سیدنا مغیرہ بن شعبہ رضی اللہ عنہ بیان کرتے ہیں کہ نبی اکرم صلی اللہ علیہ وسلم رات کے وقت نوافل ادا کرتے اور اتنا طویل قیام کرتے کہ آپ کے دونوں پاؤں ورم آلود ہو جاتے تھے، آپ کی خدمت میں عرض کی گئی: یا رسول اللہ! کیا آپ ایسا کرتے ہیں؟ جبکہ آپ کے گزشتہ اور آئندہ (ذنب) کی مغفرت ہو چکی ہے، تو نبی اکرم صلی اللہ علیہ وسلم نے ارشاد فرمایا: «أَفَلَا أَكُونُ عَبْدًا شَكُورًا» ”کیا میں شکر گزار بندہ نہ بنوں؟“ [صحیح ابن حبان/كتاب البر والإحسان/حدیث: 311]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم چاشت کی نماز باقاعدگی سے (ادا نہیں کرتے تھے) جبکہ سیدہ عائشہ رضی اللہ عنہا یہ نماز ادا کیا کرتی تھیں۔ وہ یہ فرماتی تھیں: ”نبی اکرم صلی اللہ علیہ وسلم بہت سے عمل اس لیے ترک کر دیتے تھے: کہیں ایسا نہ ہو کہ لوگ اس طریقے کی پیروی کرنا شروع کر دیں اور یہ بات ان پر لازم ہو جائے۔“ [صحیح ابن حبان/كتاب البر والإحسان/حدیث: 312]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم بعض اوقات کوئی عمل ترک کر دیتے تھے حالانکہ آپ صلی اللہ علیہ وسلم کو اس پر عمل کرنا پسند ہوتا تھا، آپ صلی اللہ علیہ وسلم اس اندیشے کے تحت ایسا کرتے تھے کہ لوگ بھی وہ عمل کرنا شروع کر دیں گے اور یہ ان پر لازم ہو جائے گا۔ [صحیح ابن حبان/كتاب البر والإحسان/حدیث: 313]

سیدنا ابوہریرہ رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بنی اسرائیل میں تین آدمی تھے: ایک پھلبہری کا مریض تھا، ایک گنجا تھا اور ایک اندھا تھا۔ اللہ تعالیٰ نے انہیں آزمائش میں مبتلا کرنے کا ارادہ کیا، تو ان کی طرف ایک فرشتے کو بھیجا۔ وہ پھلبہری کے مریض کے پاس آیا اور دریافت کیا: ”تمہارے نزدیک کون سی چیز زیادہ پسندیدہ ہے؟“ اس نے جواب دیا: ”صاف رنگ اور صاف جلد۔“ فرشتے نے دریافت کیا: ”تمہارے نزدیک کون سا مال زیادہ پسندیدہ ہوگا؟“ اس نے جواب دیا: ”اونٹ۔“ فرشتے نے اس پر ہاتھ پھیرا تو اس کی بیماری ختم ہو گئی، پھر اس شخص کو دس ماہ کی حاملہ اونٹنی دی گئی اور فرشتے نے کہا: ”اللہ تمہارے لیے اس میں برکت عطا کرے۔“ نبی اکرم صلی اللہ علیہ وسلم فرماتے ہیں: ”پھر وہ فرشتہ گنجے کے پاس آیا اور کہا: ”تمہیں کون سی چیز پسندیدہ ہے؟“ اس نے جواب دیا: ”اچھے بال اور مجھ سے یہ برائی ختم ہو جائے، جس کی وجہ سے لوگ مجھے برا سمجھتے ہیں۔“ نبی اکرم صلی اللہ علیہ وسلم فرماتے ہیں: ”فرشتے نے اس پر ہاتھ پھیرا تو اس کی بیماری ختم ہو گئی اور اسے اچھے بال عطا کر دیے گئے۔ فرشتے نے دریافت کیا: ”تمہارے نزدیک کون سا مال زیادہ پسندیدہ ہے؟“ اس نے جواب دیا: ”گائے۔“ تو اسے ایک حاملہ گائے دے دی گئی۔ فرشتے نے کہا: ”اللہ تعالیٰ تمہارے لیے اس میں برکت پیدا کرے۔“ نبی اکرم صلی اللہ علیہ وسلم فرماتے ہیں: ”پھر وہ فرشتہ نابینا شخص کے پاس آیا اور دریافت کیا: ”تمہارے نزدیک کون سی چیز زیادہ محبوب ہے؟“ اس نے جواب دیا: ”یہ کہ اللہ تعالیٰ مجھے میری بصارت واپس کر دے تاکہ میں اس کے ذریعے لوگوں کو دیکھ سکوں۔“ فرشتے نے اس شخص پر ہاتھ پھیرا تو اللہ تعالیٰ نے اس کی بینائی لوٹا دی۔ فرشتے نے دریافت کیا: ”تمہارے نزدیک کون سا مال زیادہ پسندیدہ ہے؟“ اس نے جواب دیا: ”بکریاں۔“ تو اس شخص کو ایک حاملہ بکری دے دی گئی۔ ان تینوں کے ہاں جانوروں کے بچے پیدا ہوئے، تو اس شخص کے پاس بہت سے اونٹ ہو گئے، اس شخص کے پاس بہت سی گائیں ہو گئیں اور اس کے پاس بہت سی بکریاں ہو گئیں۔“ نبی اکرم صلی اللہ علیہ وسلم فرماتے ہیں: ”پھر وہ فرشتہ اپنی مخصوص صورت اور ہیئت میں پھلبہری کے (سابقہ) مریض کے پاس آیا اور کہا: ”میں ایک غریب اور مسافر شخص ہوں، سفر کے دوران میرا زادِ سفر ختم ہو گیا ہے۔ اب اللہ تعالیٰ کے علاوہ اور تمہارے علاوہ میرا کوئی آسرا نہیں ہے، میں تم سے اس ذات کے وسیلے سے مانگتا ہوں جس نے تمہیں خوبصورت رنگ، خوبصورت جلد اور مال عطا کیا ہے، تم مجھے ایک اونٹ دے دو تاکہ میں اس کے ذریعے اپنا سفر جاری رکھ سکوں۔“ اس شخص نے کہا: ”میرے اور بہت سے اخراجات ہیں (میں تمہاری مدد نہیں کر سکتا)۔“ فرشتے نے کہا: ”میں شاید تمہیں جانتا ہوں، کیا تم پھلبہری کے مریض نہیں تھے؟ لوگ تمہیں برا سمجھتے تھے اور تم غریب بھی تھے، تو اللہ تعالیٰ نے تمہیں مال عطا کر دیا۔“ تو اس شخص نے کہا: ”مجھے یہ مال اپنے بڑوں کی طرف سے وراثت میں ملا ہے۔“ تو فرشتے نے کہا: ”اگر تم جھوٹ بول رہے ہو، تو اللہ تعالیٰ تمہیں پہلی صورت حال کی طرف واپس کر دے۔“ نبی اکرم صلی اللہ علیہ وسلم فرماتے ہیں: ”پھر وہ فرشتہ گنجے شخص کے پاس اسی شکل میں آیا اور اس سے بھی وہی بات کہی جو اس سے کہی تھی، تو اس نے بھی وہی جواب دیا جو اس نے دیا تھا، تو فرشتے نے کہا: ”اگر تم جھوٹ بول رہے ہو، تو اللہ تعالیٰ تمہیں پہلی صورت حال کا شکار کر دے۔“ پھر وہ فرشتہ اسی صورت اور اسی ہیئت میں (سابقہ) نابینا شخص کے پاس آیا اور بولا: ”میں ایک غریب اور مسافر شخص ہوں، میرا زادِ سفر ختم ہو گیا ہے۔