سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہم کو پچھلے پہر کی ایک نماز پڑھائی ظہر یا عصر، آپ نے ہمیں دو رکعتیں پڑھا کر سلام پھیر دیا۔ پھر آپ صلی اللہ علیہ وسلم مسجد کے سامنے ایک لکڑی کے پاس کھڑے ہوئے اور اپنے دونوں ہاتھ اس پر رکھ لیے، آپ صلی اللہ علیہ وسلم کا ایک ہاتھ دوسرے کے اوپر تھا اور آپ کے چہرے پر ناراضی کے آثار نمایاں تھے۔ پھر جلد باز لوگ (مسجد سے) نکل آئے اور وہ کہہ رہے تھے: ”نماز کم کر دی گئی! نماز کم کر دی گئی!“ لوگوں میں سیدنا ابوبکر رضی اللہ عنہ اور سیدنا عمر رضی اللہ عنہ بھی تھے، مگر ہیبت کے باعث وہ آپ صلی اللہ علیہ وسلم سے بات نہ کر رہے تھے، تو ایک آدمی کھڑا ہوا، رسول اللہ صلی اللہ علیہ وسلم اسے ذوالیدین (ہاتھوں والا) کہا کرتے تھے۔ وہ کہنے لگا: ”اے اللہ کے رسول! کیا آپ بھول گئے ہیں یا نماز کم کر دی گئی ہے؟“ آپ صلی اللہ علیہ وسلم نے فرمایا: ”میں بھولا ہوں نہ نماز کم کی گئی ہے۔“ کہنے لگا: ”بلکہ آپ بھول گئے ہیں، اے اللہ کے رسول!“ تب رسول اللہ صلی اللہ علیہ وسلم لوگوں کی طرف متوجہ ہوئے اور پوچھا: ”کیا ذوالیدین ٹھیک کہہ رہا ہے؟“ انہوں نے اشارہ کیا کہ ”ہاں“۔ تب رسول اللہ صلی اللہ علیہ وسلم اپنی جگہ پر تشریف لائے اور بقیہ دو رکعتیں پڑھائیں، پھر آپ صلی اللہ علیہ وسلم نے سلام پھیرا، پھر آپ صلی اللہ علیہ وسلم نے تکبیر کہی اور سجدہ کیا اپنے سجدے کی مانند یا اس سے کچھ لمبا، پھر سر اٹھایا اور تکبیر کہی اور (دوسرا) سجدہ کیا اپنے (پہلے) سجدے کی مانند یا اس سے کچھ لمبا، پھر آپ صلی اللہ علیہ وسلم نے سر اٹھایا اور تکبیر کہی۔ محمد بن سیرین رحمہ اللہ سے کہا گیا: ”کیا آپ نے سجدہ سہو کے بعد سلام پھیرا تھا؟“ انہوں نے جواب دیا: ”مجھے یہ بات سیدنا ابوہریرہ رضی اللہ عنہ سے یاد نہیں ہے، مگر مجھے بتایا گیا ہے کہ عمران بن حصین رضی اللہ عنہ نے بیان کیا ہے کہ پھر آپ نے سلام پھیرا۔“ [سنن ابي داود/أبواب تفريع استفتاح الصلاة /حدیث: 1008]

محمد (محمد بن سیرین) سے روایت ہے اور حماد کی روایت زیادہ کامل ہے، انہوں نے (سیدنا ابوہریرہ رضی اللہ عنہ سے) بیان کیا کہ ”پھر رسول اللہ صلی اللہ علیہ وسلم نے نماز پڑھی۔“ یہ نہیں کہا کہ ”ہمیں نماز پڑھائی“ اور نہ یہ کہا کہ ”لوگوں نے اشارہ کیا“ بلکہ کہا کہ لوگوں نے کہا: ”ہاں“ (یعنی آپ بھول گئے ہیں)۔ پھر بیان کیا کہ ”آپ نے سر اٹھایا“ مگر تکبیر کا ذکر نہیں کیا۔ ”پھر تکبیر کہی اور سجدہ کیا اپنے پہلے سجدے کی مانند یا اس سے کچھ لمبا، پھر سر اٹھایا“ (یعنی یہاں بھی تکبیر کا ذکر نہیں) اور یہاں تک اس کی روایت پوری ہو گئی ہے اور اس کے بعد آخر تک کے الفاظ بھی بیان نہیں کیے۔ اور «فَأَوْمَئُوا» ”لوگوں نے اشارہ کیا“ کا لفظ سوائے حماد بن زید کے کسی اور نے ذکر نہیں کیا۔ امام ابوداؤد رحمہ اللہ فرماتے ہیں کہ ”جس نے بھی یہ روایت ذکر کی ہے اس نے آپ صلی اللہ علیہ وسلم کی تکبیر اور آپ کے لوٹ آنے کا ذکر نہیں کیا ہے۔“ [سنن ابي داود/أبواب تفريع استفتاح الصلاة /حدیث: 1009]

