سیدہ اسماء بنت ابوبکر رضی اللہ عنہا بیان کرتی ہیں کہ انہوں نے نبی اکرم صلی اللہ علیہ وسلم کو منبر پر یہ بات ارشاد فرماتے ہوئے سنا ہے: ”کوئی بھی چیز اللہ تعالیٰ سے زیادہ غیرت والی نہیں ہے۔“ [صحیح ابن حبان/كتاب البر والإحسان/حدیث: 291]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”مومن غیرت والا ہوتا ہے، اور اللہ تعالیٰ زیادہ شدید غیرت والا ہے۔“ [صحیح ابن حبان/كتاب البر والإحسان/حدیث: 292]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ غیرت والا ہے، اور مومن بھی غیرت والا ہوتا ہے، اللہ تعالیٰ کی غیرت اس بات پر ہوتی ہے کہ مومن کسی ایسی چیز کا ارتکاب کرے، جو اللہ تعالیٰ نے حرام قرار دی ہے۔“ [صحیح ابن حبان/كتاب البر والإحسان/حدیث: 293]

سیدنا عبداللہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اپنی تعریف سب سے زیادہ اللہ تعالیٰ کو پسند ہے، اس لیے اس نے اپنی تعریف خود کی ہے، اور کوئی بھی شخص اللہ تعالیٰ سے زیادہ غیرت والا نہیں ہے، اس لیے اس نے فحش کاموں کو حرام قرار دیا ہے۔“ [صحیح ابن حبان/كتاب البر والإحسان/حدیث: 294]

ابن عتیک انصاری رضی اللہ عنہما اپنے والد کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”غیرت کی ایک قسم وہ ہے جسے اللہ تعالیٰ پسند کرتا ہے، اور ایک قسم وہ ہے جسے اللہ تعالیٰ ناپسند کرتا ہے، جہاں تک اس قسم کا تعلق ہے جسے اللہ تعالیٰ پسند کرتا ہے، تو یہ وہ غیرت ہے جو اللہ تعالیٰ کے بارے میں ہے، اور وہ غیرت جسے اللہ تعالیٰ ناپسند کرتا ہے، تو یہ وہ غیرت ہے جو اللہ تعالیٰ کی بجائے کسی اور کے لیے ہو، تکبر کا اظہار کرنے والے لوگوں میں کچھ لوگ وہ ہیں جنہیں اللہ تعالیٰ پسند کرتا ہے، اور کچھ لوگ وہ ہیں جنہیں اللہ تعالیٰ ناپسند کرتا ہے، جہاں تک ان لوگوں کا تعلق ہے جو تکبر کا اظہار کرتے ہیں اور اللہ تعالیٰ ان کو پسند کرتا ہے، تو اس سے مراد وہ بندہ ہے جو جنگ کے وقت اپنے آپ کو نمایاں کرے اور وہ شخص جو صدقہ کرتے وقت اپنے آپ کو نمایاں کرے، اور جہاں تکبر کرنے والے اس شخص کا تعلق ہے جسے اللہ تعالیٰ ناپسند کرتا ہے، تو اس سے مراد وہ شخص ہے جو کسی دینی معاملے کی بجائے (دنیا داری کے حوالے سے) تکبر کا اظہار کرتا ہے۔“ امام ابن حبان رحمہ اللہ فرماتے ہیں: ابن عتیک نامی راوی ابوسفیان بن جابر بن عتیک بن نعمان اشہلی ہیں، ان کے والد صحابی ہیں۔ [صحیح ابن حبان/كتاب البر والإحسان/حدیث: 295]

سیدنا عبداللہ بن عمرو رضی اللہ عنہما بیان کرتے ہیں، میں نے عرض کی: یا رسول اللہ! کون سی چیز مجھے اللہ تعالیٰ کے غضب سے بچا سکتی ہے؟ نبی اکرم صلی اللہ علیہ وسلم نے فرمایا: ”تم غصہ نہ کرو۔“ [صحیح ابن حبان/كتاب البر والإحسان/حدیث: 296]

