حضرت ثابت بن ضحاک رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”جس شخص نے جھوٹا ہونے کے باوجود کسی اور دین کی قسم کھائی تو وہ اسی طرح ہے جس طرح اس نے کہا، اور جو شخص اپنے آپ کو کسی چیز سے قتل کر ڈالے، اسے آخرت میں اسی چیز کے ساتھ عذاب دیا جائے گا۔“ [سنن نسائي/كتاب الأيمان والنذور/حدیث: 3802]

حضرت بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کہے: (اگر میں نے فلاں کام کیا ہو تو) میں اسلام سے لاتعلق ہوں، اگر وہ جھوٹا ہے تو پھر وہ واقعتاً اسلام سے لاتعلق ہے، اور اگر وہ سچا ہے تو پھر بھی وہ صحیح سالم اسلام کی طرف نہیں لوٹے گا۔“ [سنن نسائي/كتاب الأيمان والنذور/حدیث: 3803]

جہینہ قبیلے کی ایک عورت حضرت قتیلہ رضی اللہ عنہا سے روایت ہے کہ ایک یہودی شخص نبی اکرم صلی اللہ علیہ وسلم کے پاس آیا اور کہا: تم بھی شرک کرتے ہو اور غیر اللہ کو معبود بناتے ہو کیونکہ تم کہتے ہو: «مَا شَاءَ اللّٰهُ وَشِئْتَ» ”جو اللہ تعالیٰ چاہے اور آپ چاہیں“ اور تم کعبہ کی قسم کھاتے ہو۔ تو نبی اکرم صلی اللہ علیہ وسلم نے مسلمانوں کو حکم دیا کہ جب وہ قسم کھانے لگیں تو کہیں: «وَرَبِّ الْكَعْبَةِ» ”رب کعبہ کی قسم!“ اور کہیں: «مَا شَاءَ اللّٰهُ ثُمَّ شِئْتَ» ”جو اللہ تعالیٰ چاہے، پھر آپ چاہیں۔“ [سنن نسائي/كتاب الأيمان والنذور/حدیث: 3804]

حضرت عبدالرحمن بن سمرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”تم اپنے آبا و اجداد اور بتوں کی قسمیں نہ کھاؤ۔“ [سنن نسائي/كتاب الأيمان والنذور/حدیث: 3805]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے جو شخص لات کی قسم کھائے، وہ کہے: «لَا إِلٰهَ إِلَّا اللّٰهُ» (”اللہ تعالیٰ کے سوا کوئی معبود نہیں“) اور جو شخص اپنے ساتھی سے کہے: آؤ میں تم سے جوا کھیلوں تو اسے صدقہ کرنا چاہیے۔“ [سنن نسائي/كتاب الأيمان والنذور/حدیث: 3806]

حضرت سعد رضی اللہ عنہ سے روایت ہے، انہوں نے فرمایا: ہم ایک دفعہ کسی معاملے میں بحث کرتے تھے، میرا دورِ جاہلیت ابھی تازہ تھا، میں لات و عزیٰ کی قسم کھا بیٹھا تو مجھے رسول اللہ صلی اللہ علیہ وسلم کے صحابہ کہنے لگے: تو نے بری بات کہی ہے، رسول اللہ صلی اللہ علیہ وسلم کے پاس جاؤ اور آپ کو یہ بات بتاؤ، ہم تو سمجھتے ہیں کہ تو نے کلمہ کفر کہا ہے۔ میں آپ کی خدمت میں حاضر ہوا اور آپ کو پوری بات بتائی، آپ نے مجھے فرمایا: ”تین دفعہ کہہ: «لَا إِلٰهَ إِلَّا اللّٰهُ وَحْدَهٗ لَا شَرِيْكَ لَهٗ» ”اللہ کے سوا کوئی معبود نہیں، وہ یکتا ہے، کوئی اس کا ساجھی نہیں“ اور تین دفعہ شیطان سے (بچنے کے لیے) اللہ تعالیٰ کی پناہ مانگ اور تین دفعہ اپنے بائیں طرف تھوک دے اور دوبارہ ایسی بات نہ کہنا۔“ [سنن نسائي/كتاب الأيمان والنذور/حدیث: 3807]