سیدنا ابوہریرہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم نے ہمیں نماز پڑھائی“، آخر تک روایت حماد کی مانند کہ مجھے بتایا گیا ہے کہ عمران بن حصین رضی اللہ عنہ نے کہا کہ ”پھر آپ نے سلام پھیرا“، (سلمہ نے) کہا: ”میں نے پوچھا: اور تشہد؟“ انہوں نے کہا: ”تشہد کے بارے میں میں نے کچھ نہیں سنا، مگر مجھے تشہد پڑھنا زیادہ پسند ہے۔“ (سلمہ نے یہ) ذکر نہیں کیا کہ ”آپ صلی اللہ علیہ وسلم اس شخص کو ذوالیدین کہا کرتے تھے“، اور نہ لوگوں کے اشارے اور رسول اللہ صلی اللہ علیہ وسلم کی ناراضی کا ذکر کیا۔ اور حماد کی حدیث زیادہ کامل ہے جو ایوب سے مروی ہے۔ [سنن ابي داود/أبواب تفريع استفتاح الصلاة /حدیث: 1010]

سیدنا ابوہریرہ رضی اللہ عنہ نبی کریم صلی اللہ علیہ وسلم سے ذوالیدین کے قصے میں بیان کرتے ہیں کہ ”آپ نے تکبیر کہی اور سجدہ کیا۔“ جبکہ ہشام بن حسان نے روایت کیا کہ ”آپ نے تکبیر کہی (یعنی تحریمہ) پھر «اللهُ أَكْبَرُ» کہا اور سجدہ کیا۔“ امام ابوداؤد رحمہ اللہ کہتے ہیں: ”اس حدیث کو حبیب بن شہید، حمید، یونس اور عاصم احول (چاروں) نے محمد بن سیرین سے اور وہ سیدنا ابوہریرہ رضی اللہ عنہ سے بیان کرتے ہیں اور ان میں سے کسی نے بھی وہ بات ذکر نہیں کی جو حماد بن زید نے ہشام سے بیان کی ہے کہ آپ نے تکبیر (تکبیر تحریمہ) کہی پھر تکبیر کہی اور سجدہ کیا۔ اسی طرح حماد بن سلمہ اور ابوبکر بن عیاش بھی ہشام سے یہ روایت ذکر کرتے ہیں تو انہوں نے بھی حماد بن زید والی یہ بات ذکر نہیں کی کہ آپ نے تکبیر (تکبیر تحریمہ) کہی پھر تکبیر کہی۔“ [سنن ابي داود/أبواب تفريع استفتاح الصلاة /حدیث: 1011]

سعید بن مسیب، ابوسلمہ اور عبیداللہ بن عبداللہ (تینوں) سیدنا ابوہریرہ رضی اللہ عنہ سے یہ قصہ بیان کرتے ہیں، انہوں نے کہا: ”نبی کریم صلی اللہ علیہ وسلم نے سہو کے سجدے نہیں کیے حتیٰ کہ اللہ نے آپ کو اس کا یقین دلا دیا۔“ [سنن ابي داود/أبواب تفريع استفتاح الصلاة /حدیث: 1012]

