سیدنا نعمان بن بشیر رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ کی حدود کی خلاف ورزی کرنے اور اس پر (عمل کرنے کا) حکم دینے والا اور اس کی (خلاف ورزی) سے روکنے والے شخص کی مثال ایسے لوگوں کی مانند ہے، جو سمندر میں کسی کشتی کے بارے میں قرعہ اندازی کرتے ہیں، تو ان میں سے کچھ لوگوں کو کشتی کا پیچھے والا حصہ ملتا ہے، وہ لوگ سہولت سے دور ہوتے ہیں اور کچھ لوگ بالائی حصے میں چلے جاتے ہیں۔ جب وہ لوگ پانی لینے کا ارادہ کرتے ہیں، تو وہ کشتی کے آخری حصے میں ہوتے ہیں، تو وہ سوار لوگوں کو تکلیف پہنچاتے ہیں، تو ان میں سے ایک شخص یہ کہتا ہے: ہم سہولت سے زیادہ قریب ہیں اور پانی سے زیادہ دور ہیں، ہم کشتی کے ایک حصے کو توڑ دیتے ہیں اور پانی حاصل کر لیتے ہیں، جب ہماری ضرورت پوری ہو جائے گی، تو ہم اسے بند کر دیں گے، تو ان میں سے بے وقوف لوگ یہ کہتے ہیں: تم لوگ ایسا کر لو۔ تو ان میں سے ایک شخص کلہاڑی پکڑتا ہے اور کشتی کے فرش پر مارتا ہے، تو ان میں سے ایک سمجھدار شخص کہتا ہے: کیا کرنے لگے ہو؟ وہ کہتا ہے: ہم سہولت سے قریب ہیں اور پانی سے زیادہ دور ہیں، ہم کشتی کا فرش توڑنے لگے ہیں تاکہ پانی حاصل کر لیں۔ جب ہماری ضرورت پوری ہو جائے گی، تو ہم اسے بند کر دیں گے، تو وہ شخص کہتا ہے: تم ایسا نہ کرو، کیونکہ اس صورت میں تم بھی ہلاکت کا شکار ہو جاؤ گے اور ہم بھی ہلاکت کا شکار ہو جائیں گے۔“ [صحیح ابن حبان/كتاب البر والإحسان/حدیث: 301]

عبیداللہ بن جریر اپنے والد (رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جب بھی کسی قوم میں گناہوں کا ارتکاب ہونے لگے اور وہ لوگ ان گناہوں کو روک سکتے ہوں، لیکن وہ انہیں نہ روکیں، تو اللہ تعالیٰ ان کے مرنے سے پہلے ان سب پر عذاب نازل کر دیتا ہے۔“ [صحیح ابن حبان/كتاب البر والإحسان/حدیث: 302]

سیدنا ابوثعلبہ خشنی رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کے پاس آ کر بیٹھا، اس نے سونے کی انگوٹھی پہنی ہوئی تھی۔ نبی اکرم صلی اللہ علیہ وسلم نے اپنے دستِ مبارک میں موجود شاخ اس کے ہاتھ پر ماری (اور اسے انگوٹھی اتارنے کا اشارہ کیا)، جب نبی اکرم صلی اللہ علیہ وسلم کی توجہ اس شخص سے ہٹی تو اس نے اپنی انگوٹھی اتار دی، پھر نبی اکرم صلی اللہ علیہ وسلم نے اس کی طرف دیکھا تو دریافت کیا: ”تمہاری انگوٹھی کہاں ہے؟“ اس نے عرض کی: میں نے وہ اتار دی ہے۔ نبی اکرم صلی اللہ علیہ وسلم نے فرمایا: ”میرا خیال ہے، ہم نے تمہیں تکلیف پہنچائی، ہم نے تمہیں نقصان پہنچایا۔“ امام ابن حبان رحمہ اللہ فرماتے ہیں: نعمان بن راشد نامی راوی بعض اوقات زہری کے حوالے سے حدیث روایت کرتے ہوئے غلطی کر جاتے ہیں۔ [صحیح ابن حبان/كتاب البر والإحسان/حدیث: 303]

قیس بن ابوحازم بیان کرتے ہیں: سیدنا ابوبکر صدیق رضی اللہ عنہ نے یہ آیت تلاوت کی: ﴿اے ایمان والو! تم پر اپنا خیال رکھنا لازم ہے۔ جب تم ہدایت حاصل کر لو، تو گمراہ ہونے والا شخص تمہیں کوئی نقصان نہیں پہنچا سکتا﴾ [سورة المائدة: 105] ۔ سیدنا ابوبکر رضی اللہ عنہ نے فرمایا: لوگ اس آیت کا غلط مفہوم مراد لیتے ہیں۔ خبردار! میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک جب لوگ کسی ظالم کو دیکھیں گے اور اس کے ہاتھوں کو نہیں پکڑیں گے۔ (راوی کو شک ہے شاید یہ الفاظ ہیں) جب وہ کسی گناہ کو دیکھیں گے اور اسے روکیں گے نہیں، تو اللہ تعالیٰ ان سب لوگوں پر عذاب نازل کرے گا۔“ [صحیح ابن حبان/كتاب البر والإحسان/حدیث: 304]

