حضرت ایوب رحمہ اللہ سے روایت ہے کہ مجھے پہلے یہ روایت ابو قلابہ رحمہ اللہ نے حضرت عمرو بن سلمہ رضی اللہ عنہ سے بیان کی، پھر ابو قلابہ رحمہ اللہ کہنے لگے کہ ”عمرو بن سلمہ رضی اللہ عنہ زندہ ہیں تم ان سے مل کیوں نہیں لیتے!“ ایوب رحمہ اللہ نے کہا: میں ان سے جا کر ملا اور ان سے پوچھا تو انہوں نے کہا کہ جب فتح مکہ کا واقعہ ہوا تو ہر قوم نے اپنے اعلانِ اسلام میں ایک دوسرے سے سبقت کی کوشش کی۔ میرے والد محترم بھی ہماری بستی والوں کے اسلام کا اعلان کرنے کے لیے نبی کریم صلی اللہ علیہ وسلم کے پاس حاضر ہوئے۔ جب وہ واپس آئے تو ہم ان کے استقبال کے لیے گئے، انہوں نے کہا: «وَاللّٰهِ!» ”اللہ کی قسم! میں تمہارے پاس اللہ تعالیٰ کے سچے رسول صلی اللہ علیہ وسلم کے پاس سے آ رہا ہوں۔“ آپ صلی اللہ علیہ وسلم نے فرمایا ہے: ”فلاں نماز فلاں وقت پڑھو اور فلاں نماز فلاں وقت اور جب نماز کا وقت ہو جائے تو تم میں سے ایک آدمی اذان کہے اور جو زیادہ قرآن پڑھا ہوا ہے وہ امامت کرے۔“ [سنن نسائي/كتاب الأذان/حدیث: 637]

حضرت ابن عمر رضی اللہ عنہ سے منقول ہے کہ اللہ کے رسول صلی اللہ علیہ وسلم نے فرمایا: ”تحقیق بلال (رضی اللہ عنہ) رات کو اذان دیتے ہیں، لہٰذا تم کھاتے پیتے رہنا حتیٰ کہ عبداللہ بن ام مکتوم رضی اللہ عنہ اذان کہیں۔“ [سنن نسائي/كتاب الأذان/حدیث: 638]

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”تحقیق بلال رضی اللہ عنہ رات کو اذان کہتے ہیں، لہٰذا کھاتے پیتے رہو حتیٰ کہ تم ابن ام مکتوم رضی اللہ عنہ کی اذان سنو۔“ [سنن نسائي/كتاب الأذان/حدیث: 639]

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نے فرمایا: ”جب بلال اذان کہیں تو کھاتے پیتے رہو حتیٰ کہ ابن ام مکتوم اذان دیں۔“ اور ان دونوں اذانوں کے درمیان صرف اتنا فاصلہ ہوتا تھا کہ ایک اترتا اور دوسرا چڑھ جاتا تھا۔ [سنن نسائي/كتاب الأذان/حدیث: 640]

حضرت انیسہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”جب ابن ام مکتوم اذان کہیں تو تم کھاتے پیتے رہو اور جب بلال اذان کہیں تو کھانا پینا بند کر دو۔“ [سنن نسائي/كتاب الأذان/حدیث: 641]

حضرت عبداللہ بن مسعود رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”بے شک بلال رات ہی کو اذان دیتے ہیں تاکہ تمہارے سونے والے کو بیدار کریں اور تمہارے قیام کرنے والے کو لوٹائیں (تاکہ وہ کچھ آرام کرلے) اور صبح صادق ایسی نہیں ہوتی (جیسی بلال کی اذان کے وقت ہوتی ہے)۔“ [سنن نسائي/كتاب الأذان/حدیث: 642]

حضرت انس رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم سے صبح کے وقت کے بارے میں پوچھا تو آپ نے (پہلے دن) بلال رضی اللہ عنہ کو حکم دیا۔ انہوں نے اذان کہی جونہی فجر طلوع ہوئی۔ جب اگلا دن ہوا تو آپ نے فجر کی نماز کو مؤخر کیا حتیٰ کہ خوب روشنی ہوگئی، پھر آپ نے انہیں حکم دیا تو انہوں نے اقامت کہی، پھر آپ نے نماز پڑھائی۔ پھر فرمایا: ”یہ ہے نماز صبح کا وقت (یعنی کل اور آج کی نمازوں کے درمیان)۔“ [سنن نسائي/كتاب الأذان/حدیث: 643]

حضرت ابو جحیفہ رضی اللہ عنہ سے روایت ہے، انہوں نے فرمایا: ”میں نبی صلی اللہ علیہ وسلم کے پاس آیا تو بلال رضی اللہ عنہ باہر نکلے اور اذان کہی، وہ اپنی اذان میں ایسے دائیں بائیں منہ موڑتے تھے۔“ [سنن نسائي/كتاب الأذان/حدیث: 644]

حضرت ابوسعید خدری رضی اللہ عنہ نے عبداللہ بن عبدالرحمٰن بن ابو صعصعہ انصاری سے کہا: ”تحقیق میں دیکھتا ہوں کہ تم بکریوں اور صحرا کے دلدادہ ہو، اس لیے جب تم اپنی بکریوں اور صحرا میں ہو اور تم اذان کہو تو بلند آواز سے اذان کہا کرو، اس لیے کہ مؤذن کی آواز کی انتہا تک جو بھی جن و انس یا کوئی اور چیز اسے سنتی ہے، قیامت کے دن اس کے لیے گواہی دے گی۔“ حضرت ابوسعید خدری رضی اللہ عنہ نے فرمایا: ”میں نے یہ بات اللہ کے رسول صلی اللہ علیہ وسلم سے سنی ہے۔“ [سنن نسائي/كتاب الأذان/حدیث: 645]

حضرت ابوہریرہ رضی اللہ عنہ سے روایت ہے، انہوں نے رسول اللہ صلی اللہ علیہ وسلم کے منہ مبارک سے سنا، آپ صلی اللہ علیہ وسلم فرما رہے تھے: ”مؤذن کی بخشش کی جاتی ہے جہاں تک اس کی (اذان کی) آواز پہنچے اور ہر خشک و تر چیز (جاندار اور بے جان) اس کے لیے گواہی دے گی۔“ [سنن نسائي/كتاب الأذان/حدیث: 646]