محمد بن عبدالرحمن بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”صبح صادق دو قسم کی ہوتی ہے، ایک وہ صبح صادق ہوتی ہے جو سانپ کی دم کی طرح (چوڑائی کی سمت میں) پھیلتی ہے، ایسے وقت میں (فجر کی نماز) ادا کرنا جائز نہیں ہوتا اور سحری کرنے والے کے لیے کھانا حرام نہیں ہوتا، البتہ جو (روشنی) افق میں لمبائی کی سمت میں پھیلتی ہے وہ (فجر کی) نماز کو حلال کر دیتی ہے (یعنی اس وقت نماز کا وقت شروع ہو جاتا ہے) اور سحری کرنے والے کے لیے کھانے کو حرام کر دیتی ہے (یعنی اس وقت سحری کا وقت ختم ہو جاتا ہے)۔“ [سنن الدارقطني/ كتاب الصلاة/حدیث: 1053]

سیدنا عبادہ بن صامت رضی اللہ عنہ اور سیدنا شداد بن اوس رضی اللہ عنہ یہ دونوں حضرات یہ بیان کرتے ہیں: ”شفق دو طرح کی ہوتی ہے، سرخی والی، اور سفیدی والی، جب سرخی والی شفق ڈوب جاتی ہے تو اس وقت نماز کا وقت ہو جاتا ہے اور اسی طرح صبح صادق دو طرح کی ہوتی ہے، ایک لمبائی والی اور ایک چوڑائی والی، جب چوڑائی والی ختم ہو جاتی ہے تو اس وقت نماز کا وقت شروع ہو جاتا ہے۔“ [سنن الدارقطني/ كتاب الصلاة/حدیث: 1054]

سیدنا ابوہریرہ رضی اللہ عنہ فرماتے ہیں: ”شفق، سرخی کو کہتے ہیں۔“ [سنن الدارقطني/ كتاب الصلاة/حدیث: 1055]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”شفق سے مراد سرخی ہے، جب شفق غروب ہو جائے تو نماز فرض ہو جاتی ہے (یعنی اس کا وقت شروع ہو جاتا ہے)۔“ [سنن الدارقطني/ كتاب الصلاة/حدیث: 1056]

سیدنا عبداللہ بن عمر رضی اللہ عنہما بیان کرتے ہیں: ”شفق سے مراد سرخی ہے۔“ [سنن الدارقطني/ كتاب الصلاة/حدیث: 1057]

سیدنا نعمان بن بشیر رضی اللہ عنہ بیان کرتے ہیں: ”میں اس وقت یعنی عشاء کی نماز کے بارے میں سب سے زیادہ علم رکھتا ہوں، نبی کریم صلی اللہ علیہ وسلم اسے اس وقت ادا کرتے تھے جب تیسری رات کا چاند ڈوب جاتا ہے۔“ [سنن الدارقطني/ كتاب الصلاة/حدیث: 1058]

یہی روایت ایک اور سند کے ہمراہ نبی کریم صلی اللہ علیہ وسلم کے بارے میں منقول ہے، تاہم اس میں یہ الفاظ ہیں: (راوی کو شک ہے) تیسری رات کا چاند یا چوتھی رات کا چاند (ڈوب جاتا تھا)۔ بعض دیگر راویوں نے بھی اسے سیدنا نعمان رضی اللہ عنہ کے حوالے سے نقل کیا ہے، اور انہوں نے اس میں، تیسری رات کا چاند، کے الفاظ نقل کیے ہیں۔ [سنن الدارقطني/ كتاب الصلاة/حدیث: 1059]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”(مدینہ منورہ کے حساب سے) مشرق اور مغرب کی درمیانی جگہ قبلہ ہے۔“ [سنن الدارقطني/ كتاب الصلاة/حدیث: 1060]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”(مدینہ منورہ کے حساب سے) مشرق اور مغرب کی درمیانی جگہ قبلہ ہے۔“ [سنن الدارقطني/ كتاب الصلاة/حدیث: 1061]

سیدنا جابر بن عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم نے ایک مہم روانہ کی، میں بھی اس میں موجود تھا۔ ایک مرتبہ انتہائی تاریکی میں ہمیں قبلہ کی سمت کا اندازہ نہ ہو سکا۔ ہم میں سے کچھ لوگوں نے کہا: ہمیں قبلہ کا اندازہ ہو گیا ہے، وہ اس طرف ہے۔ انہوں نے شمال کی طرف اشارہ کیا، اس طرف رخ کر کے نماز ادا کی، اور یادداشت کے طور پر ایک لکیر لگائی۔ بعض نے کہا: قبلہ اس سمت ہے۔ انہوں نے جنوب کی طرف اشارہ کیا اور اس طرف لکیر لگائی۔ جب صبح ہوئی اور سورج نکلا تو دونوں لکیریں قبلہ کی سمت میں نہ تھیں۔ جب ہم سفر سے واپس آئے اور نبی کریم صلی اللہ علیہ وسلم سے اس بارے میں پوچھا تو آپ خاموش رہے۔ پھر اللہ نے یہ آیت نازل فرمائی: ”مشرق اور مغرب اللہ ہی کے لیے ہیں، تم جس طرف بھی رخ کرو گے، وہاں اللہ کی ذات موجود ہو گی۔“ [سنن الدارقطني/ كتاب الصلاة/حدیث: 1062]