سیدنا ابوبکر صدیق رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اے لوگو! تم لوگ یہ آیت تلاوت کرتے ہو اور اس کا اس سے مختلف مفہوم مراد لیتے ہو جو اللہ تعالیٰ کی مراد ہے۔“ ارشاد باری تعالیٰ ہے: ﴿يَا أَيُّهَا الَّذِينَ آمَنُوا عَلَيْكُمْ أَنْفُسَكُمْ لَا يَضُرُّكُمْ مَنْ ضَلَّ إِذَا اهْتَدَيْتُمْ﴾ [سورة المائدة: 105] ”اے لوگو! تم پر اپنا خیال رکھنا لازم ہے، جب تم ہدایت حاصل کر لو تو گمراہ ہونے والا شخص تمہیں کوئی نقصان نہیں پہنچائے گا۔“ (نبی اکرم صلی اللہ علیہ وسلم فرماتے ہیں:) ”لوگ جب منکر (یعنی گناہ) کو دیکھیں گے اور اسے روکنے کی کوشش نہیں کریں گے، تو عنقریب اللہ تعالیٰ ان سب پر عذاب نازل کرے گا۔“ [صحیح ابن حبان/كتاب البر والإحسان/حدیث: 305]

طارق بن شہاب احمسی بیان کرتے ہیں کہ عید کے دن نماز سے پہلے خطبہ دینے کا آغاز مروان بن حکم نے کیا، تو ایک شخص اس کے سامنے کھڑا ہوا اور بولا: کیا خطبے سے پہلے نماز پڑھی جائے گی؟ اس نے بلند آواز میں یہ بات کہی، تو مروان نے کہا: اے ابوفلاں! یہاں یہ طریقہ ترک کر دیا گیا ہے۔ تو سیدنا ابوسعید خدری رضی اللہ عنہ نے فرمایا: اس شخص نے اپنے ذمے لازم چیز کو ادا کر دیا ہے، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب کوئی شخص کوئی منکر دیکھے، تو اسے اپنے ہاتھ کے ذریعے ختم کرے، اگر وہ اس کی استطاعت نہیں رکھتا تو اپنی زبان کے ذریعے کرے، اگر وہ اس کی بھی استطاعت نہیں رکھتا تو اپنے دل میں اسے برا جانے اور یہ ایمان کا سب سے زیادہ کمزور درجہ ہے۔“ [صحیح ابن حبان/كتاب البر والإحسان/حدیث: 306]

سیدنا ابوسعید خدری رضی اللہ عنہ بیان کرتے ہیں کہ مروان نے عید کے دن منبر نکلوایا اور اس نے نماز ادا کرنے سے پہلے خطبہ دیا، تو ایک شخص کھڑا ہوا اور بولا: اے مروان! تم سنت کے برخلاف کر رہے ہو، تم نے عید کے دن منبر نکالا ہے، حالانکہ عید کے دن اسے نہیں نکالا جاتا اور تم نماز سے پہلے خطبہ دے رہے ہو، حالانکہ اس سے آغاز نہیں کیا جا سکتا۔ سیدنا ابوسعید خدری رضی اللہ عنہ نے دریافت کیا: یہ شخص کون ہے؟ لوگوں نے بتایا: یہ فلاں بن فلاں ہے، تو سیدنا ابوسعید خدری رضی اللہ عنہ نے فرمایا: اس شخص نے اپنے ذمے لازم فرض کو ادا کر لیا ہے۔ یہاں اسحاق نامی راوی نے یہ الفاظ زائد نقل کیے ہیں۔ (سیدنا ابوسعید خدری رضی اللہ عنہ نے فرمایا: نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے:) ”تم میں سے جو شخص کوئی منکر دیکھے، تو وہ اپنے ہاتھ کے ذریعے اسے ختم کرے، اگر وہ اس کی استطاعت نہ رکھتا ہو، تو اپنی زبان کے ذریعے کرے اور اگر وہ اس کی بھی استطاعت نہیں رکھتا تو اپنے دل کے اندر سے برا سمجھے اور یہ ایمان کا سب سے زیادہ کمزور مرتبہ ہے۔“ [صحیح ابن حبان/كتاب البر والإحسان/حدیث: 307]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص (کسی بھی چیز کا جوڑا) اللہ کی راہ میں خرچ کرتا ہے، تو جنت میں یہ اعلان کیا جاتا ہے: اے اللہ کے بندے! یہ چیز زیادہ بہتر ہے، (قیامت کے دن) جو لوگ اہل نماز ہوں گے، انہیں نماز والے دروازے سے بلایا جائے گا، جو لوگ اہل جہاد ہوں گے، انہیں جہاد والے دروازے سے بلایا جائے گا، جو لوگ صدقہ کرنے والے ہوں گے، انہیں صدقے والے دروازے سے بلایا جائے گا اور جو لوگ روزہ رکھنے والے ہوں گے، انہیں بابِ ریان سے بلایا جائے گا۔“ سیدنا ابوبکر رضی اللہ عنہ نے عرض کی: یا رسول اللہ! کیا کوئی شخص ایسا بھی ہو سکتا ہے جسے ان تمام دروازوں سے بلایا جائے؟ تو کیا کسی کو ان تمام دروازوں سے بھی بلایا جائے گا؟ نبی اکرم صلی اللہ علیہ وسلم نے فرمایا: ”جی ہاں! اور مجھے امید ہے کہ تم ان لوگوں میں سے ایک ہو۔“ [صحیح ابن حبان/كتاب البر والإحسان/حدیث: 308]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”قرآن میں موجود ہر وہ حرف جس میں «الْقُنُوتُ» کا ذکر کیا گیا ہے، تو اس سے مراد فرمانبرداری ہے۔“ [صحیح ابن حبان/كتاب البر والإحسان/حدیث: 309]

سیدنا معاویہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بھلائی عادت ہے، اور برائی لجاجت ہے، جس شخص کے بارے میں اللہ تعالیٰ بھلائی کا ارادہ کر لے، اسے دین کی سمجھ بوجھ عطا کر دیتا ہے۔“ [صحیح ابن حبان/كتاب البر والإحسان/حدیث: 310]