حضرت علی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ”عصر کے بعد نماز پڑھنے سے منع فرمایا ہے مگر یہ کہ سورج سفید، صاف اور بلند ہو۔“ [سنن نسائي/كتاب المواقيت/حدیث: 574]

حضرت عائشہ رضی اللہ عنہا فرماتی ہیں کہ ”رسول اللہ صلی اللہ علیہ وسلم نے میرے ہاں عصر کے بعد دو رکعتیں کبھی نہیں چھوڑیں۔“ [سنن نسائي/كتاب المواقيت/حدیث: 575]

حضرت عائشہ رضی اللہ عنہا فرماتی ہیں کہ: ”رسول اللہ صلی اللہ علیہ وسلم جب بھی عصر کی نماز کے بعد میرے ہاں تشریف لاتے تو یہ دو رکعتیں ضرور پڑھتے۔“ [سنن نسائي/كتاب المواقيت/حدیث: 576]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ”جب بھی عصر کی نماز کے بعد میرے پاس ہوتے تو یہ دو رکعتیں ضرور پڑھتے۔“ [سنن نسائي/كتاب المواقيت/حدیث: 577]

حضرت عائشہ رضی اللہ عنہا فرماتی ہیں کہ ”دو نمازیں اللہ کے رسول صلی اللہ علیہ وسلم نے میرے گھر میں کبھی نہیں چھوڑیں، خفیہ نہ علانیہ: فجر سے قبل دو رکعتیں اور عصر کے بعد دو رکعتیں۔“ [سنن نسائي/كتاب المواقيت/حدیث: 578]

حضرت ابوسلمہ سے روایت ہے کہ انہوں (ابوسلمہ) نے حضرت عائشہ رضی اللہ عنہا سے ان دو رکعات کے بارے میں پوچھا جو اللہ کے رسول صلی اللہ علیہ وسلم عصر کے بعد پڑھا کرتے تھے، تو انہوں نے فرمایا: ”اللہ کے رسول صلی اللہ علیہ وسلم یہ دو رکعتیں عصر سے پہلے پڑھا کرتے تھے، پھر ایک دن کسی مصروفیت میں آپ صلی اللہ علیہ وسلم سے یہ دو رکعتیں رہ گئیں یا آپ صلی اللہ علیہ وسلم بھول گئے تو آپ صلی اللہ علیہ وسلم نے عصر کے بعد انہیں پڑھا، اور آپ صلی اللہ علیہ وسلم جب کوئی نماز ایک دفعہ پڑھ لیتے تو اس پر پابندی فرماتے تھے۔“ [سنن نسائي/كتاب المواقيت/حدیث: 579]

حضرت ام سلمہ رضی اللہ عنہا سے روایت ہے کہ نبی صلی اللہ علیہ وسلم نے ان کے گھر میں صرف ایک دفعہ عصر کے بعد دو رکعتیں پڑھیں، انہوں نے آپ صلی اللہ علیہ وسلم سے اس کا ذکر کیا تو آپ صلی اللہ علیہ وسلم نے فرمایا: ”یہ وہ رکعتیں ہیں جو میں ظہر کے بعد پڑھا کرتا ہوں، آج میں ان سے مصروف رہا حتیٰ کہ عصر کا وقت ہو گیا اور مجھے عصر پڑھنی پڑی۔“ [سنن نسائي/كتاب المواقيت/حدیث: 580]

حضرت ام سلمہ رضی اللہ عنہا فرماتی ہیں کہ ”اللہ کے رسول صلی اللہ علیہ وسلم (ایک دن) عصر سے پہلے (ظہر کے بعد) کی دو رکعتوں سے مصروف رہے تو آپ نے انہیں عصر کے بعد ادا فرمایا۔“ [سنن نسائي/كتاب المواقيت/حدیث: 581]

حضرت عمران بن حدیر رحمہ اللہ نے حضرت لاحق رحمہ اللہ سے غروبِ شمس سے قبل کی دو رکعتوں کے بارے میں پوچھا تو انہوں نے فرمایا: ”حضرت عبداللہ بن زبیر رضی اللہ عنہ یہ دو رکعتیں پڑھا کرتے تھے تو حضرت معاویہ رضی اللہ عنہ نے انہیں پیغام بھیجا کہ غروبِ آفتاب کے وقت یہ دو رکعتیں کیسی ہیں؟ بات حضرت ام سلمہ رضی اللہ عنہا تک پہنچی تو انہوں نے فرمایا کہ رسول اللہ صلی اللہ علیہ وسلم یہ دو رکعتیں عصر سے پہلے پڑھا کرتے تھے۔ (ایک دن) آپ صلی اللہ علیہ وسلم مصروفیت کی بنا پر نہ پڑھ سکے تو آپ صلی اللہ علیہ وسلم نے غروبِ شمس کے وقت (عصر کے بعد) یہ دو رکعتیں پڑھ لیں۔ میں نے اس دن کے سوا کبھی آپ صلی اللہ علیہ وسلم کو یہ دو رکعتیں پڑھتے نہیں دیکھا، اس سے پہلے نہ بعد۔“ [سنن نسائي/كتاب المواقيت/حدیث: 582]

ابوالخیر سے روایت ہے کہ ابوتمیم جیشانی مغرب (کی نماز) سے پہلے دو رکعتیں پڑھنے کے لیے اٹھے۔ میں نے عقبہ بن عامر رضی اللہ عنہ سے کہا: ”انہیں دیکھیے یہ کون سی نماز پڑھ رہے ہیں؟“ انہوں (عقبہ) نے ان کی طرف توجہ فرمائی تو انہیں (نماز پڑھتے) دیکھا تو انہوں نے فرمایا: ”ہم یہ نماز رسول اللہ صلی اللہ علیہ وسلم کے زمانہ مبارک میں پڑھا کرتے تھے۔“ [سنن نسائي/كتاب المواقيت/حدیث: 583]