ہمیں یحییٰ بن یحییٰ رحمہ اللہ، ابوبکر بن ابی شیبہ رحمہ اللہ، عمرو ناقد رحمہ اللہ اور ابن ابی عمر رحمہ اللہ سب نے، ابن عیینہ رحمہ اللہ سے روایت سنائی، یحییٰ رحمہ اللہ نے کہا، ہمیں سفیان بن عیینہ رحمہ اللہ نے زہری رحمہ اللہ سے، عبیداللہ بن عبداللہ رحمہ اللہ کی ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ایسی بکری مردہ پائی جو حضرت میمونہ رضی اللہ عنہا کی آزاد کردہ لونڈی کو صدقہ میں دی گئی تھی، تو رسول اللہ صلی اللہ علیہ وسلم نے فرمایا: ”تم نے اس کے چمڑے سے فائدہ کیوں نہیں اٹھایا؟“ انہوں نے کہا: یہ مردہ ہے، تو آپ صلی اللہ علیہ وسلم نے فرمایا: ”بس اس کا کھانا حرام ہے۔“ ابوبکر رحمہ اللہ اور ابن ابی عمر رحمہ اللہ نے اپنی روایت میں «عَنْ ابْنِ عَبَّاسٍ، عَنْ مَيْمُونَةَ» کہا (روایت ابن عباس رضی اللہ عنہما کی بجائے میمونہ رضی اللہ عنہا کی طرف منسوب کی)۔ [صحيح مسلم/كِتَاب الْحَيْضِ/حدیث: 806]

مجھے ابوطاہر رحمہ اللہ اور حرملہ رحمہ اللہ نے ابن وہب رحمہ اللہ کے واسطہ سے یونس رحمہ اللہ کی ابن شہاب رحمہ اللہ سے، انہوں نے عبیداللہ بن عبداللہ بن عتبہ رحمہ اللہ سے اور انہوں نے ابن عباس رضی اللہ عنہما سے روایت سنائی کہ حضرت میمونہ رضی اللہ عنہا کی آزاد کردہ لونڈی کو ایک بکری صدقہ میں ملی تھی، وہ مر گئی تو رسول اللہ صلی اللہ علیہ وسلم اس کے پاس سے گزرے تو آپ صلی اللہ علیہ وسلم نے فرمایا: ”تم نے اس کا چمڑا کیوں نہیں اتارا تو تم اسے رنگ لیتے اور اس سے تم فائدہ اٹھا لیتے؟“ انہوں نے کہا: وہ مردہ ہے، تو آپ صلی اللہ علیہ وسلم نے فرمایا: ”بس اس کا کھانا حرام ہے۔“ [صحيح مسلم/كِتَاب الْحَيْضِ/حدیث: 807]

حسن حلوانی رحمہ اللہ اور عبد بن حمید رحمہ اللہ نے یعقوب بن ابراہیم بن سعد رحمہ اللہ سے، انہوں نے اپنے باپ رحمہ اللہ سے، انہوں نے صالح رحمہ اللہ سے اور انہوں نے ابن شہاب رحمہ اللہ کی مذکورہ بالا سند سے یونس رحمہ اللہ کی حدیث کے مفہوم والی روایت سنائی۔ [صحيح مسلم/كِتَاب الْحَيْضِ/حدیث: 808]

ہمیں ابن ابی عمر رحمہ اللہ اور عبداللہ بن محمد زہری رحمہ اللہ نے (الفاظ ابن ابی عمر رحمہ اللہ کے ہیں) سفیان رحمہ اللہ کے واسطہ سے عمرو رحمہ اللہ کی عطاء رحمہ اللہ سے ابن عباس رضی اللہ عنہما کی روایت سنائی کہ رسول اللہ صلی اللہ علیہ وسلم ایک مردہ پڑی ہوئی بکری کے پاس سے گزرے، جو میمونہ رضی اللہ عنہا کی باندی کو بطور صدقہ دی گئی تھی۔ تو نبی کریم صلی اللہ علیہ وسلم نے فرمایا: ”انہوں نے اس کے چمڑے کو کیوں نہیں اتارا؟ وہ اس کو رنگ لیتے اور فائدہ اٹھا لیتے۔“ [صحيح مسلم/كِتَاب الْحَيْضِ/حدیث: 809]

