سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے سوال کیا گیا کہ کون سے لوگ بہتر ہیں؟ تو نبی اکرم صلی اللہ علیہ وسلم نے فرمایا: ”میرے زمانے کے، پھر اس کے بعد والے، پھر اس کے بعد والے، پھر وہ لوگ آئیں گے کہ ان میں سے کسی کی گواہی قسم سے پہلے ہو گی اور قسم گواہی سے پہلے ہو گی (یعنی وہ جھوٹی قسمیں اٹھائیں گے اور جھوٹی گواہیاں دیں گے)۔“ [صحیح ابن حبان/كتاب الأيمان/حدیث: 4328]

سیدنا انس رضی اللہ عنہ بیان کرتے ہیں کہ ایک دن نبی اکرم صلی اللہ علیہ وسلم کے سامنے کچھ بچے، کنیزیں اور انصار کے غلام آئے تو نبی اکرم صلی اللہ علیہ وسلم نے ارشاد فرمایا: ”اللہ کی قسم! میں تم لوگوں سے محبت کرتا ہوں۔“ [صحیح ابن حبان/كتاب الأيمان/حدیث: 4329]

سیدنا مستورد بن شداد رضی اللہ عنہ جو بنو فہر سے تعلق رکھتے ہیں بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ کی قسم! آخرت کے مقابلے میں دنیا کی مثال بالکل اس طرح ہے جیسے کوئی شخص اپنی انگلی کو دریا میں ڈالے اور پھر اس بات کا جائزہ لے کہ وہ کس چیز کے ہمراہ واپس آئی ہے۔“ [صحیح ابن حبان/كتاب الأيمان/حدیث: 4330]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے مجھ سے فرمایا: ”یہ بات مجھ سے پوشیدہ نہیں رہتی جب تم مجھ سے ناراض ہوتی ہو اور جب تم مجھ سے راضی ہوتی ہو، جب تم ناراض ہوتی ہو تو یہ کہتی ہو سیدنا ابراہیم علیہ السلام کے پروردگار کی قسم اور جب تم راضی ہوتی ہو تو یہ کہتی ہو سیدنا محمد صلی اللہ علیہ وسلم کے پروردگار کی قسم۔“ تو میں نے کہا: آپ نے سچ کہا ہے لیکن میں تو صرف آپ کا نام لینا ترک کرتی ہوں۔ سیدہ عائشہ رضی اللہ عنہا بیان کرتی ہیں کہ میں نے عرض کی: یا رسول اللہ صلی اللہ علیہ وسلم ! اس بارے میں آپ صلی اللہ علیہ وسلم کی کیا رائے ہے؟ آپ صلی اللہ علیہ وسلم کسی ایسی وادی میں پڑاؤ کرتے ہیں جہاں بہت سے درخت ہوتے ہیں جن سے کھایا گیا ہوتا ہے اور وہاں آپ صلی اللہ علیہ وسلم کو ایک ایسا درخت ملتا ہے جس میں سے کچھ بھی نہ کھایا گیا ہو تو آپ صلی اللہ علیہ وسلم اپنے اونٹ کو کہاں چرائیں گے؟ نبی اکرم صلی اللہ علیہ وسلم نے فرمایا: ”اس درخت کے پاس جس میں سے کچھ نہ کھایا گیا ہو۔“ سیدہ عائشہ رضی اللہ عنہا کی مراد یہ تھی کہ نبی اکرم صلی اللہ علیہ وسلم نے ان کے علاوہ اور کسی کنواری خاتون کے ساتھ شادی نہیں کی تھی۔ [صحیح ابن حبان/كتاب الأيمان/حدیث: 4331]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم جب قسم اٹھاتے تھے تو یہ الفاظ استعمال کرتے تھے: «وَمُقَلِّبِ الْقُلُوبِ» ”دلوں کو پھیرنے والی ذات کی قسم۔“ [صحیح ابن حبان/كتاب الأيمان/حدیث: 4332]

ابراہیم صائغ بیان کرتے ہیں: میں نے عطاء سے لغو قسم کے بارے میں دریافت کیا، تو انہوں نے بتایا کہ سیدہ عائشہ رضی اللہ عنہا نے یہ بات بیان کی ہے کہ اللہ کے رسول صلی اللہ علیہ وسلم نے یہ بات ارشاد فرمائی ہے: ”اس سے مراد آدمی کا یہ کہنا ہے: ہرگز نہیں اللہ کی قسم! جی ہاں اللہ کی قسم۔“ [صحیح ابن حبان/كتاب الأيمان/حدیث: 4333]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک اللہ نے میری امت کی ہر اس چیز سے درگزر کیا ہے جو ان کے ذہن میں خیال آتا ہے جب تک وہ اس بارے میں کوئی بات نہ کریں یا اس پر عمل نہ کریں۔“ [صحیح ابن حبان/كتاب الأيمان/حدیث: 4334]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ نے میری امت کی ان چیزوں سے درگزر فرمایا ہے جو ان کے ذہن میں خیالات آتے ہیں، جب تک وہ اس بارے میں بات نہیں کرتے یا ان پر عمل نہیں کرتے۔“ [صحیح ابن حبان/كتاب الأيمان/حدیث: 4335]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”سیدنا عیسیٰ بن مریم علیہ السلام نے ایک شخص کو دیکھا کہ اس نے چوری کی، سیدنا عیسیٰ علیہ السلام نے دریافت کیا: کیا تم نے چوری کی ہے؟ اس نے جواب دیا: جی نہیں، اس ذات کی قسم «لَا إِلَٰهَ إِلَّا هُوَ» ”جس کے علاوہ اور کوئی معبود نہیں ہے“ (میں نے چوری نہیں کی ہے) تو سیدنا عیسیٰ علیہ السلام نے کہا: میں اللہ تعالیٰ پر ایمان رکھتا ہوں اور میں اپنی آنکھوں کو غلط قرار دیتا ہوں۔“ [صحیح ابن حبان/كتاب الأيمان/حدیث: 4336]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا سلیمان بن داؤد علیہما السلام نے یہ قسم اٹھائی کہ وہ اپنی ایک سو بیویوں کے پاس تشریف لے جائیں گے اور ان میں سے ہر ایک عورت ایسے لڑکے کو جنم دے گی جو اللہ کی راہ میں جہاد کرے گا۔“ نبی اکرم صلی اللہ علیہ وسلم فرماتے ہیں: ”تو ان میں سے صرف ایک خاتون نے نامکمل بچے کو جنم دیا۔“ نبی اکرم صلی اللہ علیہ وسلم ارشاد فرماتے ہیں: ”اگر وہ اس وقت «إِنْ شَاءَ اللّٰهُ» ”اگر اللہ نے چاہا“ کہہ دیتے تو اسی طرح ہونا تھا جس طرح انہوں نے بیان کیا تھا۔“ [صحیح ابن حبان/كتاب الأيمان/حدیث: 4337]