سیدنا بلال بن حارث مزنی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک تم میں سے کوئی ایک شخص اللہ تعالیٰ کی رضا مندی سے متعلق کوئی ایک بات کہتا ہے، اس شخص کو یہ اندازہ نہیں ہوتا کہ یہ بات کہاں تک پہنچ جائے گی، لیکن اللہ تعالیٰ اس بات کی وجہ سے، اس دن تک کے لیے، اس شخص کے بارے میں رضا مندی کو نوٹ کر لیتا ہے جس دن وہ شخص اللہ تعالیٰ کی بارگاہ میں حاضر ہو گا۔ اور کوئی شخص اللہ تعالیٰ کی ناراضگی سے متعلق کوئی بات کہتا ہے، اس کو یہ اندازہ نہیں ہوتا کہ یہ بات کہاں تک پہنچ جائے گی، لیکن اللہ تعالیٰ اس بات کی وجہ سے، اس شخص کے بارے میں، اس دن تک کے لیے، اپنی ناراضگی تحریر کر دیتا ہے جب وہ شخص اللہ تعالیٰ کی بارگاہ میں حاضر ہو گا۔“ [صحیح ابن حبان/كتاب البر والإحسان/حدیث: 281]

سیدنا کعب بن عجرہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم تشریف لائے، ہم اس وقت نو افراد تھے۔ ہمارے درمیان چمڑے کا بنا ہوا تکیہ موجود تھا۔ نبی اکرم صلی اللہ علیہ وسلم نے فرمایا: ”میرے بعد عنقریب کچھ حکمران آئیں گے، جو شخص ان کے پاس جائے گا، ان کے جھوٹ کی تصدیق کرے گا، ان کے ظلم میں ان کی مدد کرے گا، اس کا مجھ سے کوئی تعلق نہیں ہو گا اور میرا اس سے کوئی تعلق نہیں ہو گا اور وہ میرے حوض پر میرے پاس نہیں آ سکے گا۔ اور جو شخص ان کے ہاں نہیں جائے گا، ان کے جھوٹ میں ان کی تصدیق نہیں کرے گا، ان کے ظلم میں ان کی مدد نہیں کرے گا، اس کا مجھ سے تعلق ہو گا اور میرا اس سے تعلق ہو گا اور وہ عنقریب میرے حوض پر میرے پاس آئے گا۔“ ابوحصین نامی راوی کا نام عثمان بن عاصم ہے۔ یہ بات شیخ نے بیان کی ہے۔ [صحیح ابن حبان/كتاب البر والإحسان/حدیث: 282]

سیدنا کعب بن عجرہ رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ہمارے پاس تشریف لائے، ہم اس وقت چمڑے کے بنے ہوئے تکیے پر بیٹھے ہوئے تھے۔ آپ صلی اللہ علیہ وسلم نے ارشاد فرمایا: ”عنقریب میرے بعد کچھ حکمران آئیں گے، جو شخص ان کے ہاں جائے گا اور ان کے جھوٹ میں ان کی تصدیق کرے گا اور ان کے ظلم میں ان کی مدد کرے گا، اس کا مجھ سے کوئی تعلق نہیں ہوگا، اور میرا اس سے کوئی تعلق نہیں ہوگا، اور وہ میرے حوض پر میرے پاس نہیں آ سکے گا، اور جو شخص ان کے جھوٹ میں ان کی تصدیق نہیں کرے گا اور ان کے ظلم میں ان کی مدد نہیں کرے گا، اس کا مجھ سے تعلق ہوگا اور میرا اس سے تعلق ہوگا اور وہ میرے حوض پر میرے پاس آئے گا۔“ امام ابن حبان رحمہ اللہ فرماتے ہیں: ملائی نامی راوی ابونعیم فضل بن دکین ہیں۔ [صحیح ابن حبان/كتاب البر والإحسان/حدیث: 283]

