مجاہد رحمہ اللہ سے روایت ہے کہ احد کے دن بہت سے آدمی شہید ہو گئے اور ان کی بیویاں بیوہ ہو گئیں اور وہ ایک گھر میں پڑوسنیں تھیں۔ وہ نبی صلی اللہ علیہ وسلم کے پاس آئیں، انہوں نے کہا: ”اے اللہ کے رسول! ہم رات کو وحشت محسوس کرتی ہیں، ہم رات اپنے میں سے کسی ایک کے پاس گزارتی ہیں۔ جب ہم صبح کرتی ہیں تو اپنے گھروں کی طرف چلی جاتی ہیں۔“ نبی صلی اللہ علیہ وسلم نے فرمایا: ”تم اپنے میں سے کسی ایک کے پاس جب تک چاہو آپس میں باتیں کرو، پھر جب تم سونے کا ارادہ کرو تو تم میں سے ہر ایک اپنے گھر کی طرف لوٹ جائے۔“ [السنن الكبرى للبيهقي/كتاب العدد/حدیث: 15512]

سیدنا عبداللہ رضی اللہ عنہ سے روایت ہے کہ کسی عورت کے لیے جائز نہیں ہے کہ وہ ایک رات اپنے گھر سے باہر گزارے جب وہ اپنے خاوند کی وفات کی عدت میں ہو یا عدتِ طلاق میں ہو۔ [السنن الكبرى للبيهقي/كتاب العدد/حدیث: 15513]

سیدنا عبداللہ بن عمر رضی اللہ عنہما سے روایت ہے کہ طلاق شدہ عورت اور وہ عورت جس کا خاوند فوت ہو چکا ہو وہ دن میں نکلیں اور مکمل رات اپنے گھر کے علاوہ کسی دوسرے کے گھر میں نہ گزاریں۔
سفیان سے روایت ہے کہ مجھے موسیٰ بن عقبہ نے حدیث بیان کی، وہ نافع سے روایت کرتے ہیں، وہ سیدنا عبداللہ بن عمر رضی اللہ عنہما سے نقل فرماتے ہیں کہ طلاقِ بتہ والی عورت دن کو زیارت کرے اور اپنے گھر کے علاوہ رات نہ گزارے۔
علقمہ سے روایت ہے کہ ہمدان قبیلے کی عورتوں کے لیے ان کے خاوندوں کی (وفات) کا اعلان کیا گیا، انہوں نے سیدنا عبداللہ بن مسعود رضی اللہ عنہ سے سوال کیا کہ ہم وحشت محسوس کرتی ہیں، انہوں نے ان کو حکم دیا کہ وہ دن کو اکٹھی ہو جایا کریں اور جب رات ہو تو ہر ایک عورت اپنے گھر کی طرف پلٹ جائے۔
اسلم قبیلے کے ایک شخص سے روایت ہے کہ ایک عورت نے سیدہ ام سلمہ رضی اللہ عنہا سے سوال کیا کہ اس کا خاوند فوت ہو گیا ہے، کیا وہ اپنے والد کی بیمار پرسی کر سکتی ہے؟ سیدہ ام سلمہ رضی اللہ عنہا نے کہا: تو رات کے دو حصوں میں سے ایک حصہ اپنے گھر میں گزار۔ [السنن الكبرى للبيهقي/كتاب العدد/حدیث: 15514]