حضرت سعد رضی اللہ عنہ سے روایت ہے، انہوں نے فرمایا: میں لات و عزیٰ کی قسم کھا بیٹھا تو مجھے میرے ساتھی کہنے لگے: تو نے بہت برا کلمہ کہا اور بہت قبیح بات کی ہے۔ میں رسول اللہ صلی اللہ علیہ وسلم کی خدمت میں حاضر ہوا اور یہ بات آپ سے ذکر کی۔ آپ صلی اللہ علیہ وسلم نے فرمایا: ”تین دفعہ کہہ: «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ» ”اللہ کے سوا کوئی معبود نہیں۔ وہ اکیلا ہے۔ اس کا کوئی شریک نہیں۔ اسی کے لیے بادشاہی ہے۔ اسی کے لیے تعریف ہے۔ اور وہ ہر چیز پر قادر ہے“ اور تین دفعہ اپنے بائیں جانب تھوک دے اور شیطان سے بچاؤ کے لیے اللہ کی پناہ طلب کر اور پھر دوبارہ ایسی بات نہ کرنا۔“ [سنن نسائي/كتاب الأيمان والنذور/حدیث: 3808]

حضرت براء بن عازب رضی اللہ عنہ سے روایت ہے، انہوں نے فرمایا کہ رسول اللہ صلی اللہ علیہ وسلم نے ہمیں سات چیزوں کا حکم دیا: ”جنازوں کے ساتھ جانا، مریض کی بیمار پرسی کرنا، چھینکنے والے کو دعا دینا، دعوت دینے والے کی دعوت قبول کرنا، مظلوموں کی مدد کرنا، قسم کھانے والے کی قسم کو پورا کرنا اور سلام کا جواب دینا۔“ [سنن نسائي/كتاب الأيمان والنذور/حدیث: 3809]

حضرت ابو موسیٰ اشعری رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”میں اس زمین کی جس چیز پر بھی قسم کھا لوں، پھر اس کے علاوہ کسی اور چیز کو بہتر دیکھوں تو میں وہ بہتر کام کروں گا۔“ [سنن نسائي/كتاب الأيمان والنذور/حدیث: 3810]

حضرت ابوموسیٰ اشعری رضی اللہ عنہ سے روایت ہے، انہوں نے فرمایا: میں کچھ اشعری افراد کے ساتھ رسول اللہ صلی اللہ علیہ وسلم کی خدمت میں حاضر ہوا۔ ہم آپ سے (جہاد کے سلسلے میں) سواریاں مانگنے آئے تھے۔ آپ نے فرمایا: ”اللہ کی قسم! میں تمہیں سواریاں نہیں دوں گا اور نہ میرے پاس سواریاں ہیں۔“ پھر ہم ٹھہرے رہے جتنی دیر اللہ نے چاہا کہ (بعد میں) آپ کے پاس کچھ اونٹ لائے گئے۔ آپ نے ہمیں تین اونٹ دینے کا حکم دیا۔ جب ہم اونٹ لے کر چل پڑے تو ہم نے ایک دوسرے سے کہا: اللہ تعالیٰ ہمارے لیے ان اونٹوں میں برکت نہیں فرمائے گا کیونکہ جب ہم رسول اللہ صلی اللہ علیہ وسلم کے پاس سواریاں مانگنے آئے تھے تو آپ نے قسم کھائی تھی کہ میں سواریاں نہیں دوں گا۔ (اب شاید آپ قسم بھول گئے ہیں۔ یہ سوچ کر) ہم دوبارہ نبی صلی اللہ علیہ وسلم کی خدمت میں حاضر ہوئے اور آپ سے ساری بات ذکر کی۔ آپ نے فرمایا: ”میں نے تمہیں سواریاں نہیں دیں بلکہ اللہ تعالیٰ نے دی ہیں۔ اللہ کی قسم! اگر میں کسی چیز پر قسم کھا لوں، پھر میں اس کی بجائے کوئی اور چیز بہتر سمجھوں تو میں قسم کا کفارہ دے دیتا ہوں اور بہتر کام کر لیتا ہوں۔“ [سنن نسائي/كتاب الأيمان والنذور/حدیث: 3811]