حضرت ابو قلابہ رحمہ اللہ فرماتے ہیں کہ رسول اللہ صلی اللہ علیہ وسلم اپنی ازواج کے مابین عدل سے تقسیم فرمایا کرتے تھے اور ارشاد فرماتے کہ اے اللہ! یہ میری وہ تقسیم ہے جو میرے اختیار میں تھی اور جو میرے اختیار میں نہیں تیرے اختیار میں ہے اس کے بارے میں مجھ سے مواخذہ نہ فرما۔ [مصنف ابن ابي شيبه/كتاب النكاح/حدیث: 18462]

حضرت عائشہ رضی اللہ عنہا فرماتی ہیں کہ کہ رسول اللہ صلی اللہ علیہ وسلم اپنی ازواج کے مابین عدل سے تقسیم فرمایا کرتے تھے اور ارشاد فرماتے کہ اے اللہ! یہ میری وہ تقسیم ہے جو میرے اختیار میں تھی اور جو میرے اختیار میں نہیں تیرے اختیار میں ہے اس کے بارے میں مجھ سے مواخذہ نہ فرما۔ [مصنف ابن ابي شيبه/كتاب النكاح/حدیث: 18463]

حضرت یحییٰ بن سعید رحمہ اللہ فرماتے ہیں کہ حضرت معاذ رضی اللہ عنہ کی دو بیویاں تھیں، وہ اس بات کو ناپسند کرتے کہ ایک کی باری والے دن دوسری کے یہاں سے وضو بھی کرلیں یا دوسری کے پاس رہیں۔ [مصنف ابن ابي شيبه/كتاب النكاح/حدیث: 18464]

حضرت محمد رحمہ اللہ فرماتے ہیں کہ اگر کسی شخص کی دو بیویاں ہوں تو ایک کی باری والے دن دوسرے کے یہاں وضو کرنا بھی مکروہ ہے۔ [مصنف ابن ابي شيبه/كتاب النكاح/حدیث: 18465]

حضرت جابر بن زید رحمہ اللہ فرماتے ہیں کہ میری دو بیویاں تھیں میں ان دونوں کے درمیان بوسہ دینے میں بھی عدل سے کام لیتا تھا۔ [مصنف ابن ابي شيبه/كتاب النكاح/حدیث: 18466]

حضرت مجاہد رحمہ اللہ فرماتے ہیں کہ اسلاف اس بات کو پسند فرماتے ہیں کہ خوشبو لگانے میں بھی بیویوں کے درمیان برابری سے کام لیں۔ ایک کے لئے بھی وہی خوشبو لگائیں جو دوسری کے لئے لگاتے ہیں۔ [مصنف ابن ابي شيبه/كتاب النكاح/حدیث: 18467]

ابراہیم رحمہ اللہ نے ایک سے زیادہ شادیاں کرنے والے شخص کے بارے میں فرمایا کہ اسلاف بیویوں کے درمیان برابری کرنے میں اس قدر احتیاط سے کام لیتے تھے کہ ستو اور غلے وغیرہ میں سے وہ چیز جو بچ جاتی اور کیل میں نہ آسکتی تو اس کو ہتھیلیوں سے تقسیم کرتے۔ [مصنف ابن ابي شيبه/كتاب النكاح/حدیث: 18468]

حضرت ابراہیم رحمہ اللہ فرماتے ہیں کہ جب رسول اللہ صلی اللہ علیہ وسلم کا مرض شدت اختیار کرگیا تو آپ نے دیکھ بھال کے لئے حضرت عائشہ رضی اللہ عنہا کے گھر قیام کے لئے باقی ازواج سے اجازت طلب کی۔ سب نے اجازت دے دی اور آپ صلی اللہ علیہ وسلم حضرت عائشہ رضی اللہ عنہا کے یہاں قیام پذیر ہوگئے۔ [مصنف ابن ابي شيبه/كتاب النكاح/حدیث: 18469]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس شخص کی دو بیویاں ہوں اور وہ ایک کی خاطر مدارت دوسری سے بڑھ کر کرتا ہو تو قیامت کے دن اسے اس حال میں اٹھایا جائے گا کہ اس کا ایک پہلوگرا ہوگا۔ [مصنف ابن ابي شيبه/كتاب النكاح/حدیث: 18470]