سیدنا عبداللہ بن عباس رضی اللہ عنہما بیان کرتے ہیں کہ بریرہ رضی اللہ عنہا کا شوہر ایک غلام تھا، اس کا نام مغیث تھا، یہ منظر آج بھی میری نگاہ میں ہے کہ وہ ان کے پیچھے روتا ہوا جا رہا تھا اور اس کے آنسو اس کی داڑھی پر بہہ رہے تھے، تو نبی اکرم صلی اللہ علیہ وسلم نے سیدنا عباس رضی اللہ عنہ سے فرمایا: ”اے عباس! کیا آپ کو حیرانگی نہیں ہو رہی کہ مغیث بریرہ سے کتنی محبت کرتا ہے اور بریرہ مغیث کو کتنا ناپسند کرتی ہے؟“ نبی اکرم صلی اللہ علیہ وسلم نے اس خاتون سے فرمایا: ”اگر تم اس سے رجوع کر لو (تو یہ مناسب ہو گا) کیونکہ یہ تمہاری اولاد کا باپ ہے۔“ اس خاتون نے عرض کی: یا رسول اللہ صلی اللہ علیہ وسلم ! کیا آپ مجھے اس بارے میں حکم دے رہے ہیں؟ نبی اکرم صلی اللہ علیہ وسلم نے فرمایا: ”میں صرف سفارش کر رہا ہوں۔“ تو اس خاتون نے کہا: مجھے اس کے ساتھ رہنے کی کوئی ضرورت نہیں ہے۔ [صحیح ابن حبان/كتاب الطلاق/حدیث: 4273]

عبداللہ بن علی اپنے والد کے حوالے سے اپنے دادا کا یہ بیان نقل کرتے ہیں: انہوں نے اپنی اہلیہ کو طلاقِ بتہ دے دی، وہ نبی اکرم صلی اللہ علیہ وسلم کی خدمت میں حاضر ہوئے۔ نبی اکرم صلی اللہ علیہ وسلم نے دریافت کیا: ”تم نے اس کے ذریعے کیا مراد لی تھی؟“ انہوں نے جواب دیا: ”ایک (طلاق)۔“ نبی اکرم صلی اللہ علیہ وسلم نے دریافت کیا: ”کیا اللہ کی قسم! (ایسا ہی ہے)؟“ انہوں نے جواب دیا: ”اللہ کی قسم! (ایسا ہی ہے)۔“ نبی اکرم صلی اللہ علیہ وسلم نے فرمایا: ”یہ اس کے مطابق شمار ہو گی جو تم نے ارادہ کیا تھا۔“ (امام ابن حبان رحمہ اللہ فرماتے ہیں:) زبیر بن سعید نامی راوی زبیر بن سعید بن سلیمان بن نوفل بن حارث بن عبدالمطلب ہیں، ان کی والدہ حمادہ بنت یعقوب بن سعید بن نوفل بن حارث بن عبدالمطلب ہیں، ان کا انتقال خلیفہ ابوجعفر کے عہدِ خلافت میں ہوا تھا۔ [صحیح ابن حبان/كتاب الطلاق/حدیث: 4274]

سیدنا عبداللہ بن عباس رضی اللہ عنہما سیدنا عمر بن خطاب رضی اللہ عنہ کے حوالے سے یہ بات نقل کرتے ہیں: نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دے دی تھی، پھر آپ صلی اللہ علیہ وسلم نے ان سے رجوع کر لیا تھا۔ [صحیح ابن حبان/كتاب الطلاق/حدیث: 4275]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ سیدہ حفصہ رضی اللہ عنہا کے پاس تشریف لے گئے، وہ رو رہی تھیں، سیدنا عمر رضی اللہ عنہ نے دریافت کیا: تم کیوں رو رہی ہو؟ شاید نبی اکرم صلی اللہ علیہ وسلم نے تمہیں طلاق دے دی ہے، اگر نبی اکرم صلی اللہ علیہ وسلم نے تمہیں طلاق دے بھی دی ہے تو میری وجہ سے وہ تم سے رجوع کر لیں گے۔ اللہ کی قسم! اگر نبی اکرم صلی اللہ علیہ وسلم تمہیں طلاق دے دیں (یعنی ایسی طلاق جس میں رجوع کی گنجائش نہ ہو) تو میں تمہارے ساتھ کبھی بات نہ کرتا۔ [صحیح ابن حبان/كتاب الطلاق/حدیث: 4276]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے اپنی ازواج کے ساتھ ایلاء کر لیا، آپ صلی اللہ علیہ وسلم کی ٹانگ پر بھی چوٹ آئی ہوئی تھی، تو نبی اکرم صلی اللہ علیہ وسلم انتیس دن تک بالاخانے میں مقیم رہے، پھر آپ صلی اللہ علیہ وسلم اس سے نیچے اترے، لوگوں نے عرض کی: یا رسول اللہ صلی اللہ علیہ وسلم ! آپ نے ایک ماہ کے لیے ایلاء کیا تھا، تو نبی اکرم صلی اللہ علیہ وسلم نے فرمایا: ”مہینہ (کبھی) انتیس دن کا بھی ہوتا ہے۔“ [صحیح ابن حبان/كتاب الطلاق/حدیث: 4277]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اپنی ازواج کے ساتھ ایلاء کر لیا، آپ صلی اللہ علیہ وسلم نے حرام کو حلال کیا (یعنی اس سے رجوع کر لیا) اور قسم کا کفارہ ادا کیا۔ [صحیح ابن حبان/كتاب الطلاق/حدیث: 4278]

سیدہ خویلہ بنت ثعلبہ رضی اللہ عنہا بیان کرتی ہیں: اللہ کی قسم! اللہ تعالیٰ نے میرے اور (میرے شوہر) اوس بن صامت رضی اللہ عنہما کے بارے میں سورہ مجادلہ کی ابتدائی آیات نازل کی تھیں۔ وہ خاتون بیان کرتی ہیں: میں ان کی بیوی تھی، وہ ایک بڑی عمر کے بزرگ آدمی تھے جن کے اخلاق اچھے نہیں تھے، وہ ڈانٹ ڈپٹ کیا کرتے تھے۔ وہ خاتون بیان کرتی ہیں: ایک دن وہ میرے ہاں تشریف لائے، میں نے (لڑائی کے دوران) کسی بات کا جواب دیا تو وہ غصے میں آ گئے اور بولے: تم میرے لیے میری ماں کی پشت کی طرح (قابل احترام) ہو۔ پھر وہ گھر سے باہر چلے گئے، وہ اپنی قوم کی چوپال میں کچھ دیر بیٹھے رہے، پھر میرے ہاں تشریف لائے، وہ میری قربت حاصل کرنا چاہتے تھے۔ وہ خاتون بیان کرتی ہیں: میں نے کہا: ہرگز نہیں! اس ذات کی قسم جس کے دستِ قدرت میں خویلہ کی جان ہے، آپ جو بات کہہ چکے ہیں اس کی وجہ سے اب آپ میرے پاس اس وقت تک نہیں آ سکتے جب تک اللہ اور اس کا رسول صلی اللہ علیہ وسلم اس بارے میں کوئی فیصلہ نہیں دے دیتے۔ وہ خاتون بیان کرتی ہیں: انہوں نے مجھ پر حملہ کر دیا، میں نے ان سے بچنے کی کوشش کی، وہ خاتون ان پر اتنا غالب آ گئی جتنی کوئی عورت ایک بوڑھے عمر رسیدہ شخص پر غالب آ سکتی ہے، میں نے انہیں اپنے نیچے کر لیا، پھر میں اپنی پڑوسن کے گھر آ گئی، میں نے اس سے چادر عارضی استعمال کے لیے لی، پھر میں وہاں سے نکلی، یہاں تک کہ نبی اکرم صلی اللہ علیہ وسلم کی خدمت میں حاضر ہوئی، میں آپ صلی اللہ علیہ وسلم کے سامنے بیٹھ گئی، میں نے آپ صلی اللہ علیہ وسلم کے سامنے ساری صورتِ حال کا ذکر کیا اور میں نے آپ صلی اللہ علیہ وسلم کے سامنے اس بات کی بھی شکایت کی کہ مجھے ان کی طرف سے برے اخلاق کا سامنا کرنا پڑتا ہے۔ وہ خاتون بیان کرتی ہیں: نبی اکرم صلی اللہ علیہ وسلم نے ارشاد فرمایا: ”اے خویلہ! تمہارے چچازاد بوڑھے عمر رسیدہ شخص ہیں، تم ان کے بارے میں اللہ تعالیٰ سے ڈرو۔“ وہ خاتون عرض کرتی ہیں: اللہ کی قسم! میں ابھی وہیں تھی، یہاں تک کہ قرآن کا حکم نازل ہو گیا۔ نبی اکرم صلی اللہ علیہ وسلم کے اوپر وہ خاص کیفیت طاری ہوئی (جو وحی کے نزول کے وقت ہوتی تھی)، پھر جب آپ صلی اللہ علیہ وسلم کی یہ کیفیت ختم ہوئی تو آپ صلی اللہ علیہ وسلم نے ارشاد فرمایا: ”اے خویلہ! اللہ تعالیٰ نے تمہارے اور تمہارے شوہر کے بارے میں حکم نازل کر دیا ہے۔