حضرت میمونہ رضی اللہ عنہا بیان کرتی ہیں کہ رسول اللہ صلی اللہ علیہ وسلم کی کسی زوجہ کے گھر میں پلنے والی بکری مر گئی تو رسول اللہ صلی اللہ علیہ وسلم نے فرمایا: ”تم نے اس کا چمڑا اتار کر اس سے فائدہ کیوں نہیں اٹھایا؟“ [صحيح مسلم/كِتَاب الْحَيْضِ/حدیث: 810]

حضرت ابن عباس رضی اللہ عنہما سے روایت ہے کہ نبی کریم صلی اللہ علیہ وسلم میمونہ رضی اللہ عنہا کی باندی کی (مردہ) بکری کے پاس سے گزرے تو آپ صلی اللہ علیہ وسلم نے فرمایا: ”تم نے اس کے چمڑے سے فائدہ کیوں نہیں اٹھایا؟“ [صحيح مسلم/كِتَاب الْحَيْضِ/حدیث: 811]

حضرت عبداللہ بن عباس رضی اللہ عنہما سے روایت ہے کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم نے فرمایا: ”جب چمڑے کو رنگ لیا گیا تو وہ پاک ہو گیا۔“ [صحيح مسلم/كِتَاب الْحَيْضِ/حدیث: 812]

امام صاحب رحمہ اللہ اپنے مختلف اساتذہ سے مذکورہ بالا روایت بیان کرتے ہیں۔ [صحيح مسلم/كِتَاب الْحَيْضِ/حدیث: 813]

ابوالخیر رحمہ اللہ سے روایت ہے کہ میں نے علی بن وعلہ سبائی رحمہ اللہ کو ایک پوستین (چمڑے کا کوٹ) پہنے ہوئے دیکھا، میں نے اسے چھوا تو انہوں نے کہا: اسے کیوں چھوتے ہو؟ میں نے عبداللہ بن عباس رضی اللہ عنہما سے پوچھا تھا: ہم مغرب میں رہتے ہیں اور ہمارے ساتھ بربر اور مجوسی رہتے ہیں، ہمارے پاس مینڈھا لایا جاتا ہے جسے انہوں نے ذبح کیا ہوتا ہے اور ہم ان کے ذبیحہ کیے ہوئے جانور نہیں کھاتے، وہ ہمارے پاس مشکیزہ لاتے ہیں جس میں وہ چربی ڈالتے ہیں، تو ابن عباس رضی اللہ عنہما نے جواب دیا: ہم نے رسول اللہ صلی اللہ علیہ وسلم سے اس کے بارے میں پوچھا تو آپ صلی اللہ علیہ وسلم نے فرمایا: «دِبَاغُهُ طَهُورُهُ» ”اس کو رنگنا اسے پاک کر دیتا ہے۔“ [صحيح مسلم/كِتَاب الْحَيْضِ/حدیث: 814]

علی بن وعلہ سبائی رحمہ اللہ سے روایت ہے کہ میں نے عبداللہ بن عباس رضی اللہ عنہما سے پوچھا: ہم مغرب میں رہتے ہیں، تو ہمارے پاس مجوسی پانی اور چربی کے مشکیزے لاتے ہیں، تو انہوں نے کہا: پی لیا کرو۔ میں نے پوچھا: کیا آپ اپنی رائے سے بتا رہے ہیں؟ ابن عباس رضی اللہ عنہما نے جواب دیا: میں نے رسول اللہ صلی اللہ علیہ وسلم کو فرماتے ہوئے سنا: ”اس کو رنگنا اس کو پاک کر دیتا ہے۔“ [صحيح مسلم/كِتَاب الْحَيْضِ/حدیث: 815]