب تھوڑی سی روشنی پھیل گئی تھی، پھر آپ کو ظہر کی نماز پڑھائی جب ہر چیز کا سایہ اس کے برابر ہوگیا، پھر عصر کی نماز پڑھائی جب ہر چیز کا سایہ دگنا ہوگیا، پھر مغرب کی نماز کل والے وقت ہی پر پڑھائی، یعنی جب سورج غروب ہوگیا اور روزے دار کے لیے روزہ کھولنا حلال ہوگیا، پھر عشاء کی نماز پڑھائی جب رات کا کچھ حصہ گزر گیا، پھر فرمایا: ہر نماز کا وقت تمہاری کل اور آج کی نماز کا درمیانی وقت ہے۔“ [سنن نسائي/كتاب المواقيت/حدیث: 503]

حضرت عبداللہ بن مسعود رضی اللہ عنہ سے منقول ہے، انہوں نے فرمایا: ”رسول اللہ صلی اللہ علیہ وسلم کی ظہر کی نماز گرمیوں میں تین سے پانچ قدم کے بقدر (سائے میں) اور سردیوں میں پانچ سے سات قدم کے بقدر (سائے میں) ہوتی تھی۔“ [سنن نسائي/كتاب المواقيت/حدیث: 504]