سیدہ اسماء بنت ابوبکر رضی اللہ عنہما بیان کرتی ہیں کہ وہ جب کوئی چیز خرچ کرتی تھیں تو اس کی گنتی کیا کرتی تھیں۔ نبی اکرم صلی اللہ علیہ وسلم نے ارشاد فرمایا: ”تم گنتی کیے بغیر خرچ کیا کرو، ورنہ اللہ تعالیٰ بھی تمہیں گن کر عطا کرے گا اور تم (رقم کی تھیلی کا) منہ بند نہ رکھا کرو، ورنہ اللہ تعالیٰ بھی تمہیں دیتے ہوئے (رقم کی تھیلی کا) منہ بند کر لے گا۔“ [صحیح ابن حبان/كتاب الزكاة/حدیث: 3209]

سیدنا عمرو بن العاص رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے عمرو! سب سے اچھا مال وہ نیک مال ہے، جو نیک آدمی کے پاس ہو۔“ (امام ابن حبان رحمہ اللہ فرماتے ہیں:) علی بن رباح نامی راوی نے یہ روایت عمرو بن العاص رضی اللہ عنہ سے سنی ہے اور انہوں نے یہ روایت ابوقیس کے حوالے سے سیدنا عمرو رضی اللہ عنہ سے سنی ہے، اس کے دونوں طرق محفوظ ہیں۔ [صحیح ابن حبان/كتاب الزكاة/حدیث: 3210]

سیدنا عمرو بن العاص رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے عمرو! تم اپنے ہتھیار اور کپڑوں کو اپنے اوپر باندھ لو۔“ راوی کہتے ہیں: میں نے ایسا ہی کیا، پھر میں آپ صلی اللہ علیہ وسلم کی خدمت میں حاضر ہوا، تو میں نے آپ صلی اللہ علیہ وسلم کو وضو کرتے ہوئے پایا۔ آپ صلی اللہ علیہ وسلم نے اپنا سرِ مبارک اٹھایا اور میرا نیچے سے لے کر اوپر تک جائزہ لیا، پھر آپ صلی اللہ علیہ وسلم نے ارشاد فرمایا: ”اے عمرو! میں تمہیں ایک مہم پر روانہ کرنا چاہتا ہوں، اللہ تعالیٰ تمہیں سلامت رکھے اور تمہیں مالِ غنیمت عطا فرمائے اور میں تمہیں مالِ غنیمت میں سے حصہ بھی دوں گا۔“ راوی کہتے ہیں: میں نے عرض کی: یا رسول اللہ صلی اللہ علیہ وسلم ! میں نے مال کی دلچسپی کی خاطر اسلام قبول نہیں کیا، میں نے تو جہاد میں حصہ لینے کے لیے اور آپ صلی اللہ علیہ وسلم کے ہمراہ رہنے کے لیے اسلام قبول کیا ہے۔ نبی اکرم صلی اللہ علیہ وسلم نے ارشاد فرمایا: ”اے عمرو! «نِعِمَّا بِالْمَالِ الصَّالِحِ لِلرَّجُلِ الصَّالِحِ» ”وہ مال بہت اچھا ہے، جو پاک ہو اور نیک آدمی کے پاس ہو۔““ [صحیح ابن حبان/كتاب الزكاة/حدیث: 3211]

سیدہ عائشہ صدیقہ رضی اللہ عنہا بیان کرتی ہیں کہ جس بیماری کے دوران نبی اکرم صلی اللہ علیہ وسلم کا وصال ہوا اس میں آپ صلی اللہ علیہ وسلم نے ارشاد فرمایا: ”اے عائشہ! اس سونے کا کیا ہوا؟“ سیدہ عائشہ رضی اللہ عنہا کہتی ہیں میں نے عرض کی: وہ میرے پاس ہے۔ نبی اکرم صلی اللہ علیہ وسلم نے فرمایا: ”اسے میرے پاس لے کر آؤ۔“ وہ سات یا پانچ (اوقیہ) تھا، میں اسے لے کر آئی، میں نے اسے نبی اکرم صلی اللہ علیہ وسلم کی ہتھیلی پر رکھا، پھر آپ صلی اللہ علیہ وسلم نے ارشاد فرمایا: ”محمد کا اللہ تعالیٰ کے بارے میں کیا گمان ہو گا اگر وہ ایسی حالت میں اللہ تعالیٰ کی بارگاہ میں حاضر ہو کہ یہ (سونا) اس کے پاس ہو؟ تم اسے خرچ کر دو۔“ [صحیح ابن حبان/كتاب الزكاة/حدیث: 3212]

