حضرت ابوالدرداء رضی اللہ عنہ سے روایت ہے، انہوں نے کہا: حضرت ابوبکر اور حضرت عمر رضی اللہ عنہما کے درمیان کچھ تکرار ہو گئی، چنانچہ حضرت ابوبکر رضی اللہ عنہ نے حضرت عمر رضی اللہ عنہ کو ناراض کر دیا تو حضرت عمر رضی اللہ عنہ وہاں سے غضبناک ہو کر چل دیے۔ پھر حضرت ابوبکر رضی اللہ عنہ بھی ان سے معافی مانگتے ہوئے ان کے پیچھے پیچھے چلے لیکن حضرت عمر رضی اللہ عنہ نے انہیں معاف نہ کیا بلکہ ان کے سامنے سے اپنے گھر کا دروازہ بند کر لیا۔ حضرت ابوبکر رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے۔ حضرت ابوالدرداء رضی اللہ عنہ کہتے ہیں کہ ہم لوگ اس وقت آپ صلی اللہ علیہ وسلم کے پاس موجود تھے۔ آپ صلی اللہ علیہ وسلم نے فرمایا: ”تمہارے یہ صاحب کسی سے جھگڑا کر کے آ رہے ہیں۔“ اس دوران میں حضرت عمر رضی اللہ عنہ کو بھی اپنے رد عمل پر پشیمانی ہوئی تو وہ آئے اور سلام کر کے نبی صلی اللہ علیہ وسلم کے پاس بیٹھ گئے اور رسول اللہ صلی اللہ علیہ وسلم سے پورا واقعہ بیان کیا۔ (یہ سن کر) رسول اللہ صلی اللہ علیہ وسلم (حضرت عمر رضی اللہ عنہ پر) ناراض ہوئے لیکن حضرت ابوبکر رضی اللہ عنہ مسلسل کہے جا رہے تھے: ”اے اللہ کے رسول! اللہ کی قسم! واقعی میری زیادتی تھی۔“ رسول اللہ صلی اللہ علیہ وسلم نے فرمایا: ”کیا تم میرے ساتھی کو میری خاطر (ستانا) چھوڑتے ہو کہ نہیں؟ کیا تم میری خاطر میرے ساتھی کو (ستانا) نہیں چھوڑ سکتے؟ دیکھو میں نے جب کہا تھا: ”اے لوگو! بلاشبہ میں تم سب کی طرف اللہ تعالیٰ کی طرف سے بھیجا ہوا پیغمبر ہوں“ تو تم سب نے میری تکذیب کی لیکن ابوبکر نے مجھے سچا کہا تھا۔“ ابو عبداللہ (امام بخاری رحمہ اللہ) کہتے ہیں کہ «غامر» کے معنی ہیں: بھلائی میں سبقت کرنے والا۔ [صحيح البخاري/كتاب تفسير القرآن/حدیث: 4640]

حضرت ابوہریرہ رضی اللہ عنہ سے روایت ہے، وہ کہتے ہیں کہ رسول اللہ صلی اللہ علیہ وسلم نے فرمایا: ”جب بنی اسرائیل سے کہا گیا تھا: ﴿ادْخُلُوا الْبَابَ سُجَّدًا وَقُولُوا حِطَّةٌ نَّغْفِرْ لَكُمْ خَطَايَاكُمْ﴾ [سورة البقرة: 58] ”تم دروازے میں سجدہ کرتے ہوئے داخل ہو جاؤ اور کہو کہ ہمیں معاف کر دیا جائے، ہم تمہارے گناہ معاف کر دیں گے“، انہوں نے اس حکم کو یوں بدلا کہ وہ سرینوں کو گھسیٹتے ہوئے اور «حِطَّةٌ» کے بجائے «حَبَّةٌ» ”بالی میں دانہ“ کہتے داخل ہوئے۔“ [صحيح البخاري/كتاب تفسير القرآن/حدیث: 4641]