عبداللہ بن جناب اپنے والد رضی اللہ عنہ کا یہ بیان نقل کرتے ہیں کہ ایک مرتبہ ہم نبی اکرم صلی اللہ علیہ وسلم کے دروازے پر بیٹھے ہوئے تھے، آپ صلی اللہ علیہ وسلم ہمارے پاس تشریف لائے اور فرمایا: ”تم لوگ غور سے سنو!“ ہم نے عرض کی: ہم سننے کے لیے تیار ہیں۔ نبی اکرم صلی اللہ علیہ وسلم نے فرمایا: ”تم غور سے سنو!“ ہم نے عرض کی: ہم سننے کے لیے تیار ہیں۔ نبی اکرم صلی اللہ علیہ وسلم نے فرمایا: ”تم غور سے سنو!“ ہم نے عرض کی: ہم سننے کے لیے تیار ہیں۔ نبی اکرم صلی اللہ علیہ وسلم نے فرمایا: ”عنقریب میرے بعد کچھ حکمران آئیں گے، تو تم ان کی تصدیق نہ کرنا اور ان کے ظلم میں ان کی مدد نہ کرنا، کیونکہ جو شخص ان کے جھوٹ کی تصدیق کرے گا اور ان کے ظلم میں ان کی مدد کرے گا، وہ میرے حوض تک نہیں آ سکے گا۔“ [صحیح ابن حبان/كتاب البر والإحسان/حدیث: 284]

سیدنا کعب بن عجرہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم ہمارے پاس تشریف لائے، ہم لوگ اس وقت نو افراد تھے، ہمارے درمیان چمڑے کا بنا ہوا تکیہ موجود تھا۔ آپ صلی اللہ علیہ وسلم نے ارشاد فرمایا: ”عنقریب میرے بعد کچھ ایسے حکمران آئیں گے، جو شخص ان کے پاس جائے گا، ان کے جھوٹ کی تصدیق کرے گا، ان کے ظلم میں ان کی مدد کرے گا، اس کا مجھ سے کوئی تعلق نہیں ہوگا اور میرا اس سے کوئی تعلق نہیں ہوگا، وہ شخص میرے حوض پر میرے پاس نہیں آ سکے گا۔ اور جو شخص ان کے ہاں نہیں جائے گا، ان کے جھوٹ کی تصدیق نہیں کرے گا، ان کے ظلم میں ان کی مدد نہیں کرے گا، اس کا مجھ سے تعلق ہوگا اور میرا اس سے تعلق ہوگا اور وہ عنقریب میرے حوض پر میرے پاس آئے گا۔“ [صحیح ابن حبان/كتاب البر والإحسان/حدیث: 285]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”عنقریب میرے بعد کچھ حکمران آئیں گے جن کے ہاں لوگ آئیں جائیں گے، تو جو شخص ان کے جھوٹ میں ان کی تصدیق کرے گا اور ان کے ظلم میں ان کی مدد کرے گا، میں اس سے بری الذمہ ہوں اور وہ مجھ سے لاتعلق ہے؛ اور جو شخص ان کے جھوٹ کی تصدیق نہیں کرے گا اور ان کے ظلم میں ان کی مدد نہیں کرے گا، میرا اس سے تعلق ہے اور اس کا مجھ سے تعلق ہے۔“ [صحیح ابن حبان/كتاب البر والإحسان/حدیث: 286]

