اسود بن یزید کوفی بیان کرتے ہیں کہ سیدنا معاذ بن جبل رضی اللہ عنہ نے یمن میں ایک شخص کی وراثت تقسیم کی، جس نے پس ماندگان میں ایک بیٹی اور ایک بہن چھوڑی تھی، سیدنا معاذ رضی اللہ عنہ نے اس کی بیٹی کو نصف حصہ دیا اور بہن کو نصف حصہ دیا، یہ اس وقت کی بات ہے، جب نبی کریم صلی اللہ علیہ وسلم لوگوں کے درمیان موجود تھے (یعنی نبی کریم صلی اللہ علیہ وسلم کی ظاہری زندگی کی بات ہے)۔ [سنن الدارقطني/ كتاب الفرائض/حدیث: 4108]

سیدنا عبداللہ بن عباس رضی اللہ عنہما بیان کرتے ہیں کہ سیدنا حمزہ رضی اللہ عنہ کا غلام فوت ہو گیا، اس نے ایک بیٹی اور سیدنا حمزہ رضی اللہ عنہ کی صاحبزادی (اپنے پس ماندگان میں) چھوڑی، تو نبی کریم صلی اللہ علیہ وسلم نے اس غلام کی بیٹی کو نصف حصہ دیا اور سیدنا حمزہ رضی اللہ عنہ کی صاحبزادی کو بھی نصف حصہ دیا۔ [سنن الدارقطني/ كتاب الفرائض/حدیث: 4109]

سیدنا عمران بن حصین رضی اللہ عنہ بیان کرتے ہیں کہ ایک شخص نبی کریم صلی اللہ علیہ وسلم کی خدمت میں حاضر ہوا اور اس نے عرض کی: ”میرے بیٹے کا انتقال ہو گیا ہے، مجھے اس کی وراثت میں سے کیا ملے گا؟“ نبی کریم صلی اللہ علیہ وسلم نے ارشاد فرمایا: ”تمہیں چھٹا حصہ ملے گا۔“ جب وہ واپس چلا گیا، تو آپ صلی اللہ علیہ وسلم نے اسے بلایا اور فرمایا: ”تمہیں ایک اور چھٹا حصہ بھی ملے گا۔“ جب وہ واپس چلا گیا، تو آپ صلی اللہ علیہ وسلم نے اسے بلایا اور فرمایا: ”تمہیں ایک اور چھٹا حصہ بھی اضافی طور پر ملے گا۔“ [سنن الدارقطني/ كتاب الفرائض/حدیث: 4110]

سیدنا ابوامامہ بن سہل حنیف رضی اللہ عنہ بیان کرتے ہیں کہ ایک شخص نے دوسرے کو تیر مار کر قتل کر دیا، اس شخص کا وارث صرف اس کا ایک ماموں تھا، سیدنا ابوعبیدہ بن جراح رضی اللہ عنہ نے اس بارے میں سیدنا عمر رضی اللہ عنہ کو خط لکھا، تو سیدنا عمر رضی اللہ عنہ نے جوابی خط میں لکھا کہ نبی کریم صلی اللہ علیہ وسلم نے یہ بات ارشاد فرمائی ہے: ”جس شخص کا کوئی مولیٰ نہ ہو، اللہ تعالیٰ اور اس کا رسول اس کے مولیٰ ہیں اور جس شخص کا کوئی وارث نہ ہو، تو اس کا ماموں اس کا وارث بنے گا۔“ [سنن الدارقطني/ كتاب الفرائض/حدیث: 4111]

سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”بیشک جس شخص کا کوئی مولیٰ نہ ہو، اللہ تعالیٰ اس کا مولیٰ ہے اور جس کا کوئی وارث نہ ہو، اس کا ماموں اس کا وارث بنے گا۔“ [سنن الدارقطني/ كتاب الفرائض/حدیث: 4112]

سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جس شخص کا کوئی مولیٰ نہ ہو، اللہ تعالیٰ اس کا مولیٰ ہے اور جس شخص کا کوئی وارث نہ ہو، اس کا ماموں اس کا وارث بنے گا۔“ سیدہ عائشہ رضی اللہ عنہا فرماتی ہیں کہ اللہ تعالیٰ اور اس کے رسول اس شخص کے مولیٰ ہوں گے، جس کا کوئی مولیٰ نہ ہو اور ماموں اس شخص کا وارث بنے گا، جس کا کوئی وارث نہ ہو۔ [سنن الدارقطني/ كتاب الفرائض/حدیث: 4113]

ابوعاصم سے دریافت کیا گیا کہ یہ بات نبی کریم صلی اللہ علیہ وسلم کے حوالے سے منقول ہے؟ تو وہ خاموش رہے، تو شاذ کونی نے ان سے کہا: ”آپ ہمیں نبی کریم صلی اللہ علیہ وسلم کے حوالے سے حدیث سنائیں۔“ تو وہ پھر بھی خاموش رہے۔ [سنن الدارقطني/ كتاب الفرائض/حدیث: 4114]

یہی روایت ایک اور سند کے ہمراہ منقول ہے، تاہم یہ روایت ”موقوف“ ہے۔ [سنن الدارقطني/ كتاب الفرائض/حدیث: 4115]

سیدنا مقدام رضی اللہ عنہ بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”میں ہر مومن کے لیے اس کی جان سے زیادہ قریب ہوں، جو شخص مال چھوڑ کر جائے گا، وہ اس کے ورثاء کو ملے گا اور جو شخص قرض یا بال بچے چھوڑ کر جائے گا (ان کا کوئی پرسان حال نہ ہو)، تو وہ میری طرف آئیں گے، میں اس شخص کا قرض بھی ادا کروں گا اور اس کی دیگر ذمہ داریاں بھی پوری کروں گا، ماموں اس شخص کا وارث بنتا ہے، جس کا کوئی وارث نہیں ہوتا، کیونکہ وہی اس کا قرض بھی اتارے گا اور اس کی ذمہ داریاں بھی پوری کرے گا۔“ [سنن الدارقطني/ كتاب الفرائض/حدیث: 4116]

یہی روایت ایک اور سند کے ہمراہ سیدنا مقدام بن معد یکرب رضی اللہ عنہ کے حوالے سے منقول ہے۔ [سنن الدارقطني/ كتاب الفرائض/حدیث: 4117]