ابوامامہ بن سہل بیان کرتے ہیں کہ میں اور عروہ بن زبیر سیدہ عائشہ رضی اللہ عنہا کی خدمت میں حاضر ہوئے، انہوں نے فرمایا: کاش تم اس دن اللہ کے نبی صلی اللہ علیہ وسلم کو دیکھتے جب آپ صلی اللہ علیہ وسلم بیمار تھے، اس وقت نبی اکرم صلی اللہ علیہ وسلم کے چھ یا شاید سات دینار میرے پاس موجود تھے۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے مجھے ہدایت کی کہ میں انہیں خرچ کر دوں، لیکن نبی اکرم صلی اللہ علیہ وسلم کی بیماری کی وجہ سے میں ایسا نہ کر سکی، یہاں تک کہ اللہ تعالیٰ نے آپ صلی اللہ علیہ وسلم کی طبیعت بہتر فرمائی۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ان کے بارے میں مجھ سے دریافت فرمایا، تو میں نے عرض کی: جی نہیں، اللہ کی قسم! آپ صلی اللہ علیہ وسلم کی بیماری کی وجہ سے میں انہیں خرچ نہیں کر سکی۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے انہیں منگوایا اور انہیں اپنی ہتھیلی پر رکھا، پھر آپ صلی اللہ علیہ وسلم نے ارشاد فرمایا: ”اللہ کے نبی کا کیا گمان ہو گا اگر وہ ایسی حالت میں اللہ کی بارگاہ میں حاضر ہو کہ یہ اس کے پاس ہوں؟“ [صحیح ابن حبان/كتاب الزكاة/حدیث: 3213]

سیدنا ابوہریرہ رضی اللہ عنہ بیان کرتے ہیں: میں نے سیدنا ابوالقاسم صلی اللہ علیہ وسلم کو یہ بات ارشاد فرماتے ہوئے سنا ہے: ”مجھے یہ بات پسند نہیں ہے کہ میرے پاس احد پہاڑ جتنا سونا ہو اور پھر تین دن گزرنے کے بعد ان میں سے ایک دینار بھی میرے پاس ہو، ماسوائے اس کے جسے میں نے قرض کی ادائیگی کے لیے سنبھال کر رکھا ہو۔“ [صحیح ابن حبان/كتاب الزكاة/حدیث: 3214]

سیدہ عائشہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”بے شک دنیا سر سبز اور میٹھی ہے، ہم اس میں سے جو چیز اپنی خوشی کے ساتھ اور لینے والے کے لالچ کے بغیر اسے دیں جس میں اس کے نفس کی برائی نہ ہو، تو اس چیز میں اس شخص کے لیے برکت رکھی جائے گی اور جسے ہم اپنی خوشی کے بغیر اسے دیں اور اس میں اس کا لالچ بھی شامل ہو، تو اس کے لیے اس میں برکت نہیں ہو گی۔“ [صحیح ابن حبان/كتاب الزكاة/حدیث: 3215]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب تم اپنے مال کی زکوۃ ادا کر دو، تو تم نے اپنے ذمے لازم فرض کو ادا کر دیا اور جو شخص حرام طور پر مال کو جمع کرتا ہے اور پھر اسے صدقہ کرتا ہے، اسے اس کا اجر نہیں ملتا، البتہ اس کا وبال اس کے ذمے ہوتا ہے۔“ [صحیح ابن حبان/كتاب الزكاة/حدیث: 3216]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”(دنیا میں آنے کے حساب سے) ہم آخر والے ہیں، لیکن قیامت کے دن پہلے والے ہوں گے، (دنیا میں مال و دولت کے اعتبار سے) کثرت والے لوگ (آخرت میں اجر و ثواب کے اعتبار سے) کم حیثیت کے مالک ہوں گے، ماسوائے اس شخص کے جو اپنے دائیں طرف، اپنے بائیں طرف، اپنے پیچھے اور اپنے آگے اس طرح اور اس طرح کہے اور اپنے کپڑے کو پھیلائے (یعنی اللہ کی راہ میں اپنا مال خرچ کرے)۔“ [صحیح ابن حبان/كتاب الزكاة/حدیث: 3217]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”دینار کا بندہ، درہم کا بندہ، چادر کا بندہ اور قمیص کا بندہ برباد ہو جائے کہ اگر اسے کچھ دیا جائے تو وہ راضی رہتا ہے اور اگر نہ دیا جائے تو وہ ناراض ہو جاتا ہے۔“ [صحیح ابن حبان/كتاب الزكاة/حدیث: 3218]