حضرت ابن عباس رضی اللہ عنہ سے روایت ہے، انہوں نے کہا: ”عیینہ بن حصن بن حذیفہ نے اپنے بھتیجے حضرت حر بن قیس رضی اللہ عنہ کے ہاں قیام کیا۔ حضرت حر بن قیس رضی اللہ عنہ ان خاص لوگوں میں سے تھے جنہیں حضرت عمر رضی اللہ عنہ اپنے بہت قریب رکھتے تھے کیونکہ جو لوگ قرآن کریم کے زیادہ عالم اور قاری ہوتے انہیں حضرت عمر رضی اللہ عنہ کی مجلس میں بڑی پذیرائی حاصل ہوتی تھی۔ ایسے لوگ ہی آپ کے مشیر ہوتے تھے، قطع نظر اس سے کہ وہ عمر رحضرت ہوں یا نوجوان۔ بہرحال عیینہ بن حصن نے اپنے بھتیجے سے کہا: تمہیں اس امیر کی مجلس میں بڑا قرب حاصل ہے، لہٰذا مجھے بھی مجلس میں حاضری کی اجازت لے دو۔ حر بن قیس نے کہا: میں آپ کے لیے مجلس میں حاضری کی اجازت مانگوں گا، چنانچہ انہوں نے عیینہ کے لیے اجازت مانگی تو حضرت عمر رضی اللہ عنہ نے انہیں مجلس میں آنے کی اجازت دے دی۔ جب وہ مجلس میں پہنچا تو کہنے لگا: اے خطاب کے بیٹے! اللہ کی قسم! نہ تم ہمیں مال دیتے ہو اور نہ عدل کے مطابق فیصلے ہی کرتے ہو۔ حضرت عمر رضی اللہ عنہ کو اس کی بات پر بہت غصہ آیا۔ حضرت عمر رضی اللہ عنہ اسے مزہ چکھانے کے لیے آگے بڑھ ہی رہے تھے کہ حضرت حر بن قیس رضی اللہ عنہ نے عرض کی: امیر المومنین! اللہ تعالیٰ نے اپنے نبی صلی اللہ علیہ وسلم سے خطاب کرتے ہوئے فرمایا ہے: ﴿خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ﴾ [سورة الأعراف: 199] ”آپ درگزر اختیار کریں، نیک کام کی تعلیم دیں اور جاہلوں سے کنارہ کش ہو جائیں۔“ اور بلاشبہ یہ بھی جاہلوں میں سے ہے۔ اللہ کی قسم! جب حضرت حر نے قرآن مجید کی تلاوت کی تو حضرت عمر رضی اللہ عنہ وہیں رُک گئے۔ واقعی حضرت عمر رضی اللہ عنہ کتاب اللہ کا حکم سن کر فوراً گردن جھکا دینے والے تھے۔“ [صحيح البخاري/كتاب تفسير القرآن/حدیث: 4642]

حضرت عبداللہ بن زبیر رضی اللہ عنہ سے روایت ہے، انہوں نے فرمایا: ”درج ذیل آیت اللہ تعالیٰ نے لوگوں کے اخلاق کی اصلاح کے لیے نازل فرمائی ہے: ﴿خُذِ الْعَفْوَ وَأْمُرْ بِالْعُرْفِ﴾ [سورة الأعراف: 199] ”معافی اختیار کیجیے اور نیکی کا حکم دیتے رہیے۔“” [صحيح البخاري/كتاب تفسير القرآن/حدیث: 4643]

حضرت عبداللہ بن زبیر رضی اللہ عنہ ہی سے روایت ہے، انہوں نے کہا: ”اللہ تعالیٰ نے اپنے نبی صلی اللہ علیہ وسلم کو حکم دیا ہے کہ وہ لوگوں کے اخلاق درست کرنے کے لیے درگزر سے کام لیں۔“ [صحيح البخاري/كتاب تفسير القرآن/حدیث: 4644]

حضرت سعید بن جبیر رحمہ اللہ سے روایت ہے، انہوں نے کہا: ”میں نے حضرت ابن عباس رضی اللہ عنہما سے پوچھا: سورہ انفال کے متعلق آپ کی کیا رائے ہے؟ تو فرمایا: ”وہ غزوہ بدر کے متعلق نازل ہوئی“۔“ «الشَّوْكَةِ» کے معنی ہیں: ”تلوار کی دھار“۔ «مُرْدِفِينَ» کا مطلب ہے: ”ایک جماعت کے بعد دوسری جماعت“۔ «رَدَفَنِي» اور «أَرْدَفَنِي» دونوں کے معنی ایک ہیں، یعنی ”میرے بعد آیا“۔ «ذُوقُوا» کے معنی ہیں: ”عذاب برداشت کرو اور اس کا خود تجربہ کرو، اس سے مراد منہ سے چکھنا نہیں“۔ «فَيَرْكُمَهُ» کے معنی ہیں: ”اس کو جمع کر دے“۔ «شَرِّدْ»: ”متفرق اور منتشر کرنا“۔ «جَنَحُوا»: ”صلح و سلامتی طلب کریں“۔ «السَّلْمِ»، «السِّلْمِ» اور «السَّلَامِ» ان تینوں الفاظ کے ایک ہی معنی ہیں، یعنی ”امن و امان اور صلح و سلامتی“۔ «يُثْخِنَ» کے معنی ہیں: ”خون ریزی کر کے غلبہ پانا“۔ مجاہد رحمہ اللہ نے کہا: «مُكَاءً» کے معنی ہیں: ”اپنی انگلیوں کو منہ میں داخل کرنا“ اور «وَتَصْدِيَةً» کے معنی ہیں: ”سیٹی بجانا“۔ «لِيُثْبِتُوكَ» کے معنی ہیں: ”آپ کو قید کر لیں، آپ کو روک لیں“۔ [صحيح البخاري/كتاب تفسير القرآن/حدیث: 4645]

حضرت ابن عباس رضی اللہ عنہ سے روایت ہے، انہوں نے اس آیت ﴿إِنَّ شَرَّ الدَّوَابِّ عِنْدَ اللَّهِ الصُّمُّ الْبُكْمُ الَّذِينَ لَا يَعْقِلُونَ﴾ [سورة الأنفال: 22] ”بدترین حیوانات اللہ کے نزدیک وہ بہرے گونگے ہیں جو عقل سے ذرا کام نہیں لیتے۔“ کے متعلق فرمایا: ”یہ آیت بنو عبدالدار کے کچھ لوگوں کے متعلق نازل ہوئی تھی۔“ [صحيح البخاري/كتاب تفسير القرآن/حدیث: 4646]