سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تم مجھے چھ باتوں کی ضمانت دو، میں تمہیں جنت کی ضمانت دوں گا: جب تم بات کرو تو سچ بولو، جب تم وعدہ کرو تو اسے پورا کرو، جب تمہارے سپرد امانت کی جائے تو اسے ادا کرو، اپنی شرمگاہوں کی حفاظت کرو، اپنی نگاہوں کو جھکا کر رکھو اور اپنے ہاتھوں کو تھام کے رکھو۔“ [صحیح ابن حبان/كتاب البر والإحسان/حدیث: 271]

سیدنا عبداللہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”آدمی سچ بولتا رہتا ہے اور سچ بولنے کی کوشش کرتا رہتا ہے، یہاں تک کہ اللہ تعالیٰ کی بارگاہ میں اسے سچا لکھ دیا جاتا ہے، اور کوئی شخص جھوٹ بولتا رہتا ہے اور جھوٹ بولنے کی کوشش کرتا رہتا ہے، یہاں تک کہ اللہ تعالیٰ کی بارگاہ میں اسے جھوٹا لکھ لیا جاتا ہے۔“ [صحیح ابن حبان/كتاب البر والإحسان/حدیث: 272]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک سچائی نیکی کی طرف لے جاتی ہے، اور بے شک نیکی جنت کی طرف لے جاتی ہے۔ آدمی سچ بولتا ہے یہاں تک کہ اللہ تعالیٰ کی بارگاہ میں اسے سچا لکھ لیا جاتا ہے، اور جھوٹ گناہ کی طرف لے جاتا ہے، اور گناہ جہنم کی طرف لے جاتا ہے۔ بے شک آدمی جھوٹ بولتا ہے، یہاں تک کہ اللہ تعالیٰ کی بارگاہ میں اسے جھوٹا لکھ لیا جاتا ہے۔“ [صحیح ابن حبان/كتاب البر والإحسان/حدیث: 273]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم پر سچ کو اختیار کرنا لازم ہے، کیونکہ سچ نیکی کی طرف لے جاتا ہے اور نیکی جنت کی طرف لے جاتی ہے۔ آدمی سچ بولتا رہتا ہے یہاں تک کہ اللہ تعالیٰ کی بارگاہ میں اسے سچا لکھ لیا جاتا ہے، اور جھوٹ گناہ کی طرف لے جاتا ہے اور گناہ جہنم کی طرف لے جاتا ہے۔ آدمی جھوٹ بولتا رہتا ہے یہاں تک کہ اللہ تعالیٰ کی بارگاہ میں اسے جھوٹا لکھ لیا جاتا ہے۔“ [صحیح ابن حبان/كتاب البر والإحسان/حدیث: 274]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”خبردار! لوگوں کا خوف کسی بھی شخص کو حق بات کہنے سے منع نہ کرے جب کہ آدمی اسے دیکھ لے کہ یہاں حق بات کہنا بنتا ہے۔“ [صحیح ابن حبان/كتاب البر والإحسان/حدیث: 275]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جو شخص لوگوں کی ناراضگی کے ہمراہ اللہ تعالیٰ کی رضا مندی تلاش کرتا ہے، اللہ تعالیٰ اس سے راضی ہو جاتا ہے اور لوگوں کو اس سے راضی کر دیتا ہے، اور جو شخص اللہ تعالیٰ کی ناراضگی کے ساتھ لوگوں کی رضا مندی تلاش کرتا ہے تو اللہ تعالیٰ اس سے ناراض ہوتا ہے اور لوگوں کو بھی اس سے ناراض کر دیتا ہے۔“ [صحیح ابن حبان/كتاب البر والإحسان/حدیث: 276]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص لوگوں کی ناراضی کے ساتھ اللہ تعالیٰ کو راضی کر لیتا ہے، اللہ تعالیٰ اس کے لیے کافی ہو جاتا ہے، اور جو شخص لوگوں کی رضا مندی کی وجہ سے اللہ تعالیٰ کو ناراض کرتا ہے، تو اللہ تعالیٰ اسے لوگوں کے سپرد کر دیتا ہے۔“ [صحیح ابن حبان/كتاب البر والإحسان/حدیث: 277]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”لوگوں کا خوف کسی بھی شخص کو حق بات کہنے سے منع نہ کرے، جب آدمی اسے دیکھے یا یہ بات جان لے کہ (یہاں حق بات کہنا بنتا ہے)“ سیدنا ابوسعید رضی اللہ عنہ فرماتے ہیں: ہم پر مسلسل آزمائشیں وارد ہوتی رہیں۔ یہاں تک کہ ہم سے کوتاہی ہوئی۔ اب ہم بری صورتحال کا شکار ہو چکے ہیں۔ [صحیح ابن حبان/كتاب البر والإحسان/حدیث: 278]