یحییٰ بن سعید سے روایت ہے کہ مجھے یہ بات پہنچی کہ سیدنا سائب بن خباب رضی اللہ عنہ فوت ہو گئے اور ان کی بیوی سیدنا عبداللہ بن عمر رضی اللہ عنہما کے پاس آئیں، انہوں نے اپنے خاوند کی وفات کا تذکرہ کیا اور ان کے لیے اپنی کھیتی کا ذکر بھی کیا جو قناۃ نامی جگہ میں ہے اور ان سے سوال کیا کہ کیا ان کے لیے درست ہے کہ وہ اس میں رات گزاریں؟ انہوں نے ان کو اس سے منع کیا۔ وہ مدینہ سے سحری کے وقت نکلتیں، وہ دن اپنی کھیتی میں گزارتیں اور صبح اپنی کھیتی میں کرتیں، پھر جب شام ہو جاتی تو وہ مدینہ میں داخل ہوتیں اور رات اپنے گھر میں گزارتیں۔ [السنن الكبرى للبيهقي/كتاب العدد/حدیث: 15515]

زینب بنت ابی سلمہ رضی اللہ عنہا سے روایت ہے کہ انہوں نے ان تین احادیث کی خبر دی، زینب رضی اللہ عنہا نے کہا: میں نبی صلی اللہ علیہ وسلم کی زوجہ محترمہ ام حبیبہ رضی اللہ عنہا کے پاس گئی، جب (ان کے والد) ابوسفیان رضی اللہ عنہ فوت ہوئے تو ام حبیبہ رضی اللہ عنہا نے خوشبو منگوائی، اس میں زرد رنگ کی خوشبو تھی یا اس کے علاوہ کوئی اور خوشبو تھی، انہوں نے اس میں سے ایک لڑکی کو لگائی، پھر اپنے رخساروں پر ملی، پھر انہوں نے کہا: اللہ کی قسم! مجھے خوشبو کی کوئی حاجت نہ تھی، سوائے اس کے کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم منبر پر فرما رہے تھے: ”کسی ایسی عورت کے لیے جو اللہ پر اور یومِ آخرت پر ایمان رکھتی ہو، یہ حلال نہیں کہ وہ کسی میت پر تین دن سے زیادہ سوگ کرے، سوائے اپنے خاوند کے، اور وہ اپنے خاوند پر چار ماہ اور دس دن سوگ کرے۔“
زینب رضی اللہ عنہا فرماتی ہیں: میں زینب بنت جحش رضی اللہ عنہا کے پاس گئی، جب ان کے بھائی عبداللہ رضی اللہ عنہ فوت ہوئے، انہوں نے خوشبو منگوائی اور اس خوشبو میں سے کچھ خوشبو لگائی، پھر انہوں نے کہا: مجھے خوشبو کی کوئی ضرورت نہیں تھی، سوائے اس کے کہ میں نے رسول اللہ صلی اللہ علیہ وسلم کو سنا، آپ صلی اللہ علیہ وسلم منبر پر فرما رہے تھے: ”کسی ایسی عورت کے لیے جو اللہ اور یومِ آخرت پر ایمان رکھتی ہو، یہ جائز نہیں کہ وہ کسی میت پر تین راتوں سے زیادہ سوگ کرے، سوائے اپنے خاوند کے، وہ اس پر چار ماہ اور دس دن سوگ کرے۔“
زینب رضی اللہ عنہا کہتی ہیں اور میں نے اپنی والدہ ام سلمہ رضی اللہ عنہا سے سنا کہ ایک عورت نبی صلی اللہ علیہ وسلم کے پاس آئی، اس نے کہا: میری بیٹی کا خاوند فوت ہو گیا ہے اور اس کی آنکھیں خراب ہو گئی ہیں، کیا وہ سرمہ لگا سکتی ہے؟ آپ صلی اللہ علیہ وسلم نے فرمایا: ”نہیں (لگا سکتی)۔“ دو مرتبہ فرمایا یا تین مرتبہ، جتنی بار بھی اس نے سوال کیا، آپ صلی اللہ علیہ وسلم نے فرمایا: ”نہیں (لگا سکتی)۔“ پھر آپ صلی اللہ علیہ وسلم نے فرمایا: ”یہ تو محض چار ماہ اور دس دن ہیں، جبکہ تم میں سے کوئی (عورت) زمانہ جاہلیت میں سال کے اختتام پر لید پھینکتی تھی۔“
حمید رحمہ اللہ کہتے ہیں کہ میں نے زینب رضی اللہ عنہا سے کہا: کیا وہ لید (پھینکنا) تھا سال کے اختتام پر؟ زینب رضی اللہ عنہا نے فرمایا: جب کسی عورت کا خاوند فوت ہو جاتا تو وہ ایک خیمے میں داخل ہو جاتی، وہ بدترین لباس پہنتی، خوشبو نہ لگاتی یہاں تک کہ اس پر ایک سال گزر جاتا، پھر اس کے پاس کوئی گدھا یا بکری یا کوئی پرندہ لایا جاتا۔ [السنن الكبرى للبيهقي/كتاب العدد/حدیث: 15516]

