سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم ہمیں نماز پڑھا رہے تھے، آپ نے ایک سورت پڑھنی شروع کی، آپ نے اس میں سے ایک آیت کو چھوڑ دیا، جب آپ نماز سے فارغ ہوئے، تو میں نے عرض کیا: یا رسول اللہ! کیا فلاں آیت منسوخ ہو گئی ہے؟ نبی کریم صلی اللہ علیہ وسلم نے فرمایا: ”نہیں۔“ میں نے عرض کیا: آپ نے اس کی قراءت نہیں کی، نبی کریم صلی اللہ علیہ وسلم نے فرمایا: ”تم نے مجھے لقمہ کیوں نہیں دیا؟“ [سنن الدارقطني/ كتاب الصلاة/حدیث: 1492]

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم کے اصحاب نماز کے دوران ایک دوسرے کو لقمہ دے دیا کرتے تھے۔ [سنن الدارقطني/ كتاب الصلاة/حدیث: 1493]

سیدنا ابوہریرہ رضی اللہ عنہ نبی کریم صلی اللہ علیہ وسلم کا فرمان نقل کرتے ہیں: ”ایک درہم جتنا خون لگا ہو، تو وہ نماز دوبارہ پڑھی جائے گی۔“ بعض دیگر راویوں نے اسے نقل کرنے میں اختلاف نہیں کیا ہے۔ [سنن الدارقطني/ كتاب الصلاة/حدیث: 1494]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جب کپڑے پر ایک درہم جتنا خون لگا ہو، تو اس کپڑے کو دھویا جائے گا اور وہ نماز دوبارہ ادا کی جائے گی۔“ [سنن الدارقطني/ كتاب الصلاة/حدیث: 1495]

یہی روایت ایک اور سند کے ہمراہ بھی منقول ہے اور اس کا ایک راوی متروک ہے۔ [سنن الدارقطني/ كتاب الصلاة/حدیث: 1496]

سیدنا عبداللہ بن عمر رضی اللہ عنہما ارشاد فرماتے ہیں: ”جب امام سلام پھیر دے، تو تم دائیں طرف اور بائیں طرف سلام پھیر لو اور اس کے بعد تم اپنی نماز کے کسی بھی حصہ کا رخ نہ کرو۔“ [سنن الدارقطني/ كتاب الصلاة/حدیث: 1497]

سیدنا علی بن ابوطالب رضی اللہ عنہ بیان کرتے ہیں: ”جو نماز تم امام کے ساتھ پا لو، تمہاری ابتدائی نماز ہو گی اور جو قراءت پہلے گزر چکی ہو، اس کو تم بعد میں ادا کر لو۔“ سعید بن مسیب کی بھی وہی رائے ہے، جو سیدنا علی رضی اللہ عنہ کی ہے۔ [سنن الدارقطني/ كتاب الصلاة/حدیث: 1498]

محمد بن شعیب بیان کرتے ہیں: میں نے امام اوزاعی اور سعید بن عبدالعزیز سے اس بارے میں دریافت کیا، ان دونوں نے یہ فرمایا: ”تم نے امام کی نماز کا جو حصہ پایا ہے، اسے اپنی نماز کا ابتدائی حصہ سمجھو۔“ [سنن الدارقطني/ كتاب الصلاة/حدیث: 1499]

حسن بصری بیان کرتے ہیں: جب نبی کریم صلی اللہ علیہ وسلم دس دن بیمار ہوئے، تو اس میں سے نو دن سیدنا ابوبکر رضی اللہ عنہ نے لوگوں کو نماز پڑھائی، دسویں دن نبی کریم صلی اللہ علیہ وسلم کو کچھ بہتری محسوس ہوئی، تو آپ سیدنا فضل بن عباس رضی اللہ عنہ اور سیدنا اسامہ بن زید رضی اللہ عنہ کے درمیان سہارے سے چلتے ہوئے تشریف لائے اور آپ نے سیدنا ابوبکر رضی اللہ عنہ کی اقتداء میں بیٹھ کر نماز ادا کی۔ [سنن الدارقطني/ كتاب الصلاة/حدیث: 1500]

سیدنا جابر رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص امام کی اقتداء میں نماز ادا کرے، تو امام کی قراءت اس کی قراءت شمار ہو گی۔“ یہ روایت منکر ہے، اس کا راوی سہل بن عباس متروک ہے۔ [سنن الدارقطني/ كتاب الصلاة/حدیث: 1501]