حضرت مجاہد فرماتے ہیں کہ اللہ تعالیٰ کے ارشاد { وَ اتَّخِذُوْا مِنْ مَّقَامِ اِبْرٰھٖمَ مُصَلًّی } یہ تمام کا تمام حج ہے۔ [مصنف ابن ابي شيبه/كتاب الحج/حدیث: 15335]

حضرت ابو مجلز سے مروی ہے کہ وہ حضرت ابن عمر رضی اللہ عنہما کے ساتھ تھے، جب سورج طلوع ہوا تو انھوں نے سواری کا حکم فرمایا تو ان کے لیے سواری لائی گئی اور وہ منیٰ سے اس پر سوار ہو کر چل پڑے، راوی فرماتے ہیں کہ ہم میں سے ان کو سب سے زیادہ پسند وہ شخص تھا جو ہم میں سب سے زیادہ نادان تھا، ایک شخص جو ان سے خواتین کے متعلق باتیں کرتا تھا اور ان کو ہنساتا تھا، راوی فرماتے ہیں کہ جب آپ نے نماز عصر ادا کی تو وقوف عرفہ کیا اور اپنے ہاتھوں کو اٹھایا، یا پھر فرمایا کہ ہاتھوں کو پھیلایا، راوی فرماتے ہیں کہ مجھے نہیں معلوم کہ شاید یوں کہا ہو کہ کانوں سے نیچے تک اٹھایا اور یہ پڑھنے لگے: اللَّہُ أَکْبَرُ وَلِلَّہِ الْحَمْدُ، اللَّہُ أَکْبَرُ وَلِلَّہِ الْحَمْدُ، اللَّہُ أَکْبَرُ وَلِلَّہِ الْحَمْدُ، لاَ إلَہَ إِلاَّ اللَّہُ وَحْدَہُ، لَہُ الْمُلْکُ وَلَہُ الْحَمْدُ، اللَّہُمَّ اہْدِنِی بِالْہُدَی، وَقِنِی بِالتَّقْوَی، وَاغْفِرْ لِی فِی الآخِرَۃِ وَالأُولَی، پھر اپنے ہاتھ نیچے کرلیے اور اتنی دیر خاموش رہے جتنی دیر میں کوئی شخص سورة الفاتحہ پڑھ لیتا ہے پھر لوٹے اور ہاتھوں کو بلند کیا اور پھر وہی کلمات کہے، پھر آپ مسلسل اسی طرح کرتے رہے یہاں تک کہ آپ (عرفات سے) روانہ ہوئے۔ راوی فرماتے ہیں کہ جب آپ کھلی جگہ دیکھتے تو تیز چلتے اور جب جگہ کی تنگی کو دیکھتے تو رک جاتے، پھر ان پہاڑیوں میں سے کسی پہاڑ پر آتے تو ہر پہاڑ پر اتنی دیر کھڑے ہوتے جتنی دیر میں کوئی شخص یوں کہے: اس کے ہاتھ رک گئے ہیں لیکن اس کی ٹانگیں نہیں رکیں، راوی فرماتے ہیں کہ پھر وہ راستے میں ایک جگہ اترے اور چل پڑے اور میں ان کے پیچھے پیچھے چلا، میں نے (دل میں) کہا کہ شاید وہ سنت کاموں میں سے کوئی کام کرنے والے ہیں، انھوں نے فرمایا کہ میں تو وہیں جا رہا ہوں جہاں تم جانتے ہو (یعنی قضائے حاجت کے لیے)، پھر آپ آئے اور آہستہ اور اطمینان کے ساتھ وضو کیا، پھر آپ سواری پر سوار ہوگئے اور مزدلفہ آنے تک نماز نہیں پڑھی، پھر وہاں پر اقامت کہلوا کر مغرب کی نماز ادا کی اور ہماری طرف متوجہ ہو کر فرمایا: الصلاۃ جامعۃ، اور دونوں نمازوں کے درمیان کچھ (نفل) نہیں پڑھا۔ میں نے عرض کیا کہ کیا ان (دو نمازوں) کے درمیان کوئی اقامت نہیں تھی سوائے ان کے اس قول کے کہ الصلاۃ جامعۃ؟ یا کہا کہ اس کے سوا کوئی اذان نہیں تھی؟ فرمایا کہ نہیں۔ پھر عشاء کی دو رکعتیں ادا فرمائیں، یوں آپ نے مغرب اور عشاء کے لیے پانچ رکعتیں ادا کیں اور ان کے درمیان نفل ادا نہیں کیے، پھر کھانا طلب کیا اور فرمایا کہ جو ہماری آواز سن رہا ہے پس وہ ہمارے پاس آجائے، راوی فرماتے ہیں کہ گویا وہ سمجھتے تھے کہ اسی طرح کرنا مناسب ہے، پھر سب نے وہاں پر رات گزاری، پھر آپ نے ہمیں فجر کی نماز اندھیرے میں پڑھائی، اس وقت آسمان پر جو ستارہ بھی میں پہچانتا تھا وہ مجھے نظر آ رہا تھا، اور سورة عبس وتولٰی تلاوت فرمائی اور قنوت نہیں پڑھی نہ رکوع سے پہلے نہ بعد میں، پھر ٹھہرے رہے اور اس جگہ بھی ویسی ہی دعائیں کیں جیسی گذشتہ دن اپنے وقوف میں کی تھیں، پھر آپ چل پڑے، آپ اس طرح چل رہے تھے کہ اگر وسعت دیکھتے تو تیز چلتے اور جب تنگی دیکھتے تو ٹھہر جاتے۔ [مصنف ابن ابي شيبه/كتاب الحج/حدیث: 15336]

راوی فرماتے ہیں کہ حضرت ابن عباس رضی اللہ عنہما نے مجھے بتایا تھا کہ منیٰ کے سامنے جو وادی ہے جسے وادی محسر کہا جاتا ہے اس میں تیز چلا جائے، پھر جب (حضرت ابن عمر رضی اللہ عنہما) اس پر آئے تو اپنے پاؤں سے سواری کو ایڑی لگائی تو میں سمجھ گیا کہ وہ تیز چلنا چاہتے ہیں، لیکن ان کی سواری تھک گئی تو میں نے اس کو تیز چلایا۔ پھر انھوں نے جمرہ کی رمی کی، پھر جب اگلا دن ہوا تو جمرہ کی رمی کی، راوی کہتے ہیں کہ میرا خیال ہے کہ انھوں نے مجھ سے کہا: دوپہر کے وقت، پھر آگے بڑھے یہاں تک کہ اس (جمرہ) اور درمیانے جمرہ کے درمیان ہوگئے، پھر ویسی ہی دعائیں کیں جیسی دونوں موقفوں میں کی تھیں، مگر اس میں یہ اضافہ کیا: وأصلح لي، یا یوں کہا: وأتمم لنا مناسكنا، راوی کہتے ہیں کہ ان کا قیام میرے اندازے میں اتنی دیر کا تھا جتنی دیر میں کوئی شخص سورة یوسف پڑھ لے، پھر درمیانے جمرہ کی رمی کی، پھر آگے بڑھے اور اسی طرح دعا کی اور اسی طرح قیام کیا۔ [مصنف ابن ابي شيبه/كتاب الحج/حدیث: 15337]

راوی فرماتے ہیں کہ میں نے حضرت سالم یا حضرت نافع سے دریافت کیا کہ کیا وہ اپنی خاموشی (کے وقفے) میں کچھ پڑھا کرتے تھے؟ انھوں نے فرمایا کہ سنت میں سے تو کچھ نہیں ہے۔ [مصنف ابن ابي شيبه/كتاب الحج/حدیث: 15338]

حضرت جعفر اپنے والد سے روایت کرتے ہیں کہ ہم حضرت جابر بن عبد اللہ رضی اللہ عنہ کے پاس آئے، آپ نے لوگوں سے سوال کرنا شروع کیا یہاں تک کہ آپ میرے پاس پہنچ گئے، میں نے عرض کیا کہ میں محمد بن علی بن حسین ہوں، آپ نے میرے سر پر ہاتھ پھیرا، پھر میرا اوپر والا بٹن کھولا اور پھر اس کے نیچے والا بٹن کھولا اور اپنا ہاتھ مبارک میرے سینہ پر رکھا میں اس وقت نوجوان تھا، فرمایا اے میرے بھتیجے آپ کو خوش آمدید، پوچھ جو پوچھنا چاہتا ہے؟ میں نے ان سے دریافت کیا اس حال میں کہ وہ نابینا تھے، (اتنے میں) نماز کا وقت ہوگیا تو وہ بےسلہ ہوا کپڑا اوڑھ کر کھڑے ہوگئے، جب بھی اس کو کندھے پر ڈالتے تو وہ چھوٹا ہونے کی وجہ سے اس کے کونے واپس ان کی طرف آتے، اور ان کی چادر ہینگر پر لٹکی ہوئی تھی، پھر انھوں نے ہمیں نماز پڑھائی، (نماز کے بعد) میں نے عرض کیا کہ مجھے نبی کریم صلی اللہ علیہ وآلہ وسلم کے حج کے بارے میں بتائیں؟ آپ نے اپنے ہاتھ کے اشارہ سے نو کا عدد بنایا اور فرمایا کہ نبی کریم صلی اللہ علیہ وآلہ وسلم نو سال تک بغیر حج کیے مدینہ منورہ میں رہے، پھر دس ہجری کو لوگوں میں اعلان کردیا گیا کہ نبی کریم صلی اللہ علیہ وآلہ وسلم حج کے لیے تشریف لے جا رہے ہیں، (یہ سن کر) بہت سارے لوگ مدینہ منورہ آنا شروع ہوگئے ہر کوئی یہ چاہتا تھا کہ وہ نبی کریم صلی اللہ علیہ وآلہ وسلم کے ساتھ حج کا سفر کرے اور آپ کے عمل کی طرح عمل کرے، پھر ہم لوگ آپ صلی اللہ علیہ وآلہ وسلم کے ساتھ نکلے یہاں تک کہ ہم ذوالحلیفہ پہنچے تو حضرت اسماء بنت عمیس کے ہاں محمد بن ابی بکر کی ولادت ہوئی، انھوں نے رسول اکرم (صلی اللہ علیہ وآلہ وسلم) کے پاس مسجد میں پیغام بھیجا کہ میں کیا کروں؟ آپ صلی اللہ علیہ وآلہ وسلم نے ارشاد فرمایا: غسل کرلو اور (شرم گاہ) پر کپڑا باندھ لو اور پھر احرام باندھ لو۔ آپ صلی اللہ علیہ وآلہ وسلم نے مسجد میں نماز پڑھائی اور پھر قصواء نامی اونٹنی پر سوار ہوگئے، پھر جب آپ کی اونٹنی مقام بیدا پر پہنچی تو میں نے اپنے آگے دیکھا لوگوں کو جن میں کچھ سوار اور کچھ پیدل ہیں، اور داہنی طرف بھی اسی طرح اور بائیں طرف بھی اسی طرح اور پیچھے بھی اسی طرح اس حال میں کہ نبی کریم صلی اللہ علیہ وآلہ وسلم ہمارے درمیان تھے اور آپ پر قرآن نازل ہو رہا تھا اور وہ اس کی تفسیر جانتے تھے، پس آپ صلی اللہ علیہ وآلہ وسلم نے کوئی عمل نہیں کیا مگر ہم نے بھی آپ صلی اللہ علیہ وآلہ وسلم کے ساتھ وہ عمل کیا، پھر توحید کا تلبیہ پڑھا (جس کے الفاظ یہ ہیں)، لَبَّیْکَ اللَّہُمَّ لَبَّیْکَ، لَبَّیْکَ لاَ شَرِیکَ لَکَ لَبَّیْکَ، إِنَّ الْحَمْدَ وَالنِّعْمَۃَ لَکَ وَالْمُلْکَ، لاَ شَرِیکَ لَکَ لوگوں نے بھی انہی الفاظ کے ساتھ تلبیہ پڑھا پس آپ صلی اللہ علیہ وآلہ وسلم نے ان پر کسی بات کو رد نہ فرمایا اس میں اور آپ صلی اللہ علیہ وآلہ وسلم نے تلبیہ کو لازم فرمایا۔ جابر ارشاد فرماتے ہیں کہ ہم لوگوں نے صرف حج کی نیت کی ہوئی تھی ہمیں عمرے کے بارے میں معلوم نہ تھا، یہاں تک کہ جب ہم لوگ بیت اللہ آئے رکن کا استلام کیا اور طواف کیا جس میں تین چکروں میں رمل کیا اور چار چکر چل کر پورے کیے پھر مقام ابراہیم کی طرف بڑھے اور قرآن پاک کی آیت { وَ اتَّخِذُوْا مِنْ مَّقَامِ اِبْرٰھٖمَ مُصَلًّی } تلاوت فرمائی، پھر آپ صلی اللہ علیہ وآلہ وسلم نے مقام ابراھیم کو اپنے اور بیت اللہ کے درمیان رکھا۔ [مصنف ابن ابي شيبه/كتاب الحج/حدیث: 15339]

(حضرت جعفر فرماتے ہیں کہ) میرے والد فرمایا کرتے تھے، اور میرے علم میں انھوں نے یہ بات نبی کریم صلی اللہ علیہ وآلہ وسلم ہی سے ذکر کی ہے، کہ آپ صلی اللہ علیہ وآلہ وسلم نے دو رکعتوں میں { قُلْ ہُوَ اللّٰہُ اَحَدٌ } اور { قُلْ ٰٓیاََیُّہَا الْکٰفِرُوْنَ } کی تلاوت فرمائی۔ [مصنف ابن ابي شيبه/كتاب الحج/حدیث: 15340]

پھر آپ صلی اللہ علیہ وآلہ وسلم رکن (حجر اسود) کی طرف لوٹے اور اس کا استلام فرمایا، پھر دروازے سے صفا کی طرف نکلے، جب صفا کے قریب ہوئے تو { اِنَّ الصَّفَا وَ الْمَرْوَۃَ مِنْ شَعَآئِرِ اللّٰہِ } تلاوت فرمائی (اور فرمایا کہ) میں اس سے ابتداء کرتا ہوں جس سے اللہ تعالیٰ نے ابتداء کی، پس آپ نے صفا سے ابتداء کی اور اس پر چڑھے یہاں تک کہ بیت اللہ کو دیکھ لیا، پھر بیت اللہ کی طرف رخ کیا اور اللہ کی توحید اور بڑائی بیان کی اور فرمایا: لاَ إلَہَ إِلاَّ اللَّہُ وَحْدَہُ لاَ شَرِیکَ لَہُ، لَہُ الْمُلْکُ وَلَہُ الْحَمْدُ، وَہُوَ عَلَی کُلِّ شَیْئٍ قَدِیرٌ، لاَ إلَہَ إِلاَّ اللَّہُ وَحْدَہُ، أَنْجَزَ وَعدَہُ، وَنَصَرَ عَبْدَہُ، وَہَزَمَ الأَحْزَابَ وَحْدَہُ، پھر اس کے درمیان دعا فرمائی، اور اسی طرح تین مرتبہ کہا۔ پھر مروہ کی طرف اترے یہاں تک کہ جب آپ کے قدم وادی کے نشیب میں پہنچے تو آپ نے دوڑ لگائی، اور جب ہم اوپر چڑھنے لگے تو آپ عام رفتار سے چلے، یہاں تک کہ مروہ پر آئے اور مروہ پر بھی وہی کیا جو صفا پر کیا تھا، یہاں تک کہ جب مروہ پر آخری چکر تھا تو فرمایا: اگر مجھے اپنے معاملے کا پہلے سے وہ علم ہوتا جو بعد میں ہوا تو میں قربانی کا جانور ساتھ نہ لاتا اور اس (احرام) کو عمرہ بنا دیتا، پس تم میں سے جس کے ساتھ قربانی کا جانور نہیں وہ احرام کھول دے اور اسے عمرہ بنا لے۔ اس پر حضرت سراقہ بن مالک بن جعشم رضی اللہ عنہ کھڑے ہوئے اور عرض کیا: اے اللہ کے رسول! کیا یہ ہمارے اسی سال کے لیے ہے یا ہمیشہ کے لیے؟ تو رسول اللہ صلی اللہ علیہ وآلہ وسلم نے اپنی انگلیاں ایک دوسرے میں ڈالیں اور دو مرتبہ فرمایا: عمرہ حج میں داخل ہوگیا، نہیں بلکہ ہمیشہ ہمیشہ کے لیے۔ اور حضرت علی رضی اللہ عنہ یمن سے نبی کریم صلی اللہ علیہ وآلہ وسلم کے قربانی کے اونٹ لے کر آئے تو حضرت فاطمہ رضی اللہ عنہا کو ان لوگوں میں پایا جنہوں نے احرام کھول دیا تھا، انھوں نے رنگے ہوئے کپڑے پہن رکھے تھے اور سرمہ لگایا ہوا تھا، حضرت علی رضی اللہ عنہ نے ان پر اعتراض کیا تو انھوں نے فرمایا: میرے والد نے مجھے اس کا حکم دیا ہے۔ [مصنف ابن ابي شيبه/كتاب الحج/حدیث: 15341]

حضرت جابر رضی اللہ عنہ فرماتے ہیں کہ حضرت علی رضی اللہ عنہ عراق میں فرمایا کرتے تھے: میں حضرت فاطمہ رضی اللہ عنہا کے اس عمل پر شکایت کرتے ہوئے رسول اللہ صلی اللہ علیہ وآلہ وسلم کے پاس گیا، اور جو بات انھوں نے آپ کے حوالے سے بیان کی تھی اس کے بارے میں رسول اللہ صلی اللہ علیہ وآلہ وسلم سے مسئلہ پوچھنے گیا، میں نے آپ کو بتایا کہ میں نے ان پر اعتراض کیا ہے، تو آپ صلی اللہ علیہ وآلہ وسلم نے فرمایا: اس نے سچ کہا، اس نے سچ کہا۔ (پھر) فرمایا: تم نے حج کی نیت کرتے وقت کیا کہا تھا؟ میں نے عرض کیا: اے اللہ! میں اسی کا احرام باندھتا ہوں جس کا احرام تیرے رسول نے باندھا ہے۔ آپ صلی اللہ علیہ وآلہ وسلم نے فرمایا: میرے ساتھ قربانی کے جانور ہیں، لہٰذا تم احرام نہ کھولنا۔ [مصنف ابن ابي شيبه/كتاب الحج/حدیث: 15342]

حضرت جابر رضی اللہ عنہ فرماتے ہیں کہ حضرت علی رضی اللہ عنہ جو قربانی کے جانور یمن سے لائے تھے اور جو نبی کریم صلی اللہ علیہ وآلہ وسلم ساتھ لائے تھے ان سب کی تعداد سو تھی، چنانچہ نبی کریم صلی اللہ علیہ وآلہ وسلم اور جن کے ساتھ قربانی کے جانور تھے ان کے علاوہ سب لوگوں نے احرام کھول دیا اور بال کتروا لیے، پھر جب یوم الترویہ آیا تو لوگ منیٰ کی طرف چلے اور حج کا احرام باندھا، اور رسول اللہ صلی اللہ علیہ وآلہ وسلم سوار ہوئے اور وہاں ظہر، عصر، مغرب، عشاء اور فجر کی نمازیں ادا فرمائیں، پھر تھوڑی دیر ٹھہرے یہاں تک کہ سورج طلوع ہوگیا، اور آپ نے حکم دیا کہ بالوں کا ایک خیمہ آپ کے لیے نمرہ میں لگایا جائے، پھر رسول اللہ صلی اللہ علیہ وآلہ وسلم روانہ ہوئے اور قریش کو اس میں کوئی شک نہ تھا کہ آپ مشعر حرام کے پاس ٹھہریں گے جیسا کہ قریش زمانہ جاہلیت میں کیا کرتے تھے، لیکن رسول اللہ صلی اللہ علیہ وآلہ وسلم آگے گزر گئے یہاں تک کہ عرفہ آئے، تو دیکھا کہ نمرہ میں آپ کے لیے خیمہ لگا دیا گیا ہے، آپ اس میں اترے، یہاں تک کہ جب سورج ڈھل گیا تو قصواء (اونٹنی) کا حکم دیا، اس پر کجاوہ کسا گیا، پھر آپ وادی کے نشیب میں آئے اور لوگوں کو خطبہ دیا اور فرمایا: بیشک تمہارے