“ وہ خاتون بیان کرتی ہیں: پھر نبی اکرم صلی اللہ علیہ وسلم نے میرے سامنے یہ آیت تلاوت فرمائی: ﴿قَدْ سَمِعَ اللَّهُ قَوْلَ الَّتِي تُجَادِلُكَ فِي زَوْجِهَا وَتَشْتَكِي إِلَى اللَّهِ وَاللَّهُ يَسْمَعُ تَحَاوُرَكُمَا إِنَّ اللَّهَ سَمِيعٌ بَصِيرٌ﴾ [سورة المجادلة: 1] ”اللہ تعالیٰ نے اس عورت کی بات کو سن لیا ہے جو اپنے شوہر کے بارے میں تمہارے ساتھ بحث کر رہی تھی اور وہ اللہ تعالیٰ کی بارگاہ میں شکایت کر رہی تھی۔“ یہ آیت یہاں تک ہے ﴿وَلِلْكَافِرِينَ عَذَابٌ أَلِيمٌ﴾ [سورة المجادلة: 4] ”کافروں کے لیے درد ناک عذاب ہے۔“ نبی اکرم صلی اللہ علیہ وسلم نے فرمایا: ”تم اسے (یعنی اپنے شوہر کو) کہو کہ وہ کوئی گردن آزاد کرے۔“ وہ خاتون بیان کرتی ہیں: میں نے عرض کی: یا رسول اللہ صلی اللہ علیہ وسلم ! ان کے پاس کوئی ایسی چیز نہیں ہے جسے وہ آزاد کریں۔ نبی اکرم صلی اللہ علیہ وسلم نے فرمایا: ”پھر وہ مسلسل دو ماہ کے روزے رکھے۔“ وہ خاتون بیان کرتی ہیں: میں نے عرض کی: اللہ کی قسم! یا رسول اللہ صلی اللہ علیہ وسلم ! وہ بوڑھے عمر رسیدہ شخص ہیں، ان میں روزہ رکھنے کی استطاعت نہیں ہے۔ نبی اکرم صلی اللہ علیہ وسلم نے ارشاد فرمایا: ”پھر وہ ساٹھ مسکینوں کو کھجوروں کا ایک «وَسْق» کھلائے۔“ میں نے عرض کی: اللہ کی قسم! یا رسول اللہ صلی اللہ علیہ وسلم ! ان کے پاس یہ بھی نہیں ہے۔ وہ خاتون بیان کرتی ہیں: تو نبی اکرم صلی اللہ علیہ وسلم نے ارشاد فرمایا: ”ہم کھجوروں کے ایک «عَرَق» کے ذریعے اس کی مدد کریں گے۔“ وہ خاتون بیان کرتی ہیں: میں نے عرض کی: یا رسول اللہ صلی اللہ علیہ وسلم ! میں ایک اور «عَرَق» کے ذریعے ان کی مدد کر دوں گی۔ نبی اکرم صلی اللہ علیہ وسلم نے فرمایا: ”تم نے ٹھیک کیا ہے اور تم نے اچھا کیا ہے، تم جاؤ اور ان کی طرف سے صدقہ کر دو اور اپنے چچازاد کے بارے میں بھلائی کی تلقین کو قبول کرو۔“ تو وہ خاتون کہتی ہیں، تو میں نے ایسا ہی کیا۔ [صحیح ابن حبان/كتاب الطلاق/حدیث: 4279]

سیدہ حبیبہ بنت سہل انصاریہ رضی اللہ عنہا بیان کرتی ہیں کہ وہ سیدنا ثابت بن قیس بن شماس رضی اللہ عنہ کی اہلیہ تھیں، نبی اکرم صلی اللہ علیہ وسلم صبح کی نماز کے لیے گھر سے نکلے تو انہوں نے اندھیرے میں حبیبہ بنت سہل کو اپنے دروازے پر موجود پایا، نبی اکرم صلی اللہ علیہ وسلم نے فرمایا: ”تمہیں کیا ہوا ہے؟“ اس خاتون نے جواب دیا: میرا اور ثابت بن قیس کا گزارا نہیں ہو سکتا، یعنی اس نے اپنے شوہر کے بارے میں یہ بات کہی۔ جب ثابت رضی اللہ عنہ آئے، تو نبی اکرم صلی اللہ علیہ وسلم نے فرمایا: ”یہ حبیبہ بنت سہل ہے، اس نے جو اللہ کو منظور تھا وہ ذکر کیا ہے۔“ تو سیدہ حبیبہ رضی اللہ عنہا نے عرض کی: یا رسول اللہ صلی اللہ علیہ وسلم ! انہوں نے جو بھی (مہر کے طور پر) دیا تھا وہ میرے پاس ہے۔ نبی اکرم صلی اللہ علیہ وسلم نے سیدنا ثابت بن قیس رضی اللہ عنہ سے فرمایا: ”وہ تم اس سے لے لو۔“ تو وہ انہوں نے اس سے لے لیا اور وہ خاتون اپنے میکے واپس چلی گئیں۔ [صحیح ابن حبان/كتاب الطلاق/حدیث: 4280]