محمد بن عمرو بن علقمہ اپنے والد کے حوالے سے اپنے دادا کے بارے میں یہ بات نقل کرتے ہیں کہ ایک مرتبہ ہم ان کے ساتھ بازار میں بیٹھے ہوئے تھے، ان کے پاس سے مدینہ منورہ کا رہنے والا ایک صاحبِ حیثیت شخص گزرا، تو علقمہ بن وقاص رحمہ اللہ نے اس سے کہا: تمہارا ایک حق ہے (کہ میں تمہیں یہ بات بتاؤں) تم ان حکمرانوں کے ہاں آتے جاتے ہو اور ان سے بات چیت کرتے ہو، میں نے سیدنا بلال بن حارث رضی اللہ عنہ، جو نبی اکرم صلی اللہ علیہ وسلم کے صحابی ہیں، ان کو یہ بیان کرتے ہوئے سنا ہے کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بندہ کوئی بات کرتا ہے، اسے یہ اندازہ نہیں ہوتا کہ یہ بات کہاں تک جائے گی؟ اللہ تعالیٰ اس بات کی وجہ سے قیامت کے دن تک کے لیے اس بندے کے بارے میں رضامندی تحریر کر دیتا ہے۔ اور ایک بندہ کوئی بات کہتا ہے، اور اسے یہ اندازہ نہیں ہوتا کہ یہ بات کہاں تک جائے گی؟ لیکن اس بات کی وجہ سے اللہ تعالیٰ قیامت کے دن تک کے لیے اس شخص کے بارے میں ناراضگی نوٹ کر لیتا ہے۔“ تو اے میرے بھتیجے! تم اس بات کا جائزہ لو کہ تم کیا کہتے ہو اور کیا بات کرتے ہو؟ میں نے جب سے سیدنا بلال بن حارث رضی اللہ عنہ کی زبانی یہ بات سنی ہے، تب سے میں نے (غیر محتاط) باتیں کرنا ترک کر دی ہیں۔ [صحیح ابن حبان/كتاب البر والإحسان/حدیث: 287]

سیدنا عبداللہ بن سلام رضی اللہ عنہ بیان کرتے ہیں کہ جب اللہ تعالیٰ نے زید بن سعنہ رضی اللہ عنہ کو ہدایت عطا کرنے کا ارادہ کیا، تو زید بن سعنہ رضی اللہ عنہ نے کہا: نبوت کی جتنی بھی علامات باقی رہ گئی ہیں، وہ سب میں نے نبی اکرم صلی اللہ علیہ وسلم کے چہرے میں پہچان لی ہیں۔ جب میں نے آپ کی زیارت کی صرف دو باتیں باقی رہ گئی ہیں، وہ میں آپ کی شخصیت میں نہیں جان سکا۔ ایک یہ کہ آپ کے مزاج میں بردباری اور (برداشت) کا عنصر کتنا ہے؟ دوسرا یہ کہ جب آپ کے ساتھ بدتمیزی کا مظاہرہ کیا جائے، تو آپ زیادہ بردباری کا مظاہرہ کرتے ہیں؟ تو میں یہ چاہتا ہوں کہ میں نبی اکرم صلی اللہ علیہ وسلم کے ساتھ نرمی سے پیش آؤں، ان کے ساتھ ملتا رہوں تاکہ مجھے آپ کی بردباری کا اندازہ ہو سکے۔ راوی بیان کرتے ہیں: ایک مرتبہ نبی اکرم صلی اللہ علیہ وسلم اپنے حجرے سے باہر تشریف لائے آپ کے ساتھ سیدنا علی بن ابوطالب رضی اللہ عنہ بھی تھے۔ ایک شخص جو دیکھنے میں دیہاتی لگ رہا تھا، نبی اکرم صلی اللہ علیہ وسلم کی خدمت میں حاضر ہوا۔ اس نے عرض کی: یا رسول اللہ! فلاں بستی کے لوگوں نے اسلام قبول کر لیا ہے۔ میں نے انہیں بتایا تھا کہ اگر انہوں نے اسلام قبول کر لیا، تو اللہ تعالیٰ انہیں زیادہ رزق عطا کرے گا۔ اب انہیں قحط سالی لاحق ہو گئی ہے، بارش نہیں ہوئی، مجھے یہ اندیشہ ہے، یا رسول اللہ! جس طرح وہ لالچ کی وجہ سے اسلام میں داخل ہوئے تھے، کہیں اسی طرح لالچ کی وجہ سے اسلام سے خارج نہ ہو جائیں، اگر آپ مناسب سمجھیں، تو ان کی طرف کوئی ایسی چیز بھیج دیں، جو ان کی امداد کر سکے۔ راوی کہتے ہیں: نبی اکرم صلی اللہ علیہ وسلم نے اپنے پہلو میں موجود ایک شخص کی طرف دیکھا، میرا خیال ہے، وہ سیدنا عمر رضی اللہ عنہ تھے، تو انہوں نے عرض کی: یا رسول اللہ! میرے پاس تو ایسی کوئی چیز نہیں ہے۔ زید بن سعنہ رضی اللہ عنہ کہتے ہیں: میں نبی اکرم صلی اللہ علیہ وسلم کے قریب ہوا، میں نے آپ کی خدمت میں عرض کی: اے محمد صلی اللہ علیہ وسلم ! کیا آپ بنو فلاں کے باغ کی متعین کھجوریں فلاں عرصے تک ادائیگی کی شرط پر مجھے فروخت کرتے ہیں؟ نبی اکرم صلی اللہ علیہ وسلم نے فرمایا: ”جی نہیں۔ اے یہودی! میں تمہیں متعین کھجوریں فلاں، فلاں عرصے تک فروخت کر دوں گا، لیکن میں بنو فلاں کے باغ کا تعین نہیں کروں گا۔“ میں نے جواب دیا: ٹھیک ہے، تو نبی اکرم صلی اللہ علیہ وسلم نے میرے ساتھ سودا کر لیا۔ میں نے اپنے تھیلے کو کھولا اور اس میں سے اسی (80) مثقال سونا نکال کر آپ کو دے دیا، جو کھجوروں کی متعین تعداد کے عوض میں تھا، جس کی ادائیگی فلاں، فلاں مدت تک تھی۔ راوی بیان کرتے ہیں: نبی اکرم صلی اللہ علیہ وسلم نے وہ سونا اس شخص کو دیا اور کہا: ”تم جلدی سے ان کے پاس جاؤ اور اس کے ذریعے ان کی مدد کرو۔“ سیدنا زید بن سعنہ رضی اللہ عنہ بیان کرتے ہیں: جب متعین مدت پوری ہونے کا وقت قریب آیا، تو ابھی اس میں دو یا تین دن باقی تھے۔ نبی اکرم صلی اللہ علیہ وسلم کسی انصاری کے جنازے میں شریک ہونے کے لیے تشریف لائے، آپ کے ساتھ سیدنا ابوبکر رضی اللہ عنہ، سیدنا عمر رضی اللہ عنہ، سیدنا عثمان رضی اللہ عنہ اور دیگر کچھ صحابہ کرام رضی اللہ عنہم بھی تھے۔ جب نبی اکرم صلی اللہ علیہ وسلم نے نماز جنازہ ادا کر لی، تو آپ ایک دیوار کے قریب ہو کر بیٹھ گئے۔ میں نے آپ کی قمیص کے دامن کو پکڑا اور سخت نظروں سے آپ کی طرف دیکھتے ہوئے کہا: اے محمد صلی اللہ علیہ وسلم ! کیا آپ میرا حق مجھے ادا نہیں کریں گے؟ اللہ کی قسم! آپ یعنی عبدالمطلب کی اولاد کی طرف سے مجھے ٹال مٹول کرنے کا علم نہیں ہے؟ کیونکہ میں آپ لوگوں کے لین دین کو جانتا ہوں۔ راوی کہتے ہیں: میں نے سیدنا عمر بن خطاب رضی اللہ عنہ کی طرف دیکھا، تو ان کی آنکھیں غصے سے ابل رہی تھیں۔ انہوں نے میری طرف گھور کر دیکھا اور بولے: اے اللہ کے دشمن! کیا تم اللہ کے رسول کے ساتھ یہ بات کر رہے ہو جو میں سن رہا ہوں اور یہ طریقہ اختیار کر رہے ہو جو میں دیکھ رہا ہوں؟ اس ذات کی قسم! جس نے انہیں حق کے ہمراہ مبعوث کیا ہے، اگر ان کا احترام پیش نظر نہ ہوتا، تو میں اس تلوار کے ذریعے تمہاری گردن اڑا دیتا۔ نبی اکرم صلی اللہ علیہ وسلم نے نرمی اور مہربانی کے ساتھ سیدنا عمر رضی اللہ عنہ کی طرف دیکھا اور ارشاد فرمایا: ”اے عمر! تمہاری طرف سے اس سے مختلف رد عمل سامنے آنے کی زیادہ ضرورت تھی، تم مجھے اچھے طریقے سے ادائیگی کرنے کا کہتے اور اس کو اچھے طریقے سے تقاضا کرنے کا کہتے۔ اے عمر! اسے ساتھ لے جاؤ۔ اس کا حق اسے ادا کر دو اور تم نے جو اسے ڈانٹا ہے، اس کے بدلے میں اسے بیس صاع کھجوریں زیادہ دینا۔“ سیدنا زید بن سعنہ رضی اللہ عنہ بیان کرتے ہیں: سیدنا عمر رضی اللہ عنہ مجھے ساتھ لے گئے، انہوں نے میرا حق ادا کر دیا اور مزید بیس صاع کھجوریں عطا کیں، تو میں نے دریافت کیا: یہ اضافی ادائیگی کس لیے ہے؟ تو انہوں نے بتایا: نبی اکرم صلی اللہ علیہ وسلم نے مجھے یہ ہدایت کی تھی کہ میں نے تمہیں جو ڈانٹا ہے، اس کی جگہ میں تمہیں یہ اضافی ادائیگی کروں۔ میں نے دریافت کیا: اے عمر! تم مجھے پہچانتے ہو؟ انہوں نے جواب دیا: جی نہیں! تم کون ہو؟ میں نے کہا: میں زید بن سعنہ ہوں۔ انہوں نے دریافت کیا: یہودیوں کا بڑا عالم؟ میں نے جواب دیا: جی ہاں، یہودیوں کا بڑا عالم۔ سیدنا عمر رضی اللہ عنہ نے دریافت کیا: تم نے نبی اکرم صلی اللہ علیہ وسلم کے ساتھ اس طریقے کے ساتھ بات چیت اور اس طرح کا طرز عمل کیوں کیا؟ میں نے جواب دیا: اے عمر! میں نے اللہ کے رسول کے چہرے میں تمام علاماتِ نبوت دیکھ لی تھیں، جب میں نے آپ کی زیارت کی تھی، صرف دو چیزیں باقی رہ گئی تھیں۔ آپ صلی اللہ علیہ وسلم کے بارے میں مجھے یہ پتا نہیں چل سکا تھا۔ ایک یہ کہ آپ کے مزاج میں بردباری کتنی ہے؟ دوسرا یہ کہ جب آپ کے ساتھ بدتمیزی کا مظاہرہ کیا جائے، تو آپ بردباری اور تحمل کا مظاہرہ کرتے ہیں؟ تو میں نے ان دونوں کا علم بھی حاصل کر لیا ہے۔ اے عمر! اب میں آپ کو گواہ بنا کر یہ کہتا ہوں کہ میں اللہ تعالیٰ کے پروردگار ہونے، اسلام کے دین ہونے اور سیدنا محمد صلی اللہ علیہ وسلم کے نبی ہونے سے راضی ہوں (یعنی ان پر ایمان رکھتا ہوں) اور میں آپ کو گواہ بنا کر یہ کہتا ہوں: میرا نصف مال، حالانکہ یہودیوں میں سے سب سے زیادہ مال میرے پاس ہے، یہ سیدنا محمد صلی اللہ علیہ وسلم کی امت کے لیے صدقہ ہے۔ تو سیدنا عمر رضی اللہ عنہ نے فرمایا: تم یہ کہو کہ ان میں سے کچھ لوگوں کے لیے ہے، کیونکہ تم ان سب کو پورا نہیں کر سکتے، تو میں نے کہا: ان میں سے بعض لوگوں کے لیے ہے۔ پھر سیدنا عمر رضی اللہ عنہ اور سیدنا زید رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، تو سیدنا زید نے عرض کی: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے، اور سیدنا محمد صلی اللہ علیہ وسلم اس کے بندے اور اس کے رسول ہیں۔ راوی کہتے ہیں: پھر سیدنا زید بن سعنہ رضی اللہ عنہ نبی اکرم صلی اللہ علیہ وسلم پر ایمان لے آئے۔ انہوں نے نبی اکرم صلی اللہ علیہ وسلم کی تصدیق کی وہ نبی اکرم صلی اللہ علیہ وسلم کے ساتھ بہت سے غزوات میں شریک ہوئے اور پھر غزوہ تبوک کے دوران دشمن کا سامنا کرتے ہوئے انہوں نے انتقال کیا۔ اللہ تعالیٰ زید رضی اللہ عنہ پر رحم کرے۔ انہوں نے یہ بات بیان کی ہے میں نے ولید کو یہ کہتے ہوئے سنا ہے مجھے یہ تمام روایت محمد بن حمزہ نے اپنے والد کے حوالے سے اپنے دادا کے حوالے سے سیدنا عبداللہ بن سلام رضی اللہ عنہ کے حوالے سے بیان کی ہے۔ [صحیح ابن حبان/كتاب البر والإحسان/حدیث: 288]

سیدنا ابومسعود رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے آپ سے مدد طلب کی تو آپ صلی اللہ علیہ وسلم نے فرمایا: ”میرے پاس ایسی کوئی چیز نہیں ہے جو میں تمہیں دوں، تم فلاں شخص کے پاس چلے جاؤ۔“ (راوی بیان کرتے ہیں) وہ اس شخص کے پاس آیا تو اس نے اسے عطیہ دے دیا، پھر نبی اکرم صلی اللہ علیہ وسلم نے ارشاد فرمایا: ”جو شخص بھلائی کے بارے میں رہنمائی کرے، تو اس کو اس بھلائی کو کرنے والے (راوی کو شک ہے، شاید یہ الفاظ ہیں) اس پر عمل کرنے والے کی مانند اجر ملتا ہے۔“ [صحیح ابن حبان/كتاب البر والإحسان/حدیث: 289]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے ہاں تشریف لائے تو آپ کے چہرے سے مجھے اندازہ ہو گیا کہ آپ کا مزاج ٹھیک نہیں ہے۔ آپ نے وضو کیا اور کسی کے ساتھ کوئی بات چیت نہیں کی، پھر باہر تشریف لے گئے۔ میں حجرے کے (دروازے) کے پاس ہو گئی تاکہ میں یہ سنوں کہ آپ کیا ارشاد فرماتے ہیں۔ آپ منبر پر تشریف فرما ہوئے، اللہ تعالیٰ کی حمد و ثناء بیان کی، پھر آپ نے ارشاد فرمایا: ”اے لوگو! بے شک اللہ تبارک و تعالیٰ نے تمہیں یہ حکم دیا ہے: تم لوگ نیکی کا حکم دو اور برائی سے منع کرو، اس سے پہلے کہ تم لوگ مجھ سے دعا مانگو اور میں تمہاری دعا قبول نہ کروں، تم لوگ مجھ سے کچھ مانگو اور میں تمہیں عطا نہ کروں، تم لوگ مجھ سے مدد مانگو اور میں تمہاری مدد نہ کروں۔“ سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے صرف یہی کلمات ارشاد فرمائے اور پھر منبر سے نیچے تشریف لے آئے۔ [صحیح ابن حبان/كتاب البر والإحسان/حدیث: 290]