امام شعبی بیان کرتے ہیں: میں نے سیدنا نعمان بن بشیر رضی اللہ عنہ کو منبر پر یہ بات بیان کرتے ہوئے سنا، وہ کہتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے، میری سماعت اور میرے دل نے اسے محفوظ رکھا ہے اور مجھے یہ بات پتا ہے، اب میں اس منبر پر کسی شخص کو یہ کہتے ہوئے نہیں سن سکوں گا کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: (نبی اکرم صلی اللہ علیہ وسلم فرماتے ہیں) ”اللہ تعالیٰ کی حدود کو قائم کرنے والے شخص اور اللہ تعالیٰ کی حدود کی خلاف ورزی کرنے والے شخص کی مثال اس طرح ہے، جیسے کچھ لوگ ایک کشتی میں سوار ہوں، وہ اپنی جگہوں کے بارے میں قرعہ اندازی کر لیں، تو پانی حاصل کرنے کی جگہ اور لوگوں کے گزرنے کی جگہ ایک شخص کے حصے میں آئے، تو وہ غصے میں آ جائے اور پھاؤڑہ پکڑے (یہاں ایک لفظ کے بارے میں راوی کو شک ہے) تو ان میں سے ایک شخص دوسرے سے یہ کہے: یہ شخص ہمیں ڈبونا چاہتا ہے اور کشتی کو توڑنا چاہتا ہے، اور دوسرا شخص کہے: اسے کرنے دو، یہ اپنی جگہ کو توڑ رہا ہے۔“ (راوی بیان کرتے ہیں) میں نے نبی اکرم صلی اللہ علیہ وسلم کو یہ بات بھی ارشاد فرماتے ہوئے سنا ہے: ”بے شک جسم میں گوشت کا ایک ٹکڑا ہے، اگر وہ ٹھیک رہے تو سارا جسم ٹھیک رہتا ہے، اور اگر وہ خراب ہو جائے تو سارا جسم خراب ہو جاتا ہے۔“ (راوی بیان کرتے ہیں) میں نے نبی اکرم صلی اللہ علیہ وسلم کو یہ بات بھی ارشاد فرماتے ہوئے سنا ہے: ”آپس میں ایک دوسرے پر رحمت اور لطف کے حوالے سے اہل ایمان کی مثال ایک شخص کے جسم کی مانند ہے، جب جسم کا ایک حصہ بیمار ہو جائے تو پورا جسم اس تکلیف کو محسوس کرتا ہے۔“ [صحیح ابن حبان/كتاب البر والإحسان/حدیث: 297]

سیدنا نعمان بن بشیر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ تعالیٰ کی حدود کی خلاف ورزی کرنے والا اور اللہ تعالیٰ کی حدود کی حفاظت کرنے والا، اس کا حکم دینے والا اور اس سے منع کرنے والا، اس کی مثال ایسے لوگوں کی طرح ہے جو سمندر کی کسی کشتی میں اپنی جگہ کے بارے میں قرعہ اندازی کر لیتے ہیں، تو ان میں سے ایک شخص کو کشتی کا پچھلا حصہ ملتا ہے، وہ شخص اپنے ساتھیوں سے دور ہوتا ہے اور وہ لوگ بے وقوف ہوتے ہیں، جب بھی لوگ وہاں آتے ہیں تو اسے اذیت دیتے ہیں، تو وہ لوگ یہ کہتے ہیں کہ ہم تمام کشتی والوں میں سہولت کے زیادہ قریب ہیں اور پانی سے زیادہ دور ہیں، تو تم لوگ آؤ ہم کشتی کے زیریں حصے کو توڑ دیتے ہیں، جب ہم اس سے بے نیاز ہو جائیں گے تو ہم اسے واپس لگا دیں گے، تو ان میں سے جو بے وقوف شخص ہوتا ہے وہ کہتا ہے کہ تم ایسا کر لو، پھر وہ کلہاڑی کی طرف بڑھتا ہے تاکہ اسے کشتی کے فرش پر مارے، تو ایک سمجھ دار شخص جھانک کر اس کی طرف دیکھتا ہے اور دریافت کرتا ہے: تم کیا کر رہے ہو؟ وہ کہتا ہے: ہم سہولت میں تمہارے زیادہ قریب ہیں اور اس سے تم سے زیادہ دور ہیں، میں کشتی کا تختہ توڑنے لگا ہوں، جب ہماری ضرورت پوری ہو جائے گی تو ہم اسے بند کر دیں گے، تو وہ سمجھ دار شخص یہ کہتا ہے: تم ایسا نہ کرو، اگر تم ایسا کرو گے تو تم ہلاکت کا شکار ہو جاؤ گے اور ہم بھی ہلاکت کا شکار ہو جائیں گے۔“ [صحیح ابن حبان/كتاب البر والإحسان/حدیث: 298]

سیدنا عبداللہ بن عباس رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”بنی آدم کے ہر جوڑ پر روزانہ صدقہ دینا لازم ہوتا ہے۔“ حاضرین میں سے ایک صاحب نے عرض کی: کون اس کی طاقت رکھتا ہے؟ نبی اکرم صلی اللہ علیہ وسلم نے ارشاد فرمایا: ”نیکی کا حکم دینا صدقہ ہے، برائی سے روکنا صدقہ ہے، کمزور شخص کا وزن اٹھا دینا صدقہ ہے، اور تم میں سے کوئی شخص جب نماز کی طرف چل کر جاتا ہے، تو اس کا ہر قدم صدقہ ہے۔“ [صحیح ابن حبان/كتاب البر والإحسان/حدیث: 299]

عبداللہ بن جریر اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جب بھی کسی قوم کے درمیان گناہوں کا ارتکاب ہونے لگے اور وہ لوگ انہیں روک سکتے ہوں اور پھر بھی نہ روکیں، تو اللہ تعالیٰ ان لوگوں کے مرنے سے پہلے ان سب پر عذاب نازل کر دیتا ہے۔“ [صحیح ابن حبان/كتاب البر والإحسان/حدیث: 300]