ایضاً۔ [السنن الكبرى للبيهقي/كتاب العدد/حدیث: 15517]

زینب بنت ابی سلمہ رضی اللہ عنہا سے روایت ہے کہ جب ابوسفیان رضی اللہ عنہ کی وفات کا اعلان کرنے والا آیا تو ام حبیبہ رضی اللہ عنہا نے زردی منگوائی اور تیسرے دن اس کو اپنے رخساروں اور بازوؤں پر لگایا اور فرمایا: میں اس سے بے پروا ہوں اگر میں نے رسول اللہ صلی اللہ علیہ وسلم سے نہ سنا ہوتا کہ ”کسی عورت کے لیے جائز نہیں ہے جو اللہ پر اور یومِ آخرت پر ایمان رکھتی ہو کہ وہ کسی میت پر تین دن سے زیادہ سوگ کرے، مگر اپنے خاوند پر چار ماہ اور دس دن سوگ کرے۔“
اس حدیث کو بخاری نے روایت کیا ہے۔ [السنن الكبرى للبيهقي/كتاب العدد/حدیث: 15518]

سیدہ ام حبیبہ رضی اللہ عنہا سے روایت ہے کہ جب ان کا کوئی قریبی رشتہ دار فوت ہو گیا تو انہوں نے زردی کو پکڑا اور اپنی کلائیوں پر لگا لیا اور فرمایا: رسول اللہ صلی اللہ علیہ وسلم نے فرمایا: ”کسی مسلم عورت کے لیے جائز نہیں جو اللہ اور آخرت پر ایمان رکھتی ہو کہ وہ کسی میت پر تین دن سے زیادہ سوگ کرے مگر اپنے خاوند پر وہ چار ماہ اور دس دن سوگ کرے۔“ [السنن الكبرى للبيهقي/كتاب العدد/حدیث: 15519]

حفصہ رضی اللہ عنہا یا عائشہ رضی اللہ عنہا یا دونوں رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کسی عورت کے لیے جائز نہیں جو اللہ اور آخرت کے دن پر ایمان رکھتی ہو یا اللہ اور اس کے رسول پر ایمان رکھتی ہو کہ وہ کسی میت پر تین دن سے زیادہ سوگ کرے سوائے اپنے خاوند کے۔“
اس کو مسلم نے نکالا ہے۔ [السنن الكبرى للبيهقي/كتاب العدد/حدیث: 15520]

صفیہ بنت ابی عبید رضی اللہ عنہا نے حفصہ بنت عمر رضی اللہ عنہما سے سنا، وہ نبی صلی اللہ علیہ وسلم سے نقل فرماتی ہیں کہ نبی صلی اللہ علیہ وسلم نے فرمایا: ”کسی عورت کے لیے حلال نہیں جو اللہ اور یومِ آخرت پر ایمان رکھتی ہو کہ وہ کسی میت پر تین دن سے زیادہ سوگ کرے مگر اپنے خاوند پر چار ماہ اور دس دن سوگ کرے۔“ اس کو مسلم نے روایت کیا ہے۔ [السنن الكبرى للبيهقي/كتاب العدد/حدیث: 15521]