سیدنا عبداللہ رضی اللہ عنہ بیان کرتے ہیں کہ ایک رات ہم نبی اکرم صلی اللہ علیہ وسلم کے ہمراہ مدینہ منورہ کی مسجد میں موجود تھے، ایک صاحب نے عرض کی: آپ لوگوں کی کیا رائے ہے اگر کوئی شخص اپنی بیوی کے ساتھ کسی اور شخص کو پاتا ہے تو اگر وہ اس دوسرے شخص کو قتل کر دیتا ہے تو آپ لوگ اسے قتل کر دیں گے اور اگر وہ خاموش رہتا ہے تو وہ ناراضگی کے عالم میں خاموش رہے گا (یا ایسی بات پر خاموش رہے گا جس پر غصہ کیا جانا چاہیے)، اللہ کی قسم! میں اس بارے میں نبی اکرم صلی اللہ علیہ وسلم سے ضرور دریافت کروں گا۔ اگلے دن وہ نبی اکرم صلی اللہ علیہ وسلم کی خدمت میں حاضر ہوئے اور نبی اکرم صلی اللہ علیہ وسلم سے اس بارے میں دریافت کیا، انہوں نے کہا: اگر کوئی شخص اپنی بیوی کے ساتھ کسی اور شخص کو پاتا ہے اور اسے مار دیتا ہے تو آپ لوگ قتل کر دیں گے، اگر وہ یہ الزام عائد کرتا ہے تو آپ لوگ اسے کوڑے لگائیں گے اور اگر وہ خاموش رہتا ہے تو ایسی بات پر خاموش رہتا ہے جس پر غصہ کرنا چاہیے۔ پھر نبی اکرم صلی اللہ علیہ وسلم نے (یا اس شخص نے) دعا کی «اللَّهُمَّ انْزِلْ فَرَجًا» ”اے اللہ! تو کشادگی عطا کر“ تو یہ آیت نازل ہوئی: ﴿وَالَّذِينَ يَرْمُونَ أَزْوَاجَهُمْ﴾ [سورة النور: 6] ”اور وہ لوگ جو اپنی بیویوں پر الزام عائد کرتے ہیں“۔ یہ آیات لعان کے بارے میں ہیں۔ پھر وہ شخص اور اس کی بیوی نبی اکرم صلی اللہ علیہ وسلم کی خدمت میں حاضر ہوئے، ان دونوں نے لعان کیا، اس مرد نے چار مرتبہ اللہ کے نام کی قسم اٹھا کر یہ گواہی دی کہ وہ سچا ہے اور پانچویں مرتبہ یہ کہا: اس پر اللہ کی لعنت ہو اگر وہ جھوٹا ہو۔ پھر اس عورت نے لعان کرنا چاہا تو نبی اکرم صلی اللہ علیہ وسلم نے اس سے فرمایا: ”ٹھہر جاؤ“ لیکن اس عورت نے لعان کیا۔ جب وہ چلی گئی تو نبی اکرم صلی اللہ علیہ وسلم نے فرمایا: ”ہو سکتا ہے یہ عورت سیاہ رنگ کے گھنگھریالے بالوں والے بچے کو جنم دے“۔ (راوی کہتے ہیں) تو اس عورت کے ہاں سیاہ رنگ کے گھنگھریالے بالوں والے بچے کی پیدائش ہوئی۔ اسحاق نامی راوی کہتے ہیں: یحییٰ بن معین رحمہ اللہ نے یہ بات بیان کی ہے، میں نے جریر رحمہ اللہ سے کہا: آپ کے علاوہ اور کسی نے یہ روایت اعمش رحمہ اللہ کے حوالے سے نقل نہیں کی ہے، تو جریر رحمہ اللہ نے کہا: میں نے تو ان سے یہ روایت سنی ہوئی ہے۔ [صحیح ابن حبان/كتاب الطلاق/حدیث: 4281]

سیدنا ابوہریرہ رضی اللہ عنہ بیان کرتے ہیں: سیدنا سعد بن عبادہ رضی اللہ عنہ نے نبی اکرم صلی اللہ علیہ وسلم کی خدمت میں عرض کی: یا رسول اللہ صلی اللہ علیہ وسلم ! آپ کی کیا رائے ہے، اگر میں اپنی بیوی کے ساتھ کسی اور شخص کو پاتا ہوں تو کیا میں اس شخص کو مہلت دوں گا تاکہ پہلے چار گواہ لے آؤں؟ نبی اکرم صلی اللہ علیہ وسلم نے فرمایا: ”جی ہاں۔“ [صحیح ابن حبان/كتاب الطلاق/حدیث: 4282]