حضرت جابر رضی اللہ عنہ سے منقول ہے کہ رسول اللہ صلی اللہ علیہ وسلم نے ہمیں حضرت ابوعبیدہ رضی اللہ عنہ کے ماتحت ایک لشکر میں بھیجا۔ ہمارا زاد ختم ہو گیا۔ ہم ایک مچھلی کے پاس سے گزرے جسے سمندر نے (ساحل پر) پھینک دیا تھا۔ ہم نے اس میں سے کھانے کا ارادہ کیا تو حضرت ابوعبیدہ رضی اللہ عنہ نے ہمیں روک دیا، پھر خود ہی کہنے لگے: ہم رسول اللہ صلی اللہ علیہ وسلم کے بھیجے ہوئے ہیں اور اللہ تعالیٰ کے راستے میں آئے ہیں، اس لیے کھا لو۔ ہم کئی دن تک اس میں سے کھاتے رہے۔ جب ہم واپس رسول اللہ صلی اللہ علیہ وسلم کے پاس آئے تو ہم نے آپ صلی اللہ علیہ وسلم کو اس بات سے مطلع کیا۔ آپ صلی اللہ علیہ وسلم نے فرمایا: ”اگر تمہارے پاس کچھ گوشت باقی ہے تو ہمارے پاس بھی بھیجو۔“ [سنن نسائي/كتاب الصيد والذبائح/حدیث: 4358]

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں حضرت ابوعبیدہ رضی اللہ عنہ کے ساتھ بھیجا، ہم تین سو دس سے زائد تھے، آپ صلی اللہ علیہ وسلم نے ہمیں کھجوروں کی ایک بوری بطور زادِ راہ دی تھی، حضرت ابوعبیدہ رضی اللہ عنہ ہمیں روزانہ ایک ایک مٹھی کھجوریں دیتے تھے، جب ہم نے انہیں تقریباً ختم کر دیا تو وہ ہمیں ایک ایک کھجور دینے لگے حتیٰ کہ ہم اسے بچوں کی طرح چوستے رہتے اور اوپر سے پانی پی لیتے، جب کھجوریں بالکل ختم ہو گئیں تو ایک کھجور کا نہ ملنا بھی ہم کو محسوس ہوتا تھا حتیٰ کہ ہم اپنی لاٹھیوں سے درختوں کے پتے جھاڑ لیتے اور انہیں پھانک لیتے، پھر اوپر سے پانی پی لیتے حتیٰ کہ ہمارے اس لشکر کا نام ہی پتوں والا لشکر رکھ دیا گیا، پھر ہم ساحل پر پہنچے تو وہاں ٹیلے جیسا ایک آبی جانور پڑا تھا جسے عنبر کہا جاتا تھا، حضرت ابوعبیدہ رضی اللہ عنہ نے فرمایا: یہ مرا ہوا ہے، لہٰذا اسے نہ کھاؤ، پھر خود ہی کہنے لگے: ہم اللہ کے رسول صلی اللہ علیہ وسلم کی فوج ہیں اور اللہ تعالیٰ کے راستے میں جا رہے ہیں، پھر ہم لاچار بھی ہیں، اس لیے اللہ کا نام لے کر کھاؤ، ہم نے کچھ تو کھایا اور کچھ سکھا لیا، اس جانور کی آنکھ کے گڑھے میں تیرہ آدمی (آرام سے) بیٹھ گئے، پھر حضرت ابوعبیدہ رضی اللہ عنہ نے اس کی پسلی لی، پھر ایک موٹے اونچے اونٹ پر پالان کس کر (ایک لمبا تڑنگا آدمی بٹھا کر) اسے پسلی کے نیچے سے گزارا تو وہ صاف گزر گیا، جب ہم رسول اللہ صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے فرمایا: ”تم اتنے دن کہاں رکے رہے؟“ ہم نے عرض کی: ہم قریش کے تجارتی قافلوں کو تلاش کرتے رہے، پھر ہم نے آپ صلی اللہ علیہ وسلم کے سامنے اس آبی جانور کا ذکر کیا تو آپ صلی اللہ علیہ وسلم نے فرمایا: ”وہ رزق تھا جو اللہ تعالیٰ نے تمہارے لیے مہیا فرمایا۔ کیا تمہارے پاس اس کا کچھ گوشت ہے؟“ ہم نے کہا: جی ہاں۔ [سنن نسائي/كتاب الصيد والذبائح/حدیث: 4359]

حضرت عبدالرحمن بن عثمان رضی اللہ عنہ سے منقول ہے کہ ایک طبیب نے رسول اللہ صلی اللہ علیہ وسلم کے سامنے کسی دوائی میں مینڈک ڈالنے کا ذکر کیا، تو رسول اللہ صلی اللہ علیہ وسلم نے مینڈک کے قتل سے منع فرما دیا۔ [سنن نسائي/كتاب الصيد والذبائح/حدیث: 4360]

حضرت عبداللہ بن ابی اوفیٰ رضی اللہ عنہ نے فرمایا: ہم سات جنگوں میں رسول اللہ صلی اللہ علیہ وسلم کے ساتھ گئے، ہم (آپ کے ساتھ رہتے ہوئے) ٹڈیاں کھایا کرتے تھے۔ [سنن نسائي/كتاب الصيد والذبائح/حدیث: 4361]

حضرت ابو یعفور رحمہ اللہ نے کہا کہ میں نے حضرت عبداللہ بن ابی اوفی رضی اللہ عنہ سے ٹڈی کو قتل کرنے کے بارے میں پوچھا تو انہوں نے فرمایا: میں چھ جنگوں میں رسول اللہ صلی اللہ علیہ وسلم کے ساتھ حاضر ہوا، ہم ٹڈیاں کھایا کرتے تھے۔ [سنن نسائي/كتاب الصيد والذبائح/حدیث: 4362]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ایک چیونٹی نے ایک نبی کو کاٹ لیا تو انھوں نے چیونٹی کی اس پوری آبادی کو آگ لگانے کا حکم دیا، انھیں جلا دیا گیا۔ اللہ تعالیٰ نے ان کی طرف وحی فرمائی کہ تجھے ایک چیونٹی نے کاٹ لیا، تو نے اللہ تعالیٰ کی تسبیح کرنے والی مخلوق کو ہلاک کر دیا۔“ [سنن نسائي/كتاب الصيد والذبائح/حدیث: 4363]

حسن بصری رحمہ اللہ سے منقول ہے کہ (سابقہ) انبیاء علیہم السلام میں سے ایک نبی ایک درخت کے نیچے فروکش ہوئے۔ ایک چیونٹی نے انہیں کاٹ لیا۔ انہوں نے حکم دیا تو ان کے پورے بل کو تمام چیونٹیوں سمیت جلا دیا گیا۔ اللہ تعالیٰ نے ان کی طرف وحی فرمائی: ”کیوں نہ آپ نے صرف ایک چیونٹی کو مارا؟“ (آخر یہ بھی تو اللہ تعالیٰ کی تسبیح بیان کرتی ہیں)۔ [سنن نسائي/كتاب الصيد والذبائح/حدیث: 4364]

اسی قسم کی روایت حضرت ابوہریرہ رضی اللہ عنہ سے مروی ہے مگر وہ مرفوع نہیں (بلکہ ان کا اپنا قول ہے)۔ [سنن نسائي/كتاب الصيد والذبائح/حدیث: 4365]