ابن شہاب سے روایت ہے کہ ابوبکر بن سلیمان بن ابی حثمہ (تابعی) نے ان سے بیان کیا کہ انہیں رسول اللہ صلی اللہ علیہ وسلم سے یہ خبر پہنچی ہے۔ انہوں نے کہا کہ ”آپ صلی اللہ علیہ وسلم نے شک کی بنا پر کیے جانے والے سجدے اس وقت تک نہیں کیے جب تک کہ لوگوں نے مل کر نہیں بتایا۔“ ابن شہاب کہتے ہیں کہ مجھے یہ حدیث سعید بن مسیب نے سیدنا ابوہریرہ رضی اللہ عنہ سے بیان کی (علاوہ ازیں) کہا کہ مجھے ابوسلمہ بن عبدالرحمٰن، ابوبکر بن حارث بن ہشام اور عبیداللہ بن عبداللہ (نے بھی سیدنا ابوہریرہ رضی اللہ عنہ سے روایت کی ہے)۔ امام ابوداؤد رحمہ اللہ نے کہا: ”یحییٰ بن ابی کثیر اور عمران بن ابی انس نے ابوسلمہ بن عبدالرحمٰن اور علاء بن عبدالرحمٰن سے بواسطہ ان کے والد کے روایت کی ہے اور یہ سب سیدنا ابوہریرہ رضی اللہ عنہ سے یہ قصہ بیان کرتے ہیں اور اس میں دو سجدے کرنے کا ذکر نہیں ہے۔“ امام ابوداؤد رحمہ اللہ نے کہا: ”اور زبیدی نے زہری سے، وہ ابوبکر بن سلیمان بن ابی حثمہ سے، وہ نبی کریم صلی اللہ علیہ وسلم سے روایت کرتے ہیں اور اس میں کہا کہ آپ صلی اللہ علیہ وسلم نے سہو کے دونوں سجدے نہیں کیے۔“ [سنن ابي داود/أبواب تفريع استفتاح الصلاة /حدیث: 1013]

ابوسلمہ بن عبدالرحمٰن، سیدنا ابوہریرہ رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے ظہر کی نماز پڑھائی تو آپ صلی اللہ علیہ وسلم نے دو رکعتوں پر سلام پھیر دیا۔ آپ صلی اللہ علیہ وسلم سے کہا گیا: ”(کیا) نماز کم ہو گئی ہے؟“ تب آپ صلی اللہ علیہ وسلم نے دو رکعتیں (مزید) پڑھیں پھر دو سجدے کیے۔ [سنن ابي داود/أبواب تفريع استفتاح الصلاة /حدیث: 1014]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے ایک فرض نماز میں دو رکعتوں پر سلام پھیر دیا تو ایک شخص نے آپ صلی اللہ علیہ وسلم سے کہا: ”کیا نماز کم ہو گئی ہے؟ اے اللہ کے رسول! یا آپ بھول گئے ہیں؟“ آپ صلی اللہ علیہ وسلم نے فرمایا: ”ان میں سے کچھ بھی نہیں ہوا۔“ تو لوگوں نے کہا: ”تحقیق آپ نے ایسا کیا ہے، اے اللہ کے رسول!“ تب آپ صلی اللہ علیہ وسلم نے دو رکعتیں مزید پڑھائیں، پھر آپ پلٹے اور سہو کے دو سجدے نہیں کیے۔ امام ابوداؤد رحمہ اللہ نے کہا: اس روایت کو داؤد بن حصین نے بواسطہ ابوسفیان مولیٰ ابن ابی احمد، سیدنا ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے یہ قصہ بیان کیا تو کہا: ”پھر آپ نے دو سجدے کیے جبکہ آپ سلام کے بعد بیٹھے ہوئے تھے۔“ [سنن ابي داود/أبواب تفريع استفتاح الصلاة /حدیث: 1015]

ضمضم بن جوس ہفانی نے سیدنا ابوہریرہ رضی اللہ عنہ سے یہ خبر بیان کی، انہوں نے کہا: ”پھر آپ صلی اللہ علیہ وسلم نے سلام کے بعد سہو کے دو سجدے کیے۔“ [سنن ابي داود/أبواب تفريع استفتاح الصلاة /حدیث: 1016]

سیدنا ابن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے ہمیں نماز پڑھائی تو ”دو رکعتوں پر سلام پھیر دیا“ اور ابن سیرین کی حدیث کی مانند بیان کیا جو سیدنا ابوہریرہ رضی اللہ عنہ سے مروی ہے اور کہا: ”پھر آپ صلی اللہ علیہ وسلم نے سلام پھیرا، پھر سہو کے دو سجدے کیے۔“ [سنن ابي داود/أبواب تفريع استفتاح الصلاة /حدیث: 1017]