“ تو اس شخص نے کہا: ”میں پہلے نابینا تھا، تو اللہ تعالیٰ نے مجھے بصارت عطا کی، اب تم جو چاہو حاصل کر لو اور جو چاہو چھوڑ دو، اللہ کی قسم! آج تم اللہ کے نام پر جو کچھ بھی لو گے میں اس معاملے میں تمہارے ساتھ کوئی سختی نہیں کروں گا۔“ تو فرشتے نے کہا: ”تم اپنا مال اپنے پاس رکھو، تم لوگوں کو آزمائش میں مبتلا کیا گیا تھا، تو تم سے رضا مندی ہو گئی اور تمہارے دو ساتھیوں پر ناراضگی ہو گئی۔““ [صحیح ابن حبان/كتاب البر والإحسان/حدیث: 314]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”کھا کر شکر ادا کرنے والا، صبر کر کے روزہ رکھنے والے کی مانند ہے۔“ (امام ابن حبان رحمہ اللہ فرماتے ہیں:) کھا کر شکر کرنے والا، جس شخص کو صبر کر کے روزہ رکھنے والے کے اجر کے بالمقابل قرار دیا گیا ہے، یہ وہ مسلمان شخص ہے جو کچھ کھاتا ہے اور پھر وہ اپنے پروردگار کی نافرمانی نہیں کرتا ہے، وہ اپنی ذات کو قوت پہنچاتا ہے، وہ شکر کو مکمل کرتا ہے کہ اپنے اعضا کے ذریعے نیکیوں کا ارتکاب کرتا ہے۔ اس کی وجہ یہ ہے: روزہ دار اس کے ساتھ صبر کے حوالے سے مل جاتا ہے، کیونکہ وہ ممنوعہ چیزوں سے صبر کرتا ہے۔ اسی طرح اسے شکر کرنے والے کے ساتھ ملایا گیا ہے۔ تو اب یہ بات لازم ہے کہ یہ شکر جسے اس صبر کے مقابلے میں رکھا گیا ہے، یہ وہ ہو جو اس کے قریب ہو یا اس کے ساتھ مناسبت رکھتا ہو اور یہ ممنوعہ چیزوں کا ترک کرنا ہے جیسا کہ ہم پہلے ذکر کر چکے ہیں۔ [صحیح ابن حبان/كتاب البر والإحسان/حدیث: 315]

سیدنا ابوموسیٰ اشعری رضی اللہ عنہ بیان کرتے ہیں کہ سیدنا عثمان بن مظعون رضی اللہ عنہ کی اہلیہ نبی اکرم صلی اللہ علیہ وسلم کی ازواج کی خدمت میں حاضر ہوئیں، تو ان ازواج نے دیکھا کہ ان کی ظاہری حالت ٹھیک نہیں ہے، تو ازواج نے دریافت کیا: ”تمہیں کیا ہوا ہے؟ قریش میں تمہارے شوہر سے زیادہ خوشحال اور کوئی شخص نہیں ہے“، تو اس خاتون نے جواب دیا: ”ہمارا ان کے ساتھ کوئی واسطہ نہیں ہے؛ وہ دن کے وقت روزہ رکھ لیتے ہیں اور رات کے وقت نفل پڑھتے رہتے ہیں“۔ سیدنا ابوموسیٰ رضی اللہ عنہ بیان کرتے ہیں کہ نبی اکرم صلی اللہ علیہ وسلم گھر تشریف لائے، تو ازواجِ مطہرات نے نبی اکرم صلی اللہ علیہ وسلم کے سامنے اس بات کا تذکرہ کیا، پھر نبی اکرم صلی اللہ علیہ وسلم کی ملاقات سیدنا عثمان بن مظعون رضی اللہ عنہ سے ہوئی، تو آپ صلی اللہ علیہ وسلم نے فرمایا: ”اے عثمان! کیا تمہارے لیے میرے طریقے میں نمونہ نہیں ہے؟“ انہوں نے دریافت کیا: ”کیا ہوا؟ یا رسول اللہ! میرے ماں باپ آپ پر قربان ہوں“۔ نبی اکرم صلی اللہ علیہ وسلم نے فرمایا: ”تم رات بھر نفل پڑھتے رہتے ہو، اور دن کے وقت نفلی روزہ رکھ لیتے ہو؟ تمہاری بیوی کا بھی تم پر حق ہے، تمہارے جسم کا بھی تم پر حق ہے؛ تم (رات کے وقت) نفل نماز پڑھ بھی لیا کرو اور سو بھی جایا کرو اور دن کے وقت نفل روزہ رکھ بھی لیا کرو اور نہ بھی رکھا کرو“۔ راوی بیان کرتے ہیں کہ اس کے بعد ان کی اہلیہ ازواجِ مطہرات کے پاس آئیں، تو انہوں نے عطر لگایا ہوا تھا یوں جیسے وہ دلہن ہوں؛ ازواجِ مطہرات نے ان سے کہا: ”کیا ہوا؟“ تو انہوں نے بتایا: ”ہمیں بھی وہی چیز ملی ہے، جو لوگوں کو ملی ہے“۔ [صحیح ابن حبان/كتاب البر والإحسان/حدیث: 316]

سیدنا انس بن مالک رضی اللہ عنہ بیان کرتے ہیں کہ تین آدمی نبی اکرم صلی اللہ علیہ وسلم کی ازواج کے گھر آئے تاکہ نبی اکرم صلی اللہ علیہ وسلم کی عبادت کے بارے میں دریافت کریں، جب انہیں اس بارے میں بتایا گیا تو انہوں نے اسے کم سمجھا اور کہا: ہمارا نبی اکرم صلی اللہ علیہ وسلم سے کیا واسطہ؟ نبی اکرم صلی اللہ علیہ وسلم کے تو گزشتہ اور آئندہ ذنب کی مغفرت ہو چکی ہے۔ تو ان میں سے ایک شخص نے کہا: میں ہمیشہ رات بھر نوافل ادا کرتا رہوں گا۔ دوسرے نے کہا: میں ہمیشہ نفلی روزے رکھتا رہوں گا اور کبھی روزہ افطار نہیں کروں گا۔ تیسرے نے کہا: میں خواتین سے علیحدگی اختیار کروں گا اور کبھی شادی نہیں کروں گا۔ نبی اکرم صلی اللہ علیہ وسلم تشریف لے آئے اور آپ کو یہ باتیں بتائی گئیں تو آپ صلی اللہ علیہ وسلم نے ارشاد فرمایا: ”کیا تم لوگوں نے یہ بات کہی ہے؟ خدا کی قسم! میں تم سب کے مقابلے میں اللہ تعالیٰ سے سب سے زیادہ ڈرنے والا ہوں اور اس کا سب سے زیادہ تقویٰ رکھنے والا ہوں۔ لیکن میں نفلی روزے رکھ بھی لیتا ہوں اور ترک بھی کر دیتا ہوں، میں نوافل ادا بھی کرتا ہوں اور سو بھی جاتا ہوں اور میں نے خواتین کے ساتھ شادی بھی کی ہے۔ تو جو شخص میری سنت سے منہ موڑے گا اس کا مجھ سے کوئی تعلق نہیں ہے۔“ [صحیح ابن حبان/كتاب البر والإحسان/حدیث: 317]

سیدنا عبداللہ بن عمرو رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا تاکہ آپ سے جہاد میں شرکت کی اجازت مانگے، نبی اکرم صلی اللہ علیہ وسلم نے دریافت کیا: ”کیا تمہارے ماں باپ زندہ ہیں؟“ اس نے جواب دیا: جی ہاں، نبی اکرم صلی اللہ علیہ وسلم نے فرمایا: ”تم ان دونوں کی اچھی طرح خدمت کرو۔“ [صحیح ابن حبان/كتاب البر والإحسان/حدیث: 318]

