حضرت عقبہ بن عامر رضی اللہ عنہ نے کہا: میں نے رسول اللہ صلی اللہ علیہ وسلم کو فرماتے سنا: ”اللہ تعالیٰ بکریوں کے اس چرواہے سے تعجب فرماتا ہے جو کسی پہاڑ کی چوٹی پر رہتا ہے اور اذان کہہ کر نماز پڑھتا ہے، اللہ عزوجل فرماتا ہے: ”میرے اس بندے کو دیکھو! یہ اذان کہتا ہے اور نماز قائم کرتا ہے، یہ مجھ سے ڈرتا ہے، یقیناً میں نے اپنے بندے کو معاف کر دیا اور اسے جنت میں داخل کر دیا۔“” [سنن نسائي/كتاب الأذان/حدیث: 667]

حضرت رفاعہ بن رافع رضی اللہ عنہ سے روایت ہے کہ: ”ایک دفعہ رسول اللہ صلی اللہ علیہ وسلم نماز کی صف میں بیٹھے ہوئے تھے…… الحدیث۔“ [سنن نسائي/كتاب الأذان/حدیث: 668]

جامع مسجد کے مؤذن ابو مثنیٰ نے کہا: ”میں نے حضرت ابن عمر رضی اللہ عنہما سے اذان کے بارے میں پوچھا تو انہوں نے فرمایا: ”رسول اللہ صلی اللہ علیہ وسلم کے دور میں اذان دو دو کلمات تھے اور اقامت ایک ایک کلمہ، مگر جب تو «قَدْ قَامَتِ الصَّلَاةُ» ”نماز کھڑی ہو گئی“ کہے تو وہ دو دو مرتبہ ہے۔ جب ہم «قَدْ قَامَتِ الصَّلَاةُ» ”نماز کھڑی ہو گئی“ کے الفاظ سنتے تو وضو کرتے، پھر نماز کے لیے جاتے۔““ [سنن نسائي/كتاب الأذان/حدیث: 669]

حضرت مالک بن حویرث رضی اللہ عنہ سے روایت ہے کہ رسول اللہ صلی اللہ علیہ وسلم نے مجھے اور میرے ساتھی سے فرمایا: ”جب نماز کا وقت آئے تو تم اذان کہو، پھر اقامت کہو، پھر تم میں سے بڑا امامت کروائے۔“ [سنن نسائي/كتاب الأذان/حدیث: 670]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب نماز کے لیے اذان کہی جاتی ہے تو شیطان ہوا چھوڑتا (پادتا) ہوا بھاگتا ہے حتیٰ کہ اذان نہیں سنتا۔ جب اذان مکمل ہو جاتی ہے تو آ جاتا ہے، پھر جب اقامت کہی جاتی ہے تو پھر بھاگ جاتا ہے، حتیٰ کہ اقامت مکمل ہو جاتی ہے تو واپس آ جاتا ہے، یہاں تک کہ آدمی اور اس کے دل کے درمیان وسوسے ڈالتا ہے، اسے کہتا ہے: ”فلاں چیز یاد کر، فلاں چیز یاد کر۔“ ایسی چیزیں جو پہلے اس کے ذہن میں نہیں تھیں حتیٰ کہ آدمی کی یہ حالت ہو جاتی ہے کہ وہ نہیں جانتا کہ کتنی نماز پڑھی ہے؟“ [سنن نسائي/كتاب الأذان/حدیث: 671]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اگر لوگ اذان اور صفِ اول کی فضیلت کو جانتے اور پھر قرعہ اندازی کے علاوہ کوئی چارہ کار نہ پاتے تو ان کے لیے ضرور قرعہ اندازی کرتے، اور اگر لوگ ظہر کی نماز جلدی (اوّل وقت میں) پڑھنے کی فضیلت جانتے تو ایک دوسرے سے آگے بھاگتے اور اگر عشاء اور فجر کی فضیلت کو جانتے تو ضرور آتے، خواہ گھسٹ کر ہی آنا پڑتا۔“ [سنن نسائي/كتاب الأذان/حدیث: 672]

حضرت عثمان بن ابوالعاص رضی اللہ عنہ سے روایت ہے کہ ”میں نے رسول اللہ صلی اللہ علیہ وسلم سے گزارش کی کہ آپ مجھے میری قوم کا امام مقرر فرما دیں۔“ آپ صلی اللہ علیہ وسلم نے فرمایا: ”تم ان کے امام ہو۔ نماز پڑھاتے وقت ان میں سے کمزور ترین آدمی کا لحاظ رکھنا اور ایسا مؤذن رکھنا جو اپنی اذان پر تنخواہ نہ لیتا ہو۔“ [سنن نسائي/كتاب الأذان/حدیث: 673]

حضرت ابوسعید خدری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم اذان سنو تو اسی طرح کہو جس طرح مؤذن کہتا ہے۔“ [سنن نسائي/كتاب الأذان/حدیث: 674]

حضرت ابوہریرہ رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کے ساتھ تھے کہ حضرت بلال رضی اللہ عنہ کھڑے ہو کر اذان کہنے لگے۔ جب وہ خاموش ہوئے تو آپ صلی اللہ علیہ وسلم نے فرمایا: ”جس شخص نے ان کلمات کی طرح کلمات (جواباً) کہے، وہ یقیناً جنت میں داخل ہوگا۔“ [سنن نسائي/كتاب الأذان/حدیث: 675]

حضرت مجمع بن یحییٰ انصاری رحمہ اللہ نے کہا: ”میں حضرت ابو امامہ بن سہل بن حنیف رضی اللہ عنہ کے پاس بیٹھا تھا کہ مؤذن نے اذان شروع کر دی۔ اس نے دو بار «اللّٰهُ أَكْبَرُ اللّٰهُ أَكْبَرُ» ”اللہ سب سے بڑا ہے، اللہ سب سے بڑا ہے“ کہا تو آپ نے بھی دو بار «اللّٰهُ أَكْبَرُ اللّٰهُ أَكْبَرُ» ”اللہ سب سے بڑا ہے، اللہ سب سے بڑا ہے“ کہا۔ پھر اس نے دو بار «أَشْهَدُ أَنْ لَّا إِلٰهَ إِلَّا اللّٰهُ» ”میں گواہی دیتا ہوں کہ اللہ کے سوا کوئی معبود نہیں“ کہا تو آپ نے بھی دو بار «أَشْهَدُ أَنْ لَّا إِلٰهَ إِلَّا اللّٰهُ» ”میں گواہی دیتا ہوں کہ اللہ کے سوا کوئی معبود نہیں“ کہا۔ پھر اس نے «أَشْهَدُ أَنَّ مُحَمَّدًا رَّسُولُ اللّٰهِ» ”میں گواہی دیتا ہوں کہ محمد صلی اللہ علیہ وسلم اللہ کے رسول ہیں“ کہا تو آپ نے بھی دو مرتبہ «أَشْهَدُ أَنَّ مُحَمَّدًا رَّسُولُ اللّٰهِ» ”میں گواہی دیتا ہوں کہ محمد صلی اللہ علیہ وسلم اللہ کے رسول ہیں“ کہا۔ پھر فرمایا: ”مجھے حضرت معاویہ بن ابو سفیان رضی اللہ عنہ نے رسول اللہ صلی اللہ علیہ وسلم کا فرمان اسی طرح بیان کیا۔““ [سنن نسائي/كتاب الأذان/حدیث: 676]