سیدنا کعب بن عجرہ رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ہمارے پاس تشریف لائے، ہم نو افراد تھے، جن میں سے پانچ ایک قسم کے تھے اور چار دوسری قسم کے، ان دونوں میں سے ایک گروہ عرب تھا اور دوسرا عجمی۔ نبی اکرم صلی اللہ علیہ وسلم نے فرمایا: ”تم لوگ غور سے سنو، (راوی کو شک ہے شاید یہ الفاظ ہیں) کیا تم لوگ سن رہے ہو؟ میرے بعد ایسے حکمران آئیں گے، جو شخص ان کے پاس جائے گا، ان کے جھوٹ کی تصدیق کرے گا اور ان کے ظلم میں ان کی مدد کرے گا، تو اس کا مجھ سے کوئی تعلق نہیں ہو گا اور نہ میرا اس سے کوئی تعلق ہو گا، اور وہ میرے حوض پر نہیں آ سکے گا۔ اور جو شخص ان کے جھوٹ کی تصدیق نہیں کرے گا اور ان کے ظلم میں ان کی مدد نہیں کرے گا، تو اس کا مجھ سے تعلق ہو گا اور میرا اس سے تعلق ہو گا، اور وہ میرے حوض پر میرے پاس آ سکے گا۔“ [صحیح ابن حبان/كتاب البر والإحسان/حدیث: 279]

علقمہ بن وقاص رحمہ اللہ کے بارے میں یہ بات منقول ہے کہ ایک مرتبہ ان کے پاس سے مدینہ منورہ کا رہنے والا ایک شخص گزرا، جو صاحبِ حیثیت تھا (یا کوئی سرکاری اہلکار تھا)، علقمہ رحمہ اللہ اس وقت مدینہ منورہ کے بازار میں بیٹھے ہوئے تھے۔ علقمہ رحمہ اللہ نے کہا: ”اے فلاں! تمہارے کچھ حقوق بھی ہیں اور تمہارے کچھ فرائض بھی ہیں۔ میں نے دیکھا ہے کہ تم ان حکمرانوں کے پاس آتے جاتے رہتے ہو اور ان کے ساتھ بات چیت کرتے رہتے ہو۔ میں نے نبی اکرم صلی اللہ علیہ وسلم کے صحابی سیدنا بلال بن حارث مزنی رضی اللہ عنہ کو یہ بات بیان کرتے ہوئے سنا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”بے شک تم میں سے کوئی ایک شخص اللہ تعالیٰ کی رضا مندی سے متعلق ایک بات کہتا ہے، اس کو یہ اندازہ نہیں ہوتا کہ یہ بات کہاں تک جائے گی، تو اللہ تعالیٰ اس بات کی وجہ سے اس دن تک کے لیے اس سے رضا مندی نوٹ کر لیتا ہے، جب وہ اللہ تعالیٰ کی بارگاہ میں حاضر ہو گا۔ اور ایک شخص اللہ تعالیٰ کی ناراضگی سے متعلق کوئی بات کہتا ہے، اس کو یہ اندازہ نہیں ہوتا کہ وہ بات کہاں تک جائے گی، لیکن اللہ تعالیٰ اس بات کی وجہ سے قیامت کے دن تک کے لیے اس شخص کے لیے ناراضگی نوٹ کر لیتا ہے۔““ علقمہ رحمہ اللہ نے فرمایا: ”تمہارا ستیاناس ہو! تم اس بات کا جائزہ لیا کرو کہ تم کیا کہتے ہو اور کس بارے میں کلام کر رہے ہو؟ کیونکہ جب سے میں نے سیدنا بلال بن حارث رضی اللہ عنہ کی زبانی یہ حدیث سنی ہے، میں کئی باتیں بیان نہیں کرتا ہوں۔“ [صحیح ابن حبان/كتاب البر والإحسان/حدیث: 280]