سیدنا انس رضی اللہ عنہ بیان کرتے ہیں کہ (ایک مرتبہ) نبی اکرم صلی اللہ علیہ وسلم کو تکلیف کا سامنا کرنا پڑا، اگلے دن صبح آپ کی خدمت میں عرض کی گئی: یا رسول اللہ! آپ پر تکلیف کے آثار واضح ہیں۔ نبی اکرم صلی اللہ علیہ وسلم نے فرمایا: ”میری وہ صورتحال ہے، جو تم دیکھ رہے ہو، (اس حالت میں) میں نے گزشتہ رات (نوافل میں) سات لمبی سورتوں کی تلاوت کی تھی۔“ [صحیح ابن حبان/كتاب البر والإحسان/حدیث: 319]

عون بن ابوجحیفہ اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم نے سیدنا سلمان فارسی اور سیدنا ابودرداء رضی اللہ عنہما کے درمیان بھائی چارہ قائم کر دیا۔ ایک دن سیدنا سلمان فارسی رضی اللہ عنہ، سیدنا ابودرداء رضی اللہ عنہ سے ملنے کے لیے آئے، تو سیدہ ام درداء رضی اللہ عنہا کو بکھرے ہوئے حلیے میں دیکھا تو دریافت کیا: آپ کو کیا ہوا ہے؟ انہوں نے جواب دیا: آپ کے بھائی کو دنیا کی کوئی ضرورت نہیں ہے۔ جب سیدنا ابودرداء رضی اللہ عنہ آئے، تو انہوں نے سیدنا سلمان رضی اللہ عنہ کو خوش آمدید کہا اور ان کے سامنے کھانا رکھ دیا، تو سیدنا سلمان رضی اللہ عنہ نے کہا: آپ کھائیے۔ سیدنا ابودرداء رضی اللہ عنہ نے جواب دیا: ہم نے تو روزہ رکھا ہوا ہے۔ سیدنا سلمان رضی اللہ عنہ نے کہا: میں آپ کو قسم دیتا ہوں کہ آپ کھائیں، کیونکہ میں بھی اس وقت تک نہیں کھاؤں گا، جب تک آپ نہیں کھائیں گے۔ راوی بیان کرتے ہیں کہ سیدنا ابودرداء رضی اللہ عنہ نے ان کے ساتھ کھانا کھا لیا، پھر وہ رات کو ان کے پاس ہی ٹھہر گئے، جب رات کا وقت ہوا تو سیدنا ابودرداء رضی اللہ عنہ اٹھ کر نوافل ادا کرنے لگے، تو سیدنا سلمان رضی اللہ عنہ نے انہیں روک دیا، انہوں نے فرمایا: اے ابودرداء! تمہارے پروردگار کا بھی تم پر حق ہے، تمہاری بیوی کا بھی تم پر حق ہے، تمہارے جسم کا بھی تم پر حق ہے، تم ہر حق دار کو اس کا حق دو، تم نفلی روزہ رکھو اور چھوڑ بھی دیا کرو، تم نوافل ادا کیا بھی کرو اور سو بھی جایا کرو اور تم اپنی بیوی کے پاس بھی جایا کرو۔ جب صبح صادق کا وقت قریب آیا، تو سیدنا سلمان رضی اللہ عنہ نے کہا: اب آپ اٹھ جائیں، پھر یہ دونوں حضرات اٹھ کھڑے ہوئے، ان دونوں نے نوافل ادا کیے اور نماز ادا کرنے کے لیے چلے گئے۔ جب نبی اکرم صلی اللہ علیہ وسلم نے نماز ادا کی تو سیدنا ابودرداء رضی اللہ عنہ آپ کی خدمت میں حاضر ہوئے اور آپ کو سیدنا سلمان رضی اللہ عنہ کی بات کے بارے میں بتایا تو نبی اکرم صلی اللہ علیہ وسلم نے ان سے وہی بات کہی جو سیدنا سلمان رضی اللہ عنہ نے کہی تھی۔ [صحیح ابن حبان/كتاب البر والإحسان/حدیث: 320]