خون اور تمہارے مال تم پر اسی طرح حرام ہیں جس طرح تمہارے اس دن کی، تمہارے اس مہینے میں اور تمہارے اس شہر میں حرمت ہے، سن لو! جاہلیت کی ہر چیز میرے قدموں تلے پامال ہے، جاہلیت کے خون معاف ہیں، اور ہمارے خونوں میں سے پہلا خون جسے میں معاف کرتا ہوں وہ ربیعہ بن حارث کے بیٹے کا خون ہے جو بنو سعد میں دودھ پیتا تھا اور اسے ہذیل نے قتل کردیا تھا، اور جاہلیت کا سود ختم ہے، اور ہمارے سود میں سے پہلا سود جسے میں ختم کرتا ہوں وہ عباس بن عبد المطلب کا سود ہے، وہ سارا کا سارا ختم ہے، پس عورتوں کے معاملے میں اللہ سے ڈرو، کیونکہ تم نے انہیں اللہ کے حکم سے لیا ہے اور اللہ کے کلمہ کے ذریعہ ان کی شرم گاہوں کو اپنے لیے حلال کیا ہے، اور تمہارا ان پر حق یہ ہے کہ وہ تمہارے بستروں پر کسی ایسے شخص کو نہ آنے دیں جسے تم ناپسند کرتے ہو، اگر وہ ایسا کریں تو انہیں ایسی مار مارو جو سخت نہ ہو، اور ان کا تم پر حق یہ ہے کہ دستور کے مطابق ان کا کھانا اور لباس (تمہارے ذمہ) ہو، اور میں تم میں وہ چیز چھوڑے جا رہا ہوں کہ اگر تم نے اسے مضبوطی سے تھامے رکھا تو اس کے بعد ہرگز گمراہ نہ ہوگے: اللہ کی کتاب، اور تم سے میرے بارے میں پوچھا جائے گا تو تم کیا کہو گے؟ لوگوں نے عرض کیا: ہم گواہی دیتے ہیں کہ آپ نے (پیغام) پہنچا دیا، (حق) ادا کردیا اور خیرخواہی فرمائی، تو آپ نے اپنی شہادت کی انگلی آسمان کی طرف اٹھاتے اور لوگوں کی طرف جھکاتے ہوئے تین مرتبہ فرمایا: اے اللہ! گواہ رہنا، اے اللہ! گواہ رہنا۔ پھر اذان ہوئی، پھر اقامت ہوئی تو آپ نے ظہر کی نماز پڑھی، پھر اقامت ہوئی تو عصر کی نماز پڑھی اور ان دونوں کے درمیان کوئی نماز نہیں پڑھی، پھر رسول اللہ صلی اللہ علیہ وآلہ وسلم سوار ہو کر موقف پر آئے اور اپنی اونٹنی قصواء کا پیٹ چٹانوں کی طرف کیا اور پیدل چلنے والوں کے راستے کو اپنے سامنے رکھا اور قبلہ رخ ہوئے، پھر مسلسل کھڑے رہے یہاں تک کہ سورج غروب ہوگیا اور زردی کچھ کم ہوگئی یہاں تک کہ سورج کی ٹکیہ غائب ہوگئی، اور حضرت اسامہ رضی اللہ عنہ کو اپنے پیچھے سوار کیا، اور رسول اللہ صلی اللہ علیہ وآلہ وسلم روانہ ہوئے، آپ نے قصواء کی مہار اتنی کھینچ رکھی تھی کہ اس کا سر کجاوے کے اگلے حصے کو چھو رہا تھا، اور آپ اپنے دائیں ہاتھ سے اشارہ کرتے ہوئے فرما رہے تھے: اے لوگو! سکون سے، سکون سے۔ جب بھی کسی پہاڑی پر آتے تو اس کی مہار تھوڑی ڈھیلی کردیتے یہاں تک کہ وہ اس پر چڑھ جاتی، یہاں تک کہ مزدلفہ آئے اور وہاں ایک اذان اور دو اقامتوں کے ساتھ مغرب اور عشاء کی نمازیں ادا فرمائیں اور ان کے درمیان کوئی نفل نہیں پڑھے، پھر رسول اللہ صلی اللہ علیہ وآلہ وسلم لیٹ گئے یہاں تک کہ فجر طلوع ہوگئی، اور جب صبح واضح ہوگئی تو اذان اور اقامت کے ساتھ فجر کی نماز ادا فرمائی، پھر قصواء پر سوار ہو کر مشعر حرام آئے، قبلہ رخ ہو کر اللہ سے دعا کی، اس کی تکبیر، تہلیل اور توحید بیان کی، اور مسلسل کھڑے رہے یہاں تک کہ خوب روشنی ہوگئی، پھر سورج نکلنے سے پہلے روانہ ہوئے، اور حضرت فضل بن عباس رضی اللہ عنہما کو اپنے پیچھے سوار کیا، وہ خوبصورت بالوں والے، گورے اور حسین آدمی تھے، جب رسول اللہ صلی اللہ علیہ وآلہ وسلم روانہ ہوئے تو کچھ عورتیں اپنی سواریوں میں گزریں، حضرت فضل ان کی طرف دیکھنے لگے تو رسول اللہ صلی اللہ علیہ وآلہ وسلم نے ان کے چہرے پر اپنا ہاتھ رکھ دیا، تو حضرت فضل نے اپنا چہرہ دوسری طرف پھیر کر دیکھنا شروع کیا، تو رسول اللہ صلی اللہ علیہ وآلہ وسلم نے دوسری طرف سے اپنا ہاتھ حضرت فضل کے چہرے پر رکھ دیا، تو انھوں نے دوسری طرف سے چہرہ پھیر کر دیکھا، یہاں تک کہ آپ وادی محسر میں آئے تو (سواری کو) تھوڑا تیز کیا، پھر درمیانی راستہ اختیار کیا جو جمرہ کبریٰ کی طرف نکلتا ہے، یہاں تک کہ اس جمرہ پر آئے جو درخت کے پاس ہے اور اسے سات کنکریاں ماریں، ہر کنکری کے ساتھ تکبیر کہتے تھے، وہ کنکریاں انگلیوں سے پھینکی جانے والی کنکریوں جیسی تھیں، آپ نے وادی کے نشیب سے رمی فرمائی، پھر قربان گاہ کی طرف تشریف لے گئے اور اپنے دست مبارک سے تریسٹھ (اونٹ) نحر کیے، پھر حضرت علی رضی اللہ عنہ کو دے دیے تو باقی انھوں نے نحر کیے، اور آپ نے انہیں اپنی قربانی میں شریک کیا، پھر ہر اونٹ میں سے ایک ٹکڑا لینے کا حکم دیا، وہ ایک ہانڈی میں ڈال کر پکائے گئے، تو دونوں حضرات نے اس کا گوشت کھایا اور اس کا شوربہ پیا، پھر رسول اللہ صلی اللہ علیہ وآلہ وسلم سوار ہو کر بیت اللہ کی طرف (طواف افاضہ کے لیے) تشریف لے گئے اور ظہر کی نماز مکہ میں ادا فرمائی، پھر بنو عبد المطلب کے پاس آئے جو زمزم پر پانی پلا رہے تھے، اور فرمایا: اے بنو عبد المطلب! پانی کھینچو، اگر یہ اندیشہ نہ ہوتا کہ لوگ تمہارے پانی پلانے (کے حق) پر تم پر غالب آجائیں گے تو میں بھی تمہارے ساتھ پانی کھینچتا، تو انھوں نے آپ کو ایک ڈول دیا اور آپ نے اس میں سے پیا۔ [مصنف ابن ابي شيبه/كتاب الحج/حدیث: 15343]

حضرت مسروق سے مروی ہے کہ کتاب اللہ میں تمہیں چار چیزوں کا حکم دیا گیا ہے، نماز قائم کرنے کا، زکوٰۃ ادا کرنے کا، حج ادا کرنے کا اور عمرہ کرنے کا۔ [مصنف ابن ابي شيبه/كتاب الحج/حدیث: 15344]