(نبی کریم صلی اللہ علیہ وسلم نے فرمایا:)
”قبیلہ اسلم، غفار، اشجع، مزینہ، جہینہ اور بنو کعب کے لوگ، باقی لوگوں کو چھوڑ کر میرے دوست اور حلیف ہیں، اور اللہ اور اس کا رسول ان کے حامی و ناصر ہیں۔“ [صحيح الجامع الصغير وزيادته/[حرف الألف] -- أر/حدیث: 976]

(نبی کریم صلی اللہ علیہ وسلم نے فرمایا:)
”قبیلہ اسلم، غفار، اور مزینہ و جہینہ کے کچھ لوگ اللہ کے نزدیک اسد، تمیم، ہوازن اور غطفان قبائل سے زیادہ بہتر ہیں۔“ [صحيح الجامع الصغير وزيادته/[حرف الألف] -- أر/حدیث: 977]

(نبی کریم صلی اللہ علیہ وسلم نے فرمایا:)
”قبیلہ اسلم، غفار اور مزینہ، بنو تمیم، اسد، غطفان اور عامر بن صعصعہ سے بہتر ہیں۔“ [صحيح الجامع الصغير وزيادته/[حرف الألف] -- أر/حدیث: 978]

(نبی کریم صلی اللہ علیہ وسلم نے فرمایا:)
”اللہ تعالیٰ کا وہ اسمِ اعظم کہ جس کے واسطے سے اگر دعا کی جائے تو وہ قبول فرماتا ہے، قرآن مجید کی تین سورتوں میں ہے: سورۃ البقرہ، سورۃ آل عمران اور سورۃ طہٰ میں۔“ [صحيح الجامع الصغير وزيادته/[حرف الألف] -- أر/حدیث: 979]

(نبی کریم صلی اللہ علیہ وسلم نے فرمایا:)
”اللہ کا اسمِ اعظم ان دو آیتوں میں ہے: ﴿وَإِلَهُكُمْ إِلَهٌ وَاحِدٌ لَا إِلَهَ إِلَّا هُوَ الرَّحْمَنُ الرَّحِيمُ﴾ ”اور تمہارا معبود ایک ہی معبود ہے، اس کے سوا کوئی سچا معبود نہیں، وہ بہت مہربان، نہایت رحم کرنے والا ہے۔“ [سورة البقرة: 163] اور سورۃ آل عمران کی ابتدائی آیات میں: ﴿الم، اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ ”الم، اللہ وہ ہے جس کے سوا کوئی سچا معبود نہیں، وہ ہمیشہ زندہ رہنے والا، (سب کو) قائم رکھنے والا ہے۔“ [سورة آل عمران: 1-2] “ [صحيح الجامع الصغير وزيادته/[حرف الألف] -- أر/حدیث: 980]

(نبی کریم صلی اللہ علیہ وسلم نے فرمایا:)
”تم (دوسروں کے ساتھ) درگزر (اور نرمی) سے کام لو، تو تمہارے ساتھ بھی درگزر سے کام لیا جائے گا۔“ [صحيح الجامع الصغير وزيادته/[حرف الألف] -- أر/حدیث: 981]

(نبی کریم صلی اللہ علیہ وسلم نے فرمایا:)
”تو (دوسروں کے ساتھ) نرمی اور فیاضی سے پیش آ، تو تیرے ساتھ بھی فیاضی اور نرمی کی جائے گی۔“ [صحيح الجامع الصغير وزيادته/[حرف الألف] -- أر/حدیث: 982]

(نبی کریم صلی اللہ علیہ وسلم نے فرمایا:)
”(اپنے امیر کی بات) سنو اور اطاعت کرو، خواہ وہ کوئی کٹے ہوئے اعضاء والا حبشی غلام ہی کیوں نہ ہو۔“ [صحيح الجامع الصغير وزيادته/[حرف الألف] -- أر/حدیث: 983]

(نبی کریم صلی اللہ علیہ وسلم نے فرمایا:)
”(حکمرانوں کی بات) سنو اور ان کی اطاعت کرو، کیونکہ ان پر اس بات کی ذمہ داری ہے جس کا انہیں مکلف بنایا گیا ہے، اور تم پر اس بات کی ذمہ داری ہے جس کے تم مکلف بنائے گئے ہو۔“ [صحيح الجامع الصغير وزيادته/[حرف الألف] -- أر/حدیث: 984]

(نبی کریم صلی اللہ علیہ وسلم نے فرمایا:)
”(اپنے امیر کی بات) سنو اور اطاعت کرو، خواہ تم پر کوئی ایسا حبشی غلام ہی کیوں نہ حاکم بنا دیا جائے جس کا سر (سیاہ اور چھوٹا ہونے میں) کشمش کی طرح ہو۔“ [صحيح الجامع الصغير وزيادته/[حرف الألف] -- أر/حدیث: 985]